Latest News

CREDIT

သတင်းစုံပျော်ဝင်အိုးကြီးတွင် ဖော်ပြထားသည့် သတင်း၊ဓာတ်ပုံများသည် သက်ဆိုင်သူများ၏မူပိုင်သာဖြစ်ကြောင်း အသိပေးအပ်ပါသည်။

Friday, May 12, 2017

“ချမ်းသာစွာ အိပ်စက်ရခြင်း”

  
“ချမ်းသာစွာ အိပ်စက်ရခြင်း”
•••••••••••••••••••••••••••••••••••
မြတ်စွာဘုရားရဲ့ အဓိပ္ပာယ်က ချမ်းချမ်းသာသာ
အိပ်စက်ရခြင်းဆိုသည်မှာ နှလုံးသား အပူငြိမ်းပြီးတော့
ကိလေသာခပ်သိမ်း ငြိမ်းနေတဲ့ပုဂ္ဂိုလ်ရဲ့ အိပ်စက်မှုသာလျှင် 
ချမ်းချမ်းသာသာ အိပ်စက်ရခြင်း လို့ ဆိုနိုင်တယ်။ 
ကိလေသာအပူတွေရှိနေတဲ့ ပုဂ္ဂိုလ်ရဲ့ အဆင့်အတန်း
မြင့်တဲ့ အိပ်ရာကြီးတွေပေါ်မှာ အိပ်ခြင်းဟာ 
အပြင်ပန်းအားဖြင့် ဇိမ်ကျတယ်၊ ချမ်းသာတယ်လို့
ဒီလို ထင်ရသော်လည်း အတွင်းအပူတွေ 
နှိပ်စက်နေသည့်အတွက်ကြောင့် ပူလောင်မှုတွေနဲ့ 
လုံးပမ်းနေရလို့ သူ့ရဲ့ စိတ်နှလုံးဟာ အေးချမ်းမှုမရှိဘူး။
စိတ်နှလုံး အေးချမ်းမှုမရှိသည့်အတွက်ကြောင့် အဲဒီပုဂ္ဂိုလ်ဟာ
ချမ်းချမ်းသာသာ အိပ်စက်ရတယ်ဆိုတဲ့အဓိပ္ပာယ်မရပါဘူးတဲ့။
ဆင်းဆင်းရဲရဲပဲ အိပ်စက်ရပါတယ်။ 

တကယ်လည်းပဲ လောဘ၊ ဒေါသ၊ မောဟ ဆိုတာတွေရဲ့
အနှောင့်အယှက်ကြောင့် ထိုပုဂ္ဂိုလ်ဟာ ဘယ်တော့မှ 
ချမ်းချမ်းသာသာ အိပ်စက်ရမှာ မဟုတ်ဘူး။ 
စိတ်ထဲမှာ အလိုမကျမှုတွေနဲ့ လုံးထွေးပြီတော့ စိတ်နှလုံးဟာ
ပူပန်နေသည့်အတွက်ကြောင့် စိတ်ငြိမ်းချမ်းမှု ဆိုတာ 
လုံးဝမရနိုင်ဘူးတဲ့။

❖အေး၊ ဒါကြောင့်မို့ မြတ်စွာဘုရားသခင် ကိုယ်တော်မြတ်က
ချမ်းသာစွာ အိပ်စက်ရတယ်ဆိုတဲ့ တကယ့်အဓိပ္ပာယ်ဟာ
နှလုံးသား အေးချမ်းမှုရှိမှ ချမ်းသာစွာ အိပ်စက်ရတယ်။ 
ရာဂ၊ ဒေါသ၊ မောဟ စတဲ့ ကိလေသာတွေ ချုပ်ငြိမ်းမှ
သာလျှင် တကယ့်ကို အေးချမ်းတယ်ဆိုတာကို ပြောလို့ရမယ်။ 
ချမ်းသာစွာ အိပ်စက်ရတယ်ဆိုတဲ့ ပုဂ္ဂိုလ်ဟာ တကယ့်ကို 
ရာဂ၊ ဒေါသ၊ မောဟ ငြိမ်းချမ်းတဲ့ပုဂ္ဂိုလ်မှသာ ဖြစ်နိုင်တယ်ပေါ့။

