ရန်ကုန် ဝင်ကစွပ်ဈေးကွက်

နေထိုင်စရိတ် ကြီးမြင့်လွန်းသည့် နိုင်ငံတွင် သူတို့နေထိုင်ကြရပြီး ထိုနေထိုင်စရိတ်ကပင် တစ်လရှာသမျှ ဝင်ငွေ၏ ထက်ဝက်ကျော်ကို ဝါးမျိုသွားသည်။
စားဝတ်နေရေး၊ ဘဝရပ်တည်ရေးအတွက် ဝင်ငွေရှာလို့ကောင်းသည့် မြို့ကြီးပြကြီးကို ပြောင်းရွှေ့လုပ်ကိုင်ကြချိန်တွင် ကျောတစ်ခင်းစာနေရာအတွက် ရုန်းကန်ရှာဖွေရပြန်သည်။
ရန်ကုန်မြို့မှ ဝင်ကစွပ်များ၏ ဘဝမှာ ကူသူကယ်သူမဲ့လှသည်။
ရန်ကုန်မြို့တော်နေ ပြည်သူများအတွက် နေထိုင်စရိတ်ကို လျှော့ချပေးနိုင်မည့် အရိပ်အယောင်မှာ မှုန်ဝါးဝါးသာ။
ဝင်ကစွပ်များ တတ်နိုင်မည့် ကျောတစ်ခင်းစာနေရာ အတွက် အစိုးရလည်း ဘာမှမလုပ်ပေးနိုင်သေး၊ ငွေကြေးအရ ဝန်ပိမှုကို ဖြေလျှော့ပေးနိုင်မည့် တစ်ဦးချင်းဝင်ငွေ မြင့်တက်လာရေး ဆိုသည်မှာလည်း နိုင်ငံရေးသဘောအရ ဖြစ်ချင်သည်ကို ကြွေးကြော်ထားသည့် ပုံနှယ်။
“တစ်နှစ်ကို နေစရာနေရာအတွက် သုံးရတာက သိန်းနှစ်ဆယ်လောက် ရှိတယ်၊ စားစရိတ်ကလည်း တစ်လ တစ်သိန်းခွဲလောက် ဆိုတော့ တစ်နှစ် သိန်းနှစ်ဆယ်နီးပါးပါပဲ။ ဝင်ငွေနဲ့ထွက်ငွေက မျှကိုမမျှဘူး” ဟု သာကေတမြို့နယ်တွင် နေထိုင်သူ ကိုဇော်ထူးက ဆိုလေသည်။
ပြည်တွင်းကုမ္ပဏီတစ်ခုတွင် တစ်လဝင်ငွေ ကျပ်လေးသိန်းခန့် ရရှိသူ ကိုဇော်ထူးမှာ အိမ်ထောင်ရှင်၊ ကလေးတစ်ယောက်နှင့် မိသားစု သုံးဦးတည်းသာ နေထိုင်သူ ဖြစ်သည်။
ဇနီးဖြစ်သူမှာ ယခင်က အလုပ်ရှိသော်လည်း ရင်သွေးမွေးပြီးနောက် ကလေးထိန်းရန် လက်ရှိအလုပ်မှ နုတ်ထွက်ထားချိန်၊ အပိုကုန်ကျလာသော ကလေးစရိတ်နှင့် မကြာမီ သက်တမ်းပြည့်မည့် အိမ်ငှားစာချုပ်တို့အတွက် ကိုဇော်ထူး ချွေးပြန်နေပြီ ဖြစ်သည်။
“နှစ်ယောက်လုံး အလုပ်ရှိတုန်းက မစုမိရင်တောင် လောက်ငသေးတယ်။ အခုတစ်ယောက်ထဲ ရုန်းရချိန်မှာ ဘယ်လိုမှ မလွယ်ဘူး၊ ချေးရငှားရနဲ့ အဆင်ပြေအောင် လုပ်ရတာပေါ့၊ ဒီကြားထဲ တစ်ယောက်ယောက်ကများ ကျန်းမာရေးကိစ္စ ဖြစ်ပြီဆိုရင်တော့ ငွေတိုးပေးစားသူတွေဆီ ပြေးပေတော့ပဲ” ဟု ၎င်းက ဆိုသည်။
