[လူပြောများ ဝေဖန်နေကြတဲ့ ကိစ္စနဲ့ ပတ်သက်လို့ ရှင်းပြလို့ ရတဲ့အတိုင်းအတာဘောင်အတွင်းက ရှင်းလင်းပြရခြင်း ဖြစ်ပါကြောင်း ကြိုတင် တင်ပြပါရစေ။]
(၁)
ပထမဆုံးအချက်အနေနဲ့ မြန်မာနိုင်ငံဟာ ဘယ်သူ့ကိုမှ ကြောက်စရာ မလိုသလို ဘယ်သူ့ကိုမှလည်း မျက်နှာချိုသွေးနေစရာ မလိုပါဘူး။ အနောက်ကို ကပ်ဖို့ ပြောကြတာ ရှိသလို အရှေ့ကို ကပ်ဖို့ ပြောကြတာ တွေလည်း ရှိပါတယ်။ ပြီးခဲ့တဲ့ လေးနှစ်တာ ကာလအတွင်းမှာ ဦးသိန်းစိန်ဟာ အနောက်အုပ်စုလူလည်း မဟုတ် သလို အရှေ့အုပ်စု လူလည်း မဟုတ်ပါဘူး၊ ဒါပေမယ့် မြန်မာနိုင်ငံရဲ့အကျိုးစီးပွားအတွက် ဘက်မလိုက်ကြားနေပြီး၊ အားလုံးနဲ့ သင့်တင့် မျှတတဲ့ ဆက်ဆံရေး ထူထောင်ထားနိုင် ဖို့ အဓိကပါပဲ။ ကိုးကန့်ပဋိပက္ခဖြစ်စဉ်မှာ အစိုးရရဲ့ ရပ်တည်ချက်ကို သိနိုင်ပါလိမ့်မယ်။ အချို့သော ကိစ္စရပ်တွေဆိုရင် အများပြည်သူကို အသိမပေးဘဲ သိုသိပ်စွာ လုပ်ဆောင်နေရတာတွေ ရှိပါတယ်။ ဥပမာ အကြမ်းဖက် တိုက်ဖျက်ရေး လို လုပ်ငန်းစဉ်တွေ ဆိုရင် လူထုအတွင်းမှာ စိုးရိမ်မှုတွေ ပြင်းထန်လာနိုင်တာတွေကိုလည်း ထည့်တွက်ရပါတယ်။ အချို့သော ကိစ္စတွေဟာ ဘာတွေလုပ်နေပါတယ် ဆိုပြီး ပြောကြားလို့ မရတာတွေ ရှိပါတယ်။
မြန်မာနိုင်ငံမှာပြစ်မှုကျူးလွန်တဲ့နိုင်ငံခြားသားတွေကိုဥပဒေအရ တရားစွဲဆိုပြစ်ဒဏ်ပေးတာတွေ ရှိပါတယ်။ နိုင်ငံသား မျိုးစုံ အကျဉ်းထောင်တွေမှာရှိပါတယ်။မိမိနိုင်ငံနဲ့ ပြည်သူလူထုရဲ့အကျိုးစီးပွား ကို ထိခိုက်စေနိုင်တဲ့ပြစ်မှုကြီးတွေကျူးလွန်သူတွေ ကို ဆက်လက်ထိန်းသိမ်းထားရှိပါတယ်။ ယခုရက်ပိုင်း လူပြောများနေတဲ့ကိစ္စနဲ့ပတ်သက်လို့ ပြည်သူလူထုနဲ့ နိုင်ငံ့တာဝန် ထမ်းဆောင်သူ တွေရဲ့ အကျိုး၊ လြုံခုံရေးနဲ့ တည်ငြိမ်အေးချမ်းမှုကို ထိခိုက်မှုမရှိနိုင်တဲ့သူတွေ ကိုသာ ပြစ်ဒဏ်လွတ်ငြိမ်းခွင့် ပေးဖို့ ချင့်ချိန်ဆုံးဖြတ်ခဲ့တာဖြစ်ပါတယ်။ (ဒါက လွတ်ငြိမ်းချမ်းသာခွင့် မဟုတ်ပါဘူး) ဒီထက်ပိုပြီးပြောလို့ မရတာကိုနားလည်ပေးစေချင်ပါတယ်။
(၂)
ဒုတိယအချက်အနေနဲ့ ပြည်တွင်းငြိမ်းချမ်းရေးလုပ်ငန်းစဉ်ပါ။ မြန်မာနိုင်ငံမှာ ဒီထက်အရေးကြီးတဲ့ကိစ္စ မရှိတော့ပါဘူး။ ကူမင်တန်ကျူးကျော်မှု၊ ဗကပအမြစ်ပြတ်ရေး စတဲ့ သမိုင်းနောက်ခံအခြေအနေတွေအရ မြန်မာ နိုင်ငံ ငြိမ်းချမ်းဖို့ အိမ်နီးချင်းနိုင်ငံတွေရဲ့ အပြုသဘော ပူးပေါင်းဆောင်ရွက်မှုနဲ့ ကတိက၀တ်တွေ ရှိထားဖို့ လိုပါတယ်။
