Latest News

CREDIT

သတင်းစုံပျော်ဝင်အိုးကြီးတွင် ဖော်ပြထားသည့် သတင်း၊ဓာတ်ပုံများသည် သက်ဆိုင်သူများ၏မူပိုင်သာဖြစ်ကြောင်း အသိပေးအပ်ပါသည်။

Thursday, September 22, 2016

နွေတည(၁၁)


(၁၁)
 ကျနော်နှင့်ဝေသည် ဟေမန်မရောက်မီ ဝေ့မိဖများရှိရာသို့ သွားဖြစ်ခဲ့ကြသေးသည်။ ဝေ့မိဖများကိုကား ထိုနေရာဟောင်း၌ မတွေ့ကြရပေ။ သူတို့ စပါးစက်သည် ပျက်နေခဲ့သဖြင့် ကာလအတန်ကြာကပင် ရပ်ထားခဲ့၏။ ပျံကျစက်အလုပ်သမားများသည်လည်းစက်ပျက်ကြီးကို စွန့် ပစ်ကာ ရေကြည်ရာ မြက်နုရာသို့ ပျံသန်းထွက်ခွာ သွားကြလေပြီ။ ထိုအထဲ၌ ဝေ့မိဖများပါ ပါသွားသည်။ ကျနော်တို့ သည် လက်ရမ်းမဲ့ တံတားကလေးထိပ်တွင် ဝေ စိတ်ကျေနပ်သည် အထိ ရပ်နေခဲ့ကြ၏။ တံတားကလေးသည်လည်း အိုမင်းယိုင်ရွဲ့ နေပြီ။ တံတားကလေးအောက်ရှိ ချောင်းပြင်မှ နွံများသည်လည်း ခြောက်သွေ့နေကြ၏။ ချောင်းဟိုဘက် သည်ဘက် တဲတန်းလျားများ၌ လူတဦးတယောက်မျှ မတွေ့ ရ။

တဲတန်းလျားများ၏ အကာထရံများသည် တွဲလောင်း ဖရိုဖရဲ ပြုတ်ကျနေကြ၏။ ဝေနှင့်ဝေ့ မိဖများနေထိုင်ခဲ့ရာ တန်းလျားအိုမှာမူ အမိုးပင် မရှိတော့။ ချောင်းတဖက်ကမ်းရှိ စက်ရုံကြီ်းများသည်လည်း
 ငြိမ်သက်နေ၏။

“စက်ဘယ်တော့ပြန်ဖွင့်မလဲ မသိဘူးနော်၊ အမေတို့ ကျောက်ကြီးကို ကော်ပတ်စီးခြစ်သွားမှာဘဲ၊ ဒီလိုဘဲ သွားကြရတာ၊ ခင်ဝေတို့  လိုက်ကော်ပတ်စီး ခြစ်ကြရရင် ကောင်းမလား၊ မကောင်းပါဘူးလေ၊ ဟိုမှာ စက်ထဲက လူတွေ အများကြီးရောက်နေမှာဘဲ၊ တော်ကြာကိုကို့ ကို အထင်သေးနေ ကြမယ်”
 ဝေသည် တံတားကလေးထိပ်တွင် ငေးငိုင်နေရင်း သူ့ ကိုယ်သူ ပြောသလို တီးတိုးညည်းညည်း ပြောနေခဲ့သည်။ ဝေသည် အားကိုးမဲ့နေသည့်အခါတွင် သူ့အမေရင်ခွင်ကို ခေါင်းတိုးဝှေ့ကာ အားကိုးချင်
 ရှာပေမည်။ တန်းလျားဘက်ကို ငိုင်ကြည့်နေရင်း ဝေ့မျက်လုံးအိမ်ထဲ၌ မျာက်ရည်များဝိုင်းလာနေပြန်သည်။
“မငိုနဲ့ လေ” ဟူ၍သာ ကျနော်သည် ပြောခဲ့မိ၏။
“ခင်ဝေ မငိုပါဘူး”
“ဒို့ ဟေမန်ကို သွားကြမှာ မှုတ်လား”
“ဟုတ်ပါတယ်” ဟု သူက တိုးတိုးပြောလျက် ကျနော် တို့ သည် စိတ်ထိခိုက်ဖွယ်ရာများဖြင့်