ပြီးခဲ့သည့်နှစ်များအတွင်းက ကွန်ဒို၊ တိုက်ခန်းများစွာ ဆောက်လုပ်ခဲ့ကြသည်။ မြို့တွင်းခြောက်မြို့နယ် ပြင်ပမြို့နယ်များတွင်လည်း ကန်ထရိုက်တိုက်သစ်များ တစ်လုံးပြီးတစ်လုံး ပေါ်လာသည်။
သို့သော် အိမ်အငှားဈေးကွက်တွင် ဈေးကျသည့် အရိပ်အယောင်မရှိ၊ အိမ်၊ ခြံ၊ မြေဈေးကွက် အေးစက်နေသော်လည်း အငှားဈေးကွက်မှာမူ ပုံမှန်အတိုင်းနီးပါး လည်ပတ်နေဆဲ၊ အိမ်တိုက်ခန်း အငှားဈေးနှုန်းမှာလည်း ဈေးကွက်တစ်ခုလုံး အနေအထားဖြင့်ကြည့်လျှင် ဈေးကျသွားသည်ဟု မဆိုနိုင်သေးပေ။
“အိမ်အငှားဈေးက တက်တာမျိုးတော့ မရှိဘူး။ ခုက တိုက်အသစ်တွေကလည်း ထပ်ထွက်လာနေတော့ ဈေးကတော့ မတက်ဘူး” ဟု ဒေါပုံမြို့နယ်မှ အိမ်တိုက်ခန်းပွဲစား လုပ်နေသူတစ်ဦးက ဆိုသည်။
အိမ်၊ ခြံ၊ မြေ အရောင်းဈေးကွက်မှာ ၂ နှစ်ကျော်ကာလအတွင်း အေးစက်သွားခဲ့ပြီး အရောင်းအဝယ် ကျဆင်းသွားသလို ဈေးနှုန်းလည်း တည်နေရာ အနေအထားပေါ် မူတည်ကာ ၁၅ ရာခိုင်နှုန်းမှ ၂၀ ရာခိုင်နှုန်းခန့်အထိ အထိုက်အလျောက် ကျဆင်းခဲ့သည်။
ထိုအချိန်တစ်လျှောက်လုံးတွင် အိမ်အငှားဈေးကွက်မှာမူ ဈေးကွက်မအေးသွားသလို ဈေးလည်း သိပ်မကျသွားဘဲ ပန်းပန်ဆဲသာ ဖြစ်သည်။
အိမ်၊ ခြံ၊ မြေ တိုက်ခန်းပိုင်ဆိုင်သူထက် ပိုင်ဆိုင်မှု ကင်းမဲ့သူ အရေအတွက်က သိသိသာသာ များပြားလွန်းသည့်အတွက် အငှားဈေးကွက်က ပုံမှန်လည်ပတ်နေနိုင်ခြင်း ဖြစ်သည်။
အိမ်အငှားနေထိုင်သူ အများစု အတွက် မြို့တွင်းခြောက်မြို့နယ်နှင့် နီးစပ်သော အလုံ၊ စမ်းချောင်း၊ တာမွေမြို့နယ်တို့တွင် နေထိုင်မည် ဆိုပါက အနည်းဆုံး တစ်လ ကျပ်နှစ်သိန်း ဝန်းကျင်ခန့် အသုံးပြုမှသာ ထိုမြို့နယ်တို့တွင် နေထိုင်နိုင်မည် ဖြစ်သည်။
