ဗိုလ်ချုပ်မှူးကြီးသန်းရွှေကို
ကြည့်လိုက်လျှင် အမြဲတမ်း မျက်နှာထား သုန်မှုန်နေတတ်ပြီး ဘာတစ်ခုမှ
အလိုမကျသည့်အသွင် ဖြစ်နေတတ်သည်။ စစ်အစိုးရများထဲတွင် ဟောင်ဖွာဟောင်ဖွာ
ပြုလုပ်မှု အနည်းဆုံး ပုဂ္ဂိုလ်လည်းဖြစ်သည်။ သူ့ရှေ့က
ဗိုလ်ချုပ်ကြီးစောမောင်သည်ပင် ရောက်ရာအရပ်တွင် စာအုပ်တွေထောင်ပြီး
သူမည်မျှသိကြောင်း ထုတ်ဖော်ကြွားဝါ ပြောဆိုတတ်သည်။ သို့သော်
ဗိုလ်ချုပ်မှူးကြီးကား ဘယ်နေရာမှ စကားမပြော၊ တပ်မတော်နေ့လိုမျိုးတွင်ပင်
မဖြစ်မနေ စာတက်ဖတ်လိုက်သည်သာ များသည်။ သူ စစ်အစိုးရခေါင်းဆောင် အဖြစ်
တာဝန်ယူနေရချိန်တွင် ဒေါ်အောင်ဆန်းစုကြည်မှာ သူ့အတွက် ဆူးငြောင့်ခလုတ်တစ်ခု
ဖြစ်နေရသလို စိတ်ပျက်စရာ ဖြစ်နေရသည်။ ဒေါ်အောင်ဆန်းစုကြည်ကား
တစ်နိုင်ငံလုံးက လေးစားကြည်ညို ချစ်ခင်ရသည့် အမျိုးသားခေါင်းဆောင်ကြီး
ဗိုလ်ချုပ်အောင်ဆန်း၏ သမီး၊ ထို့ပြင် စစ်အစိုးရနှင့် ဆန့်ကျင်ဘက်
ဒီမိုကရေစီ ဘက်တော်သား။ ပိုဆိုးသည်က အမျိုးသမီး ဖြစ်နေခြင်း။
အာဏာရ၊ နေရာရလာပြီးနောက် ရုပ်မြင်သံကြားများထဲတွင် မကြာခဏ
ဗိုလ်ချုပ်ကြီးများကို တွေ့မြင်လာကြရသည်။ သတင်းလာလျှင် သူတို့
တိုင်းခန်းလှည့်လည်မှုများ၊ အခမ်းအနားတက်မှုများ၊ ဖွင့်ပွဲများကို
ဖွင့်ပေးခြင်းများ အားလုံး သူတို့ကို မတွေ့ချင်၊ မမြင်ချင်မှအဆုံး ဖြစ်သည်။
တစ်ရက်တွင် ထူးခြားစွာ ဗိုလ်ချုပ်မှူးကြီးကို အမျိုးသမီးများသာ
ဝတ်ဆင်လေ့ရှိသည့် ချိတ်ထဘီကြီး ဝတ်လျက်သား အခမ်းအနားတစ်ခုတွင်
တွေ့လိုက်ကြရသည်။ ထိုနေ့ကား ၂၀၁၁ ခုနှစ် ဖေဖော်ဝါရီလ ၁၂ ရက်နေ့
နေပြည်တော်တွင် ကျင်းပသော ပြည်ထောင်စုနေ့ ညစာစားပွဲ အခမ်းအနား ဖြစ်သည်။
သူနှင့်အတူ အခြားသော ဗိုလ်ချုပ်များ အားလုံးလိုလိုလည်း ချိတ်ထဘီတွေ
ကိုယ်စီနှင့် ဖြစ်နေသည်။
“သူတို့ ဘယ်လိုသဘောနဲ့ ချိတ်ထဘီတွေ
ဝတ်လာကြသလဲတော့ မပြောတတ်ဘူး။ ဒါပေမဲ့ သူတို့ကိုကြည့်ရတာ အတော်လေး
ထူးဆန်းနေတာတော့ အမှန်ပဲ” ဟု ရန်ကုန်မြို့တွင် နေထိုင်သော စက်ပြင်ဆရာတစ်ဦး
ဖြစ်သည့် မြင့်ဦးက ပြောသည်။
မြန်မာနိုင်ငံတွင် အမျိုးသားရော
အမျိုးသမီးများပါ ပိုးထည်များ ဝတ်သည်ဆိုသော်လည်း ယောက်ျား မိန်းမ ဒီဇိုင်း
