အဲဒီရုပ်ရှင်က အမေရိကန်နိုင်ငံမှာရှိနေတဲ့ ကျန်းမာရေးစနစ်ကို ပြသဝေဖန်ထားတဲ့ ရုပ်ရှင်ဖြစ်ပါတယ်။ ရုပ်ရှင်ရဲ့အစပိုင်းပြကွက်တွေထဲမှာ ကျန်းမာရေးအာမခံမရှိလို့ ဆေးရုံ၊ ဆေးခန်းမသွားနိုင်ဘဲ ရရှိထားတဲ့ဒဏ်ရာတွေကို မိမိဘာသာ အပ်နဲ့ချုပ်နေရတဲ့သူတစ်ယောက်ကို တွေ့ရတာမှတ်မိနေပါသေးတယ်။ အမေရိကန်နိုင်ငံကို အထင်ကြီးပြီး အဲဒီမှာပညာသင်ကြားခွင့်ရဖို့ ကြိုးစားခဲ့တာမို့ ဒီလိုအနေအထားမျိုးတွေ အဲဒီမှာရှိနေလိမ့်မယ်လို့ အရင်ကယောင်လို့တောင် မတွေးခဲ့မိဖူးပါဘူး။ အဲဒီရုပ်ရှင်ကို ကြည့်အပြီးမှာ ကျွန်မအလွန်အမင်း အံ့အားသင့်ပြီး အမေရိကန်နိုင်ငံရဲ့ ကျန်းမာရေးစနစ်ထဲက အားနည်းချက်တွေကို အတန်အသင့် နားလည်သဘောပေါက်သွားခဲ့ပါတယ်။
အမေရိကန်နိုင်ငံရဲ့ ကျန်းမာရေးစနစ်က အစိုးရကချည်း တာဝန်ယူထားတာမဟုတ်ဘဲ ကျန်းမာရေးအာမခံကုမ္ပဏီတွေနဲ့ ချိတ်ဆက်ထားတာပါ။ ကျန်းမာရေးအာမခံတွေကို လူတိုင်းဝယ်ယူထားရှိနိုင်တဲ့ အနေအထားမှာမရှိပါဘူး။ ဒါ့အပြင် ၀ယ်ယူထားသူတွေမှာလည်း လှည့်ဖြားမှုများစွာကို ကြုံရတတ်ပါတယ်။ ဘယ်လိုရောဂါတွေရှိနေရင် အာမခံဝယ်ခွင့်မပေးဘူးဆိုတာမျိုးတွေလည်း ရှိတတ်ပါတယ်။ ကျန်းမာရေးအာမခံထားသူတွေ အစအဆုံး အကုန်အစင် မဖတ်နိုင်အောင် ရှည်လျားစွာရေးသားထားတဲ့ စာချုပ်စာတမ်းတွေရဲ့ သဘောတူညီချက်တွေထဲမှာ ဖမ်းထားတဲ့အရာလေးတွေလည်း ရှိတတ်ပါတယ်။ အာမခံဝယ်ထားပေမယ့် တကယ်တမ်း ရောဂါကြီးကြီးမားမားဖြစ်လို့ ငွေကြေးအမြောက်အမြားအကုန်ခံပြီး ဆေးကုသရတော့မယ်ဆိုရင် အဲဒါတွေကမပါဘူး၊ ဒါမှမဟုတ် ငွေကြေးပမာဏ ဘယ်လောက်အထိပဲ ပေးမယ်လို့ပြောထားတာဆိုတာမျိုးတွေကို ရင်ဆိုင်ရတတ်ပါတယ်။ အမေရိကန်နိုင်ငံမှာ တစ်ခုခုဝယ်မယ်ဆိုရင် ရေးထားတဲ့ သဘောတူညီချက်တွေကို အစအဆုံး သိနားလည်အောင်ဖတ်နိုင်မှ တော်ကာကျပါသတဲ့။