“စမ်းချောင်းမှာတော့ အိမ်ငှားတွေက အောက်ထစ်အနည်းဆုံး နှစ်သိန်းလောက်တော့ ရှိကြတယ်။ နှစ်သိန်းအောက် ဆိုရင်လည်း အပေါ်ဆုံး အလွှာတွေ၊ တိုက်ခန်းကျဉ်းတွေတော့ ရှိတယ်၊ ဒါပေမဲ့ ရှားတယ်” ဟု စမ်းချောင်းမြို့နယ်တွင် အိမ်အငှားပွဲစား လုပ်နေသူ အမျိုးသမီးတစ်ဦးက ဆိုသည်။
စမ်းချောင်းမြို့နယ်တွင် ၁၂ ပေခွဲ၊ ၅၅ ပေ အကျယ်အဝန်းရှိသော လေးလွှာ၊ ငါးလွှာ တိုက်ခန်းတစ်ခန်း၏ အိမ်ငှားခမှာ နှစ်သိန်းကျပ်ရှိပြီး အလွှာနိမ့်လေ ဈေးပိုပေးရလေ ဖြစ်ကြောင်း အိမ်၊ ခြံ၊ မြေ အငှားဈေးကွက် အတွင်းမှ စုံစမ်းသိရှိရသည်။
ထို့အတူ တာမွေ၊ ကျောက်မြောင်းကဲ့သို့ နေရာမျိုးတွင် အိမ်ငှားမည် ဆိုပါကလည်း ၁၅ ပေ၊ ၅၅ ပေ ဝန်းကျင် တိုက်ခန်းတစ်ခန်း၏ ပုံမှန်အိမ်ငှားခမှာ အနည်းဆုံး နှစ်သိန်းခန့်ရှိပြီး အိမ်ခန်းအတွင်း ပြင်ဆင်ထားမှု၊ လေအေးပေးစက် တပ်ဆင်ထားမှု၊ ကြွေပြားကပ်၊ အလွှာအလိုက် စသည့်အပြင် အဆင်များပေါ် မူတည်ကာ ကျပ်နှစ်သိန်းခွဲ၊ သုံးသိန်းမှသည် ကျပ်လေးသိန်း၊ ငါးသိန်း ဝန်းကျင်အထိ ရှိကြောင်း အိမ်၊ ခြံ၊ မြေ အကျိုးဆောင် ဝက်ဘ်ဆိုက်များထံမှ သိရှိရသည်။
ကန်ထရိုက်ဈေးကွက် လှုပ်ခတ်ခဲ့သော သင်္ဃန်းကျွန်း၊ သာကေတနှင့် ဒေါပုံမြို့နယ်တို့တွင်မူ အိမ်အငှားဈေးကွက် အနည်းငယ် အေးသွားကြောင်း အိမ်၊ ခြံ၊ မြေ ကားဝယ်ရောင်းငှား အကျိုးတော်ဆောင် ဒေါ်နန္ဒာဝင်းက ဆိုသည်။
မြို့တွင်းခြောက်မြို့နယ်နှင့် မနီးမဝေးနေရာတွင် ရှိနေသော မြို့နယ်များတွင် ကန်ထရိုက်တိုက် ဆောက်လုပ်မှုများ အလွန်ခေတ်စားခဲ့သော်လည်း နောက်ပိုင်းတွင် ကန်ထရိုက်တာလိုင်စင် ရှိ၊ မရှိ စစ်ဆေးခြင်း၊ အဆောက်အအုံ အရည်အသွေးပိုင်း ကြီးကြပ်မှု တင်းကျပ်လာခြင်းနှင့် အိမ်၊ ခြံ၊ မြေ ဈေးကွက် အရှိန်တန့်သွားချိန်တွင် ကန်ထရိုက်တာအချို့ ရှောင်ပြေးမှုများ ရှိခဲ့သည်။
ထိုဂယက်မှာ မြို့နယ်အချို့ရှိ အငှားဈေးကွက်ကို ဂယက်ရိုက်ခဲ့ပြီး အငှားဈေးကွက် အေးသွားခြင်း ဖြစ်သည်။
