CREDIT
သတင်းစုံပျော်ဝင်အိုးကြီးတွင် ဖော်ပြထားသည့် သတင်း၊ဓာတ်ပုံများသည် သက်ဆိုင်သူများ၏မူပိုင်သာဖြစ်ကြောင်း အသိပေးအပ်ပါသည်။
Thursday, October 9, 2014
လိုင်လာခမ်းရဲ့ ပထမဆုံး ဗီလိန်ဇာတ်ရုပ်
သီဟတိုး| October 9, 2014 | Hits:2,320
| |
ဘောလိဝုဒ်, မြန်မာပြည်ဖွား, ရုပ်ရှင်, နည်းပညာ, မွေးရာပါ ဗီဇ, လိုင်လာခမ်း,
ဗီလိန်ဇာတ်ရုပ်
လိုင်လာခမ်း
ဒါရိုက်တာ မောင်မျိုးမင်း(ရင်တွင်းဖြစ်) ရိုက်ကူးထားပြီး သရုပ်ဆောင်
ပြေတီဦး၊ မိုးဟေကို တို့နဲ့ အတူ မြန်မာပြည်ဖွား ဘောလီဝုဒ် မင်းသမီး
လိုင်လာခမ်းတို့ သရုပ်ဆောင်ထားတဲ့ “တိုက်ဆိုင်မှုရှိလျှင်” ရုပ်ရှင်
ဇာတ်ကားကြီးကို သမ္မတ၊ သွင်၊ မင်္ဂလာ အစရှိတဲ့ ရုပ်ရှင်ရုံကြီးတွေမှာ
ပြသခဲ့ရာမှာ ပရိသတ်တွေရဲ့ အထူးစိတ်ဝင်စား အားပေးမှုကို ခံခဲ့ရပါတယ်။
ခါတိုင်း ရုံတင်ပြသနေကျ မြန်မာရုပ်ရှင် ဟာသဇာတ်ကားတွေနဲ့ ပုံစံကွဲပြီးတော့
အိမ်ထောင်ရေး ပညာပေး ရုပ်ရှင် ဇာတ်ကားကြီး ဖြစ်သလို မြန်မာပြည်ဖွား
ဘောလီဝုဒ်မင်းသမီး လိုင်လာခမ်း ပါဝင်သရုပ်ဆောင်ထား တာကြောင့်လည်း
ဒီဇာတ်ကားက ပရိသတ်ရဲ့ အာရုံကို ပိုပြီးဖမ်းစားနိုင်ခဲ့တာလို့ ယူဆရပါတယ်။
လိုင်လာခမ်းဟာ လက်ရှိမှာ ဘောလီဝုဒ် မင်းသမီး အဖြစ် လုပ်ကိုင်လာခဲ့တာ
အခုဆိုရင် ၆ နှစ် ကျော် ၇ နှစ် နီးပါး ရှိပါပြီ။ “တိုက်ဆိုင်မှုရှိလျှင်”
မြန်မာရုပ်ရှင် ဇာတ်ကားကြီးဟာ လိုင်လာခမ်းရဲ့ အနုပညာနဲ့ ပတ်သက်လို့ မြန်မာ
ပရိသတ်တွေ ပထမဆုံး စတင်ခံစားတွေ့မြင်ခဲ့ ရတဲ့ ဇာတ်ကား တကား ဖြစ်သလို
အဲဒီရုပ်ရှင်မှာတင် ပရိသတ်ရဲ့ လက်ခံ အားပေးမှုကို ရရှိခဲ့တာ ဖြစ်ပါတယ်။
ဒီဇာတ်ကားထဲမှာ ဇာတ်လမ်း အဆုံးထိ ပရိသတ်ရဲ့ အချစ်ကို နည်းနည်းမှ မယူပြခဲ့
ပေမယ့် ဇာတ်ကား တကားလုံးကို အဆုံးထိ ကြည့်ချင်အောင် သဘာဝကျ ပိုင်နိုင်တဲ့
သရုပ်ဆောင်ချက်တွေနဲ့ ပရိသတ်ကို ဆွဲဆောင်နိုင်ခဲ့တဲ့ ဘောလိဝုဒ်မင်းသမီး
လိုင်လာခမ်း (ခေါ်) စန္ဒာဝင်းကို ဧရာဝတီသတင်းထောက် သီဟတိုးက တွေ့ဆုံမေးမြန်း
ထားပါတယ်။
မေး။ ။ ပထမဆုံး လိုင်လာခမ်း ဘောလီဝုဒ် ကို ရောက်ခဲ့ပုံကို အကျဉ်းချုံး
ပြောပြပေးပါ။
ဖြေ။ ။ အကျဉ်းချုံး ပြောရရင်တော့ ပထမဆုံး ကျမ ဒူဘိုင်းမှာရှိတဲ့
ကြော်ငြာအေဂျင်စီ တခုမှာ General Manager အနေနဲ့ အလုပ်လုပ်ခဲ့တယ်။ အဲဒီမှာက