ကျန်းမာရေးအာမခံမရှိဘဲ ဆေးကုသမယ်ဆိုရင်လည်း ဆေးကုသစရိတ်တွေက သာမန်လူတွေတတ်နိုင်တဲ့ အနေအထားမှာမရှိအောင်ကို များပြားလှပါတယ်။ ကျန်းမာရေးအာမခံစနစ်ကို ပြုပြင်ပြောင်းလဲဖို့ ဆောင်ရွက်သူတွေရှိပေမယ့် အဲဒါကိုဆန့်ကျင်ကန့်ကွက်သူတွေလည်း ရှိတာကြောင့် ဆောင်ရွက်လို့မရခဲ့တဲ့ ဖြစ်ရပ်တွေရှိခဲ့ပါတယ်။ အလုပ်ကောင်းကောင်းရှိသူတွေက အလုပ်ကကျန်းမာရေး အာမခံထားပေးတာကို ရနေကြတာမို့ သူတို့အတွက်က အဆင်ပြေပါတယ်။ အာမခံမရှိသူတွေအားလုံး ဆေးကုသခွင့်ရအောင်ဆိုတဲ့ အနေအထားကိုပြောင်းလဲရင် သူတို့အခွန်အခတွေ ထပ်ပေးရနိုင်ပါတယ်။ ဒါကြောင့်မလိုလားပါဘူး။ ကျန်းမာရေးအာမခံနဲ့ လုပ်စားနေကြတဲ့ ကုမ္ပဏီတွေကလည်း အလွန်အင်အားကောင်းတဲ့ အတိုက်အခံတွေ ဖြစ်ပါတယ်။
အတန်းထဲမှာရှိတဲ့ ကျွန်မနဲ့ပညာသင်ကြားဖက်တွေအားလုံးက နိုင်ငံပေါင်းစုံကလာကြတဲ့ ကျောင်းသား၊ ကျောင်းသူတွေပါ။ ကျွန်မတို့လို အမေရိကန်နိုင်ငံအစိုးရကပေးတဲ့ ပညာသင်ဆုနဲ့ လာတဲ့သူတွေရှိသလို၊ အခြားနိုင်ငံအစိုးရတွေကပေးတဲ့ ပညာသင်ဆုတွေနဲ့ ရောက်နေသူတွေလည်းရှိပါတယ်။ ဂျပန်နိုင်ငံက အစိုးရ၀န်ထမ်း ကျောင်းသားတစ်ဦးပါဝင်တာကို မှတ်မိပါတယ်။ ကျွန်မတို့နိုင်ငံက လူတချို့တွေးသလိုတွေးမယ်ဆိုရင် ဒီလိုကျောင်းသား ကျောင်းသူတွေရှေ့မှာ ကိုယ့်နိုင်ငံရဲ့ အားနည်းချက်တွေကို ထုတ်ပြတော့ အမေရိကန်နိုင်ငံအစိုးရရဲ့ သိက္ခာမကျဘူးလားလို့ မေးစရာရှိပါတယ်။ တကယ်တော့ အတန်းထဲမှာမပြလည်း ရုပ်ရှင်ကဈေးကွက်ထဲမှာရှိနေတာပါပဲ။ အခုဆိုရင် ယူကျု (ပ်) (Youtube) ထဲမှာ Sicko တစ်ကားလုံးကို အစအဆုံးကြည့်လို့ရနေပါပြီ။ သက်ဆိုင်တဲ့ သတင်းအချက်အလက်တွေကလည်း အင်တာနက်ထဲမှာ၊ မီဒီယာထဲမှာ၊ ဆိုရှယ်မီဒီယာထဲမှာ စသဖြင့်နေရာပေါင်းစုံမှာရှိနေတာမို့ ဘာမှပိုဆိုးသွားစရာ အကြောင်းမရှိပါဘူး။ ဒါ့အပြင်ကမ္ဘာပေါ်က