Latest News

CREDIT

သတင်းစုံပျော်ဝင်အိုးကြီးတွင် ဖော်ပြထားသည့် သတင်း၊ဓာတ်ပုံများသည် သက်ဆိုင်သူများ၏မူပိုင်သာဖြစ်ကြောင်း အသိပေးအပ်ပါသည်။

Saturday, February 25, 2017

အကျဉ်းထောင်အတွင်းမှ ဗြဟ္မာဦးခေါင်း အလှဖန်တီးရှင်များ - ဇော်သက်ထွေး


ပြီးခဲ့တဲ့ ရက်ပိုင်းအတွင်းက ဂေးအလှမယ် မျိုးကိုကိုစန်းကို ဆက်သွယ်ရေးဥပဒေပုဒ်မ ၆၆(ဃ)နဲ့ တရားစွဲဆိုခံရတဲ့အတွက် ရန်ကင်းရဲစခန်းမှာ ဖမ်းဆီးထိန်း သိမ်းလိုက်ပါတယ်။ Gay Miss International Queen 2014 Myanmar ရရှိထားသူ မျိုးကိုကိုစန်းကို ဘန်ကောက်မှ ရန်ကုန်သို့ MAI လေကြောင်းလိုင်းဖြင့် ပြန်လာစဉ် ရန်ကုန်လေဆိပ်မှာပဲ ရဲတပ်ဖွဲ့ရဲ့ ဖမ်းဆီးထိန်းသိမ်းခြင်းကို ခံခဲ့ရပါတယ်။

ရန်ကင်းမြို့နယ် တရားရုံးက တရားလိုနေရာမှာ နာမည်ကျော် ရုပ်ရှင်မင်းသမီး ၀တ်မှုန်ရွှေရည်(ခ) ကစ်ကစ်လို့ ဖော်ပြခဲ့ပါတယ်။ ပြဿနာဖြစ်ရတဲ့ အကြောင်းအရင်းကတော့ Cele Cele Small ဆိုတဲ့ Facebook Page ရဲ့ Admin တစ်ဦးအဖြစ် သံသယရှိလို့ ထိန်းသိမ်းခဲ့တာ ဖြစ်ပါတယ်။ ဒါပေမဲ့ ဇန်န၀ါရီလ ၂၀ ရက်နေ့မှာတော့ စွဲဆိုမှုနဲ့ ပတ်သက်ပြီး ကင်းရှင်းကြောင်း အတည်ပြုစစ်ဆေးချက်ရရှိလို့ သူ့ကို အချုပ်က ပြန်လွှတ်ပေးလိုက်ပါတယ်။

အမှုစွဲဆိုမှုတွေ ပြီးဆုံးသွားပေမယ့် နောက်ဆက်တွဲ ပြဿနာတွေကတော့ ဆက်ရှိလာပါတယ်။ ပထမဦးဆုံး ပြဿနာကတော့ မြန်မာ LGBT အခွင့်အရေးဆိုင်ရာကွန်ရက်နဲ့ မြန်မာ LGBT အသိုင်းအ၀ိုင်းနှင့် တရားဥပဒေစိုးမိုးရေး လိုလားသူများက မျိုးကိုကိုစန်းကို ဖမ်းဆီးထိန်းသိမ်းခြင်းနဲ့ ပတ်သက်ပြီး ထုတ်ပြန်ကြေညာချက်ပဲ ဖြစ်ပါတယ်။

ဒီကြေညာချက်ထဲမှာ အရေးကြီးတဲ့ အကြောင်းအရာကတော့ တရားရုံးအချုပ်ခန်းမှာ မျိုးကိုကိုစန်းရဲ့ အမျိုးသမီးအဖြစ် ခံယူကာ ၀တ်စားဆင်ယင်မှုကို အသိအမှတ်ပြုခြင်းမရှိဘဲ အမျိုးသားအချုပ်ခန်းမှာ အခြားအမျိုးသားများနှင့်အတူ ရောနှောထားရှိခြင်းခံခဲ့ရတယ်လို့ ပါရှိပါတယ်။ အထူးသဖြင့် အများပြည်သူ သွားလာသောနေရာမှာ နည်းလမ်းမကျသော ဖမ်းဆီးမှုအတွက် ထိုသူ၏ ဂုဏ်သိက္ခာထိခိုက်ပြီး အရှက်ရစေတယ်လို့ ဆိုပါတယ်။