အေး၊ လောကမှာ အိပ်မရလို့ အိပ်ဆေးသောက် 
အိပ်ရတဲ့ လူတွေကော မရှိဘူးလား။
အေး၊ သောကတွေ ဖြစ်နေလို့
တစ်ညလုံးအိပ်မပျော်ဘူးတဲ့။ အဲဒီအပူတွေကြောင့် 
အိပ်မရလို့ အိပ်ဆေးသောက်ပြီးတော့ အိပ်နေကြရတယ်။ 
အိပ်ဆေးဟာ တကယ့်အဖြေ မဟုတ်ဘူး။
တကယ့်အိပ်ဆေးကတော့ မြတ်စွာဘုရား ရဲ့
တရားတော်သာဖြစ်တယ်ပေါ့။ဘယ်အချိန်ပဲဖြစ်ဖြစ် 
ဒီတရားကို လိုက်နာကျင့်ကြံကြိုးကုတ် အားထုတ်မယ်
ဆိုလို့ရှိရင် လောဘတွေ လျော့ချနိုင်မယ်၊ ဒေါသတွေ 
လျော့ချနိုင်မယ်၊ မောဟတွေ လျော့ချနိုင်မယ်။
နောက်ဆုံး လောဘ၊ ဒေါသ၊ မောဟတွေကင်းပြီးတော့ 
နှလုံးသားရဲ့ ပူလောင်မှုတွေ အကုန်ကင်းသွားရင် 
ဘယ် နေရာနေနေ စိတ်နှလုံးဟာ အေးချမ်းနေမှာပဲ ဖြစ်တယ်။ 

ဒါကြောင့်မို့ တရားချစ်ခင် သူတော်စင် ပရိသတ်အပေါင်းတို့၊
တို့တစ်တွေဟာ စိတ်နှလုံး အေးချမ်း သာယာမှု ရှိမှသာလျှင်
ချမ်းသာစွာအိပ်စက်ရတယ် ဆိုတဲ့ အဓိပ္ပာယ်ကို အပြည့်အဝ 
ရကြရမှာဖြစ်တယ်။ သာမန်အားဖြင့် ကြည့်ပြီးတော့ 
တို့တစ်တွေဟာ ချမ်းသာစွာအိပ်စက်ရတယ်လို့
ဖြေလို့ရှိရင် မပြည့်စုံတဲ့ စကားမျိုးသာဖြစ်တယ်ပေါ့။
အေး၊ အဲဒီလို သဘောကျပြီးတော့ တို့တစ်တွေ 
ချမ်းချမ်းသာသာ အိပ်စက်ရခြင်းရဲ့အဓိပ္ပာယ်ပြည့်စုံအောင် 
ဘာလုပ်ရမလဲ။နှလုံးသားကို ပူလောင်စေတတ်တဲ့ 
ရာဂတွေ ဖယ်ရှားဖို့ ကြိုးစားရမယ်၊ ဒေါသတွေဖယ်ရှားဖို့
ကြိုးစားရမယ်။မောဟတွေ ဖယ်ရှားဖို့ ကြိုးစားရမယ်။ 

ကဲ၊ ကြိုးစားပြီဆိုတဲ့အခါမှာ 
❖ရာဂကို ဘာနဲ့ဖယ်ရှားမလဲ။
ရာဂကို ဖယ်ရှားဖို့ရာအတွက် နံပါတ်(၁)က 
ဘုန်းကြီးတို့တစ်တွေ ရာဂဟာ ဘာကြောင့်ဖြစ်နေသလဲ 
လို့ဆိုရင် တင့်တယ်မှုလို့ စိတ်က အာရုံပြုနေသည့်
အတွက်ကြောင့် “သုဘနိမိတ်”ကို အာရုံပြုထားသည့် 
အတွက်ကြောင့် ရာဂဟာ တိုးသည်ထက် တိုးလာတာ 
ဖြစ်တယ်။ ဒါကြောင့်မို့လို့ မတင့်တယ်ဘူးလို့ဆိုတဲ့ 
အသုဘကမ္မဋ္ဌဌာန်း (အေး၊ ဗမာစကားထဲမှာ အသုဘ 
ဆိုလို့ရှိရင် မသာသွားသွားပြီး သတိရနေတာမျိုး 
ဖြစ်တတ်တယ်နော်။ အဲဒါကိုပြောတာ မဟုတ်ဘူး။) ကို 
မိမိရို့ အသက်ရှင်လျက်ဖြစ်သော်လည်း ခန္ဓာကိုယ်မှာ 
တင့်တယ်မှုမရှိတာတွေကို ဆင်ခြင်စဉ်းစားရမယ်တဲ့။ 