ဘယ်နိုင်ငံ ဘယ်အစိုးရမှ စင်းလုံးချော မဟုတ်ပါဘူး။ အားနည်းချက်တွေ၊ ထောက်ပြဝေဖန်စရာတွေ နေရာတိုင်းမှာရှိပါတယ်။ ကျွန်မတို့ကို သင်ကြားပေးတဲ့ အမေရိကန်နိုင်ငံသူ ဆရာမကိုလည်း ကိုယ့်နိုင်ငံရဲ့ အားနည်းချက်တွေကို ရိုးသားပွင့်လင်းစွာ သိနားလည်စေခဲ့တဲ့အတွက် ပိုပြီးလေးစားဖြစ်ပါတယ်။ သူမရဲ့စာသင်ခန်းထဲက မျှော်လင့်ချက်က ကျွန်မတို့ကို အင်္ဂလိပ်စာပိုမိုကျွမ်းကျင်လာစေဖို့၊ အမေရိကန်နိုင်ငံရဲ့ ယဉ်ကျေးမှုနဲ့ အနေအထားတွေကို အမှန်အတိုင်း သိရှိနားလည်လာစေဖို့ ဖြစ်ပါတယ်။
ဘွဲ့လွန်တန်းတွေကို စတက်ရတဲ့အချိန်မှာလည်း အတန်းထဲက ဆွေးနွေးမှုတွေမှာ အမေရိကန်နိုင်ငံရဲ့ ပြည်သူ့ကျန်းမာရေးစနစ်တွေ၊ အနေအထားတွေကို ဥပမာပေးပြီး ဆွေးနွေးကြတာမို့ အဲဒီအထဲမှာ ထောက်ပြဝေဖန်မှုတွေ အမြဲတမ်းပါဝင်နေပါတယ်။ ကျွန်မတက်ခဲ့တဲ့ကျောင်းက အစိုးရကျောင်းဖြစ်ပြီး အလုပ်တစ်ဖက်နဲ့ ကျောင်းတက်တဲ့ ကျောင်းသား ကျောင်းသူများပြားတဲ့ ကျောင်းဖြစ်ပါတယ်။ အခြားနိုင်ငံတွေက ကျောင်းလာတက်သူတွေလည်း များပါတယ်။
ကျွန်မအကြိုက်ဆုံး အတန်းတစ်တန်းကတော့ လက်ရှိမှာ အဲဒီတက္ကသိုလ်က ပြည်သူ့ကျန်းမာရေးကျောင်းမှာ ကျောင်းအုပ်ဖြစ်နေပြီဖြစ်တဲ့ ဒေါက်တာမိုက်ကယ်အဲရစ်ဆင်ရဲ့ ပြည်သူ့ကျန်းမာရေး၏ လူမှုရေးနှင့် အပြုအမူဆိုင်ရာ ရှုထောင့်များဆိုတဲ့ အတန်းဖြစ်ပါတယ်။ အဲဒီအတန်းမှာ သူကသူတစ်ယောက်တည်းမသင်ဘဲ အခြားပညာရပ်နယ်ပယ်က ဆရာ၊ ဆရာမတွေကိုပါ အလှည့်ကျဖိတ်ခေါ်ပြီး သင်ကြားပို့ချစေပါတယ်။ ဥပဒေပညာရှင်၊ မှုခင်းပညာရှင်၊ စိတ်ပညာရှင်၊ စီးပွားရေးပညာရှင်၊ မနုဿဗေဒပညာရှင်၊ လူမှုရေးပညာရှင်တွေ ပါဝင်တာကို မှတ်မိပါတယ်။ သူတို့က အဲဒီပညာရပ်တွေနဲ့ ပြည်သူ့ကျန်းမာရေး ဆက်နွှယ်နေမှုကို ကျွန်မတို့သိနားလည်အောင် သင်ကြားပို့ချပေးခဲ့ကြပါတယ်။