ကုလားကားတွေ ရုံတင်လို့ ရှိရင် အိန္ဒိယ ဒါရိုက်တာတွေ ကုလားကားတွေကို
ပရိုမိုးရှင်း လုပ်ဖို့၊ မားကက်တင်း လုပ်ဖို့ ဘောလီဝုဒ် တွေ
လာငှားတာပေါ့နော်။ သူတို့က ဒူဘိုင်းမှာလည်း လုပ်တယ်၊ တခြား နိုင်ငံတွေ US
တို့၊ ဥရောပ တို့မှာလည်း လုပ်တယ်ဆိုတော့ ဒူဘိုင်းက Billboard တွေကို ကျမက
တာဝန်ယူ ထားတဲ့ အပေါ်မှာ သူတို့နဲ့ အတူ အစည်းအဝေးတွေ လုပ်ဖြစ်တယ်။ အဲဒီမှာ
သူတို့က ကျမကို အရမ်းလှတယ်၊ ကြည့်ကောင်းတယ် ပေါ့နော်။ ဘာဖြစ်လို့ ဘောလီဝုဒ်
မှာ မင်းသမီးမလုပ်ဘဲနဲ့ General Manager လိုမျိုး အလုပ်ကို လုပ်နေလဲပေါ့။
အကယ်၍ အဆင်ပြေရင် လာခဲ့ပါ၊ Welcome လုပ်ပါတယ် ဆိုပြီးပြောတယ်။
အဲဒီကနေတဆင့် အိန္ဒိယကို သွားပြီး ကြိုစားလုပ်ပြီးတော့ ဘောလီဝုဒ် ကို
ရောက်သွားခဲ့တယ်။
မေး။ ။ ဘောလီဝုဒ် ကို ရောက်သွားခဲ့တာ ဘယ်တုန်းလောက်ကလဲ။
ဖြေ။ ။ လွန်ခဲ့တဲ့ ၇ နှစ်လောက်ကပါ။ မင်းသမီးဖြစ်တာ ၆ နှစ်လောက်ရှိပြီ
ဆိုတော့လေ။
မေး။ ။ အိန္ဒိယမှာ အနုပညာနဲ့ ပတ်သက်တဲ့ ကျောင်းတွေ ဘာတွေ တက်ခဲ့သေးလား။
ဖြေ။ ။ ဘာကျောင်းမှ မတက်ခဲ့ပါဘူး။ ဒီလို အနုပညာနဲ့ ပတ်သက်တာကို
ဘာကျောင်းမှ ဒီနေ့ထက်ထိ မတက်ခဲ့ဘူး။ ဒါပေမယ့် ကိုယ်က အနုပညာကို ရုပ်ရှင်တွေ
ကြည့်ပြီးတော့ပဲ လေ့လာတယ်။ ရုပ်ရှင်တွေ ကြည့်ပြီးတော့ပဲ ကိုယ့်ထက် တော်တဲ့
မင်းသား မင်းသမီးတွေ ဆီကနေ သင်ယူတယ်။ ဘယ်သူ့ဆီ ဘယ်ဒါရိုက်တာ
ဘယ်လိုကျောင်းမျိုးမှ မတက်ခဲ့ဘူး။ ဒါပေမယ့် ကိုယ်က ယုံကြည်ထားတာ အစကတည်းက
တခုရှိတယ်။ အနုပညာ ဆိုတာ သင်တန်းတက် လို့ ဘယ်လိုမှ မတတ်နိုင်ဘူး။ အနုပညာ
ဆိုတာ လူတယောက်ရဲ့ မွေးရာပါဗီဇ၊ မွေးရာပါ Talent တခုပေါ့။ အဲဒီတခုက
ရှိနေမယ် ဆိုရင် ဘယ်လို မဆို ဘာမှ မသင်ဘဲ နဲ့ အကောင်းဆုံး မင်းသား မင်းသမီး
ဖြစ်လာနိုင်တယ်။ အထဲမှာ တကယ့် Talent မရှိဘူး၊ အနုပညာနဲ့ ပတ်သက်တဲ့
အားသာချက် မရှိဘူးဆိုရင် ဘယ်လောက်ကြီးပဲ သင်ယူသင်ယူ အဆင်ပြေမှာ မဟုတ်ဘူး။
မေး။ ။ လိုင်လာခမ်းရဲ့ မိသားစုနဲ့လည်း မိတ်ဆက်ပေးပါဦး။
ဖြေ။ ။ ဟုတ်ကဲ့ပါ၊ ကျမရဲ့ဖေဖေက ဒေါက်တာနိုင်ဝင်းပါ။ ကျမရဲ့မေမေက
Housewife အိမ်ထောင်ရှင်မကောင်း တယောက်ပေါ့ နော်။ ပြီးတော့ ကျမ ပေါ့။
ဒါပါပဲ။ မိသားစုက နည်းပါတယ်။
