Latest News

CREDIT

သတင်းစုံပျော်ဝင်အိုးကြီးတွင် ဖော်ပြထားသည့် သတင်း၊ဓာတ်ပုံများသည် သက်ဆိုင်သူများ၏မူပိုင်သာဖြစ်ကြောင်း အသိပေးအပ်ပါသည်။

Thursday, December 22, 2016

အချစ်စမ်းချင်စမ်း မစမ်းချင်နေ


( ၁ )

" ကျုပ်အသက် ၁၉ နှစ်သမီးကတည်းက လင်ယူလာတာ .... အခု အသက်ငါးဆယ် ပြည့်တော့မယ် ... တစ်ချက်ကလေးမှ အလုပ်နဲ့လက် မပြတ်ရသေးဘူး ...... အဲဒီလောက် လင်ကိုညှာတဲ့ကောင်မ ..... ရှာလည်း ကြည့်ကြဦး ..... "

ဒေါ်လှမေသည် အိမ်ဘေးရေစင်တွင် ဟင်းရွက်တွေ ဆိတ်ဆွဆေးကြောရင်းက မကျေမနပ်နှင့် တရစပ်ပြောနေသည်။

" ကလေးသုံးယောက် ဗိုက်ကြီးလွယ်ထားတဲ့အချိန်တောင် ကျုပ်က နားတာမဟုတ်ဘူး ..... မောင်တစ်ထမ်း မယ်တစ်ရွက်ဆိုတာ သူများတွေ ပြောတဲ့စကား ..... ကျုပ်ကတော့ သူတစ်ထမ်း ကိုယ်တစ်ထမ်းကို ထမ်းလာခဲ့တာ .... ဒင်းက ခုမှ ကိုယ့်အသက် ကိုယ်အားမနာ..... သမီးနဲ့ သမက်နဲ့ မြေးနဲ့ဖြစ်မှ ဖောက်လွှဲဖောက်ပြန်တဲ့လူတော့ လာပါစေ ......... လှမေအကြောင်း ကောင်းကောင်းသိသွားမယ်..... "

တဖြည်းဖြည်း အရှိန်မြှင့်လာတော့ ဆိုင်ကလေးထဲ စားပွဲထိုးပေးနေသော သမက်လုပ်သူကျော်အောင်က သူ့မိန်းမအေးနွယ်ကို လှမ်းပြီး မျက်စပစ်ပြလိုက်တယ်။ အဘွားကြီး ကြမ်းနေပြီဟူသော အဓိပ္ပါယ်ကို အေးနွယ်ကလည်း သတိပြုမိကာ ပြုံးယောင်ယောင်ဖြစ်သွားသည်။

" ဟင် .... ပြောရင်း ... ပြောရင်း .... ဒေါသဖြစ်တယ် ... အဲဒီကုန်ကားမောင်းတဲ့အလုပ်ကို ဖြတ်ရင်ဖြတ် မဖြတ်ရင် ကားပါ မီးနဲ့ ရှို့ပစ်မယ် ..... ဒရိုင်ဘာငှားပြီး ခိုင်းပါဆိုတော့လည်း ပြောမရတာ ဒါကြောင်ကိုး .... သူ့ကိုယ်သူ လည်လှပြီမှတ်နေတာ .... "

" ဟာ .... အမေကလည်း တိုးတိုးပြောပါ ... အမေ့အသံက ပြောရင်း ပြောရင်း ကျယ်လာပြီ .... အိမ်ရှေ့မှာ ထမင်းစားတဲ့လူတွေ ကြားကုန်ပါဦးမယ် ... "

မနေနိုင်တော့တဲ့အလတ်မမိသွယ်က အမေ့ကို လှမ်းပြောလိုက်သည်။

" ကြားကြားအေ .... ကိုယ့်အကြောင်း ကိုယ်ပြောတာ ... သူများအကြောင်းပြောတာမဟုတ်ဘူး .... "

"ရှက်စရာကြီးအမေရာ .... မပြောပါနဲ့ .... အမေ မရှက်ဘူးလား .... "

" ရှက်နိုင်ပေါင် ..... "

" အမေမကျေနပ်တာ အဖေ့ကိုမဟုတ်လား ... အဖေလာမှ ပြောပေါ့ အမေရာ ... အခု အမေပြောနေတာတွေ အဖေကြားတာမှမဟုတ်တာ .... "

" သူ မကြားလည်း သူ့သမီးတွေ ကြားတယ်လေ ...... ညည်းတို့ကြားတယ်မဟုတ်လား .... ပြန်ပြောလိုက်ကြပေါ့ ... "

" အဲဒီလိုဆိုလည်း အိမ်သားတွေချည်း ရှိတဲ့အချိန် ပြောပါအမေရာ ... အမေ့ဆိုင်မှာ ထမင်းစားတဲ့သူတွေက အလုပ်ကြမ်းသမားတွေ ၊ ဆိုက်ကားသမားတွေ ၊ ကားသမားတွေနဲ့ အမေရဲ့ .. "

" အဲဒါ ဘာဖြစ်တုန်း "

" သူတို့ခမျာ ဒီအချိန်လေး နားရတာ .... စားတုန်းသောက်တုန်း နားအေးပါးအေးနေပါစေ အမေရာ ... ကိုယ့်ကိုယ်ရေးကိုယ်တာကြောင့် သူများအနှောက်အယှက် မဖြစ်ပါစေနဲ့ ... အမေဆူပူနေရင် စိတ်ညစ်ပြီး နောက် ဘယ်လာအားပေးချင်ပါ့မလဲ .... "

" ညည်းတို့ ရှက် ... ရှက်တယ် ပြောစမ်းပါအေ .. "

" ဟုတ်တယ်အမေရေ ... ရှက်လို့ ..... ရှက်လို့ .. မပြောပါနဲ့တော့ ... "

အငယ်မကပါ ဝင်ပြောတော့ ဒေါ်လှမေလေသံ ပျော့သည်။

" ဒါတောင် ညည်းတို့ကို တကယ်အရှက်ခွဲမှာက ကျုပ်မဟုတ်ဘူးအေ့ .... ညည်းအဖေ ညည်းတို့ ကြပ်ကြပ်သတိထားကြတော့ .... " ဟု ဆိုကာ နေရာမှ ဆောင့်အောင့်ပြီး ထွက်သွား၏။