အဆင်ခွဲခြား ဝတ်ဆင်ကြသည်က များသည်။ ယောက်ျားများ ဝတ်လျှင် ပုဆိုးဟုခေါ်ပြီး၊
ပုဆိုးဆင်က သီးခြားဖြစ်သည်။ အမျိုးသမီးများ ဝတ်လျှင် ချိတ်ထဘီဟု ခေါ်ကြသည်။
ထိုနေ့က ဗိုလ်ချုပ်များ ဝတ်ဆင်လာသည့် ပုံစံများမှာ လုံချည်ပုံစံမဟုတ်
ချိတ်ထဘီအဆင်များ ဖြစ်နေသည်။
မြန်မာနိုင်ငံ၏ နောက်ဆုံးမင်းဆက်
သီပေါမင်းသည် ဗြိတိသျှတို့ထံတွင် ၁၈၈၆ ခုနှစ်၌ နန်းစွန့်ခဲ့ရသည်။ ထိုခေတ်က
ဘုရင်များသာ ချိတ်ထဘီ အဆင်များကို ဝတ်ဆင်လေ့ ရှိကြသည်။ သို့သော်
ခေတ်သစ်အာဏာရှင် စစ်ဗိုလ်ချုပ်များအားလုံး ချိတ်ထဘီတွေ
ကိုယ်စီဖြစ်နေခြင်းကို တီဗီကြည့်နေသူ အားလုံးက သဘောပေါက်လိုက်သည်မှာ
ယတြာချေနေခြင်းသာ ဖြစ်မည်ဟု ယူဆကြသည်။ အမည်မဖော်လိုသူ ဗေဒင်ဆရာ တစ်ဦးကလည်း
ထိုနေ့သည် ကိန်းခန်းဗေဒင် ဓာတ်သဘောအရ ဓာတ်ရိုက်ဓာတ်ဆင်ရန် အကောင်းဆုံး
နေ့တစ်နေ့ ဖြစ်နေကြောင်း သိရသည်။
မြန်မာနိုင်ငံသည် လွန်ခဲ့သော
ရာစုနှစ်ဝက် တစ်ခုအတွင်း အုပ်စိုးသူ မင်းသုံးဆက် ပြောင်းသွားခဲ့ရသည်။
ထိုမင်းဆက် အာဏာရှင် သုံးဦးစလုံးသည် ဗေဒင်ယတြာများကို ယုံကြည်ကိုးစား
အားထားကြသူများ ဖြစ်ခဲ့သည်။ ဗိုလ်ချုပ်နေဝင်းက ၁၉၆၂ ခုနှစ်မှ ၁၉၈၈
ခုနှစ်အထိ အုပ်စိုးသွားခဲ့သည်။ သူလည်း ယတြာသဘောအရ သူ့ပုံကို
မှန်ထဲတွင်ကြည့်ပြီး မှန်ကို သေနတ်ဖြင့် ပစ်ခတ်ကာ ယတြာချေခဲ့သူ ဖြစ်သည်။
သူကိုးကွယ်သည့် နတ်ဆရာက သူ့ကို လုပ်ကြံမည့်သူ ရှိသည်ဟု ပြောသဖြင့်
ကိုယ့်ကိုယ်ကိုယ် မှန်ထဲတွင် လုပ်ကြံလိုက်ခြင်း ဖြစ်သည်။ ထို့ပြင် ၉
ဂဏန်းကို အဆောင်သဘောဖြင့် ၁၉၈၇ ခုနှစ်တွင် အသစ်ထုတ်ခဲ့သော ပိုက်ဆံများကို ၉
ဖြင့် စားလျှင်ပြတ်သည့် ကိန်းဂဏန်းများဖြင့် ခွတီးခွကျ ထုတ်ခဲ့သည်။ ၄၅
ကျပ်တန်၊ ၉၀ တန်များဖြစ်သည်။ သို့သော် သူ့ယတြာမစွမ်းဟု ဆိုရမည်။
နောက်တစ်နှစ်တွင် တိုင်းပြည်ပျက်ပြီး သူလည်း ရာထူးက ဆင်းပေးလိုက်ရသည်။
သူ့နေရာကို အာဏာသိမ်းပြီး ဆက်ခံသူမှာ ဗိုလ်ချုပ်ကြီးစောမောင် ဖြစ်သည်။
သူလည်း ဘယ်နေရာ ရောက်ရောက်၊ ဘာပြောပြော ဗေဒင်နှင့် နတ်ဆရာတွေ
အကြံအစည်အတိုင်း ခင်းကျင်းပြင်ဆင် ပြောဆိုလုပ်ကိုင်တတ်သည်။