မေး။ ။ လိုင်လာ့မှာ ကိုယ်ပိုင်မိသားစုရော ရှိပြီလား။
ဖြေ။ ။ မရှိဘူး ရှင့်။ (ရယ်လျက်)။ ကျမက အခုထိ Single ပါ။
မေး။ ။ လိုင်လာက အိန္ဒိယနိုင်ငံသား အဖြစ် ခံယူထား တာလား၊
မြန်မာနိုင်ငံသားပဲလား။
ဖြေ။ ။ မွေးကတည်းက မြန်မာနိုင်ငံသားပဲ။ သေလည်း မြန်မာနိုင်ငံသား
အဖြစ်နဲ့ပဲ သေမယ် (ရယ်လျက်)။ သူတို့ နိုင်ငံကတော့ ကမ်းလှမ်းပါတယ်။ ဒါပေမယ့်
Permanent Resident အဖြစ်ပဲ ခံယူထားတယ်။
မေး။ ။ လိုင်လာ့ကို ဘယ်မှာမွေးဖွားခဲ့တာလဲ။
ဖြေ။ ။ ဟုတ်ကဲ့ပါ။ လိုင်လာ့ကို မွေးခဲ့တာက ရန်ကုန်မှာပါ။ ရန်ကုန်
မီးယပ်နဲ့ သားဖွားဆေးရုံမှာ မွေးခဲ့တာ ဆိုတော့ ရန်ကုန်ဇာတိ ပေါ့။
ရန်ကုန်မှာပဲ မွေး၊ ရန်ကုန်မှာပဲ ကြီးခဲ့တာပါ။ ကျောင်းဆိုတာ ကလည်း အထက-၁
ဒဂုံမှာ ကျောင်းတက်ခဲ့တာပါ။
မေး။ ။ လိုင်လာ့ရဲ့ ငယ်ဘဝ အကြောင်းလေးကို ပြောပြပေးပါ။
ဖြေ။ ။ ငယ်ဘဝကတော့ အရမ်းကောင်းတယ်။ အထက-၁ ဒဂုံလိုမျိုး ကျောင်းမှာ
တက်ခွင့်ရခဲ့ပြီး ငယ်ငယ် ကတည်းက ဆရာ၊ ဆရာမတွေရဲ့ ချစ်ခင်ကြင်နာမှုကို
ရခဲ့တယ်။ ပြီးတော့ အဲဒီကနေ RC-2 မှာ ကျောင်းတက်ခဲ့တယ်။ အဲဒီတုန်းက
ကြည့်မြင်တိုင် ကောလိပ်တို့ RC-2 တို့ရှိတယ်လေ။ ကျမတို့ရဲ့ ငယ်စဉ် ဘဝကတော့
အရမ်းကို ပျော်ရွှင်စရာ ကောင်းခဲ့တယ်။
မေး။ ။ ငယ်ငယ်တုန်းက ဖြစ်ချင်ခဲ့တဲ့ အနာဂတ်အိပ်မက်က ဘာဖြစ်မလဲ။
ဖြေ။ ။ ကိုယ်က ငယ်ငယ်တုန်းက အရမ်း ဖြစ်ချင်ခဲ့တာတော့ စီးပွားရေးသမား
တယောက်ပဲ။ ကိုယ်က အမြဲတမ်း စီးပွားရေး သမားတွေကိုပဲ အားကျတယ်။
ပိုက်ဆံရှာရတာကို အားကျတယ်။ မင်းသား မင်းသမီးကိုတော့ ငယ်ငယ် ကတည်းက
ကြိုက်တယ်။ မင်းသား မင်းသမီးကို အရမ်းအားကျတယ်။ ဒါပေမယ့် ဘယ်တော့မှ ကိုယ်
မင်းသမီး တယောက် ဖြစ်လာလိမ့်မယ်လို့ မတွေးခဲ့ဘူး။ လုပ်ဖြစ်ဖို့လည်း တခါမှ
မရှိခဲ့ဘူး။ မစဉ်းစားမိခဲ့ဘူး။ ဒါကတော့ ကံကြမ္မာက လုပ်ယူသွားတာပါ။
မေး။ ။ ဘောလိဝုဒ်မှာ အနုပညာနဲ့ ပတ်သက်ပြီး ဘယ်လို ထူးချွန်ဆုတွေ
ရရှိထားလဲ။ ဇာတ်ကားတွေ ဘယ်နှစ်ကား ရိုက်ပြီးသွားပြီလဲ။
ဖြေ။ ။ ဟုတ်ကဲ့၊ ကျမ ဘောလိဝုဒ်မှာ ဇာတ်ကား ၇ ကား ရိုက်ပြီးပါပြီ။ ၄
ကားက ထုတ်လုပ်ပြီး ပြီ၊ ၃ ကားကတော့ ကိုယ်ရိုက်လက်စနဲ့ ပြီးသွားပြီ။
ရုံတင်ဖို့ စောင့်နေတာရယ် အဲဒါတွေ ရှိပါတယ်။ ဘောလိဝုဒ်မှာ ပထမဆုံးကားက