“ဟိုတုန်းက ကန်ထရိုက်တွေ ဆောက်ကြတုန်းက ကန်ထရိုက်တာတွေက မြေရှင်၊ အိမ်ရှင်တွေကို အိမ်ငှားခပေးတော့ ဘယ်ဈေးနဲ့ဖြစ်ဖြစ် ငှားနေကြတယ်လေ။ ခုက ကန်ထရိုက်တိုက်တွေက ဆောက်နေရင်း ရပ်ထားတာတွေရော၊ ဆက်မဆောက်တော့တာတွေရောကြောင့် အငှားဈေးကွက်က အေးသွားတယ်” ဟု ဒေါ်နန္ဒာဝင်းက ရှင်းပြသည်။
လိုင်စင်မဲ့ ကန်ထရိုက်တာများ ဆောက်လုပ်ထားသော အရပ်ခေါ် ငါးထပ်တိုက် (သုံးထပ်ခွဲသာ ရှိသည်) ၏ အပေါ်ဆုံးအလွှာ ဒါဘာအခန်းငှားရမ်းခမှာမူ လွန်ခဲ့သည့် ၂ နှစ်ခန့်က ကျပ်ကိုးသောင်း၊ တစ်သိန်းဝန်းကျင်မှ ကျပ်တစ်သိန်းသုံးသောင်း ဝန်းကျင်အထိ ရှိခဲ့သော်လည်း ယခုအခါ ကျပ်ခုနစ်သောင်း၊ ရှစ်သောင်း ဝန်းကျင်သာ ရှိကြောင်း သင်္ဃန်းကျွန်း၊ ဒေါပုံမြို့နယ်တို့ရှိ အိမ်အငှားပွဲစားများထံမှ သိရသည်။
ရန်ကုန်တိုင်းဒေသကြီးအစိုးရ၏ အထပ်မြင့်အဆောက်အအုံများကို ကန့်သတ်မှု လုပ်ဆောင်ခြင်းနှင့် မြေဈေးနှုန်း ကျဆင်းရေး လုပ်ဆောင်မည်ဆိုသော အချက်တို့ကြောင့် အိမ်၊ ခြံ၊ မြေ ဈေးကွက်မှာ အဝယ်လုံးဝ မရှိသလောက် ဖြစ်သွားပြီး အငှားဈေးကွက်ကိုပါ အနည်းငယ် ထိခိုက်လာကြောင်း ကံကောင်း အိမ်၊ ခြံ၊ မြေလုပ်ငန်းမှ ဦးမင်းခန့်က ဆိုသည်။
“အခုက အငှားဈေးကွက်ပါ နည်းနည်းလာထိတာပေါ့။ ဒီလဆို အငှားတော်တော်နည်းသွားတယ်။ ငှားရမ်းခလည်း နည်းနည်းတော့ ကျတာတွေရှိတယ်။ အရင် နှစ်သိန်းလောက်ကနေ အခု တစ်သိန်းရှစ်သောင်းလောက် ဆိုတာမျိုးပေါ့” ဟု ၎င်းက ဆိုသည်။
တိုက်ခန်းကို နေထိုင်ရုံသက်သက် ငှားရမ်းမှုတွင် အများဆုံး ငှားရမ်းကြသည့် ပမာဏမှာ ကျပ်နှစ်သိန်း၊ နှစ်သိန်းခွဲ ဝန်းကျင်က အများဆုံး ဖြစ်ကြောင်းလည်း ၎င်းက ဆက်လက်ပြောပြသည်။