တရုတ်ခေါင်းဆောင်တွေ ပေးအပ်ထားတဲ့ ကတိတွေကတော့
(၁) မြန်မာနိုင်ငံရဲ့ လက်ရှိ ဆောင်ရွက်နေတဲ့ ငြိမ်းချမ်းရေးလုပ်ငန်းစဉ်တွေကို ထောက်ခံတယ်၊
(၂) တရုတ်နိုင်ငံအနေနဲ့ တိုင်းရင်းသားလက်နက်ကိုင်အဖွဲ့အစည်း တွေကို ကူညီထောက်ပံ့မှု လုံးဝ ပြုလုပ်မှာ မဟုတ်ဘူး၊
(၃) မြန်မာနိုင်ငံရဲ့ တရုတ်တစ်နိုင်ငံတည်းမူဝါဒအတိုင်း တရုတ်နိုင်ငံကလည်း One Myanmar Policy ကို ကျင့်သုံးမယ် ဆိုတာပဲ ဖြစ်ပါတယ်။
ငြိမ်းချမ်းရေးဟာ မြန်မာနိုင်ငံအတွက် ဒီမိုကရေစီ၊ လူ့အခွင့်အရေးတွေထက် အရေးကြီးတဲ့ လုပ်ငန်းစဉ် တစ်ရပ်ပဲ ဖြစ်ပါတယ်။
(၃)
တတိယအချက်အနေနဲ့ ကိုးကန့်အရေးအခင်းကြောင့် တရုတ်နိုင်ငံထဲကို ထွက်ပြေးတိမ်းရှောင်သွားရတဲ့ မြန်မာနိုင်ငံသား သုံးထောင်ကျော် ရှိပါတယ်။ သူတို့ကို တရုတ်နိုင်ငံက လိုအပ်တာတွေ ပံ့ပိုးကူညီ စောင့်ရှောက် ထားပါတယ်။ ဒီလူတွေကို မြန်မာနိုင်ငံက နိုင်ငံသား ဟုတ်-မဟုတ် ပြန်လည်စိစစ်ပြီး ပြည်တွင်းပြန်ရောက် လာ အောင် လုပ်ဆောင်နေတာ ရှိပါတယ်။ မြန်မာနိုင်ငံသားတွေ သူများနိုင်ငံမှာ ဒုက္ခရောက်နေတာကို တာဝန်ယူဖြေရှင်းပေးဖို့ အစိုးရမှာ တာဝန်ရှိပါတယ်။ တစ်ဆက်တည်းမှာပဲ "ကူရုံး - ထိန်ချုံး - ရင်ကျန်း " စတဲ့အရပ်တွေမှာ အုံနဲ့ကျင်းနဲ့ နေထိုင် လုပ်ကိုင်နေကြတဲ့ မြန်မာနိုင်ငံသားတွေ အများကြီး ရှိနေပါတယ်။ တစ်ချို့ဆိုရင် နယ်စပ်ဖြတ်ကျော်ခွင့် လက်မှတ်တောင် မရှိပါဘူး။ ကားဆေးတဲ့အလုပ်ရုံမှာ ၀င်ရောက်လုပ်ကိုင်နေတဲ့ သူတစ်ဦးဟာ တစ်လကို စားရိတ်ငြိမ်း ယွမ် ၁၂၀၀ ကျော်လောက် ရရှိနေကြောင်း သိရပါတယ်။ တစ်ချို့ စက်ရုံ တွေမှာ စားရိတ်ငြိမ်း တစ်လ ငါးသိန်း ခြောက် သိန်း ရရှိနေပါတယ်။ ဒီလို အဆင်ပြေပြေ လုပ်ကိုင်နေတဲ့ မြန်မာနိုင်ငံ သားတွေကို (ထိုင်းနိုင်ငံမှာလို) တရားဝင် အလုပ်သမားတွေ ဖြစ်လာအောင် ညှိနှိုင်းဖို့ ကိစ္စတွေ ရှိပါတယ်။ တရုတ် နိုင်ငံ ရှန်တုန်း ပြည်နယ်နဲ့ ကျန်းစု ပြည်နယ်တွေမှာ တရားမဝင် သွားရောက် လုပ်ကိုင်မှုနဲ့ ဖမ်းဆီး ချုပ်နှောင် ခံရပြီး ထိန်းသိမ်းခံထားရတဲ့ မြန်မာနိုင်ငံသား ၂၀၅ ဦးကို တရုတ်နိုင်ငံကနေ မြန်မာနိုင်ငံကို ပြန်လည် လွှဲပြောင်း ပေးအပ် ခဲ့ပြီး ဖြစ်ပါတယ်။