( ၂ )

" အဖေက မမိုက်ဘူးဟာ "

ညနေဆိုင်သိမ်းချိန် အမေနှင့် သမက်ဖြစ်သူကျော်အောင်တို့ သီရိမင်္ဂလာဈေးသွားတုန်းမှာ ညီအစ်မသုံးယောက် ခေါင်းချင်းဆိုင်မိကြချိန်တွင် မိသွယ်က စပြောသည်။ အကြီးမအေးနွယ်က နှစ်နှစ်သာသာအရွယ်ရှိ သားငယ်ရွှေတိုးကို ပွေ့ထားရင်းက

" ယောက်ျားတွေဟာ အဲဒီလိုပဲဟဲ့ ... မိန်းမနဲ့ မျက်ခြေပြတ်သွားတာနဲ့ ဖောက်ပြန်ချင်တာ ..... ကြီးကြီး ငယ်ငယ် လွှတ်ထားလို့မရဘူး " ဆိုတော့ အဖေ့အသည်းကျော် အငယ်မက

" အမယ် ... မနွယ်က အဲလိုတော့ မပြောပါနဲ့နော် ... မနွယ်ယောက်ျားနဲ့ နှိုင်းပြီး မပြောပါနဲ့ .... အဖေကြီးက အဲဒီလိုမဟုတ်ပါဘူး .... ခုလည်း ဘကြီးအေးမောင် မူးမူးနဲ့ပြောတဲ့အတိုင်း ဟုတ်ချင်မှဟုတ်မှာပါ ... သူများပြောတိုင်း စွတ်ယုံမနေကြနဲ့ဦး ... "

" ငါ့ယောက်ျားလည်း အဲဒီလို မဟုတ်ပါဘူးနော် ... ငါက တွေ့ဖူးတာတွေကို ပြောတာ.... "

အကြီးမက လျှောချသွားသည်။

" မနွယ်ကျတော့လည်း လွန်လွန်းပါတယ် ... ဟိုလူနဲ့ စကားပြောနေပြန်ပြီ ... ဒီလူ့ ပြုံးပြ ပြပြန်ပြီနဲ့ မျက်စိအောက်က အပျောက်မှမခံတာ .. မနွယ်ယောက်ျားက ဘယ်လှုပ်ရဲမလဲ ... "

" နေစမ်းပါဦးဟာ ... အဲဒါတွေက အရေးမကြီးပါဘူး ... ဖေကြီးကိစ္စ တကယ်ဟုတ်မဟုတ် သိချင်တယ် ... ဟုတ်နေရင်တော့ ဒုက္ခပဲ .... "

" သိဖူးလေဟာ ... သူတို့ကားသမားအချင်းချင်း ပြောတာပဲ ... ဟုတ်မှာပေါ့ ... "

" ဒါဆို ဖေကြီးလာရင် အမေသောင်းကျန်းတော့မှာ သေချာတယ် ...သောင်းကျန်းပါစေ .. ဝင်မဆွဲကြေး သိလား .... "

" အေး ... "

ညီအစ်မတတွေ စိတ်တူသဘောတူ တိုင်ပင်ထားကြ၏။ သမီးတွေက အဖေ့ကို သဲသဲလှုပ်ချစ်သလို အမေ့ကိုတော့ အသနားပါထပ်၍ ပိုနေကြသေး၏။ သူတို့အမေသည် အခြားအမေတွေထက် မိသားစုအပေါ် အနစ်နာခံသည်ဟု သူတို့ ယူဆသည်။ မိသားစုအပ်ါတွင်သာမက အမေသည် သူ့ဆိုင်မှာ စားသောက်သူတွေအတွက်လည်း စေတနာထားရှာသည်။ အမေ့ဆိုင်ကလေးက လက်လုပ်လက်စားများ၏ စားမြိန်ဝိုင်းဖြစ်သည်။

" ဆင်းရဲသားဆိုတာ ငပိတို့ ၊ တို့စရာတို့ကို ဦးစားပေးရတာ ... အာဟာရလည်း ရှိတယ်... အကုန်လည်း သက်သာတယ်.... ငပိတို့စရာ ကောင်းရင် ဟင်းကောင်းမလိုပါဘူး .. ပိုက်ဆံရှာရတာ လွယ်တာမဟုတ်ဘူး ... " ဟု ဆိုကာ ဖောဖောသီသီ ဝဝလင်လင်ကျွေးနိုင်ရေးအတွက် အပင်ပန်းခံကာ အချိန်မရလျှက် ညဘက်ဆိုင်ပိတ်ချိန်မှဖြစ်စေ ညလုံးပေါက်သီရိမင်္ဂလာဈေးသို့သွား၍ ခြင်းကြီးခြင်းငယ်ဖြင့် ဟင်းရွက်များ ကျုံး၍ဝယ်လေ့ရှိသည်။ ထို့ကြောင့် အမေ့ဆိုင်တွင် ထမင်းစားသူတို့က ငပိရည်ကောင်းကောင်း ၊ တို့စရာစုံစုံ ၊ ဟင်းသီးဟင်းရွက်ကြော်များများ ၊ ချဉ်ရည်ဟင်းပျစ်ပျစ်တို့ဖြင့် ထမင်းမြိန်လေ့ရှိသည်။

" အမေ ထမင်းမစားရသေးဘူးမဟုတ်လား .... ခူးလိုက်မယ်နော် ... "

သီရိမင်္ဂလာဈေးမှပြန်လာပြီး ဆေးလိပ်တစ်တိုနှင့် ငိုင်နေသောအမေ့အနားကို မိသွယ် ရောက်သွား၏။

" မခူးနဲ့ ... မခူးနဲ့ ...မစားချင်ဘူး ... "

" အမေ အမောပြေရင် စားလိုက်တော့လေ ... ဈေးသွားခါနီး ကျွန်တော်စားတုန်းကလည်း အမေ ဝင်မစားဘူး "