ဒါ့အပြင် စွပ်စွဲခံရသူအနေဖြင့် ရှေ့နေအား အကြောင်းကြားခွင့် မပေးခဲ့ခြင်း၊ ၂၄ နာရီအတွင်း တိကျသေချာစွာ စစ်ဆေးမှုမရှိခြင်းတို့ကြောင့် စိတ်ပိုင်းဆိုင်ရာ ခြိမ်းခြောက်မှုကို ခံခဲ့ရတယ်လို့လည်း ဆိုပါတယ်။ မျိုးကိုကိုစန်းကို ဖမ်းဆီးမှုအပေါ်မှာ ရှုထောင့်ပေါင်းစုံကနေ ဝေဖန်ဆန်းစစ် ငြင်းခုန်နေကြသူတွေလည်း အများအပြားပါပဲ။ လက်ရှိ မြန်မာနိုင်ငံရဲ့ အခြေအနေဟာ ဒီမိုကရေစီအရေးနဲ့ လူ့အခွင့်အရေးကို အလေးထားဆောင်ရွက်နေတဲ့ အစိုးရတစ်ရပ် ပေါ်ပေါက်နေပြီဖြစ်လို့ ယခုလို လူ့အခွင့်အရေး ချိုးဖောက်မှုတွေအပေါ် ဝေဖန်ထောက်ပြတာတွေဟာ ထူးဆန်းအံ့သြဖွယ် မဟုတ်ပါဘူး။ ဒါပေမဲ့ လက်ရှိ မျိုးကိုကိုစန်းရဲ့ အမှုကိုလေ့လာပြီး လွန်ခဲ့တဲ့နှစ်ပေါင်း ၃၀ နီးပါးက ပြဿနာ အမျိုးမျိုးကြောင့် အကျဉ်းထောင်ထဲကို ရောက်ရှိလာတဲ့ ဂေးများ၊ အလှဖန်တီးရှင် မိန်းမလျာများကို လူ့အခွင့်အရေး စံနှုန်းနဲ့မညီဘဲ တာဝန်ရှိသူတွေက ဖြစ်သလို ဆက်ဆံခဲ့တာတွေကိုလည်း ပြန်လည်အမှတ်ရမိပါတယ်။

၁၉၉၀ ကာလတစ်ဝိုက်က မြန်မာနိုင်ငံရဲ့ အကြီးဆုံးထောင်ဖြစ်တဲ့ ဗဟိုစံပြအင်းစိန် အကျဉ်းထောင်မှာ သာမန်ရာဇ၀တ် အကျဉ်းသားများအပြင် ဒီမိုကရေစီရေး လှုပ်ရှားဆောင်ရွက်မှုကြောင့် ပြစ်ဒဏ်အမျိုးမျိုး ချမှတ်ထားတဲ့ ကျောင်းသားတွေ၊ ဘုန်းကြီးတွေ၊ နိုင်ငံရေးသမားတွေလည်း အများအပြားရှိနေပါတယ်။

နိုင်ငံရေး သမားတွေကို သတ်မှတ်ထားတဲ့ ထောင်ကျဆောင်ဝင်းကနေ အပြင်ထွက်ခွင့် မပေးပါဘူး။ ကျန်တဲ့ အကျဉ်းသားများကတော့ ချထားတဲ့ အလုပ်နေရာကို အကြောင်းပြုပြီး တစ်ထောင်လုံးကို သွားလာလို့ရပါတယ်။ အင်းစိန်အကျဉ်း ထောင်မှာ ယောက်ျားလေးအချုပ်ဆောင်နဲ့ ထောင်ကျဆောင်ဆိုပြီး ခွဲခြားထားသလို မိန်းကလေး အချုပ်ဆောင်နဲ့ ထောင်ကျဆောင်လည်း ရှိပါတယ်။ မိန်းကလေးအဆောင်နဲ့ ယောက်ျားလေး အဆောင်တွေကြားမှာ သွားလာခွင့်ဆက်သွယ်ခွင့်တွေ မလုပ်ဖို့ကိုတော့ အကျဉ်းထောင်ဝန်ထမ်းတွေက တင်းတင်းကျပ်ကျပ် ကိုင်တွယ်ထားပါတယ်။

ဒီလို ကျား/မ အဆောင်တွေကို ခွဲခြားထားပေမယ့် ထောင်ထဲကို အကြောင်းအမျိုးမျိုးကြောင့် ရောက်ရှိလာတဲ့ ဂေးတွေ၊ အလှဖန်တီးရှင်တွေကို နေရာချထားပေးရာမှာတော့ အကျဉ်းထောင်အနေနဲ့ အတော်ဦးနှောက်ခြောက်ရပါတယ်။ မိန်းကလေးအဖြစ် စိတ်ပိုင်းဆိုင်ရာရော ရုပ်ပိုင်းဆိုင်ရာပါ ခံယူထားတဲ့သူတွေကို ယောက်ျားလေးတွေချည်းနေတဲ့ အဆောင်မှာထားဖို့ဆိုတာ ဘယ်လိုမှမဖြစ်နိုင်ပါဘူး။