ကျွန်မတို့ ဘယ်လိုမှမမြင်နိုင်ခဲ့တဲ့ ရှုထောင့်တွေကို မြင်ဖြစ်လာအောင် တဖြည်းဖြည်းချင်း ဆွဲခေါ်သွားခဲ့တာပါ။ အခုအချိန်မှာ ပြည်သူ့ကျန်းမာရေးနဲ့ ဆက်စပ်မနေတဲ့ အလုပ်ဆိုတာမရှိသလောက်ပဲလို့ မြင်ဖြစ်လာတာ အဲဒီအတန်းရဲ့ ကျေးဇူးပါ။ အတန်းထဲမှာသင်နေတဲ့ ဘာလုပ်သင့်တယ်ဆိုတဲ့ သီအိုရီတွေကို လက်တွေ့မှာ အမှန်တကယ် ဖြစ်ပျက်နေတာတွေနဲ့လည်း နှိုင်းယှဉ်ချိန်ထိုးပြလေ့ရှိပါတယ်။ တစ်ခါတစ်ရံမှာ ကျွန်မတို့ကျောင်းသား၊ ကျောင်းသူတွေ ပါဝင်ဆွေးနွေးရင်း အလွန်အမင်း စိတ်ပျက်လက်ပျက် ဖြစ်လာကြတဲ့အထိပါပဲ။ အဲဒီလိုဖြစ်လာပြီဆိုရင် ကျွန်မတို့ရဲ့ဆရာက ကျွန်မတို့ကိုအခုလိုပြောလေ့ရှိပါတယ်။ ကျွန်မမှတ်မိသလောက် အနီးစပ်ဆုံးစကားလုံးတွေက “ငါ့တာဝန်က မင်းတို့အားလုံး ဒီအတန်းပြီးဆုံးသွားချိန်မှာ စိတ်ဓာတ်ကျသထက် ကျသွားအောင် ဆောင်ရွက်ဖို့ပဲ။ မှားနေတာတွေကိုသိမှ မှန်အောင်ပြင်နိုင်မယ်။ လက်ရှိအနေအထားကို မကျေမနပ်ဖြစ်မှ ပိုတိုးတက်အောင် ဆောင်ရွက်ချင်စိတ်ပေါ်မယ်။ ဒါမှမင်းတို့ခေါင်းဆောင်ပိုင်းနေရာတွေကို ရောက်လာတဲ့အခါမှာ လက်ရှိအနေအထားထက် ပိုကောင်းအောင် ဆောင်ရွက်နိုင်မယ်” တဲ့။ ဒါကကျွန်မဆရာရဲ့ စာသင်ခန်းထဲက မျှော်လင့်ချက်ဖြစ်ပါတယ်။ အဲဒီအတန်းထဲမှာတော့ အမေရိကန်နိုင်ငံက ကျောင်းသား၊ ကျောင်းသူတွေက အများစုဖြစ်ပါတယ်။
ကျွန်မတို့ ကျောင်းတက်နေစဉ်မှာ မြန်မာနိုင်ငံက သူငယ်ချင်းအချို့က မြန်မာနိုင်ငံအကြောင်းပြောရင် အကောင်းတွေပဲပြောပါလို့ ပြောဖူးပါတယ်။ ကျွန်မကအကောင်းတွေချည်းပြောလို့ရော သူတို့ကအင်တာနက်ထဲက သတင်းတွေ၊ မီဒီယာထဲကသတင်းတွေကို မမြင်၊ မကြားဘဲရှိကြမှာမို့လားလို့ တွေးမိပါတယ်။ ရိုးသားစွာ ပြောဆိုဆွေးနွေးကြ၊ ဖလှယ်ကြတာ အကောင်းဆုံးပါပဲ။ ဖုံးကွယ်ခြင်း၊ ဟန်ဆောင်ခြင်းတွေက စိတ်တွေကိုပင်ပန်းစေတဲ့အပြင် ဘယ်သူ့ကိုမှ အသိပညာဗဟုသုတ မရရှိစေပါဘူး။ မိမိကိုသာ အများကယုံကြည်မှုတွေကင်းမဲ့ပြီး အထင်သေးလာမှာ ဖြစ်ပါတယ်။
