Latest News

CREDIT

သတင်းစုံပျော်ဝင်အိုးကြီးတွင် ဖော်ပြထားသည့် သတင်း၊ဓာတ်ပုံများသည် သက်ဆိုင်သူများ၏မူပိုင်သာဖြစ်ကြောင်း အသိပေးအပ်ပါသည်။

Saturday, August 19, 2017

ဟောလိဝုဒ်မှာ



ဟောလိဝုဒ်မှာ ရုပ်သံ နဲ့ ရုပ်ရှင် မင်းသား၊ မင်းသမီး လုပ်တဲ့သူတွေဟာ audition လို့ခေါ်တဲ့ သရုပ်ဆောင် ရွေးချယ်ခံတဲ့ အဆင့်ကို မကျော်ဖြတ်ပဲ နဲ့ မင်းသား၊ မင်းသမီး ဖြစ်မလာကြပါဘူး။ အတူတူပါပဲ။ ဒါရိုက်တာ လုပ်တဲ့ သူတွေလည်း casting လို့ ခေါ်တဲ့ သရုပ်ဆောင်ရွေးချယ်တဲ့ အဆင့်ကို မကျော်ဖြတ်ပဲ နဲ့ ဒါရိုက်တာ ဖြစ်မလာကြပါဘူး။ ဒါရိုက်တာတွေက Casting Calls တွေခေါ်ရတယ်။ သရုပ်ဆောင်တွေက သူတို့ရဲ့ Acting Reel တွေ၊ Resume တွေ နဲ့အတူ လျှောက်လွှာတင်ကြတယ်။ စိတ်ဝင်စားတဲ့ သူတွေကို ပဏာမ အနေနဲ့ လူတွေ့ပြီး သရုပ်ဆောင်ရွေးကြတယ်။ အဲဒီအထဲကမှ ဇာတ်ကောင် နဲ့ အလိုက်ဖက်ဆုံး နဲ့ သရုပ်ဆောင် အကောင်းဆုံး သူတွေကို ပြန်ခေါ် (Call Back) ကြတယ်။ သရုပ်ဆောင်တွေအနေနဲ့ audition အတွေ့အကြုံရှိထားမှ ကိုယ့်ဘက်က ဘာတွေလိုတယ်။ ဘာတွေပြင်ဆင်ရမယ်ဆိုတာကို သိမှာ။ ဒါရိုက်တာ လုပ်တဲ့သူတွေ ဘက်ကလည်း casting လုပ်ဖူးမှ ဇာတ်ကားအတွက် မှန်ကန်တဲ့ သရုပ်ဆောင်တွေကို ဘယ်ပုံ ဘယ်နည်း နဲ့ ရွေးရမလဲဆိုတာကို casting အတွေ့အကြုံအရ တဖြည်းဖြည်း နဲ့ သိလာမှာ။

Audition မှာ အကောင်းဆုံး လုပ်ပြနိုင်တဲ့ မင်းသား၊ မင်းသမီးတွေ တောင်မှ စိတ်ချရသေးတာမဟုတ်ဘူး။ တကယ့်ရိုက်ကွင်းရောက်ရင် မီးရောင်တွေ၊ ကင်မရာတွေ၊ တခြားစက်ပစ္စည်းတွေ နဲ့ လူတွေအများ ကြီး ရှေ့မှာ ရှိန်ပြီးတော့ အယောင် ယောင် အမှားမှား ဖြစ်တတ်ကြ သေးတာ။ Dialogue တွေ မေ့လို့ ခဏခဏ ပြန်ပြန်ပြီး ရိုက်ရသေးတာ။