ကျော်အောင်ကပါ အမေ့ကို လှမ်းပြော၏။

" ငါမှ မဆာသေးတာ ... ဆာရင် စားမှာပေါ့ .. မင်းတို့လင်မယားလည်း ပြီးရင် ပြန်ကြတော့လေ ... ကလေး အိပ်ချင်နေရောပေါ့ ... "

အကြီးမလင်မယားက သူတို့နှစ်အိမ်ကျော်တွင် နေသည်။ အိမ်ထောင်ကျပြီးကတည်းက ကျော်အောင့်ကို နဂိုအလုပ်က ထွက်ခိုင်းပြီး အမေက ဆိုင်တွင်ကူခိုင်းကာ စားရိတ်ငြိမ်းပြီး လခကို သတ်သတ်ပေးသည်။ သူစိမ်းခေါ်မည့်အစား သားသမီးကိုထားတော့ အမေလည်း အဆင်ပြေ သူတို့လည်း စုမိဆောင်းမိရှိသည်။

" အမေက ဘာလို့ မစားသေးတာလဲ ... "

မိသွယ်ပြောမရတော့ အငယ်မကပါထပ်ကာ အမေ့အနား ကပ်ထိုင်ရင်း မေးပြန်၏။

" မစားချင်လို့ပေါ့ဟဲ့ "

" ဘာလို့ မစားချင်ရတာလဲ "

" မဆာလို့ ... မဆာလို့ ... "

မိငယ်က မချိုမချဉ်မျက်နှာဖြင့် အမေ့ကိုဖက်ကာ

" အမေ အသည်းကွဲနေတာမဟုတ်လား ... "

" တယ် ... ဒီကောင်မ "

မိငယ်က စ တော့ ဒေါ်လှမေမျက်နှာကြီး ရဲကာ လှမ်းခေါက်မည်ပြု၏။

" ဟုတ်ပါတယ် ... တို့အမေကြီးကလည်း ဖေကြီးကို အောက်မေ့ပြီး အသည်းကွဲနေတာ ... ထမင်းတောင် မစားနိုင်ဘူးဟေ့ .. ရယ်ရတယ် ... "

" အောင်မယ် ဒင်းအတွက်များ ငါက အစားပျက် အသောက်ပျက်ဖြစ်ရအောင် ဒင်းက ဘာမို့လို့လဲ .... ညည်းတို့က အဲဒီလိုထင်နေရင် ယူလာခဲ့ .. ကျုပ် စားပြမယ် ... ထမင်းနဲ့ဟင်း ပုံခဲ့ .. "

ဒေါ်လှမေက စိတ်မရှည်သလိုပြောတော့

" အဖေနဲ့ အမေ့ကိုတော့ မိငယ်မှပဲ နိုင်တယ် .. " ဟု ပြောကာ မိသွယ်က ထမင်း ပြေးထည့်၏။

( ၃ )

" အဟုတ်ပြောတာလား ဒေါ်ကြီး ... ဒေါ်ကြီးယောက်ျားကိုယ်တိုင် တွေ့ခဲ့တာလား ... "

" အေးလေ .. သူပြောလို့ ငါသိတာပေါ့ .. ညည်းအမေကိုလည်း သူပဲ ပြောတာမဟုတ်လား ... "

" အခု အမေက အရမ်းခံစားနေရတာ .. အဖေလာရင် ပြဿနာတက်မှာ သေချာတယ် .... "

" ဒုက္ခပါပဲအေ .... ကျုပ်တို့လင်မယားတော့ တရားခံဖြစ်တော့မယ်ထင်တယ် ... "

" မဖြစ်ပါဘူးဒေါ်ကြီးရာ ... ပြန်ပြောပြလို့ ကျေးဇူးတောင်တင်သေးတယ် ... ဒေါ်ကြီးတို့သာ မပြောရင် အဖေ နယ်မှာ မိန်းမယူထားရင်တောင် မိငယ်တို့ သိမှာမဟုတ်ဘူး ... "

" အဲဒီလောက်လည်း မဟုတ်ပါဘူးအေ ... ညည်းအဖေက လူရိုးပါ ... အခုဟာက မိန်းမက ကပ်နေတဲ့ပုံပါ ... ငါ့အိမ်က လူကမှ ခပ်ရှုပ်ရှုပ်ရယ် .... အဲဒီမိန်းမက ညည်းအဖေလာရင် ကွမ်းယာဆီးကျွေး ၊ ဆေးလိပ်ဆီးတိုက်နဲ့တဲ့ ... ပြီးတော့ သူတို့နှစ်ယောက် ထမင်းဆိုင်မှာ အတူမှာစားကြတာလည်း သုံးလေးခါလောက် မြင်တယ်ဆိုတော့ မရိုးဘူးထင်လို့ပြောတာပါ .... ကျုပ်လည်းမသိဘူး ... သူပြောသမျှပဲ သိတာ ... "

" အခုတောင် သူတို့ ညားနေပြီလား မသိဘူးနော် ဒေါ်ကြီး ... "

" ခဏတဖြုတ် အပျော်သဘောနေမှာပါအေ ... သမီးတွေ မြေးတွေကို တုန်နေအောင်ချစ်တာ.... ကိုထွန်းမောင် ဒီလိုတော့ မလုပ်တန်ကောင်းပါဘူး ... "

" အပျော်သဘောလည်း ဘယ်ကောင်းမလဲဒေါ်ကြီးရာ ... ရှက်စရာကြီး ... "

မိငယ် အိမ်ပြန်ရောက်တော့ အစ်မနှစ်ယောက်ကို အတွင်းခန်းမှာအိပ်နေသော အမေမကြားအောင် ပြန်ပြီးဖောက်သည်ချနေတော့သည်။ အဒေါ်နှစ်ယောက်နှင့် အမေကြားတွင် ရွှေတိုးလေးက မျက်လုံးကလယ်ကလယ်နှင့် ရှိနေရှာသည်။

( ၄ )