ဗိုလ်ချုပ်ကြီးစောမောင်နောက် ဆက်ခံသည့် ဗိုလ်ချုပ်ကြီးသန်းရွှေကား ဗေဒင်ဆရာ၊
နတ်ဆရာပေါင်း ခုနစ်ဦးခန့် ရှိသည်။ သူတို့အားလုံး၏ အဓိကပစ်မှတ်သည်
ဒေါ်အောင်ဆန်းစုကြည် ဖြစ်သည်။
ဗေဒင်ဆရာ၊ နတ်ဆရာ၊ အောက်လမ်းဆရာများ
အားလုံးသည် အရှေ့တောင်အာရှတွင် အလွန်ရေးပန်းစားသူများ ဖြစ်ကြသည်။
ပြည်ထောင်စုနေ့ ညစာစားပွဲတွင် ဗိုလ်ချုပ်မှူးကြီးသန်းရွှေနှင့်
အပေါင်းအပါများကို ချိတ်ထဘီများဖြင့် ပြည်သူတွေ တွေ့ရှိလိုက်ကြရသော်လည်း
အင်တာနက် Webpage ပေါ်တွင် ထိုပုံများကို မတင်ကြောင်း တွေ့ရသည်။
ထိုအကြောင်းနှင့် ပတ်သက်ပြီး ဝစ်ကိုဆင်တက္ကသိုလ်မှ မြန်မာ့ရေးရာ
အထူးကျွမ်းကျင်သူ မနုဿဗေဒ ပညာရှင် အင်းဂရစ်ဂျော့က ယတြာချေသည်ကို
လူသိမခံလိုသောကြောင့် အင်တာနက်ပေါ်သို့ ပုံများ မတင်ခြင်း ဖြစ်မည်ဟု
သုံးသပ်သည်။
ယင်းသို့ ဗိုလ်ချုပ်များ ချိတ်ထဘီဝတ်ခြင်းနှင့်
ပတ်သက်ပြီး ပြည်တွင်းမီဒီယာမှ ပုဂ္ဂိုလ်တစ်ဦးကလည်း သူ၏ ထင်မြင်ချက်ကို
အချက်နှစ်ချက်ဖြင့် သုံးသပ်ပြသည်။ ပထမအချက်မှာ မြန်မာနိုင်ငံကို
မိန်းမတက်ပြီ အုပ်ချုပ်သွားမည်ကို စိုးရိမ်သောကြောင့် မိန်းမအသွင်
ထဘီဝတ်ထားသော ဗိုလ်ချုပ်ကြီးများက ထိုနေ့ကို ယတြာချေသည့် အနေနှင့် တက်ပြီး
အုပ်ချုပ်လိုက်ခြင်း ဖြစ်သည်။ ဒုတိယအချက်မှာ ဗိုလ်ချုပ်အားလုံး
ထဘီဝတ်လိုက်ခြင်းကြောင့် ဒေါ်အောင်ဆန်းစုကြည်၏ အာဏာကို
လွှဲပြောင်းယူလိုက်သလို ဖြစ်သွားမည်ဟု အခါပေးသည့်အတိုင်း လိုက်လုပ်ကြခြင်း
ဖြစ်သည်။
၂၀၀၇ ခုနှစ်တွင် ရွှေဝါရောင်တော်လှန်ရေး
ပေါ်ပေါက်လာခဲ့သည်။ ထိုတော်လှန်ရေးသည် လက်ရှိ စိုးမိုးအုပ်ချုပ်နေသည့်
စစ်အစိုးရအပေါ် သံဃာတော်များက ဆန့်ကျင်သည့် လှုပ်ရှားမှုလည်း ဖြစ်သည်။
ထိုဆန့်ကျင်ပွဲတွင် ပြည်သူတွေကလည်း အစိုးရထံ အမျိုးသမီးအတွင်းခံများ
ပို့ရန် ဆော်သြကြသည်။ အဘယ်ကြောင့်ဆိုသော် အမျိုးသမီးအဝတ်ကို
နိုင်ငံခေါင်းဆောင်ကြီးများက မြတ်နိုးတန်ဖိုးထားသောကြောင့် ဖြစ်ကြောင်း
အများက သတ်မှတ်ကြသည်။ သို့သော် ဗိုလ်ချုပ်မှူးကြီးသန်းရွှေသည် သူ့ရပ်တည်ချက်
ခိုင်မြဲနိုင်ရေးအတွက် အောက်လမ်းနည်းများ သုံးပြီး လုပ်ရမည် ဆိုလျှင်လည်း