အမေရိကန်နိုင်ငံမှာ အကောင်းတွေ အများကြီးရှိပါတယ်။ ဒါပေမဲ့အဆိုးတွေလည်း ကင်းစင်မနေပါဘူး။ ကျန်းမာရေးစနစ်ထဲမှာလည်း မယုံနိုင်လောက်အောင် ဆိုးရွားတာတွေရှိနေသလို အားကျအတုယူရလောက်အောင် ကောင်းမွန်တာတွေလည်းရှိပါတယ်။ လူကြည့်များတဲ့ ဟောလိဝုဒ်ရုပ်ရှင်တွေမှာ ပြနေတဲ့အရာတွေအားလုံးက အမေရိကန်နိုင်ငံရဲ့ ယဉ်ကျေးမှုအစစ်အမှန်တွေ မဟုတ်ပါဘူး။ အဲဒါတွေကို စာသင်ခန်းထဲက ပို့ချမှုတွေကတစ်ဆင့် အဓိကသိခွင့်ရခဲ့တာပါ။
ကျွန်မတို့လို အမေရိကန်နိုင်ငံအစိုးရရဲ့ ပညာသင်ဆုပေးခြင်းခံရတဲ့ ကျောင်းသား၊ ကျောင်းသူတွေအပေါ် သူတို့ရဲ့မျှော်လင့်ချက်တွေထဲမှာ အမေရိကန်နိုင်ငံရဲ့ ဖြစ်ရပ်မှန်အနေအထားတွေကို ကျွန်မတို့ကတစ်ဆင့် ကျွန်မတို့နိုင်ငံကလူတွေ သိရှိနားလည်စေဖို့ဆိုတဲ့အချက်လည်း ပါဝင်ပါတယ်။ အဲဒီလိုသိနားလည်မှ အမေရိကန်နိုင်ငံမှာ နေထိုင်နေကြသူတွေကို သူတို့လည်း ကျွန်မတို့လိုလူသားတွေပဲရယ်လို့ ကိုယ်ချင်းစာနားလည်နိုင်မယ်။ အလွန်အမင်း အထင်သေးခြင်း၊ အလွန်အမင်း အထင်ကြီးခြင်းတွေ လျော့ကျလာမယ်။ လူသားအချင်းချင်းကြားထဲမှာ မုန်းတီးမှုတွေ၊ ခါးသီးမှုတွေ၊ ကြောက်ရွံ့မှုတွေ၊ မလိုလားမှုတွေ လျော့ကျပြီး ကမ္ဘာကြီး ပိုမိုငြိမ်းချမ်းလာစေဖို့အတွက် ဖြစ်ပါတယ်။
ကျွန်မသိခွင့်ရခဲ့တာက ၂၀၀၈-၂၀၁၀ ကအမေရိကန်နိုင်ငံပါ။ လက်ရှိမှာတော့ ပြောင်းလဲမှုများစွာရှိနေပြီလို့ ထင်ပါတယ်။ သို့ပေမဲ့စာသင်ခန်းတွေထဲမှာ ဖြစ်ရပ်တွေကို အမှန်အတိုင်းသင်ကြားခွင့်၊ ထောက်ပြဝေဖန်ခွင့်၊ လေ့လာဆွေးနွေးခွင့်တွေကတော့ အဲဒီတုန်းကအတိုင်း ဆက်လက်ကျန်ရှိနေဆဲဖြစ်မယ်လို့ ယူဆမိပါတယ်။
Writerကျွန်း
eleven Media Group
No comments:
Post a Comment