Light Hearted ဆိုတဲ့ ဟာသကားလေး ဖြစ်ခဲ့တယ်။ အဲဒီ ဇာတ်ကားမှာတော့ လူတွေရဲ့
ချစ်ခင်ကြင်နာမှုကို ငါးဆယ်ရာခိုင်နှုန်း လောက်ရတယ်။ ဘာလို့လဲ ဆိုတော့
ဘောလိဝုဒ်မှာက မင်းသားမင်းသမီးက မြန်မာပြည်လို အကန့်အသတ်နဲ့ မဟုတ်ဘူး။
အရမ်းများတယ်။ ဒါပေမယ့် ဒုတိယကား သရဲကားလေးမှာ ကျမ လူတွေရဲ့
ချစ်ခင်ကြင်နာမှုကို ၁၀ဝ ရာခိုင်နှုန်းလောက်ရ ခဲ့တယ်။ ပြီးတော့ ဆုအနေနဲ့ The
Best Fresh Face Award ဆိုတဲ့ အကောင်းဆုံးဆု ပေါ့။ နိုင်ငံခြားကနေ
လာပြီးတော့ အိန္ဒိယနိုင်ငံသား မဟုတ်ဘဲ အိန္ဒိယမှာ လာပြီး အောင်မြင်တဲ့သူကို
ပေးတဲ့ဆု၊ အဲဒီဆုတခုကို ရရှိခဲ့ပါတယ်။
မေး။ ။ ဇာတ်ကားတွေမှာကော ခေါင်းဆောင်မင်းသမီး အနေနဲ့ သရုပ်ဆောင်တာလား။
ဖြေ။ ။ ဟုတ်ကဲ့ပါ၊ အမြဲတမ်း ဘယ်ကားမဆို စခဲ့တဲ့ ကားကတည်းကနေ အခုနောက်ဆုံး
ရိုက်ထားတဲ့ ကားအထိ ခေါင်းဆောင်မင်းသမီးပဲ လုပ်ခဲ့တယ်။
ခေါင်းဆောင်မင်းသမီးမှာမှ တချို့ကားတွေဆို မင်းသမီး နှစ်လက်တို့၊
တချို့ကားတွေဆို Solo မင်းသမီး အဲဒီလိုမျိုးတွေ လုပ်ခဲ့ပါတယ်။
မေး။ ။ နာမည်ကြီး အောင်မြင်မှု ရရှိခဲ့တဲ့ ဇာတ်ကားတွေကိုလည်း
ပြောပြပေးပါဦး။
ဖြေ။ ။ အောင်မြင်မှု ရရှိခဲ့တဲ့ ဇာတ်ကားတွေ ဆိုရင် ပထမ
ဆုံးဇာတ်ကားကိုလည်း လူတွေ အရမ်းကြိုက် ခဲ့ပါတယ်။ ဟာသကား ပေမယ့် သူက
နည်းနည်းလေး လူငယ်ဆန်ဆန်လေးပေါ့ နော်၊ ဒရာမာ မရှိဘူးပေါ့။ ဒုတိယကားမှာတော့
သူက သရဲကားဖြစ်တယ်၊ အရမ်း Dramatic ဆန်တယ်။ တတိယကားမှာလည်း သူက စုံထောက်ကား
ဖြစ်တဲ့အတွက် Dramatic ဆန်တာလေးတွေ ပါတယ်။ နောက် အခုလက်ရှိ ရိုက်နေတဲ့
ကားတွေမှာလည်း အိုက်တင်ပိုင်းနဲ့ အရမ်း ဖိဖိစီးစီး ရိုက်ထားတဲ့ အပေါ်မှာ
လူတွေရဲ့ ချစ်ခင်ကြင်နာမှုကိုလည်း အရမ်းရတယ်၊ ကိုယ်ကိုယ်တိုင်လည်း အားရတယ်။
မေး။ ။ ဘောလီဝုဒ် ဇာတ်ကားတွေမှာကော ဗီလိန် အနေနဲ့ကော သရုပ်ဆောင်ခဲ့ဖူး
လား။
ဖြေ။ ။ မရှိဘူးရှင့်၊ တခါမှ မရှိပါဘူး။ တိုက်ဆိုင်မှုရှိလျှင်
ရုပ်ရှင်ဇာတ်ကားက ကျမရဲ့ ပထမဆုံး ဗီလိန်ပါ။
မေး။ ။ လိုင်လာခမ်းရဲ့ သရုပ်ဆောင်မှုအပေါ် ဘောလီဝုဒ်က ပရိသတ်ရဲ့
တုံ့ပြန်မှုနဲ့ မြန်မာပရိသတ်ရဲ့ တုံ့ပြန်မှု ဘာတွေ ကွာခြားလဲ။
ဖြေ။ ။ ပရိသတ်တွေရဲ့ တုံ့ပြန်မှုမှာက အကယ်၍ တူညီခဲ့ရင်တောင်မှ ကျမရဲ့
စိတ်ထဲမှာ ဖြစ်တဲ့ ကျေနပ်မှုက တခြားစီပဲ။ ဘောလိဝုဒ်မှာက သူများနိုင်ငံ