ကနေ့ည ဒေါ်လှမေ တစ်ညလုံး အိပ်မပျော်။ အတွေးတွေက လွန်ခဲ့သောနှစ်ပေါင်းသုံးဆယ်ဆီ ရောက်နေသည်။ အဲဒီတုန်းက အုပ်လုံးသိမ်းစ အလှသွေးကြွယ်ကာ ကြောက်တတ်သောလှမေ ၊ ကာလသားတစ်ယောက်ယောက်ကများ ခပ်စိုက်စိုက် ကြည့်လိုက်လျှင် ခြေလှမ်းတွေ ဟိုယိုင် သည်ယိုင်နှင့် အယောင်ယောင် အမှားမှားဖြစ်တတ်သော လှမေ ၊ ထိုလှမေသည် ညီအစ်မဝမ်းကွဲတော်သူ မြချစ် အောင်သွယ်ကောင်းသဖြင့် ဆွေမျိုးမိသားစုထံတွင် လာနေရင်း ပလတ်စတစ်စက်ရုံ ညဆိုင်းအလုပ်သမား ထွန်းမောင်နှင့် ရည်းစားဖြစ်ခဲ့သည်။

သမီးရည်းစားသာ ဖြစ်သွားသည်။ လှမေနှင့်ထွန်းမောင် နှစ်ယောက်တည်း တစ်ကြိမ်မှ မဆုံဖူး။ ထွန်းမောင်က လှမေကို ကာလအတော်ကြာအောင်ပင် နှစ်ယောက်အတူ တွေ့ခွင့်ပေးရန် စာဖြင့်တစ်မျိုး ၊ မြချစ်နှင့် စကားပါး၍တသွယ် တောင်းပန်သည်။ လှမေက တွေ့လည်း တွေ့ချင်သည်။ တွေ့လည်း မတွေ့ရဲ။ အိမ်ကို ဘယ်လိုပြောပြီး ထွက်ရမှန်းလည်း မသိ။ လှမေတို့အိမ်က ဆေးလိပ်ခုံဖြစ်သည်။ အိမ်မှာ တစ်နေကုန် ဆေးလိပ်လိပ်ရသောလှမေက ရံဖန်ရံခါ ဈေးသွားဝယ်ရတာကလွဲလို့ အပြင်ထွက်စရာ အခွင့်အရေးမရှိ။ အချိန်ရှိသရွေ့ ဆေးလိပ်ခုံတွင်သာ အချိန်ကုန်ရသည်။

ဆေးလိပ်လာလ်ိပ်သော ဆေးလိပ်သမများ၏နှုတ်ဖျားတွင် တစ်နယ်သား ကာလသားထွန်းမောင်၏ ရိုးသားကြောင်း ၊ သဘောကောင်းကြောင်း ၊ ယောက်ျားပီသကြောင်း ကောင်းသတင်းကိုတော့ အဆက်မပြတ် ကြားနေရသည်။ တစ်နေ့တွင်တော့ သူ့ချိန်းဆိုမှုကို အရဲစွန့်၍ လှမေ လက်ခံလိုက်သည်။ ချိန်းသည့်နေရာကား ဆေးလိပ်ခုံနှင့် အတော်အတန်လှမ်းသော ဘုရားဝိုင်းထဲမှာဖြစ်၏။ မြချစ်မှတဆင့် ထွန်းမောင်က နံနက်အလုပ်ဂျူတီထွက်ကတည်းက ဘုရားဝိုင်းထဲတွင် မလာမချင်း စောင့်နေမည်။

ထွန်းမောင်ကို ထမင်းစားချိန် ၁၁ - နာရီလောက်မှ လာ၍ရမည်ဖြစ်ကြောင်း အကြောင်းပြန်လိုက်သည်။ အိမ်မှထွက်ရန်အတွက်တော့ မြချစ်ကို ဘုရားမှာ ယတြာသွားချေချင်လို့ဆိုပြီး အမေ့ကို လာပြောပြီး အဖော်ခေါ်ရန် ဇာတ်တိုက်ထားသည်။
မတော်တဆ အသိမိတ်ဆွေများ ဘုရားပေါ်တွေ့လျှင်လည်း ရှင်းရလွယ်အောင်ဖြစ်၏။

စီစဉ်ထားသည့်အတိုင်း မြချစ် လာခေါ်သည်။ အမေက တော်တော်နှင့်မလွှတ်။ ဆေးစပ်ခိုင်းနေသေးသည်။ ဖင်စီခံ ဖြတ်ခိုင်းနေသေးသည်။ အချိန်က မျှော်မှန်းထားသည်ထက် အတော်လေး လင့်သွားသည်။ နေ့လည်တစ်နာရီကျော်သွားမှ " မြန်မြန် ပြန်လာနော် ... အိမ်မှာ လုပ်စရာတွေ တပုံကြီး .. " ဟု ပြောပြီး လွှတ်လိုက်၏။

လှမေတို့ညီအစ်မ ဘုရားစောင်းတန်းဘက်သို့ ကမန်းကတန်းသုတ်ခြေတင်ခဲ့၏။ ဘုရားဝိုင်းနှင့်နီးလာလေ လှမေရင်တွေ ခုန်လာလေ။ မြချစ်ကိုဆုပ်ကိုင်ထားသော သူ့လက်ဖဝါးတွေက ဇောချွေးတွေနှင့် နစ်နေ၏။ ဘုရားကုန်းတော်ပေါ် လှမ်းတက်လိုက်ချိန်တွင် သူ့ခြေထောက်တွေက မြေကြီးနဲ့ထိသည်ဟု မထင်ရပဲနှင့် ခလုတ်တွေ ခဏခဏ တိုက်နေပြန်သည်။ သူတစ်ယောက်တော့ လည်ပင်းညောင်ရေအိုး ဖြစ်နေရှာတော့မယ်ဟု သနားကရုဏာကြီးကာ ရင်တွေ ဖိုနေမိသည်။ သူ့ကိုမြင်ရင် လှမ်းပြုံးပြလိုက်ရမလား ၊ ရှက်ရှက်နှင့် ခေါင်းကြီးငုံ့ပြီး အသံတွေတုန်ကာ စကားမှ ပြောလို့ရပါ့မလား။

