အိန္ဒိယ နိုင်ငံ တောင်ပိုင်း ကာရာလာ ပြည်နယ်က
အသက် ၂၃ နှစ် အရွယ် အမျိုးသမီး တယောက်ဟာ သူ့ကို အကြိမ်ကြိမ် အဓမ္မပြုကျင့်ခဲ့တဲ့ ဟိန္ဒိူဘာသာရေးခေါင်းဆောင် တယောက်ရဲ့ လိင်တံကို ဖြတ်ပစ်လိုက်တယ် ဆိုပါတယ်။
အဲဒီ ဘာသာရေးဆရာက သူ့အိမ်ကို ဖခင်ဖြစ်သူရဲ့ ကျန်းမာရေး အတွက် ဆုတောင်းပေးဖို့ အမြဲလာလေ့ရှိသူပါ။ အဲဒီလို လာတိုင်းမှာ အခွင့်အရေးရရင် ရသလို သမီး ဖြစ်သူကို လိင်ပိုင်းဆိုင်ရာ စော်ကားတယ် ဆိုပါတယ်။
ပြီးခဲ့တဲ့ သောကြာနေ့တုန်းကတော့ အမျိုးသမီးငယ်ဟာ ဓား တလက်နဲ့ အဓမ္မပြုကျင့်သူကို ခုခံ တိုက်ခိုက်ခဲ့ပါတယ်။
အခုတော့ အဲဒီ ဘာသာရေးဆရာဟာ အရေးပေါ်ခွဲစိတ်ကုသမှုခံရဖို့ သီရီဝမ်သရပူရမ် ဆေးကောလိပ် ဆေးရုံမှာ တင်ထားရပါတယ်။
ဆေးရုံရဲ့ ထုတ်ပြန်ချက်မှာ ဘာသာရေးဆရာရဲ့ လိင်တံဟာ ၉၀ ရာခိုင်နှုန်း ပြတ်တောက်နေပြီး ဒါကို ပြန်လည် ဆက်ပေးနိုင်ဖို့ နည်းလမ်း မရှိဘူးလို့ ဆိုပါတယ်။ ဒါပေမယ် သွေးတိတ်ဖို့နဲ့ ဆီးသွားနိုင်ဖို့ အတွက်တော့ ခွဲစိတ်ဆရာဝန်တွေနဲ့ ဆီးလမ်းကြောင်း အထူးကုတွေက ခွဲစိတ်ပေးခဲ့တယ် ပြောပါတယ်။
ရဲတပ်ဖွဲ့ရဲ့ ထုတ်ပြန်ချက်မှာတော့ အကြိမ်ကြိမ် အဓမ္မပြုကျင့်ခံရတဲ့ အကြောင်းကို အမျိုးသမီးငယ်ဟာ မိခင်ကို အရင်တုန်းက တိုင်ကြား ခဲ့ပေမယ့် မိခင်ဘက်က အရေးယူမှု မရှိခဲ့ဘူး ဆိုပါတယ်။ အဲဒီအတွက် မိခင်ဟာ ရာဇဝတ်မှုတိုင်ကြားဖို့ ပျက်ကွက်မှုနဲ့ အရေးယူခံရဖွယ် ရှိပါတယ်။
လိင်တံကို ဖြတ်တောက်ခဲ့သူ အမျိုးသမီးငယ်ကတော့ အမှုရင်ဆိုင်ရဖွယ် မရှိပါဘူး။
ကာရာလာ ပြည်နယ် ဝန်ကြီးချုပ် ဗီဂျာယမ်က အမျိုးသမီးငယ်ရဲ့ တုံ့ပြန်မှုကို သတ္တိရှိတဲ့ လုပ်ရပ် အဖြစ် ချီးကျူးခဲ့ပါတယ်။
အိန္ဒိယမှာ ၂၀၁၂ ခုနှစ် အုပ်စုလိုက် လိင်အဓမ္မပြုကျင့်မှု နောက်ပိုင်း လိင်စော်ကားမှုကျူးလွန်သူတွေကို အမြင့်ဆုံး ပြစ်ဒဏ် ဖြစ်တဲ့ သေဒဏ် အထိ ပြင်းပြင်းထန်ထန် အပြစ်ပေးအရေးယူဖို့ တောင်းဆိုလာကြသလို ကြိုတင်ကာကွယ်မှု အသိပညာပေးမှုတွေလည်း ပိုတိုး လုပ်ဆောင်လာပါတယ်။
တိုင်းပြည်တဝှမ်းမှာ အမျိုးသမီးငယ်တွေနဲ့ ကလေးသူငယ်တွေ လိင်စော်ကားခံရမှု သတင်းတွေကတော့ ဆက်လက် ဖြစ်ပေါ်နေဆဲ ဖြစ်ပါတယ်။
Credit: ဘီဘီစီမြန်မာပိုင်း
No comments:
Post a Comment