သူများမြေပေါ်မှာ ကိုယ်အောင်မြင်မှု ဘယ်လောက်ပဲရရ ကိုယ့်ရဲ့ အပေါင်းအသင်း
ပတ်ဝန်းကျင်မရှိတဲ့ အပေါ်မှာ ဒီလောက် ကျေနပ်မှု မရဘူး။ အခုက
ကိုယ့်ရဲ့မြန်မာပြည်မှာ ကိုယ့်ရဲ့ မြန်မာလူမျိုးတွေက ကိုယ့်ကို
ဒီလောက်ချစ်တယ်၊ ဒီလောက်လက်ခံတယ်၊ ဒီလောက် အားပေးတယ် ဆိုတာ သိရတော့၊
နောက်ပြီးတော့ ကိုယ်က ဒီလိုအားပေး ချစ်ခင်ကြင်နာမှုကို ကိုယ့်မိသားစုရဲ့
မျက်စိအရှေ့မှာ၊ ပြီးတော့ သူငယ်ချင်း အပေါင်းအသင်း ဆရာဆရာမတွေ၊ သူတို့ရဲ့
လက်ပေါ်မှာ ကိုယ်က ကြီးခဲ့တဲ့ ကိုယ်အမြဲ ရိုသေလေးစား ခဲ့ရတဲ့
အမေ့ရဲ့မိတ်ဆွေတွေ၊ အဒေါ်တွေ အဲဒီလိုလူတွေကြားထဲမှာ အောင်မြင်မှု ရခဲ့တော့ ဒီ
Feeling ကို အရမ်း ပိုပြီးတော့ မြတ်နိုးတယ်။ ပိုပြီးတော့ သဘောကျတယ်။
ပြီးတော့ ကိုယ့်မြန်မာတွေ ကိုယ့်ကို ဒီလောက်ထိ အားပေးတာ ကို
အရမ်းကျေနပ်တယ်၊ ဆိုတော့ ဒီ Feeling က အများကြီး ပိုသာပါတယ်။
မေး။ ။ ဒီ “တိုက်ဆိုင်မှု ရှိလျှင်” ဇာတ်ကားကို စပြီးရိုက်ကူးဖို့
လက်ခံဖြစ်ခဲ့ပုံကို ပြောပြပေးပါဦး။
ဖြေ။ ။ လက်ခံဖြစ်ခဲ့ပုံက ကျမ ဒီမှာ ဘောလီဝုဒ် မင်းသမီး
ဖြစ်ပြီးတဲ့နောက်မှာ မီဒီယာကွန်ဖရင့် တခု လုပ်ခဲ့တယ်။ အဲဒီမှာ ကျမက
မီဒီယာတွေကို ကျမရဲ့ ဇာတ်ကားနမူနာတွေ ပြခဲ့ပါတယ်။ အဲဒီမှာ အကုန်လာကြတဲ့
အခါမှာ ဒါရိုက်တာ ဦးမျိုးမင်း လည်းလာပြီးတော့ ကျမရဲ့ ဘောလီဝုဒ်
ဇာတ်ကားတွေကို ကြည့်ပြီး သဘောကျသွားတယ်။ ဦးမျိုးက အစ ကတည်းက သူ့မှာ အစီအစဉ်
ရှိတဲ့ အပေါ်မှာ ကျမကို ကမ်းလှမ်းလာတော့ ကိုယ်က လက်ခံလိုက်တဲ့
အကြောင်းရင်းက ဦးမျိုးရဲ့ Talent ကို အရမ်း ယုံကြည်တယ်၊ ဦးမျိုးတော်တယ်
ဆိုတာ သိတာတခုရယ်၊ နောက်တခုက ကိုယ့်မြန်မာပြည် က ပရိသတ်တွေနဲ့ ထိတွေ့မှု
ရှိချင်တယ်။ ကိုယ်က နိုင်ငံခြားမှာ ဇာတ်ကားတွေ ဘယ်လောက်ပဲ ရိုက်ရိုက် အဲဒီ
ကားတွေက မြန်မာပြည်မှာ ရုံမတင်တဲ့ အပေါ်မှာ ကိုယ့်မြန်မာတွေက ကိုယ့်ကို
မသိဘူး။ သိတဲ့သူတွေကလည်း ရှိပါတယ်။ ဒါပေမယ့် ထိတွေ့မှု မဖြစ်ဘူးပေါ့၊
တရင်းတနှီး မဖြစ်ဘူး။ အဲဒါလေးကို တရင်းတနှီး ဖြစ်သွားအောင်၊ ကိုယ့်ရဲ့
Talent ကို ကိုယ့်မြန်မာတွေ သိသွားအောင်၊ ဂုဏ်ယူအောင်၊ ပိုပြီးအားပေးအောင်
ဆိုပြီး လက်ခံဖြစ် သွားတာပါ။