အစိုးရ အနေနဲ့ တစ်ခုခုစဉ်းစားဆုံးဖြတ်တိုင်း ပြည်တွင်းမှာရှိတဲ့ မိမိနိုင်ငံသားတွေ သာမက ပြည်ပရောက်ြမန်မာနိုင်ငံသားတွေ ရဲ့ အကျိုးစီးပွားကိုလည်း ထည့်သွင်း စဉ်းစား ဆောင်ရွက်ရတယ်ဆိုတာ သိရှိကြစေလိုပါတယ်။
(၄)
စတုတ္ထအချက်ကတော့ နယ်စပ်ကုန်သွယ်ရေး ဖြစ်ပါတယ်။ နှစ်နိုင်ငံ နယ်စပ်ကုန်သွယ်မှု တရားဝင် ဖြစ်လာစေလို့ ကြိုးပမ်းဆောင်ရွက်နေပါတယ်။ ဥပမာအားဖြင့် တရုတ်နိုင်ငံဟာ မြန်မာနိုင်ငံက စပါးစိုက်တောင်သူ တွေအတွက် ဈေးကွက်ကြီးတစ်ခု ဖြစ်ပါတယ်။ ဒါပေမယ့်လည်း တရားမ၀င် တင်သွင်းရတာ ဖြစ်နေတဲ့အတွက် နစ်နာမှုတွေ ရှိပါတယ်။ ဒါတွေ တရားဝင်တင်ပို့နိုင်ဖို့ ဗဟိုအစိုးရ၊ ယူနန်အစိုးရတွေနဲ့ တွန်းအားပေး ဆောင်ရွက်နေပါတယ်။
(၅)
ပဉ္စမအချက်အနေနဲ့ လက်နက်ကိုင်စစ်ပွဲတွေ လွတ်လပ်ရေးရဲ့ ဖွားဖက်တော်အဖြစ် ရှင်သန်နေကြတုန်းပါပဲ။ ဒီလက်နက်ကိုင် ပဋိပက္ခနဲ့ အတူ နယ်စပ်ယိုပေါက်တွေ၊ သယံဇာတပြုန်းတီးမှုတွေ၊ တရားမ၀င် ကူးသန်းရောင်းဝယ်မှုတွေ ရှိနေခဲ့ပါတယ်။ ဒီနိုင်ငံထဲ ခိုးဝင် သစ်တွေ ခိုးထုတ်ခဲ့ကြတဲ့ တရုတ်နိုင်ငံသားတွေရဲ့ ဖြစ်စဉ်နဲ့အတူ ဒီနယ်မြေ၊ ဒီနယ်စပ်မှာ ဘာကြောင့် ဒီလိုဖြစ်နေတာလဲ ပြောရရင် စစ်ဘုရင်ဝါဒနဲ့ တစ်ဗိုလ်တစ်မင်း စစ်ခင်းနေကြတဲ့ လက်နက်ကိုင်အဖွဲ့အစည်းတွေကြောင့် ဒီနယ်မြေတွေကိ်ု မစိုးမိုးနိုင်တာကြောင့်ပဲ ဖြစ်ပါတယ်။ နယ်မြေ စိုးမိုးနိုင်ဖို့ ဘာလုပ်ကြရမလဲ။ ရေရှည် လုပ်ဆောင်သွားရမယ့် ကိစ္စ ဖြစ်ပါတယ်။
အချုပ် တင်ပြချက်
ခေါင်းဆောင်လုပ်သူတွေအနေနဲ့ ခက်ခဲတဲ့ ဆုံးဖြတ်ချက်တွေကို ကြိမ်ဖန်များစွာ ကြုံရလေ့ ရှိပါတယ်။ ဒီလို ဆုံးဖြတ် ချက်တွေ ချမှတ်ရာမှာ အဓိကအချက်က ကိုယ့်နိုင်ငံ၊ ကိုယ့်ပြည်သူတွေရဲ့ အကျိုးစီးပွားကို အလေးအနက် ထားရမှာ ဖြစ်ပါတယ်။ တစ်ခါတစ်ရံမှာ ကိုယ့်နိုင်ငံကောင်းဖို့အတွက် လူထု မကြိုက်နိုင်တဲ့ ဆုံးဖြတ်ချက်တွေလည်း ချမှတ်ရတာမျိုး ရှိပါတယ်။ မြစ်ဆုံလို၊ ကိုးကန့်လို ကိစ္စရပ်တွေကတော့ ကိုယ့်နိုင်ငံ၊ ကိုယ့်ပြည်သူရဲ့ တစ်မျက်နှာတည်းကို ကြည့်ခဲ့တာ ဖြစ်ပါတယ်။ ထုတ်ဖော်မပြောသာတဲ့ အကြောင်းအချက်တွေ ရှိနေသေးပေမယ့်လည်း အခုအချိန်မှာတော့ ဒီဇာတ်လမ်းကို ဒီပမာဏ ဒီမျှလောက်ပဲ အလေးအနက်ထား ရှင်းပြချင်ပါတယ်။ နားလည်နိုင်ကြပါစေ။
No comments:
Post a Comment