ဘုရားပေါ်ရှိ ချိန်းဆိုထားရာ နေရာအနီးအရောက် မျက်လုံးတွေကပြာပြီး ဘာကိုမျှ မမြင်။ မမြချစ်က ဟိုကြည့် သည်ကြည့်နှင့် " ဟယ်တော့ အစ်ကိုထွန်းမောင်ကြီးရယ် ... ဟိုမှာ .... " ဆိုပြီး တအံ့တသြနှင့် ရေရွတ်လိုက်တော့ သူ မရဲတရဲနှင့် လှမ်းအကြည့် ဟင်ကနဲ ဖြစ်သွားသည်။ ထွန်းမောင်ကား ကျောက်တုံးတစ်တုံးကို ခေါင်းအုံးကာ နှစ်နှစ်ခြိုက်ခြိုက်ကြီး အိပ်ပျော်လျက်ရှိသည်။ ထွန်းမောင်အိပ်ပျော်နေပုံကြီးကို ကြည့်ကာ သူ အရမ်းရှက်သွားသည်။

" ကျွန်မတို့ တော်တော်နဲ့မလာနိုင်လို့ စောင့်ရင်းနဲ့ အိပ်ပျော်သွားတာဖြစ်မယ် ... "

မြချစ်ကလည်း ဘယ်လောက်ပဲရဲရဲ လူပျိုတစ်ယောက်အိပ်ပျော်နေတာကိုတော့ သွားမနှိုးရဲ။ လှမေက ပိုဆိုးတော့သည်။ ညီအစ်မနှစ်ယောက်သား သူ့အရှေ့တည့်တည့် ခပ်လှမ်းလှမ်းမှထိုင်ကာ ဘုရားရှိခိုးရင်း စောင့်နေကြသည်။ ရှိသမျှဘုရားရှိခိုးနှင့် ဂါထာတွေသာ အကုန်ရွတ်ဖတ်၍ ကုန်သွားသည်။ ထွန်းမောင်က နိုးမလာ။ ဘုရားကို လက်ဝဲရစ် လက်ယာရစ် အကြိမ်ကြိမ်ပတ်ရင်း သူ့နားမှ ရစ်ဝဲရစ်ဝဲနှင့် ကြည့်ရင်း ခြေသလုံးသာ တောင့်လာသည်။ သူကတော့ ဟောက်များပင် ဟောက်နေချေသေးသည်။ နောက်ဆုံး ဘုရားပေါ်ကသာ ပြန်ဆင်းလာသည်။ သူက မနိုး။

လှမေ အကြာကြီး သူ့ကို စိတ်ကောက်ပစ်လိုက်သည်။ မြချစ်စကားအရ အဲဒီနေ့က ညနေသုံးနာရီခွဲပြီး၍ မျက်နှာပေါ် ကျနေထိုးမှ နိုးလာပြီး လန့်ဖြန့်ထူပူသွားတော့သည်ဆို၏။

" ဟင်း ... အဲဒီကတည်းက လူကို ဒုက္ခပေးတဲ့လူ ... အူတူတူ အတတနဲ့ ... "

ဒေါ်လှမေနှုတ်ခမ်းက မသိမသာပြုံးယောင်သန်းကာ တစ်ဖက်သို့ စောင်းအိပ်ရင်း ရင်ထဲမှ ကြုံးဝါးလိုက်၏။

" အဲဒီတုန်းကဒုက္ခမျိုးသာ ကျုပ်က ခံချင်ခံမယ် ... အခုပေးတဲ့ဒုက္ခကိုတော့ ခံနေလိမ့်မယ်မထင်နဲ့ ... တော့်ခေါင်းနဲ့ ကိုယ် အိုးစားမကွဲလို့ကတော့ ကျုပ်ကို ပြောချင်တိုင်း ပြော ... "

( ၅ )

" ဘုရား ... ဘုရား ... ငါမှားသွားပြီထင်တယ် ... မြရီက ငါ့ကို တကယ်အားကိုးပုံပေါ်နေပြီ ... "

ဦးထွန်းမာင်ရင်ထဲ လှုပ်လှုပ်ခတ်ခတ်နှင့် ကတုန်ကယင်ဖြစ်လာသည်။

" ကိုကြီးထွန်း .. ရော့ ... ဟောဒါက ကွမ်းယာဘူး .. ဒီမှာ ဆေးလိပ် .. "

" အေး ... အေး ... ရပါတယ်ဟာ ... နင်ကလည်း ဒုက္ခရှာလို့ ..... "

သူ မြရီကို မကြည့်ပဲ ကားပေါ်တက်ဟန် ပြင်နေသည်။ စပယ်ယာမောင်အေးကို ရှေ့ခန်းတံခါးချက် လှမ်းဖွင့်ပေးနေရင်းမှ ပြောလိုက်သည်။

" အမယ် ... ဒါ ဒုက္ခမှမဟုတ်တာ .... မြရီ ယာတဲ့ကွမ်းယာက အစပ်တည့်တယ်ဆိုလို့ လမ်းမှာ စားရအောင် ထည့်ပေးလိုက်တာ .... "

" အေးဟာ ... ကျေးဇူးပဲ .. "

" ကိုကြီးထွန်း ... ဘယ်နေ့ ကားပြန်ထွက်မှာလဲ ... "

" အခြေအနေအရပဲဟ .. "

" ဟင် ... ကိုကြီးထွန်းကလဲ အကြာကြီးနေမှာလား ... ပြန်မလာတော့ဘူးလား ... "

" သိဘူးလေဟာ ... အဆင်သင့်သလိုပေါ့ ... "

" ပြန်လာခဲ့ပါ ကိုကြီးထွန်းရာ .. မြရီက ကိုကြီးထွန်းကို အားကိုးနေရတာ .. ဒီကားဂိတ်က လူတွေက သိတဲ့အတိုင်းပဲ .. မြရီကို မထီတရီနဲ့ .... "

မြရီက သနားစဖွယ်မျက်နှာငယ်နဲ့ သူ့ကို ငေးပြီးပြောတော့ ဘေးနားမှာရှိသည့် မောင်အေးကို သူ မလုံမလဲဖြစ်သွားသည်။

