စစ်ထောက်လှမ်းရေး အကြီးအကဲ ဗိုလ်ချုပ်ကြီးဟောင်း ဦးခင်ညွှန့်က ဇွန်လ၂၂ ရက်က မရမ်းကုန်းမြို့နယ် အ.ထ.က (၁) ကျောင်းတွင် ပြုလုပ်သော မူးယစ်ဆေးဝါး တိုက်ဖျက်ရေးအကြို လှုပ်ရှားမှု အခမ်းအနား၌ ဒီမိုကရက်တစ် မြန်မာ့အသံ (DVB) ၏ တွေဆုံမေးမြန်းမှုတွင် သတင်းမီဒီယာများ အနေဖြင့် နောက်ကြောင်းပြန်လှန်သည့် ဝေဖန်ရေးသား တင်ဆက်မှုများ မပြုလုပ်ကြရန် ပြောဆိုခဲ့သည်။
ထိုသို့ ပြောဆိုမှုများအပေါ် ဦးခင်ညွှန့် အာဏာရှိစဉ် အချိန်က နှစ်ရှည်ထောင်ဒဏ်များ ချခံခဲ့ရပြီး ပြန်လည်လွတ်မြောက် လာကြ သည့် နိုင်ငံရေးနယ်ပယ်က ခေါင်းဆောင်တချို့ကို ဧရာဝတီ သတင်းထောက် ကျော်ခက ဆက်သွယ် မေးမြန်းထားသည်။
ဗိုလ်ချုပ်ကြီးဟောင်း ဦးခင်ညွှန့်သည် ၁၉၈၈ မှ ၂၀၀၄ ခုနှစ်အတွင်း န၀တ၊ နအဖ စစ်အစိုးရ အဆက်ဆက်၌ အတွင်းရေးမှူး (၁)၊ ၀န်ကြီးချုပ်၊ တပ်မတော် စစ်ဘက်ဆိုင်ရာ အကြံပေး၊ တပ်မတော် ထောက်လှမ်းရေး အကြီးအကဲ စသည့် ထိပ်တန်း ရာထူးများကို တာဝန်ယူခဲ့သူ ဖြစ်ပြီး သူအာဏာရှိစဉ် အချိန်က နိုင်ငံရေး လှုပ်ရှားသူများကို ဖိနှိပ်ခဲ့သူလည်း ဖြစ်သည်။
သို့သော် ၂၀၀၄ ခုနှစ်တွင် ဗိုလ်ချုပ်မှူးကြီး သန်းရွှေ ဦးဆောင်သည့် အစိုးရ အဖွဲ့က ဦးခင်ညွှန့်အား အဂတိ လိုက်စားမှု၊ အာဏာ အလွဲသုံးစားလုပ်မှု စသည့် စွပ်စွဲချက်များဖြင့် ဆိုင်းငံ့ပြစ်ဒဏ် ထောင်ဒဏ် ၄၄ နှစ် နှင့် နေအိမ်အကျယ်ချုပ် ချမှတ်ခံခဲ့ရသည်။ သို့သော်လည်း ၂၀၁၂ ခုနှစ်တွင် သမ္မတ ဦးသိန်းစိန်၏ လွတ်ငြိမ်းချမ်းသာခွင့်ဖြင့် လွတ်မြောက်လာခဲ့သည်။
ကိုမြအေး
၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်း
ကိုမြအေး (ဓာတ်ပုံ- ဧရာဝတီ)
အထူးသဖြင့် သမိုင်းမှာ ဆိုးဆိုးဝါးဝါး ပြစ်မှုကြီးတွေ ကျုးလွန်ခဲ့သူတွေအနေနဲ့ ဒီလိုမျိုး ပြောပိုင်ခွင့်၊ ခိုင်းပိုင်ခွင့် မရှိပါဘူး။ တိုင်းပြည် အတွက် ကောင်းခဲ့တဲ့၊ ဆိုးခဲ့တဲ့ဟာတွေက ပြည်သူက မှတ်ကျောက် ဖြစ်ပါတယ်။ ဒါကိုရဲရဲတင်းတင်း ခံယူဖို့ပဲရှိတယ်လို့ ထင်ပါတယ်။
မြန်မာ့နည်း မြန်မာ့ဟန် ဆိုရှယ်လစ်ဆိုတဲ့ အတွက်ကြောင့် တိုင်းပြည် ဖုတ်ခါပြာခါ ကျပြီးတော့မှ ပြည်သူတွေရဲ့ လူမှုဘဝ အဘက် ဘက်က စိတ်ဓာတ်ရေးရာကအစ နိမ့်ကျတဲ့ အဆင့်ကို ရောက်ခဲ့ပြီးပါပြီ။ ဒီမိုကရေစီမှာ စံချိန်၊ စံညွှန်း၊ စံထားတွေက တပုံစံတည်းပဲ ရှိပါတယ်။ အဲဒါကို ခုနပြောသလိုမျိုး မြန်မာ့နည်း၊ မြန်မာ့ဟန် ဒီမိုကရေစီဆိုပြီး ထပ်ပြီးနောက်ထပ် ၂၆ နှစ်သွားခွင့် မပြုနိုင်ပါဘူး။