 ပြည့်နေသော စပါးစက်ကြီးကို ကျောခိုင်းထွက်လာခဲ့ကြသည်။ လက်ရန်းမဲ့ တံတားကလေး၊
တဲတန်းလျားဟောင်းများ၊ ငြိမ်သက်နေသော စပါးစက်ကြီးများသည် ကျောက်ဘက်၌ မလှုပ်မရှက်၊ အသံမရှိ၊ အသက်မရှိနေရစ်ခဲ့ကြလေသည်။ ထိုမှ ကျနော်တို့ သည် ကျနော်မရောက်ဖူုးသေးသော
 ဟေမန်သို့ တဆင့်ထွက်ခွာလာကြ၏။ ဟေမန်သို့ ရောက်စက ရက်အတန်ကြာမျှအထိ နေမရထိုင်
မရ ဖြစ်ခဲ့ရသေး၏။ ဘယ်ပုံဘယ်နည်းဆက်ဆံရမည် ကိုလည်းမသိ။ ဟေမန်သို့ ရောက်ပြီး သုံးရက်
အတွင်း ရွာသား များသည် ကျနော်တို့ အတွက် တဲအိမ်ကလေးတလုံးကိုဝိုင်းဝန်း ဆောက်လုပ်ပေးကြ၏။ တဲကလေးသည် ရွာလယ်လမ်းမကြီးဖက်သို့ မျက်နှာပြုထား၏။ တဖက်ခပ်လှမ်းလှမ်း၌ ဟေမန်တာတမံကြီးသည် တဲအပေါ်မှမိုးကာ ထီးတည်းငြိမ်သက် ရပ်တည်နေသည်။
ည၌လထွက်လာလျှင် တဲကလေးရှေ့ ရှိ ငှက်ပျော်ပင်များကို လေတိုးဝှေ့ လာကာ ငှက်ပျော်ရွက်များ
လည်း ရွက်ချင်းခတ်လာကြလေသည်။ ညများ၌ မြစ်ပြင်တွင် ရေတိုးဝှေ့ နေသံများ ကြားလာရသည်။ အဝေးဆီမှ ပုရစ်အော်သံများသည် ကျနော်တို့တဲကလေးရှိရာဘက်သို့ ပြန့်လွင့်ုလာကြသည်။
တဲ ကလေးရှေ့ ဘက် သင်ရိုး ရင်းလိပ်ကာများကို လေများ တိုးဝှေ့လာနေသည်။
ညတွင် ကျနော့် နံဘေး၌ဝေသည် စိတ်ချမ်းသာစွာ နှစ်ခြိုက်စွာ အိပ်မောကျသွား သော်လည်း ကျနော်ကား မရေမရာ အတွေးများကို တွေးနေကာ ခေါင်းတခုလုံး ရှုပ်ထွေးနေပြီးအိပ်မရ။
တခါတရံတွင်မူ ဝေသည် အိပ်ရာမှတရေးနိုးလာပြီး
“ကိုက်ိုမအိပ်သေးဘူးလား၊ စိတ်ညစ်နေလို့ လား”ဟု ကြင်နာယုယစွာ မေးတတ်သည်။
 “စိတ်မညစ်စမ်းပါနဲ့ ကိုကိုရယ်၊ တချို့ ဆိုရင်အ၀တ်တထည်ကိုယ်တခုနဲ့ ခိုးရာလိုက်ပြေးကြတာ၊
 နားတောင်းကလေး တရံတောင် ရှိကြတာမှုတ်ဖူး၊ ခု ခင်ဝေတို့ မှာ ရွှေလဲပါတယ်၊ ငွေလဲပါတယ်၊
ခင်ဝေအလုပ်လုပ်ပါ့မယ်၊ ကိုကို့လခကို မှီအောင်လုပ်ပြမယ်၊ ခုတောင် အိမ်ဆိုင်ကလေး ဖွင့်ရင်
ဘာရောင်း ကောင်းမလဲ စဉ်းစားနေတာ”
 ဝေသည် ကျနော့်ရင်အုံပေါ်သိ်ု့ သူ့မျက်နှာကိုတင်ထားပြီး ကျနော့်ပါးကို သူ့လက်နှစ်ဖက်ဖြင့်