" နင် အိမ်ထောင်ပြုလိုက်ပါလားဟ ... ဒါမှမဟုတ် ဒီနေရာမှာ ရောင်းမယ့်အစား နံနက်ခင်းဈေးဖြစ်ဖြစ် ပြောင်းရောင်းပါလားဟင် ... "

" ကိုကြီးထွန်းကလည်း မြရီမှာ အားကိုးရမယ့်လူမှ မရှိတာ .. ကိုကြီးထွန်း ရှာပေးမလား .. "

" အမလေး ... မလုပ်ပါနဲ့ .. ငါ့မှာလည်း ပြဿနာနဲ့ဟ ... အေးမောင်ကြီးကား ညက ပြန်ဝင်လာတယ် ... ငါ့အိမ်ကလူတွေ ငါ့ကို မျှော်နေကြပြီ ... ဒီကောင်ကြီး ဘာတွေသွားချွန်ထားမှန်း မသိဘူးဟာ .... "

အေးမောင် ညက မူးမူးနှင့် သူ့ကိုပြောသွားသည့်စကားတွေကိုတော့ သူ မြရီကိုအားနာ၍ ပြန်မပြောဖြစ်။

" အဲဒီလူကြီးက အားကြီး မဟုတ်က ဟုတ်ကပြောတတ်တာ ... ဂရုမစိုက်စမ်းပါနဲ့ ကိုကြီးထွန်းရာ ... ကျွန်မကိုလည်း အမျိုးမျိုးပြောနေတာပဲ ... "

" အေးပါဟာ .. ငါက အကြောင်းမဟုတ်ပါဘူး ... နင်သာ သတိဝီရိယနဲ့ နေ ... ညဘက်လည်း သိပ်မိုးချုပ်အောင် မရောင်းနဲ့ပေါ့ .... သွားမယ်နော် .. "

ပြောပြောဆိုဆို ကားစက်နှိုးပြီးထွက်ခဲ့စဉ် နောက်ကြည့်မှန်မှ သူ့ကားကိုငေးပြီး ကျန်ရစ်သောမြရီကို သူမြင်ပြီး သနားနေသည်။ ဒီကောင်မလေးဟာ ကလေးတစ်ယောက်မအေ မုဆိုးမ ၊ အမယ်အိုကြီးကို လုပ်ကျွေးနေသူ ၊ ဘဝမှာ လုံခြုံမှုသိပ်မရှိလှ။ သူ့ကိုတော့ အတော် အားကိုးခင်မင်ယုံကြည်မှုရှိသည်။ သူမှသူဖြစ်နေတော့ ဂိတ်ကကောင်တွေက သိပ်မကြည်။ မူးလာပြီဆို အမနာပပြောကြသည်။ ထိုသတင်းက အိမ်ပင်ပြန်ရောက်နေပြီဖြစ်ကြောင်း မနေ့ကသိလိုက်ရတော့ သူ ရင်ပူသွားသည်။

မြရီအပေါ် သူ တိတ်တခိုးသာယာခဲ့မိတာမှန်ရင်တောင် လှမေနှင့် သမီးတွေကိုတော့ သူ ဘာနှင့်မှ မလဲနိုင်။ လှမေသည် သူ့အတွက် အဖိုးတန်လှသောမိန်းမတစ်ယောက်။ အုပ်လုံးသိမ်းစ ရွှေရင်သိမ်းသစ်အရွယ်ကတည်းက စွဲနစ်ခဲ့ရသည့်ငယ်ချစ်။ ပြီးတော့ သူသိပ်ချစ်သည့်သမီးတွေကိုလည်း သူ့အတွက် မွေးပေးခဲ့သေးသည်။ မြေးကလေးရွှေတိုးကလည်း ဘိုးအေရဲ့အသက်။ သူ့ရဲ့သံယောဇဉ်အသိုက်အမြုံကို သူ ဘယ်နည်းနှင့်မှ ပြိုကွဲမခံနိုင်။ လှမေမကြိုက်လျှင် ဒီကားကို သူ မမောင်းရုံသာရှိတော့သည်။ အေးမောင်ကြီးက သူ့နေရာမှာ ကားမောင်းချင်လို့ အုံနာစစ်စစ်ဖြစ်တဲ့လှမေကို ပိုပိုသာသာတွန်းခဲ့တာလည်း ဖြစ်ချင်ဖြစ်မည်။ အတော်ဆိုးတဲ့ကာင်။

" ဟော ... အစ်ကိုရေ အချိန်အခါမဟုတ် ပိတောက်ပန်း ပွင့်နေပါလား ... ညက မိုးရွာလို့ထင်တယ် .. "

မောင်အေးက လှမ်းပြောသည်။ ရှားရှားပါးပါး ကားလမ်းဘေးက ပိတောက်ပန်းတစ်ချို့ကိုမြင်တော့ ဘယ်တော့မှမမေ့နိုင်သော မြင်ကွင်းတစ်ခုကို သူ သတိရသွားကာ အသံမထွက်ပဲ ရယ်လိုက်မိသည်။

" ဘာရယ်တာလဲ အစ်ကိုရ ... "

မောင်အေးက သူ့ကို နားမလည်ဟန်နှင့် မေးသည်။

" ငါလူပျိုတုန်းကအကြောင်း သွားသတိရလို့ပါကွာ ...အဲဒီတုန်းက မရယ်ရဘူးကွ .. ရင်နာတယ် .. ဒေါသဖြစ်ရတယ် .. စိတ်ကောက်ရတယ် .. အခုမှ တွေးရင်း ရယ်ချင်တာ ... "

" ဘယ်သူ့ကိုလဲ .. "

" မင်းအစ်မကိုပေါ့ ... လှမေကိုပေါ့ .. "

" ဟုတ်လား ... ဘာဖြစ်လို့လဲ .. "