မေး။ ။ ဒီဇာတ်ကားထဲမှာ လိုင်လာ့ဇာတ်ရုပ်က အရမ်းကို ဗီလိန်ဆန်တယ်
ဆိုတော့ ပရိသတ် မုန်းသွားမှာကို မစိုးရိမ်ဘူးလား။
ဖြေ။ ။ မမုန်းပါဘူး (ရယ်လျက်)။ ပရိသတ်က ပိုတောင် ချစ်သေးတယ်။ ကိုယ်က
ဘာဖြစ်လို့လဲ ဆိုတော့ ယုံကြည်တယ် လေ။ ကိုယ့်ပရိသတ်ကို ကိုယ်ယုံကြည်တယ်။
နောက် ကိုယ့်မြန်မာ လူမျိုးတွေက ပညာမရှိ၊ ဦးနှောက်မရှိတဲ့ လူမျိုးတွေမှ
မဟုတ်တာ။ ရုပ်ရှင်ဆိုတာ Entertainment ပဲလေ။ Entertainment အတွက် ဒါရိုက်တာ
ခိုင်းလို့ လုပ်ရတယ် ဆိုတာ အားလုံးသိတာပဲလေ။
မေး။ ။ ဒီဇာတ်ကားမှာ ကိုယ့်ကိုယ်ကိုယ် ကျေနပ်အားရမှု အရှိဆုံး
အကြိုက်ဆုံး ဇာတ်ဝင်ခန်းနဲ့ မကြိုက်ဆုံး ဇာတ်ဝင်ခန်း ရှိရင် ပြောပြပေးပါဦး။
ဖြေ။ ။ မကြိုက်ဆုံး ဇာတ်ဝင်ခန်း တခန်းမှမရှိဘူး။ အခန်းတိုင်းကို
အရမ်းကြိုက်တယ်၊ တကားလုံးကို အရမ်း ကြိုက်တယ်။ အားလုံးရဲ့အိုက်တင်ကို
အရမ်းကြိုက်တယ်၊ ဦးမျိုးရဲ့ Direction ကို အရမ်းကြိုက်တယ်။ ဒါပေမယ့်
ကိုယ့်အတွက်က အကောင်းဆုံး အခန်းတခန်းဆိုရင် နည်းနည်းလေး ပိုတာက Park Royal
Hotel အခန်းထဲမှာ ကိုယ်က စိတ်ဖောက်တယ်၊ အရမ်းကြောက်ပြီး ကိုပြေတီဦးကို
ဖုန်းဆက်ပြီး လာဖို့ခေါ်တယ်။ လာခဲ့ပါ၊ ကျမကို လူတွေသတ်တော့မယ် ဆိုပြီး
စိတ်ဖောက်တဲ့ အခန်းပေါ့နော်၊ အဲဒီအခန်းပေါ့။ ပြီးတော့ နောက်ဆုံး အခန်း၊
သော့လုတဲ့ အခန်း အဲဒီအခန်းမှာ ကိုယ်က Split Personality ပေါ့။
အရမ်းပူလောင်နေတယ်၊ ပြီးတော့ ချက်ချင်းကြီး ငြိမ်ကျ သွားပြီး
ကိုယ့်ကိုယ်ကိုယ် သတ်သေဖို့ စိတ်ဆုံးဖြတ်လိုက်တဲ့ အခါမှာ ရုပ်ကို
Expression တွေ ပြောင်းထည့် လိုက်တယ်။ အဲဒီ Scene ကို အရမ်းကြိုက်တယ်။
အဲဒီအခန်းကို ကိုယ့်ကိုယ်ကိုယ် အရမ်းအားရတယ်။
မေး။ ။ ဇာတ်ကား ရိုက်နေစဉ်အတွင်းမှာ ဘာအခက်ခဲတွေ တွေ့ခဲ့လဲ။ မြန်မာ
သရုပ်ဆောင်တွေ၊ ဒါရိုက်တာတွေနဲ့ အတူတွဲပြီး အလုပ် လုပ်ကိုင်ရတာ ဘောလီဝုဒ်
မှာနဲ့ ဘယ်လိုကွာခြားလဲ။
ဖြေ။ ။ နည်းစနစ် အပိုင်းတွေ ကတော့ အများကြီး ကွာတယ်။ မီးအားသုံးတာတွေ
အရမ်းကွာတယ်။ လူအင်အား သုံးတာတွေ အများကြီးကွာတယ်။ ဒါပေမယ့်
ဘယ်နိုင်ငံမှာမဆို Artist ဆိုတာ Arist ပဲ။ အက်တင် လုပ်ရတာက
အက်တင်လုပ်ရတာပဲ။ ကင်မရာ On လိုက်ရင် အားလုံး Acting လုပ်ရတာပဲ ဆိုတော့
ဒီနိုင်ငံကလူ၊ ဟိုနိုင်ငံက လူမို့လို့ ရယ်လို့ ဘာမှ ကွာခြားချက် မရှိပါဘူး။