ဝန်မလေးကြောင်း အားလုံး သိသွားခဲ့ကြသည်။
ယခုတင်ပြခဲ့သည့်
အမျိုးသမီး ချိတ်ထဘီဝတ် ဗိုလ်ချုပ်ကြီးများ အကြောင်းသည် ယုတ္တိဗေဒနည်းအရ
ခိုင်လုံခြင်းမရှိဟု ဆိုလျှင် အယူသီး အစွဲအလမ်းကြောင့် ထင်ရာလုပ်ခြင်းဟုသာ
ဆိုရပေလိမ့်မည်။ ဤကဲ့သို့ ထဘီဝတ်ပြီး ယတြာချေသော အမှုကိစ္စသည် ယခင်ကလည်း
ရှိခဲ့ဖူးသည်။ ယခင်ထောက်လှမ်းရေး အကြီးအကဲတစ်ဦးသည်လည်း
အမျိုးသမီးတစ်ဦးကဲ့သို့ ဝတ်ပြီး ဒေါ်အောင်ဆန်းစုကြည်ကို
တန်ပြန်တိုက်ခိုက်ခဲ့ဖူးသည်။ မည်သို့ဆိုစေ ပြည်သူများသည် တစ်ကြိမ်မဟုတ်၊
နှစ်ကြိမ်မဟုတ် ထဘီယတြာများကို မြင်လာရသည့်အခါတွင် အဘယ်ကြောင့်
စစ်အုပ်စုသည် ထိုသို့ လုပ်ဆောင်နေကြောင်းကို သဘောပေါက်စ ပြုလာကြသည်။
ထိုအကြောင်းနှင့် ပတ်သက်ပြီး စစ်ဗိုလ်ချုပ်ကြီးများသည် လေသံလည်းမဟ၊
အင်တာဗျူးလည်းမခံ အားလုံး နှုတ်ပိတ်ရေငုံနေကြသည်မှာ ဆိတ်ဆိတ်နေ ဝန်ခံရာ
ရောက်နေသလောဟုလည်း စဉ်းစားစရာ ဖြစ်သည်။
နောက်ဆုံးအကြိမ်
ဒေါ်အောင်ဆန်းစုကြည် နေအိမ်အကျယ်ချုပ်မှ လွတ်မြောက်ချိန်တွင်
စစ်ခေါင်းဆောင်များသည် တင်းမာစွာ ဆက်ဆံနေဆဲ ဖြစ်သည်။
ဒေါ်အောင်ဆန်းစုကြည်ကလည်း မြန်မာနိုင်ငံအပေါ် စီးပွားရေးပိတ်ဆို့မှုများ
ဆက်လုပ်ရန် အနောက်နိုင်ငံများကို ထပ်မံတိုက်တွန်းသည့် အခါတွင်
နိုင်ငံပိုင်သတင်းစာများက သူမနှင့် သူမ နောက်လိုက်များကို ကြေကွဲဖွယ်
နိဂုံးချုပ်ရလိမ့်မည်ဟု သတိပေး ရေးသားခဲ့ကြသည်။ သို့ဖြင့်၂၀၀၃ ခုနှစ်တွင်
ဒေါ်အောင်ဆန်းစုကြည်ကို စစ်အစိုးရ ပေးကျွေးထားသည့် အုပ်စုများက ဒီပဲယင်းတွင်
ဝိုင်းဝန်းတိုက်ခိုက်လိုက်ခြင်းမှာ စစ်အစိုးရသည် ပြောသည့်အတိုင်း
လုပ်တတ်ကြောင်း ပေါ်လွင်ထင်ရှားစေခဲ့သည်။
မြန်မာနိုင်ငံသည် ၂၀၁၀
ပြည့်နှစ် နိုဝင်ဘာလတွင် ရွေးကောက်ပွဲ ကျင်းပပေးခဲ့သည်။ စစ်ဖိနပ်အောက်
ရောက်နေသော ပြည်သူများအတွက် ဒီမိုကရေစီကို နဖူးတွေ့ဒူးတွေ့
ရင်ဆိုင်လိုက်ကြရခြင်း ဖြစ်သည်။ ဗိုလ်ချုပ်မှူးကြီးသန်းရွှေ
အုပ်ချုပ်သည့်ခေတ်သည် ဒီမိုကရေစီအသွင်ထက် အာဏာရှင်ပုံစံဖြင့်သာ
အုပ်ချုပ်သွားကြောင်း တွေ့ရှိရသည်။ သူ ချိတ်ထဘီ ဝတ်ခြင်းနှင့် ပတ်သက်ပြီး