" အပျိုတုန်းက သူက သိပ်ရှက်တတ်တာ .. လူရှေ့ဆို မနေတတ်အောင်ရှက်တာ ... တစ်နေ့မှာ တို့စက်ရုံကပိတောက်ပင်မှာ ပိတောက်ပန်း ပွင့်ရော .. ငါက မနက်အစောကြီးကတည်းက သူ့ကိုပေးချင်လို့ တစ်ခါမှ သစ်ပင်မတက်ဖူးပဲနဲ့
ပိတောက်ပင်ပေါ်ကို ခဲရာခဲဆစ်တက်ခူးတာ .... ပြန်အဆင်းကျတော့ လိမ့်ကျပါလေရော... "

" ဟုတ်လား ... ဘာဖြစ်သွားသေးတုန်း ... "

" ဒူးခေါင်းတွေ စုတ်ပြတ်သတ်သွားတာပေါ့ကွ ... ငါက လူ နာရင် နာပါစေဆိုပြီး ပိတောက်ပန်းကို အထိမခံတော့ ပိုအီတာပေါ့ ...အဲဒါနဲ့ သူ့ကိုပေးပန်ချင်လို့ ဘုရားတပြီး ဈေးမှာသွားစောင့်ရတာ.... ကံကောင်းလို့ တွေ့တော့တွေ့ပါရဲ့ ... ဘေးမှာ အဖော်ပါလာလို့ အပြန်ကို တစ်ခါစောင့်ရသေးတယ် ... အပြန်ကျတော့မှ တစ်ယောက်တည်းတွေ့တုန်း .... ရော့ ... အလှအတွက် ပိတောက်ပန်းဆိုပြီး ကမ်းပေးလိုက်တာ ... မချောက ဖျတ်ကနဲဆွဲယူပြီး သုတ်ခြေတင်သွားတာ ... စကားတစ်ခွန်းတောင်မှ မပြောလိုက်ရဘူး .... "

" အဲဒါ အစ်ကိုက စိတ်ဆိုးရောလား ... "

" အဲဒီလောက်နဲ့တော့ ဘယ်စိတ်ဆိုးဦးမလဲကွ .. သူက ခြေထောက်ကတင် ရှက်တာမဟုတ်ဘူး ... လက်ကပါ ရှက်ပြီး ပိတောက်ပန်းကိုင်သွားတဲ့လက်ကို ဘယ်လိုယမ်းသွားတယ်မသိဘူး ... ငါ့ပန်းတွေ တစ်လမ်းလုံးကြွေကျပြီး သူ့လက်ထဲမှာ အရိုးချည်း ကျန်တော့တယ် .. ငါ့မှာ ဒူးပြဲရပျိုးတောင် မနပ်တော့ဘူး ... "

( ၆ )

" အဖေတို့ကား ဝင်လာပြီတဲ့ဟေ့ .... "

အလတ်မ မိသွယ်က အရင်ဦးဆုံး သတင်းပို့တော့ ညနေဆိုင်သိမ်းပြီးပြီမို့ အိမ်မှာ မိသားစုတွေချည်းရှိနေသည်။ ညီအစ်မတစ်တွေက တစ်ယောက်မျက်နှာတစ်ယောက် အဓိပ္ပါယ်ပါပါကြည့်လိုက်ကြသည်။ ဒေါ်လှမေက ရေချိုးပြီးစ မျက်နှာသုတ်ရင်း
" ညည်း ဘယ်သူပြောတုန်း " ဟု မေးသည်။

" ကားသိမ်းတဲ့ဂိတ်ဝင်းဘက်က လာတဲ့လူ ပြောတာ ...အဖေ ကားဝင်ထားနေတယ်တဲ့ .. ခုလောက်ဆို လာနေရောပေါ့ ... "

" ဟင်း ... ငါမကြည့်ချင်ဘူး .. " ဟု ဆိုကာ ဒေါ်လှမေ သနပ်ခါးလိမ်းပြီး ညဈေးဘက် ဆင်းသွား၏။

" အဖေ့ကို တစ်ယောက်မှ စကားမပြောနဲ့ဟေ့ ... ခပ်တည်တည်နေ ....ရွှေတိုးကိုလည်း အဖေ့နား မကပ်စေနဲ့ .... "

အမေထွက်သွားပြီး ညီအစ်မတစ်တွေ တစ်ယောက်ကိုတစ်ယောက် သတိပေး၍မဆုံးခင်မှာပင် ပခုံးတွင် အိတ်တစ်လုံးချိတ်ထားသော အဖေသည် ကြိမ်ခြင်းကြီးတစ်လုံးကိုဆွဲကာ အိမ်ပေါ် တက်လာသည်။ အဖေ့ကြည့်ရတာ သူ့ကိုယ်သူ မလုံမလဲဖြစ်လာပုံရ၏။ မျက်လုံးက ဟိုကြည့် သည်ကြည့်နှင် မျက်နှာပိုးသတ်ထားကြသော သူတို့ကို ဝေ့ကြည့်ကာ

" ဟေ့ ... အိမ်က တိတ်လှချည်လားကွ ... " ဟု မေးသောအသံက ခြောက်ကပ်ကပ်။ သူ့ကို ဘယ်သူမှ ပြန်ဖြေမည့်သူမရှိ။ အဖေ အငယ်မဆီ လျှောက်သွား၏။

" သမီးငယ် ညည်းအမေရော .. "

" ညဈေးဘက် ဆင်းသွားတယ် .. "

" ခြင်းထဲမှာ မင်းဂွတ်သီးတွေ ဝယ်လာတယ် ... သမီးကြိုက်မှန်းသိလို့ အဖေဝယ်လာတာ ... ထုတ်စားကြ ... "

" ဟင့်အင်း ... မစားချင်ဘူး .. "

မေးတစ်ခွန်း ပြောတစ်ခွန်းနှင့် အငယ်မ အဖေ့အနားက ခွါလာသည်။

" ရွှေတိုးရော .. သားလေး ဘယ်သွားလဲ ... လာပါဦးကွ .. ဘိုးဘိုး ပြန်လာပြီ .. သားဖို့ မုန့်တွေပါလာတယ် .. "