ရွံရှာဖွယ်သဘောတွေကို ဆင်ခြင်စဉ်းစားတတ်ရမယ်။ 
ဘယ်လို ဆင်ခြင်စဉ်းစားတတ်ရမလဲ ဆိုရင် ကြည့်လေ။
ကိုယ့်ခန္ဓာကိုယ်ဟာ မတင့်တယ်ဘူး။ရွံစဖွယ်
ဆိုတာဟာ အလွယ်လေးနဲ့ စဉ်းစားလို့ရတယ်။ 
ကိုယ့် ကိုယ်ကို တစ်လ နှစ်လ ရေမချိုး၊မျက်နှာမသစ်ဘဲနဲ့
နေကြည့်ပေါ့။မွှေးကြိုင်တဲ့အနံ့ ထွက်မလား၊နံစော်တဲ့ 
အနံ့ထွက်လာမလား စဉ်းစားကြည့်ပေါ့။ ခန္ဓာကိုယ်ရဲ့ 
သဘာဝဟာ တကယ်တော့ လှပတင့်တယ်တာမဟုတ်ဘူး။
အပြင်က ဝတ်စားဆင်ယင်တာတို့၊ဖီးလိမ်းတာတို့ 
ဒါတွေကြောင့်မို့လို့ လူတွေဟာ လူကြားထဲမှာ 
ဝင်လို့ရတာနော်။ 

အေး၊ အဲဒီလို မတင့်မတယ် ရွံစဖွယ်သဘောတွေကို 
ဆင်ခြင်စဉ်းစားရင်းဖြင့်၊ အသုဘသညာကို နှလုံးသွင်းခြင်းဖြင့် 
ရာဂကို ဖယ်ရှားနိုင်တယ်တဲ့။ ရာဂကို လျှော့ချနိုင်တယ်။ 
ရာဂ လျော့ကျသွားတာနဲ့တစ်ပြိုင်နက် နှလုံးသားရဲ့
ပူလောင်မှုတွေဟာ လျော့ကျသွားမယ်။ လျော့ကျသွားတာနဲ့
တစ်ပြိုင်နက် ချမ်းချမ်း သာသာ အိပ်စက်ရဖို့ 
ဖြစ်ပေါ်လာလိမ့်မယ်။ 

❖ထို့အတူပဲ ဘုန်းကြီးတို့တစ်တွေရဲ့ နှလုံးသားထဲမှာ 
မုန်းတီးမှုတွေကို သိမ်းထားမယ်ဆိုလို့ရှိရင် နှလုံးသားဟာ 
အမုန်းတရားတွေ လွှမ်းမိုးနေသည့်အတွက်ကြောင့် 
ဘယ်တော့မှချမ်းသာမှာ မဟုတ်ဘူးတဲ့။ 
အဲဒီ အမုန်းတရားတွေကို ဖယ်ရှားနိုင်ဖို့အတွက် 
မေတ္တာသက်ဝင် ချစ်ခင်စေတတ်တဲ့ “မေတ္တာတရား”ကို 
ပွားများအားထုတ်ကြရမယ်။ မေတ္တာနှလုံးသားနဲ့ 
အစားထိုးပြီး နေနိုင်မှသာလျှင် အမုန်းတရားတွေ 
ကင်းစင်သွားလိမ့်မယ်။ မေတ္တာသက်ဝင် ချစ်ခင်တဲ့၊
ကြည်လင်အေးမြတဲ့ စိတ်ဓာတ်ကို ရရှိလာတဲ့အခါမှာ 
ချမ်းချမ်းသာသာ အိပ်စက်ရမှုဆိုတာ ဖြစ်ပေါ်လာမှာပါ။ 
အဲဒီလိုမဟုတ်ဘဲနဲ့ အမုန်းတရားတွေ နှလုံးသားထဲမှာ
ထားမယ်ဆိုလို့ ရှိရင် ချမ်းချမ်းသာသာ အိပ်စက်ရမှု
ဆိုတာ ဘယ်တော့ မှရမှာ မဟုတ်ဘူးတဲ့။ 