ဟောလိဝုဒ်မှာ ဘယ်သူကမှ “မင်းက မင်းသားရုပ် ပေါက်တယ်။ နင်က မင်းသမီးရုပ်ပေါက်တယ်” လို့ မပြောကြဘူး။ ဟောလိဝုဒ်မှာ သရုပ်ဆောင်တိုင်းက မင်းသား၊ မင်းသမီးချည်းပဲ။ သရုပ်ဆောင်တိုင်းက ဇာတ်ပို့ဇာတ်ရံတွေချည်းပဲ။ အဲဒီလို ကိုယ် နဲ့ အံဝင်ခွင်ကျဖြစ်မယ့် ဇာတ်ရုပ်အပေါ်မူတည်ပြီး တစ်လှည့်စီဖြစ်နေတာ။ အသက်အရွယ်တွေ၊ ရုပ်ရည်တွေ နဲ့ မဆိုင်ဘူး။ ရုပ်ဆိုးလည်း ဇာတ်လမ်းထဲက အဓိက ဇာတ်ကောင်ရဲ့ ဇာတ်ရုပ်နဲ့ ပီပြင်အောင် လုပ်ပြနိုင်ရင် မင်းသား၊ မင်းသမီး အဖြစ် အရွေးခံရမှာပဲ။ ဟောလိဝုဒ်မှာ မင်းသား၊ မင်းသမီးဖြစ်ဖို့ ရုပ်ချောဖို့မလိုသလို၊ ပိုက်ဆံရှိဖို့ လည်း မလိုဘူး။ ကိုယ်လုပ်တဲ့အလုပ်ပေါ်မှာ နိုင်နင်းနင်း နဲ့ ပီပီပြင်ပြင် လုပ်နိုင်မယ်။ ကိုယ့်ဘက်က လိုအပ်တဲ့၊ လုံလောက်တဲ့ ကြိုတင် ပြင်ဆင်မှုတွေ ကြိုပြီး လုပ်ထားနိုင်ရင် ဖြစ်တယ်။

ဟောလိဝုဒ်မှာရှိတဲ့ သရုပ်ဆောင်တိုင်း၊ သရုပ်ဆောင်တိုင်း audition process ကို ဖြတ်သန်းပြီးမှ သရုပ်ဆောင် ဖြစ်လာကြတာမို့လို့ ဟောလိဝုဒ်မှာ မင်းသား၊ မင်းသမီးအလွှာတို့၊ ဇာတ်ပို့ဇာတ်ရံအလွှာတို့ ဆိုတာ မရှိဘူး။ Casting Calls တွေခေါ်တဲ့အခါမှာ ဇာတ်ကောင်ရဲ့ သဘာဝ (Character Breakdown)၊ ဇာတ်ကောင်ရဲ့ အသားအရောင်၊ အရပ်အမောင်း၊ ကိုယ်လုံးကိုယ်ပေါက် စသဖြင့် တခါတည်း ဖော်ပြထားပြီးခေါ်တာ ဖြစ်တဲ့ အတွက်ကြောင့် ကိုယ့်ကိုကိုယ် အဲဒီဇာတ်ကောင်နဲ့ လိုက်ဖက်မယ်လို့ ထင်ရင်၊ ကိုယ့်ကိုကိုယ် အဲဒီဇာတ် ကောင်နေရာမှာ ပီပီပြင်ပြင် သရုပ်ဆောင်နိုင်မယ်လို့ ယုံကြည်မှု အပြည့်ရှိရင် လျှောက်လွှာတင်လိုက်တာပဲ။ သရုပ်ဆောင်ရွေးချယ်ရေး အေဂျင်စီတွေဆိုတာကလည်း လက်ချိုးရေလို့တောင် မလောက်ဘူး။ သရုပ်ဆောင်ရွေးချယ်ပွဲတွေ ဆိုတာကလည်း နေရာတိုင်းမှာ နေ့တိုင်းရှိတယ်။

နာမည်ကြီး ဒါရိုက်တာတွေ ရိုက်ကူးမယ့် ရုပ်ရှင်ဇာတ်ကားကြီးတွေ အတွက် သရုပ်ဆောင်ရွေးချယ်ပွဲတွေ လုပ်တဲ့အခါဆိုရင် သရုပ်ဆောင်ရွေးချယ်ရေး (audition) လုပ်မယ့် အေဂျင်စီရုံးခန်းအရှေ့မှာ မနက်မိုးမလင်းခင် ၄ နာရီလောက်ကတည်းက သရုပ်ဆောင် အရွေးချယ်ခံမယ့် သူတွေ တန်းစီပြီးစောင့်နေကြတာ။ ဘာနဲ့ တူသလဲဆိုတော့ မြန်မာနိုင်ငံမှာ အဝေးသင်တက္ကသိုလ် စာသင်နှစ်မစခင် ကျောင်းအပ်နှံတဲ့အခါမှာ ကျောင်းသားရေးရာ ဌာနတွေမှာ ကျောင်းသားတွေ ကြိတ်ကြိတ်တိုးပြီး ကျက်ပျံမကျ စည်းကားနေသလိုပါပဲ။