အဖေက မြေးကိုအော်ခေါ်နေတုန်းမှာပဲ အေးနွယ်က မကြားဟန်ဆောင်ကာ ကလေးကိုကောက်ချီ၍ အိမ်ပေါ်မှ ဆင်းသွား၏။ အေးနွယ်ယောက်ျားက ခေါင်းငုံ့ကာ နောက်မှ ပါသွား၏။ အဖေ မျက်မှောင်တွန့်ကာ မိသွယ်ကို ခေါ်ပြန်သည်။

" မိသွယ် ... ..မိသွယ် .. "

" ရှင် .. "

" အိမ်ကို အေးမောင်လာသေးလား ... "

" လာတယ် "

" ဘာတွေ ပြောလဲ .. "

" အစုံပဲ .. "

" ဘာအစုံလဲ ... ပြောစမ်း .. အဲဒီအကောင် ဘာ မဟုတ်က ဟုတ်ကတွေ ပြောလဲ .. "

" ပြောမပြချင်ဘူး ... ရှက်တယ် "

အဖေ သက်ပြင်းတစ်ချက်ချလိုက်ပြီး အိမ်ပေါ်မှာ ခေါက်တုံ့ခေါက်ပြန် လျှောက်နေ၏။ ခဏနေတော့

" အငယ်မ ... အငယ်မ .. လာဦး အဖေ့ဆီကို .. "

" မလာဘူး ... သမီးအိပ်တော့မလို့ "

အဖေ့အပေါ်ဆိုးနေကျ အငယ်မက အိပ်ခန်းထဲမှ လှမ်းအော်လိုက်၏။ အဖေ အဝတ်အစားပင် မလဲနိုင်တော့ပဲ အိမ်ရှေ့ကွက်ပျစ်က မှောင်ရိပ်ထဲတွင် တိတ်တိတ်ကလေး သွားထိုင်နေတော့၏။ ထိုအခါတွင်တော့ မိသွယ်နှင့်အငယ်မ အဖေမမြင်နိုင်သည့် အိမ်တွင်းတစ်နေရာမှ နေ၍ အဖေ့ကို တိတ်တိတ်ကလေး ချောင်းကြည့်နေလိုက်ကြ၏။ အဖေစိတ်ထိခိုက်လျှင် ထိုသို့ ငြိမ်နေတတ်သည်။ အဖေ့ကို သနားမိပေမယ့် သူတို့ စိတ်ကောက်မပြေချင်သေး။

အမေလာလျှင် ပေါက်ကွဲမှာကိုလည်း တဖက်က စိုးရိမ်နေပြန်သည်။ အမေအိမ်ပြန်လာမည့်အချိန်ကို သူတို့ ရင်တထိတ်ထိတ်ဖြင့် စောင့်နေကြရသည်။ အခြေအနေမကောင်းလျှင် ဆွဲရန်အသင့်ဖြစ်နေကြသည်။ အေးနွယ်ကလည်း သူ့အိမ်ကလေးကနေ စိတ်ပူပြီးနေမှာ သေချာသည်။

" ဟော ... အမေ ပြန်လာပြီ "

အမေသည် အိမ်ထဲအဝင်တွင် လမ်းမီးရောင်ဖြင့် မြင်ရသောအဖေ့မျက်နှာကို ဖျတ်ကနဲ တစ်ချက်ကြည့်၍ ချက်ချင်းမျက်နှာလွှဲကာ အိမ်ပေါ်သို့တက်ရန် ပြင်သည်။ အဖေက နေရာမှထကာ အမေ့လက်ကိုဆွဲပြီး

" ငါ မင်းကို စောင့်နေတာ ... လာပါဦး အလှရာ .. " ဟု ခေါ်သည်။

အမေ အဖေ့ကို ဘာများ လုပ်ထည့်လိုက်လေမလဲဟု ညီအစ်မနှစ်ယောက် အသက်ပင်မရှူဝံ့ပဲ စိုးရိမ်တကြီးနှင့် မျက်တောင်မခတ်တမ်း စောင့်ကြည့်နေမိသည်။

အတန်ကြာမှ " ရှင်က ဘာဖြစ်နေတာလဲ .. မျက်ရည်တွေနဲ့ .. " ဟု ဆိုတော့ ညီအစ်မနှစ်ယောက် အံ့သြသွားကြ၏။ အဖေက အသံတုန်တုန်ဖြင့်

" မင့်သမီးတွေပေါ့ ငါ့ကို တစ်ယောက်မှ စကားမပြောကြဘူးကွာ ... အကြီးမကလည်း ငါ့ဆီကိုလာမယ့်ကလေးကို ခေါ်ပြီး ဆင်းသွားတယ် ... ဘုရားစူးရပါစေ့ကွာ .. ငါ မင်းတို့သားအမိထက် ဘယ်သူ့ကိုမှ သံယောဇဉ်ပိုမရှိပါဘူး .... ငါ့သားသမီးတွေက ငါ့ကို အဲဒီလိုစိမ်းကားတော့ ငါ အရမ်းခံစားရတယ် ... အားလည်းငယ်တယ် ... ဝမ်းလည်းနည်းတယ် .... "

ဟင် .. အဖေ .. ဟု အဖေ့ကို အံ့သြလို့မှ မဆုံးခင် အမေပြောလိုက်သောစကားကြောင့် သူတို့ညီအစ်မတစ်တွေ ပိုပြီး အံ့သြထိတ်လန့်စရာဖြစ်သွားလေတော့သည်။

" ဟင် .. ကိုထွန်းမောင် .. ရှင် .. ယောက်ျားမဟုတ်ဘူးလား ..သူတို့မခေါ်တာများ ဝမ်းနည်းစရာလား .. အားငယ်စရာလား .... ဘယ်သူမခေါ်ခေါ် ကျုပ်ခေါ်ရင် ပြီးရောမဟုတ်လား ...အချိန်တန်ကျ တော်နဲ့ ကျုပ်နဲ့ နှစ်ယောက်တည်း ကျန်ခဲ့မှာ ....
သူတို့က လင်ယူပြီးထွက်ကုန်ကြမယ့်ဟာတွေ ... ကျုပ်တစ်ယောက်လုံးရှိတယ် ... တော် ဘာမှ အားမငယ်နဲ့ ... "

( သန်းမြင့်အောင် )

No comments:

Post a Comment