နိုင်ငံခြားသားများ နေထိုင်အသုံးပြုရန် ငှားရမ်းသည့် ကွန်ဒိုတိုက်ခန်း ဈေးနှုန်းများမှာလည်း လွန်ခဲ့သည့် ၂ နှစ်နှင့် နှိုင်းယှဉ်လျှင် ၁၀ ရာခိုင်နှုန်းမှ ၂၀ ရာခိုင်နှုန်းအထိ ဈေးကျသွားပြီး ယခင် အမေရိကန်ဒေါ်လာ ၂၅၀၀ ဖြင့် ငှားရမ်းသော တိုက်ခန်းကို ယခုအခါ အမေရိကန်ဒေါ်လာ ၂၀၀၀ ဖြင့် ငှားရမ်းနေကြရကြောင်း iMyanmarHouse အိမ်၊ ခြံ၊ မြေ လုပ်ငန်း၏ အုပ်ချုပ်မှုဒါရိုက်တာ ဦးနေမင်းသူက ဆိုသည်။
“ဝါကျွတ်ပြီး နောက်ပိုင်းမှာတော့ နေအိမ်၊ တိုက်ခန်း ငှားရမ်းခတွေလည်း နည်းနည်းတော့ ကျနိုင်တယ်လို့ ခန့်မှန်းထားတယ်။ ဆောက်လုပ်ပြီးစီးမယ့် ဟာတွေကလည်း ရှိနေတယ်လေ” ဟု ၎င်းက ပြောသည်။
အိမ်တိုက်ခန်းအငှားဈေးကွက်မှာ ပုံမှန်အတိုင်း လည်ပတ်နေချိန်တွင် ဈေးကွက်ကို လှုပ်ခတ်မည့် သတင်းတစ်ခု ထွက်ပေါ်လာပြန်သည်။
မန္တလေးတိုင်းဒေသကြီးတွင် အိမ်တိုက်ခန်းငှားရမ်းမှုအတွက် အိမ်ငှားလိုင်စင် ပြုလုပ်ရမည် ဖြစ်ပြီး လိုင်စင်ကြေးမှာ ငှားရမ်းခ၏ ၅ ရာခိုင်နှုန်း ဖြစ်ကြောင်း မန္တလေးမြို့တော် စည်ပင်သာယာရေး ကော်မတီက ယခုလအတွင်း ကြေညာချက် ထုတ်ပြန်လိုက်သည်။
ရန်ကုန်တိုင်းဒေသကြီးတွင်မူ ထိုသို့ အိမ်အငှားလိုင်စင် ပြုလုပ်မည့် သတင်းကို မကြားမိသေးဟု အိမ်၊ ခြံ၊ မြေ အကျိုးဆောင်အများစုက ဆိုကြသော်လည်း အချို့ကမူ လိုင်စင်သတင်း သဲ့သဲ့ကြားသည်ဟု ဆိုကြပြန်သည်။
“ရန်ကုန်မှာလည်း အဲ့လိုမျိုး အိမ်ငှားလိုင်စင် လုပ်မယ်လို့ သတင်းကြားမိတယ်” ဟု ဒေါ်နန္ဒာဝင်းက ဆိုသည်။
အိမ်အငှားလိုင်စင်ကြေး ဆိုသည်မှာ အစိုးရက ပြည်သူထံမှ ကောက်ယူသည့် အခွန်အခတစ်မျိုးပင် ဖြစ်ရာ နောက်ထပ် အသစ်တိုးပွားလာမည့် အခွန်အခဟု ဆိုရပေမည်။
လိုင်စင်ပြုလုပ်ခြင်း၊ လိုင်စင်ကြေး ကောက်ခံခြင်းတို့ကို လုပ်ဆောင်ရာတွင် ဘေးထွက်ဆိုးကျိုး နည်းပါးစေရန် ချင့်ချိန်ဆောင်ရွက်သင့်ကြောင်း အိမ်၊ ခြံ၊ မြေ အကျိုးဆောင်များက သုံးသပ်ကြသည်။