ယောက်ျားလေး အဆောင်တွေမှာလည်း နှစ်ပေါင်းများစွာ အကျဉ်းကျနေပြီး မိန်းမနဲ့ဝေးနေတဲ့ အကျဉ်းသား ရာပေါင်းများစွာရှိပါတယ်။ ဒီလူတွေကြားထဲမှာ သွားထားရင် သေချာပေါက် ရန်ပွဲတွေ၊ ပဋိပက္ခတွေ ဖြစ်လာနိုင်ပါတယ်။

မိန်းကလေးဘ၀ ခံယူထားလို့ဆိုပြီး အမျိုးသမီးအဆောင်ထဲမှာ သွားထားလို့လည်း မဖြစ်ပြန်ပါဘူး။ ဘာလို့လဲဆိုတော့ အမျိုးသမီးထောင်ထဲမှာ ယောက်ျားလေးနဲ့ နှစ်ပေါင်းများစွာ ဝေးနေတဲ့ မိန်းမအကျဉ်းသားတွေ ရာပေါင်းများစွာရှိနေလို့ပဲ ဖြစ်ပါတယ်။ ဒါကြောင့် အကျဉ်းထောင် အာဏာပိုင်တွေဟာ ဂေးအုပ်စုကို ထောင်ဆေးရုံထဲက လွတ်နေတဲ့ လက်ပါးတိုက်တွေမှာ စုပြီးထားရှိလေ့ရှိပါတယ်။

အင်းစိန်အကျဉ်းထောင်ဟာ နှစ်ပေါင်း ၁၀၀ ကျော် သက်တမ်းရှိပြီး အရင်ခေတ်တွေမှာတော့ လက်ပါးရောဂါသည်တွေ ပေါများပြီး ထောင်ကျလာရင် သီးခြားထားရှိပါတယ်။ ဒီဘက်ခေတ်မှာတော့ လက်ပါးရောဂါသည်ဆိုတာ မရှိသလောက်ရှားသွားပါတယ်။ ဒီတိုက်မှာ သူတို့ကို အလွယ်တကူ ထားလိုက်တာပါပဲ။ ဒါပေမဲ့ နောက်ပိုင်းမှာ ညတာဝန်ကျ ၀န်ထမ်းတွေနဲ့ ဇာတ်လမ်းတွေ ရှုပ်လို့ဆိုပြီး တွဲဖက်ထောင်က အဆောင် (၁) အနောက်ဘက်ခြမ်း ဆယ်ခန်းတွဲမှာ သူတို့ကို ပြောင်းရွှေ့လိုက်ပါတယ်။ အရှေ့ဘက်ခြမ်း ဆယ်ခန်းတွဲမှာတော့ နိုင်ငံရေးသမားတွေရှိပါတယ်။

နိုင်ငံရေး သမားတွေကတော့ ကိုယ့်ကိုယ်ကိုယ် ချုပ်တည်းနိုင်စွမ်းရှိလို့ ဘာပြဿနာမှမရှိခဲ့ပါဘူး။ လွန်ရောကျွံရော သီချင်းစောင်းဆိုတာလောက်ပဲ ခံရပါတယ်။ “ဂန်ဒူးမ ဘ၀ကို စိတ်နာတယ်တို့၊ ဘာတို့ပေါ့”။

ဒါပေမဲ့ အင်းစိန်အကျဉ်းထောင်သမိုင်းမှာ ထူးထူးခြားခြား ဖြစ်ရပ်တစ်ခုလည်း ရှိခဲ့ပါတယ်။ အဲဒါကတော့ သင်္ကြန်ကာလအတွင်း မူးယစ်ရမ်းကားနဲ့ရန်ဖြစ်တဲ့ သူတွေကို တရားရုံးတွေက ထောင် ၇ ရက် ချပါတယ်။ သင်္ကြန်တွင်း ကာလဆိုတော့ ဖမ်းဆီးထောင်ချခံရတဲ့သူတွေ အတော်များပါတယ်။
ရန်ကုန်တိုင်းအတွင်း မြို့နယ်အသီးသီးက ပို့လိုက်တဲ့ တရားခံတွေဟာ ညမှောင်ရီပျိုးမှ အင်းစိန်ထောင်ကို ရောက်လာကြပါတယ်။ ထောင်မှူးတွေ၊ ထောင်ပိုင်တွေကလည်း သင်္ကြန်ကာလဖြစ်လို့ သူတို့တွေကို မြန်မြန်ဆန်ဆန်ပဲ အဆောင်ခွဲလိုက်ပါတယ်။ မိန်းကလေးဆို မိန်းကလေးဆောင်၊ ယောက်ျားလေးဆို ယောက်ျားလေးဆောင် ခွဲတာမှာ ဘာပြဿနာမှမရှိပါဘူး။ ဒါပေမဲ့ နှစ်ဆန်း ၂ ရက်နေ့မှာတော့ မိန်းကလေးထောင်က ပူညံပူညံအသံ ကြားရတော့တာပဲ။ ပြဿနာက မိန်းကလေးအကျဉ်းထောင် တန်းစီးနဲ့ ထမင်းဘုတ်ကိုင်တို့ ရန်ပွဲကစတာပါ။ ၀န်ထမ်းတွေက ရန်ပွဲဖြန်ဖြေပြီး စစ်ဆေးလိုက်တော့ ပြဿနာက မိန်းကလေး ထောင်ထဲရောက်နေတဲ့ ယောက်ျားလေးကို ညဘက်အတူအိပ်ဖို့ လုရာကနေ ကြီးကျယ်တဲ့ရန်ပွဲ ဖြစ်သွားခဲ့ရပါတယ်။