ကိုပြေတီဦးလည်း သရုပ်ဆောင်ကောင်း တယောက်ပါ။ မိုးဟေကိုလည်း ကောင်းပါ တယ်။
ဆိုတော့ Acting အပိုင်းမှာ Directing အပိုင်းမှာ ဘာပြဿနာမှ မရှိပါဘူး။
Technology အပိုင်းမှာ အရင်ကတော့ ကိုယ်က နည်းနည်းစိတ်ပူခဲ့တယ်။ ဘယ်လိုများ
ထွက်လာမလဲ၊ ရလဒ်က ဘယ်လိုများ ဖြစ်မလဲ ဆိုတာကို စိတ်ပူခဲ့တဲ့ အပေါ်မှာ
ရလဒ်က ထွက်လာတော့ အရမ်းအဆင်ပြေတဲ့ အခါမှာ ကိုယ်ကျေနပ်သွားပါတယ်။
မေး။ ။ ဒီဇာတ်ကားက ရုပ်ရှင်ဇာတ်ကားကြီး ဆိုတော့ အကယ်ဒမီဆု ရရှိမယ်လို့
မှန်းမိလား။
ဖြေ။ ။ အကယ်ဒမီကို လိုချင်လား ဆိုရင် လိုချင်တယ်။ မှန်းလားဆိုရင်တော့
မမှန်းရဲပါဘူး။ မမှန်းရဲဘူးဆိုတာ အကယ်ဒမီက နတ်လည်း ကြီးတယ်။ ပြီးတော့
လူကြီးတွေက ဆုံးဖြတ်တာ ဆိုတော့၊ အကယ်၍ ပရိသတ်တွေက ဆုံးဖြတ်တာ ဆိုရင်တော့
ကိုယ်ရမှာသေချာတယ်။ ပရိသတ်တွေက အစ်မ အကယ်ဒမီရမယ်၊ အကယ်ဒမီရမယ် ဆိုပြီး
ပြောတယ်။ ဒါပေမယ့် ကိုယ့်နိုင်ငံမှာက ပရိသတ်ဆုံးဖြတ်တာ မဟုတ်ဘူး၊
ကြည့်ရှု့တဲ့လူတွေရ့ ရွေးချယ်မှု မဟုတ်ဘူး။ လူကြီးတွေ၊ ရုပ်ရှင်ကောင်စီက
လူတွေ ဆုံးဖြတ်တာ ဆိုတော့ သူတို့ကို မျှမျှတတနဲ့ ဆုံးဖြတ်စေချင်တယ်၊
ဒါပေမယ့် မမှန်းရဲဘူး။
မေး။ ။ ဒီဇာတ်ကားကို ရုံမတင်ခင်က လိုင်လာခမ်း လုပ်ကြံသတ်ဖြတ်ခံရတယ်
ဆိုပြီး ကောလာဟလ သတင်းတွေ ထွက်လာတယ်။ အဲဒါနဲ့ ပတ်သက်ပြီး ပြောပြပေးပါဦး။
ဖြေ။ ။ အဲဒါလေးက အမှန်တကယ်တော့ ၂၀၁၁ တုန်းက အိန္ဒိယမှာ ကောလာဟလ
သတင်းပေါ့။ ကျမနဲ့ ပတ်သက် ပြီးတော့ ထွက်ခဲ့တယ်။ အဲဒါကလည်း
နည်းနည်းမနာလိုတဲ့ လူတွေက လုပ်လိုက်တဲ့ အနေအထားမှာပေါ့ နော်။ နောက်ပြီးတော့
မှားယွင်းတဲ့ သတင်းတခု ထွက်သွားတဲ့အပေါ်မှာ၊ အဲဒီ သူတို့ ထုတ်လိုက်တဲ့ ZEE
TV ဆိုတာ အိန္ဒိယမှာ Main Channel ပေါ့။ အဲဒီ Channel နဲ့လည်း ကျမ နည်းနည်း
ပြဿနာလေးတွေ ဖြစ်တယ်၊ ဒါပေမယ့် အဲဒီ Channel က ကျမကို ပြန်တောင်းပန်ပြီး
သူတို့ ပြန် အသံလွှင့်ပေးတယ်၊ အဲဒီကိစ္စ မှားသွားပါတယ် ဆိုပြီး။ သူတို့
အယ်ဒီတာ တယောက်က Identical မှားတဲ့ ကိစ္စတခုကို ထည့်မိတဲ့ အတွက်
တောင်းပန်ပါတယ် ဆိုပြီးတော့ တောင်းလည်း တောင်းပန်တယ်။ အခု
“တိုက်ဆိုင်မှုရှိလျှင်” ဇာတ်ကားထွက်တဲ့ အချိန်မှာ ကျမထင်တာကတော့