အင်းဂရစ်ဂျော့က-
“ဗိုလ်ချုပ်မှူးကြီးသန်းရွှေသည် အမှန်တော့
နန်းကျဘုရင်၏ အသွင်ကို ယူထားခြင်းသာ ဖြစ်သည်။ အမှန်မှာ သူသည်
မြန်မာနိုင်ငံကို ဘုရင်စနစ်ဖြင့် မင်းတရားကြီးအသွင် အုပ်ချုပ်ချင်နေသူ
ဖြစ်သည်” ဟု ရေးသားခဲ့သည်။ ဘုရင်အသွင်နှင့် ထီးရိပ်နန်းရိပ်ကို အထင်ကြီး
လေးစားနေသောကြောင့်လည်း သူ့အိမ်တွင် ခေါ်ပြောနေကြသည်များမှာ
ထီးသုံးနန်းသုံးများ ဖြစ်သည်ဟုလည်း ဆိုကြသည်။
ပြည်ထောင်စုနေ့
ညစာစားပွဲတွင် မင်းတရားကြီး ယတြာအတိုင်း လိုက်ပြီး ချိတ်ထဘီ ဝတ်ကြသော
ဗိုလ်ချုပ်များသည် ထိုနေ့ကိစ္စနှင့် ပတ်သက်ပြီး နှုတ်ပိတ်ရေငုံ နေကြသည်။
အားလုံး အမိန့်မရဘဲနှင့်လည်း တစ်ညီတညွတ်တည်း ချိတ်ထဘီ ဝတ်ဆင်လာကြပြီး
အခမ်းအနားတက်ရန် ဆိုသည်မှာလည်း မဖြစ်နိုင်ပေ။ ထိုထဘီမျိုးသည် မည်သည့်
အမျိုးသားများထံတွင်မှ အဆင်သင့်ရှိနိုင်သော အရာမျိုးမဟုတ်ပေ။
တစ်နည်းကြည့်ရလျှင် ၂၀၀၄ ခုနှစ်က အရာကျသွားခဲ့ရသည့်
ဗိုလ်ချုပ်ကြီးခင်ညွန့်ကဲ့သို့ပင် သူတို့ခေါင်းဆောင်ကြီး၏
နောက်ဆုံးအချိန်ကို နှစ်သိမ့်ပေးသည့် အနေနှင့် အလိုလိုက်အကြိုက်ဆောင်
စစ်ဗိုလ်ချုပ်အားလုံး ထဘီလိုက်ဝတ်ခြင်းလည်း ဖြစ်နိုင်သည်။
ဗိုလ်ချုပ်မှူးကြီးသန်းရွှေသည် ယခင်ဘုရင် ဝင်စားသည့် မင်းတစ်ပါး
ဖြစ်သည်ဆိုဆို၊ ဘုရင်မကြီး တစ်ပါး ဝင်စားသည်ဟုပြောပြော နောက်ဆုံးအချိန်တွင်
ထဘီဝတ်ပြီး စွန့်လွှတ်ခဲ့ရသည်ကတော့ အမှန်သာ ဖြစ်ခဲ့သည်။
Ref : Why Did Burma's Leader Appear on TV in Women's Clothes?, By Robert Horn; Times; The Guardian.
အယ်ဒီတာတစ်ဦး
- See more at: http://www.thevoicemyanmar.com/index.php/society/item/4836-ykp#sthash.x7jrUHb3.dpuf
CREDIT
သတင်းစုံပျော်ဝင်အိုးကြီးတွင် ဖော်ပြထားသည့် သတင်း၊ဓာတ်ပုံများသည် သက်ဆိုင်သူများ၏မူပိုင်သာဖြစ်ကြောင်း အသိပေးအပ်ပါသည်။
Thursday, December 18, 2014
ယတြာချိတ်၏ နိမိတ်ပုံများ
Reviewed by သတင်းစုံပျော်ဝင်အိုးကြီး
on
December 18, 2014
Rating: 5
Subscribe to:
Post Comments (Atom)
No comments:
Post a Comment