❖ထို့အတူပဲ အသိဉာဏ်ကင်းမဲ့နေကြမယ် ဆိုလို့ရှိရင်၊
လုပ်သင့်တာနဲ့ မလုပ်သင့်တာ ခွဲခြားမသိဘူး။ 
မသိသည့်အတွက်ကြောင့် မလုပ်သင့်တာတွေ လုပ်လိမ့်မယ်။
လုပ်သင့်တာတွေကို မလုပ်ဘူးလို့ဆိုလို့ရှိရင် 
ပြဿနာတွေတက်မယ်။ ပြဿနာတွေတက်ရင် 
ထိုပြဿနာကြောင့် စိတ်တွေက တည်ငြိမ်မှုမရဘူးတဲ့။ 
မောဟကြောင့် ဖြစ်ပေါ်လာတဲ့ ရင်ထဲမှာ ပူနွေးစေတဲ့ 
အခြေအနေမျိုးတွေ ရောက်လာတယ်။ 
ဒါကြောင့်မို့ အဲဒီမောဟကို ပယ်ဖျောက်ဖို့ရာ
အတွက် အသိပညာ ရအောင် ကြိုးစားကြရမယ်။ 
အသိပညာရဖို့ရာအတွက် တရားနာရမယ်။
တရားစာအုပ်တွေ ဖတ်ရမယ်။ 
သုတမယဉာဏ်ရမယ်၊ ကမ္မဋ္ဌာန်းတရား အားထုတ်ရမယ်။
အားထုတ်လို့ရှိရင် ဘာဝနမယဉာဏ်တွေ ရလာမယ်။ 
သုတမယပညာ၊ ဘာဝနာမယပညာ ဒီပညာနှစ်ခုနဲ့
မောဟကို လျော့ချနိုင်တာပေါ့။ 

နောက်ဆုံးမှာ သဘာဝတရားတွေရဲ့အစစ်အမှန်ကို 
သိမြင်ခြင်းဖြင့် မှန်မှန်ကန်ကန် စဉ်းစားတွေးခေါ်နိုင်တဲ့ 
အသိဉာဏ်ကို ရရှိခြင်းဖြင့်၊ သင်္ခါရတရားတွေရဲ့
မမြဲတဲ့ သဘောတွေကို ဆင်ခြင်စဉ်းစားခြင်းဖြင့် 
ဘုန်းကြီးတို့တစ်တွေဟာ ပူလောင်မှုတွေရော၊ 
တပ်မက်မှုတွေရော အားလုံးကို လျော့ချ
သွားနိုင်ပါလိမ့်မယ်တဲ့။ 
အဲဒီလို ပူလောင်မှုတွေ၊ တပ်မက်မှုတွေ လျော့ချ
သွားနိုင်တာနဲ့ တစ်ပြိုင်နက် ချမ်းသာစွာအိပ်စက်ရမှု
ဆိုတာ ရရှိလာမှာဖြစ်ပါတယ်။ 

ရာဂ၊ ဒေါသ၊ မောဟဆိုတဲ့ အခြေခံ အကုသိုလ်တရား 
(၃)ပါးကို ဖယ်ရှားပစ်ခြင်းဖြင့် အခြားအကုသိုလ်
သဘာဝတရားတွေကိုလည်း ဖယ်ရှားနိုင်မှာဖြစ်တယ်။ 

တရားချစ်ခင် သူတော်စင် ပရိသတ်တို့၊
တို့တစ်တွေ ချမ်းချမ်းသာသာ အိပ်စက်ရဖို့အတွက် 
ဘာလုပ်ရမလဲ ဆိုရင် ရာဂ၊ ဒေါသ၊ မောဟဆိုတဲ့ 
ဒီတရားတွေ ကို ဖယ်ရှားဖို့ရာ အဓိကဖြစ်တယ်ဆိုတာ
ကိုယ်စီကိုယ်ငှ သဘောကျပြီးတော့ ဟောဒီ 
ဟတ္ထကသုတ်မှာလာတဲ့ မြတ်စွာဘုရားရဲ့အဖြေအတိုင်း 
ချမ်းသာစွာအိပ်စက်ရခြင်း ရဲ့ အဓိပ္ပာယ်ကို အလေးအနက် 
စဉ်းစားပြီး လောဘ၊ ဒေါသ၊ မောဟစတဲ့ ကိလေသာ
အပူတရားတွေကို ဖယ်ရှားနိုင်အောင် ကျင့်ကြံ
ကြိုးကုတ်အားထုတ်နိုင်ကြပါစေကုန်သတည်း။ ။ 

-【စာရိုက်ပူဇော်သူ - Admin Team of
Young Buddhist Association】
-【ပါမောက္ခချုပ်ဆရာတော်ဒေါက်တာအရှင်နန္ဒမာလာဘိဝံသ】
 

No comments:

Post a Comment