 ပွတ်သပ်နေသည်။ သူ့အသက်ရှူသံ၌ပင် ကြည်နူးရွှင်လန်းမှုများ ပါနေသည် ထင်သည်။
 ရက်များမကြာမီတွင်ပင် ဝေ့ စိတ်ကူးများအတိုင်း တဲအိမ်ကလေးအတွင်း ဈေးဆိုင်တခုဖြန့် ခင်း
လိုက်လေသည်။ ငရုတ်သီး၊ ဆား၊ ဆီ၊ ရေနံဆီ၊ ငါးပိငါးခြောက်၊ ကြက်သွန်၊ ပဲလှော် လဖက်၊ ကွမ်းသီး၊ ဆေးလိပ်၊ ထန်းလျက်၊ ခလေး သွားရေစာများနှင့် အထည်အ၀တ် အကြမ်းထည်လေးများပါ
တင်ခင်းလိုက်သည်။ မြို့ သစ်ကလေးတွင်နေစဉ်က ညနေခင်းများတွင် ဝေသည် ကျနော်နှင့်အတူ
လမ်းလျှေက်လိုက်ပါလေ့ရှိသော်လည်း ဤ ဟေမန်တာရိုးအပေါ်၌ လမ်းလျှေက်သောအခါတွင်ကား ဝေ့ကိုခေါ်မရတော့ပေ။ လမ်းလျှောက်ခေါ်လျှင် ဝေသည် သူ့ ဆိုင်ကလေး ပေါ်တွင် ထိုင်နေရာမှ
လှမ်းပြီး ပြုံးလျက်ခေါင်းယမ်းပြလေသည်။
“လမ်းရှောက်တယ်ဆိုတာ ဆင်းရဲသားအလုပ် မဟုတ်ဖူး မောင်ကိုကိုရဲ့ ” ဟု ပြောကာ သူသည် ရယ်နေတတ်၏။ တာရိုးကြီးနှင့်မြစ်ပြင်အကြား နုံးတင်မြေနုများ၌ ယာခင်းများသည်
 စိမ်းမြလန်းဆန်းနေ၏။ မြစ်တဖက်ကမ်းရှိရိုးမတောင်တန်ကြီးတွင် မြူခိုးများ ခိုနေကြ၏။
 ညနေဆည်းဆာများ၌ မြစ်ပြင်ထက်တွင် တဖျတ်ဖျတ် ခတ်နေသော လှိုင်းကြက်ခွပ်ကလေးများပေါ်ဝယ် ဆည်းဆာ နေခြည်များသည် ခိုစီးနေတတ်၏။ မဲဟော် တောစပ်ဖက်မှ ငှက်တအုပ်ပျံသန်းလာသည်။ သူတို့ သည် ကျနော့်အပေါ်မှဖြတ်၍ ပျံနေစဉ်တွင် ကျနော့်ကိုတီတီတာတာ အော်မြည်ကာ
နှုတ်ဆက်သွားသည်။ နောက်ပိုင်းရက်များ၌ ဝေသည် ညနေခင်းများတွင် သစ်ကြိမ်းရွာ၊ မြယာရွာ၊ နတ္တလင်းရွာ၊ နတ်ရေတွင်းရွာများဖက်သို့ ခေါင်းရွက် ဈေးသည်အဖြစ်ဖြင့် ထွက်ခွာသွား၏။
 မိုးချုပ်လျှင် ကျနော်သည် တာရိုးကြီးအတိုင်း လမ်းလျှောက်ရင်း လိုက်သွားကာ သူ့ကို ထွက်ကြိုရလေသည်။ သူ၏ သစ်ကြိမ်းရွာအတွင်းမှ ဈေးအော်ဟစ် ရောင်းသံသည် ကျနော် စောင့်ကြိုနေရာ တာရိုးဖက်သို့  အဝေးမှပင်ရောက်ရှိ လာနေတတ်၏။