ကျနော်က များသောအားဖြင့် ညလုံးပေါက် Uber မောင်းတာဆိုတော့ တခါတလေ မနက် ၆ နာရီလောက်မှာ အဲဒီအေဂျင်စီတွေရှေ့မှာ ခရီးသည်ရတယ်။ သရုပ်ဆောင်ရွေးချယ်ပွဲကနေ ကိုယ့်အလှည့်ပြီးလို့ အိမ်ပြန်မယ့် သူတွေကို အိမ်ပြန်ပို့ပေးရတယ်။ အာရှသား သရုပ်ဆောင် တစ်ချို့ကိုလည်း တွေ့တယ်။ လမ်းမှာ ကားမောင်း ရင်းနဲ့ audition နဲ့ ပက်သက်ပြီး သူတို့ရဲ့ စိတ်လှုပ်ရှားစရာ ကောင်းတဲ့ အတွေ့အကြုံ လေးတွေကို ပြန်ပြောပြကြတယ်။

Audition ပွဲကိုသွားရ တယ်ဆိုတာ အမေရိကန် ပြည်ထောင်စုမှာ ဒေါ်လာသန်းချီပေါက်နိုင်တဲ့ ထီတွေဖြစ်တဲ့ Power Ball တို့၊ Mega Million တို့ကို ထိုးရသလိုပါပဲတဲ့။ Call Back Date မှာ အေဂျင်စီတွေဘက်က ကိုယ့်ကို ဖုန်းနဲ့ ဖြစ်စေ၊ အီးမေးလ် နဲ့ဖြစ်စေ ပြန်ပြီး ဆက်သွယ်လာမလားဆိုပြီး စောင့်ရတာက ထီမထွက်မချင်း ပေါက်ဂဏန်းကို ရင်ခုန်စွာ နဲ့ စောင့်ရတဲ့ အဖြစ်နဲ့ အတူတူပါပဲတဲ့။

လာမယ့်နှစ်မှာ ရုံတင်မယ့် Ready Player One ဇာတ်ကားထဲမှာ ဇာတ်ကောင် Daito အဖြစ် သရုပ်ဆောင်တဲ့ မြန်မာမင်းသား အ၀င်း လည်း ဒီအဆင့်တွေကို ဖြတ်ကျော်ခဲ့ရတာပါဘဲ။ Satacracy 88 ရုပ်သံဇာတ်လမ်းတွဲမှာ ဇာတ်ကောင် Arial Zim အဖြစ် သရုပ်ဆောင်ပြီး Emmy Award ကို ဆွတ်ခူးခဲ့တဲ့ ဟောလိဝုဒ်က မြန်မာ သရုပ်ဆောင် မင်းသား Adrian Zaw လည်း ဒီအဆင့်တွေကို ဖြတ်ကျော်ခဲ့ရတာ ပါဘဲ။

ဟောလိဝုဒ်လို နေရာမျိုးမှာ ကိုယ့်ကိုကိုယ် သရုပ်ဆောင်ပိုင်းမှာ အရမ်းကောင်းနေတဲ့သူလို့ ထင်ရင်၊ တစ်ချိန် တည်းမှာပဲ ကိုယ့်လို သရုပ်ဆောင် ကောင်းတဲ့ သူတွေ တစ်ထောင်၊ တစ်သောင်းမကရှိတယ်လို့ တွေးထားပြီး ကြိုတင်ပြင်ဆင်မှုတွေ အများကြီး လုပ်ထားရမှာပါ။ Audition ပွဲတွေကို များများသွားရမှာပါ။

အလားတူပါပဲ။ ဒါရိုက်တာ လုပ်မယ့်သူ တစ်ယောက်အတွက် ဆိုရင်လည်း ဒါရိုက်တာ မလုပ်ခင် သရုပ်ဆောင် ရွေးချယ်ရေး ဒါရိုက်တာ (Casting Director) အဆင့်ကို မကျော်ဖြတ်ဘဲ၊ audition ပွဲတွေ မလုပ်ဘဲ နဲ့ ဒါရိုက်တာကောင်း တစ်ယောက် ဖြစ်ဖို့ မလွယ်ပါဘူး။ ဒါရိုက်တာ တစ်ယောက်အနေနဲ့ Casting အတွေ့အကြုံတွေ များများရှိထားမှ နောက်ပိုင်းမှာ ကိုယ်ရိုက်ကူးမယ့် ဇာတ်လမ်းတွေထဲက သက်ဆိုင်ရာ ဇာတ်ကောင် နေရာတွေအတွက် မှန်ကန်သင့်တော်တဲ့ သရုပ်ဆောင်တွေကို ရွေးချယ်တတ်လာမှာပါ။
Kyaw Thein Kha

No comments:

Post a Comment