“ဒီလိုကောက်မယ်ဆိုရင် အိမ်ရှင်တွေကတော့ ငှားရမ်းခမှာ အခွန်ထပ်ပေါင်းထည့်လိုက်မှာပဲ။ ခံရမှာကတော့ အငှားနေသူတွေပေါ့။ ဒါမှမဟုတ် ငှားရမ်းခကို လျှော့ပြတာမျိုးလည်း ဖြစ်နိုင်တယ်။ လိုင်စင်ကိစ္စက ချင့်ချိန်ဖို့လိုတယ်။ ကောက်ခံမယ့်နှုန်းထား သတ်မှတ်မှုက အရေးကြီးတာပေါ့” ဟု ဦးနေမင်းသူက လိုင်စင်ကြေးကောက်ခံမှုနှင့် ပတ်သက်၍ ထည့်သွင်းစဉ်းစားရမည့် အချက်အချို့ကို သုံးသပ်ပြောကြားသည်။
မန္တလေးမြို့တော် စည်ပင်သာယာရေးကော်မတီ၏ လိုင်စင်နှုန်းထား ၅ ရာခိုင် နှုန်းအတိုင်း ရန်ကုန်မြို့တော်တွင်လည်း ကျင့်သုံးခဲ့သည်ရှိသော် ပျမ်းမျှ တစ်နှစ်လျှင် သိန်းနှစ်ဆယ် ကုန်ကျသည့် ငှားရမ်းခအတွက် ပိုင်ရှင်များက လိုင်စင်ကြေးတစ်သိန်း ပေးဆောင်ရမည် ဖြစ်သည်။
ထိုတစ်သိန်းကို နေအိမ်၊ တိုက်ခန်းပိုင်ရှင်က ပေးဆောင်မည်လား၊ သို့မဟုတ် ငှားရမ်းနေထိုင်သူအပေါ် ပုံချလိုက်မည်လား။
“ပုံမှန်အတိုင်း တွေးကြည့်မယ်ဆို အိမ်ရှင်ကတော့ ပေးမှာမဟုတ်ဘူး။ ငှားတဲ့သူရဲ့ စရိတ်ထဲကို ထပ်ပေါင်းထည့်လိုက်မှာပဲ” ဟု ဦးမင်းခန့်က ဆိုသည်။
ဝင်ကစွပ်တို့ သက်သာစရာ နေရာရှာမရသေးပေ။
အစိုးရက အကောင်အထည်ဖော်နေသော အငှားအိမ်ရာ စီမံကိန်း ဆိုသည်မှာလည်း ထုနှင့်ထည်နှင့် ရှိနေသော အငှားဈေးကွက် ဝယ်လိုအားနှင့် ယှဉ်ကြည့်လျှင် ဆင့်ပါးစပ် နှမ်းပက်သကဲ့သို့သာ ဖြစ်နေသည်။
တန်ဖိုးနည်း၊ တန်ဖိုးမျှတ အိမ်ရာစီမံကိန်း ဆိုသည်မှာလည်း တစ်နိုင်ငံလုံး အတိုင်းအတာနှင့်ယှဉ်လျှင် မလောက်ငသေး၊ နှစ်ရှည်အရစ်ကျစနစ်ဖြင့် အိမ်ပိုင်ဆိုင်ခွင့် ဆိုသည်မှာလည်း ယခုမှ အစပျိုးခါစ ဖြစ်သည်။
ထို့ကြောင့် ခြောက်လတစ်ကြိမ်၊ တစ်နှစ်တစ်ကြိမ် ဝင်ကစွပ်တို့ သက်ပြင်းချနေရပေဦးမည်။
Credit:The Voice
Share on Google Plus

About MP4 YoU

ကမ္ဘာသတင်း၊မြန်မာ့သတင်း ပေါင်းစုံကိုရောသမမွှေဖော်ပြသွားမည့်
MP4 YoU (The Melting Pot For You)