“ဒီဘက်က ကပ်ပဲယိုရမယ်၊ ယူကြအုံးမလား တော်ရေ့” ဟုသူ့ အော်သံသည် ဟေမန် မြစ်ပြင်ကို ရှပ်တိုက်ပြေးလာလေသည်။ ကျနော်သည် ရပ်တန့်ပြီး သူ့ကို စောင့်နေစဉ်၌ပင် သူ့ဈေးရောင်းနေဟန်ကိုစိတ်အာရုံ၌ ထင်မြင် လာနေမိတတ်သည်။ သူသည် ထမီတိုတိုဝတ်ပြီး ကုန်းနိမ့်စောင်း ရွာကလေးထဲ၌ လမ်းမများအတိုင်း တကြော်ကြော် အော်ဟစ်သည်။ ထမီ တိုတိုကြောင့် သူ၏ ဖုထစ်မာကြောသော
 ခြေသလုံးသားများ ပေါ်နေ၏။ ကျွတ်မကျနိုင်စေရန် သူသည် ထမီကိုလုံးထွေးပြီး မာကျစ်နေအောင်
 ဝတ်ထားသည်။ သူ့မျက်နှာပေါ်၌ သနပ်ခါးကြမ်းများကို ထူပျစ်အောင် လိမ်းထားသည်။ သူ့ လက်နှစ်ဖက်သည် ဈေးတောင်းကို မြဲခိုင်စွာ ဆုပ်ကိုင်ထားသည်။ သူသည် တာရိုးပေါ်သို့ တက်လာခဲ့လျှင် အဝေးမှပင်ပြုံးလာခဲ့လေသည်။
“ မောလိုက်တာကွယ်၊ မောင်ကိုကို လာစောင့်နေတာ အတော်ကြာပလား” ဟု မေးသည်။
 ကျနော်နှင့် သူသည် တာရိုးအတိုင်း လမ်းလျှောက် ပြန်လာခဲ့ကြ၏။ ပြုံးနေသော သူ့မျက်နှာပေါ်၌ ချွေးဥကလေးများ စီနေသည်။ အဝေးဆီမှချိုးကူသံကို သူသည် နှစ်ခြိုက်နေတတ်၏။ လမ်း၌ တာရိုးကြီးနံဘေးသစ်ပင်ရိပ်တခုတွင် ခေတ္တချနားသည်။
“ ခု ညနေဖက်ရောင်းတာ ငါးကျပ်လောက် ကျန်တယ်၊ စပါးပေါ်ကာနီးရင် စပါးနဲ့ ထပ်ရင် ဒီ့ထက်
ပိုကျန်တာပေါ့။ ခု ငါးကျပ် ကျန်တာ အဲဒီကျရင် ဆယ့်ငါးကျပ်ကျန်မယ်သိလား၊ ခင်ဝေလေ ကိုကို့လစာကိုမကြောက်ဖူး။ ကိုကိုနဲ့ မြို့လဲ လိုက်မနေချင်ပါဘူး၊ ဒီမှာဘဲနေချင်တယ်၊ ကိုကိုနဲ့ လိုက်နေရင် အကျင့်ပျက်ကုန်ရော၊ အလုပ် လုပ်ချင်စိတ် ပျောက်ကုန်ရော၊ ခုကြည့်လေ၊ ဆယ့်ငါးပိဿာလောက် လေးတာကို
 ရွက်တာတောင် ခေါင်းကျိန်းလာတယ်၊ မူးလာတာဘဲ၊ ခင်ဝေစက်ထဲမှာ စပါးသယ်တုန်းကဆိုရင်
 ဒီထက်လေးတာတွေကိုလဲ ဘယ်ဂရုစိုက်မလဲ၊ ကဲ ခုညနေဆိုင်မှာ ရောင်းတာ ဘယ်လောက်ရသလဲ”
သူသည် အရိပ်တွင် ခေါင်းခုကို ပစ်ချလိုက်ကာ မန်ကျည်းပင်ကို မှီလိုက်သည်။ မျက်နှာမှ ချွေးဥများကို
သုတ်လိုက်သည်။ သူသည် ပင်ပန်းလှသဖြင့် ည အိပ်ရာဝင်လျှင်ပင် နှစ်ခြိုက်စွာ အိပ်မောကျသွားလေသည်။ တခါတရံ ထမင်းစားပြီးစ၌ပင် သူသည် စကားပြောသည်ကို နားထောင်ရင်း မျက်ခွံများလေးလံပိကျလာနေတတ်သည်။ ကျနော် စကားပြောလျှင်မူ သူသည် မျက်လုံးများကို ကြိုးစားဖွင့်ထားနေပုံရသည်။ ဆတ်ကနဲ အိပ်ငိုက်သွားလျှင် သူသည် ခေါင်းကို ကမန်းကတန်း ပြန်မတ်ပြီး ကျနော့်ကို