ဒီသတင်းလည်း ကြားရော ထောင်ပိုင်ကြီးလည်း ခေါင်းဆင်နင်းတော့တာပါပဲ။ ချက်ချင်းပဲ စစ်ဆေးရေးဖွဲ့ရပါတယ်။ စစ်ဆေးရေးအဖွဲ့ရဲ့ အစီရင်ခံစာအရ သင်္ကြန်တွင်းဝင်လာတဲ့ အကျဉ်းသားတွေထဲမှာ ဆံပင်ရှည်ရှည်၊ အသားဖြူဖြူနဲ့ ချောမောလှပတဲ့ မိန်းကလေးတစ်ယောက် ပါလာလို့ မိန်းကလေးထောင်ကို ပို့လိုက်ပါတယ်။ အမှန်တော့ မိန်းကလေးအစစ်မဟုတ်ဘဲ အလွန်ချောမောတဲ့ ဂေးတစ်ယောက် ဖြစ်နေခဲ့တာပါ။ တရားသူကြီးကလည်း မိန်းကလေးလို့ ယူဆပြီး ထောင်ချလိုက်တာ ဖြစ်ပါတယ်။

နောက်ဆုံး သူ့ကို သီးသန့်တိုက်ခန်းတစ်ခုမှာ သီးခြားချုပ်နှောင်ထားလိုက်ရပါတယ်။ သူ့ကို ဂေးမှန်းမသိဘဲ အမျိုးသမီးဆောင် ပို့လိုက်တဲ့ ထောင်မှူးကြီးကိုတော့ နှစ်တိုး လစာလျှော့ချတဲ့ ပြစ်ဒဏ်ပေးခဲ့ပါတယ်။ သူ့ကို ယောက်ျားလေးမှန်း မယုံကြည်လို့ သွားကြည့်တဲ့ ထောင်ပိုင်၊ ထောင်မှူး၊ ၀န်ထမ်းတွေလည်း မိန်းကလေးတစ်ယောက်ရဲ့ အဆင်းအင်္ဂါရပ်နဲ့ ပြည့်စုံနေလို့ လက်ဖျားတခါခါပါပဲ။ သူကတော့ ထောင်ထဲက မထွက်ခင်မှာ အားလုံးရဲ့ အထူးဂရုစိုက်ခြင်းကို ခံခဲ့ရပါတယ်။

ကောလာဟလ သတင်းတစ်ရပ် အနေနဲ့ကတော့ သူ့ကိုလုတဲ့ တန်းစီးနဲ့ ထမင်းဘုတ်ကိုင်ကို ထောင်ပိုင်ကြီးက ဆရာဝန်နဲ့ တိုင်ပင်ပြီး ကိုယ်ဝန်တားဆေးထိုးပေးလိုက်ရတယ်ဆိုပြီး တစ်ထောင်လုံး သတင်းပြန့်သွားပါတယ်။

ဘယ်လိုပဲပြောပြော ဂေးဒဏ္ဍာရီတစ်ခုတော့ အင်းစိန်မှာ အမှန်တကယ် ရှိခဲ့ပါတယ်။

ဇော်သက်ထွေး


  • အင်းစိန်ထောင်အတွင်းမှ ဂန္တ၀င်လူမိုက်ကြီးများအကြောင်း အပိုင်း (၁)
  • အင်းစိန်ထောင်အတွင်းမှ ဂန္တ၀င်လူမိုက်ကြီးများအကြောင်း အပိုင်း (၂)
  • အင်းစိန်ထောင်အတွင်းမှ ဂန္တ၀င်လူမိုက်ကြီးများအကြောင်း အပိုင်း (၃) - 
  • အင်းစိန်ထောင်အတွင်းမှ ဂန္တ၀င်လူမိုက်ကြီးများ အကြောင်း အပိုင်း (၄) -
  • No comments:

    Post a Comment