ရှေ့ကစကားနဲ့ ချိတ်ဆက်ပြီး ပြောရမယ်ဆိုလို့ရှိရင် သူဆိုလိုတဲ့ မြန်မာ့နည်း မြန်မာ့ဟန် ဒီမိုကရေစီဆိုတာ ငါတို့ ဘာလုပ်လုပ် မင်းတို့ကို လွတ်လပ်ခွင့် တစိတ်တပိုင်းဖြစ်တဲ့ အချိုအချဉ်လေး ကျွေးထားပြီးပြီပဲဆိုတဲ့ အခြေအနေမျိုးလောက်ကို ပြောတာပါ။
ကျနော်တို့ အနေနဲ့ကတော့ ဒါမျိုးကို လက်မခံနိုင်ပါဘူးဗျ။ နောက်တခုက မြန်မာနိုင်ငံ ဒီမိုကရေစီထဲကို ရောက်နေပြီဆိုတဲ့ဟာကို ကျနော် သဘောမတူပါဘူး။ အခုအခြေအနေက အသွင်ကူးပြောင်းရေး ကာလထဲကိုတောင် မရောက်သေးပါဘူး။ အခုအချိန်က နိုင်ငံရေး ဖြေလျှော့တဲ့ အဆင့်လို့ပဲ ကျနော်တို့က ယူဆထားပါတယ်။
ဦးခွန်ထွန်းဦး
ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD)
ဦးခွန်ထွန်းဦး (ဓာတ်ပုံ- ဧရာဝတီ)
သူက မြန်မာ့နည်း မြန်မာ့ဟန် ဒီမိုကရေစီစနစ်ဆိုတော့ ကျနော်တို့က သူပြောတဲ့ မြန်မာ့နည်း၊ မြန်မာ့ဟန် ဆိုရှယ်လစ်လည်း ကြုံပြီးပြီ။ မြန်မာ့နည်း၊ မြန်မာ့ဟန် ဒီမိုကရေစီလည်း အခုကြုံနေပြီလေ။ နောင်ဆိုလည်း မြန်မာ့နည်း၊ မြန်မာ့ဟန် ဖက်ဒရယ်ဆိုတာ လာဦးမှာပဲ။ ဒါတွေက မပြီးနိုင်ဘူး။
ဦးဝင်းထိန်
အမျိုးသား ဒီမိုကရေစီ အဖွဲ့ချုပ်(NLD)
ပထမအချက်က မီဒီယာတွေကို ဒီလိုပြောစရာ ဘာမှအကြောင်း မရှိဘူး။ ပြောစရာလည်း မလိုဘူး။ နောက်ကြောင်းပြန်လှန် မရေးနဲ့ ဆိုတာမျိုးက သူ့အကြောင်းတွေ ပေါ်မှာစိုးလို့နဲ့ တူပါတယ်။
ဦးဝင်းထိန် (ဓာတ်ပုံ- ဧရာဝတီ)
သူပြောတဲ့ ဒီမိုကရေစီ စနစ်ဆိုတဲ့ စကားလုံးက သူအာဏာရှိစဉ်တုန်းက ပြောတဲ့ စကားပဲလေ။ စည်းကမ်းပြည့်ဝသော ဒီမိုကရေစီဆိုတဲ့ ဟာမျိုးကို သူက အခုချိန်ထိ သံယောဇဉ် ရှိနေတုန်းနဲ့ တူပါတယ်။ စည်းကမ်းပြည့်ဝတဲ့ ဒီမိုကရေစီဆိုတာ သူတို့ ဗိုလ်ချုပ်မှူးကြီး သန်းရွှေတို့ ပြောခဲ့တဲ့ စကားလုံးတွေပေါ့။ ဒါတွေကို ပြန်ပြီး အစဖော်တာပေါ့လေ။ အဲဒီလိုပဲ သဘောပေါက်ပါတယ်။
မြန်မာ့ဆိုရှယ်လစ် လမ်းစဉ်ပါတီလိုပေါ့။ မြန်မာ့နည်း မြန်မာ့ဟန်လေ နောက်တော့ ပေါက်ကရတွေ ဖြစ်ကုန်တာပဲ။ အခုလည်း ဒီမိုကရေစီကို မြန်မာ့နည်း မြန်မာ့ဟန်နဲ့ လုပ်ရင်တော့ ပေါက်ကရတွေ ဖြစ်ကုန်မှာပဲ။ ဒီမိုကရေစီရဲ့ အဓိပ္ပာယ်ကို သူ (ဦးခင်ညွှန့်) ကောင်းကောင်း သိပုံမရသေးပါဘူး။
No comments:
Post a Comment