မြန်မာပြည်က မီဒီယာတွေက ကျမနဲ့ ပတ်သက်တဲ့ အကြောင်းအရာတွေကို Google မှာ
ရှာရင်းနဲ့ သူတို့က အမှားအယွင်း သတင်းကို တွေ့သွားပြီး အဲဒါကို
ရေးလိုက်တော့ အဲဒါက ပြန်ပြန့်သွားတယ်။ အဲဒီသဘောပါပဲ။ ဒါပေမယ့် အဲဒီ
အယ်ဒီတာတွေနဲ့ ခေါ်ပြီး စကားပြောတဲ့ အခါမှာ သူတို့ကိုယ်တိုင်ကလည်း
ဒီလိုယူပြီးတော့ ထည့်ခဲ့တဲ့ အတွက်၊ သေချာစုံစမ်းပြီးတော့ မထည့်ခဲ့တဲ့အတွက်
တောင်းပန်ပါတယ်ဆိုပြီး သူတို့က ဆိုပါတယ်။
မေး။ ။ နောက်ထပ် မြန်မာပြည်က ရုပ်ရှင်ဇာတ်ကားကြီးတွေ ရိုက်ဖို့
ကမ်းလှမ်းလာမယ် ဆိုရင်ကော ရိုက်ဖို့ အစီစဉ် ရှိပါသလား။
ဖြေ။ ။ ကမ်းလည်း ကမ်းလှမ်းပါတယ်။ ရိုက်ဖို့လည်း အစီအစဉ်ရှိပါတယ်။ အခု
ရိုက်ဖို့လည်း လုပ်နေပါပြီ။ ဒါရိုက်တာ ဦးမျိုးမင်းနဲ့ ပါပဲ။ ဦးမျိုးနဲ့ အခု
နှစ်ကားလောက်တော့ ပြောထားတယ်။
မေး။ ။ ဒီ မြန်မာ့ရုပ်ရှင်ကို နိုင်ငံတကာ အဆင့်မီအောင် ဘာတွေ
လုပ်သင့်တယ်လို့ မြင်မိလဲ။
ဖြေ။ ။ တဖြည်းဖြည်းနဲ့ ဖြစ်လာမှာပါ။ ဘာဖြစ်လို့လဲ ဆိုတော့ ဒီ
Technology အပိုင်းကို မြှင့်တင်လိုက်ပြီ၊ ငွေသုံးတာကို တခြား ဘောလိဝုဒ်
ကားတွေ ရိုက်သလို သိန်းနဲ့ သန်းနဲ့ချီပြီး ကုဋေနဲ့ ကုဋာနဲ့ ချီပြီး
သုံးနိုင်ပြီ ဆိုရင်တော့ Automatically ဒီကားတွေက International Level
ဖြစ်သွားမှာပါ။
မေး။ ။ မြန်မာပြည်မှာ ပြန်အခြေချဖို့ အစီအစဉ်ကော ရှိလား။
ဖြေ။ ။ မြန်မာနိုင်ငံက ကိုယ့်နိုင်ငံ ဖြစ်တဲ့ အပေါ်မှာ သင်္ဘောသားတယောက်က
နိုင်ငံရပ်ခြားသွားပြီးတော့ သင်္ဘောမှာ အလုပ် လုပ်နေသလို ပုံစံပါပဲ။
ဘယ်နှစ်နှစ်ပဲ နေရနေရ သွားပြီး အလုပ်လုပ်ပြီးရင် ကိုယ့်နိုင်ငံပဲ
ကိုယ်ပြန်ရတာပဲလေ။ ကျမလည်း အကယ်၍ နိုင်ငံခြားသားနဲ့ ကိုယ်အိမ်ထောင်ကျ
သွားရင်တော့ ကိုယ်ဘယ်နိုင်ငံမှာ နေဖြစ်မလဲဆိုတာ ပြောလို့ မရဘူး။ အကယ်၍
ကိုယ်နိုင်ငံခြားသားနဲ့ အိမ်ထောင် မကျခဲ့ရင်တော့ ကိုယ့်မြန်မာပြည်
ကိုယ့်နိုင်ငံမှာပဲ ကိုယ် ပြန် အခြေချရမှာပေါ့။ ။
irrawaddy
လိုင်လာခမ်းရဲ့ ပထမဆုံး ဗီလိန်ဇာတ်ရုပ်
Reviewed by သတင်းစုံပျော်ဝင်အိုးကြီး
on
October 09, 2014
Rating: 5
![](http://1.bp.blogspot.com/-0uUGVx4dIV0/VDZ_HIu2qcI/AAAAAAAAYd0/q_SjovB3xgI/s72-c/338.jpg)
Subscribe to:
Post Comments (Atom)
No comments:
Post a Comment