 မျက်လုံးပွတ်သပ် ကြည့်ရင်း ရယ်ကျဲကျဲပြုံးပြနေတတ်သည်။ ထိုအခါများ၌သူသည် ကျနော့် စကားများကို ကြိုးစားပြီး ဖမ်းမမိနိုင်အောင် ရှိနေပေမည်။
 “ဒို့ မြို့ ကြီးကို သွားရအောင်ကွယ်၊ ဒီမှာတော့ကိုလဲ ဘာမှ မလုပ်တတ်ဖူး၊ ဝေတယောက်ထဲ ပင်ပန်းနေတာဘဲ” ဟူ၍ သူ အိပ်ငိုက်နေစဉ်တွင် ကျနော်က သူ့ ပခုံးပေါ် လက်တင်ပြီး ကိုယ့်ကိုယ်ကို ပြောသလို အသံနှိမ့်ပြီး ပြောနေသည်ကို သူကြားမည် မဟုတ်ပေ။ နောက်ပိုင်းရက်များတွင် မိုးရွာလာပြီး ဟေမန်နှင့် မြို့ အကူးတွင် လှည်းလမ်းများ ပိတ်ကုန်သောအခါ လှည်းနှင့် သွားမဖြစ်တော့သော အခါတွင်ကား ပင်ပန်းရသည်မှာ ဝေ တယောက်တည်း မဟုတ်တော့ပေ။ မြို့ မှ ကုန်များကို သယ်ယူရာ၌ ကျနော် တထမ်း၊ ဝေတရွက် ဖြစ်လာကြရလေသည်။ အစပိုင်းက ကျနော်သည် မြို့ ထဲမှ ကုန်များ ထမ်းရမည်ကို ရှက်ကြောက်ကာ ခြေလှမ်း မလှမ်းရဲ၊ လူများကို မကြည့်ရဲ့ ဖြစ်နေခဲ့ရသေးသည်။ မြို့ မှ ဟေမန်သို့ ရှစ်မိုင်ကျော်မျှသာ ဝေးသော်လည်း အထမ်းကို ထမ်းပြီး လယ်ကန်သင်းရိုးများအတိုင်း
 လျှောက်နေရလျှင် မိုင်ရှစ်ဆယ်ကျော်နေပေပြီဟု စိတ်၌ ခံစားလာရသည်။ ကျနော့် ကျောပြင်၌ နေ
သည် အက်ကွဲ ကုန်တော့မည့် အတိုင်း ပူနေ၏။ အင်္ကျီသည် ချွေးများနစ်ကာ ကျောပြင်တွင် ကပ်နေ၏။ ရောင်ကိုင်းပြီး အရေးပြားများ ကွာနေသည့် ပခုံးပေါ်တွင် ကုန်ထမ်း တံပိုးသည် ညွတ်ပက်ကာ
တကျိကျိ မြည်နေသည်။ နဖူးမှ ချွေးများသည် မျက်လုံးထဲသို့  စီးဝင်နေ၏။ ရေငတ်ကာ အာခေါင်များ
 ခြောက်သွေ့ လာသည်။ ကန်သင်းများပေါ်မှ ချော်မကျစေရန် သတိထားလာရ၏။ ဝေသည် ကျနော့် နောက်ဖက်မှ ခြေလှမ်းမှန်မှန်ဖြင့်လျှောက်လာသည်။ ကျနော်ကား မဲဟော်တောစပ်ကို စိတ်၌ ပန်းတိုင်
အဖြစ် ရည်မှန်းရင်း သွက်သွက် လျှောက်လာသည်။ မဲဟော် တောစပ်ကား ရောက်လိုဇော ပြင်းလာလေလေ ဝေးနေလေလေ ထင်ရသည်။ မဲဟော်တောစပ်ရှိ မဲဟော်စမ်းချောင်း နံဘေးသို့ ရောက်လာခဲ့ချိန်တွင်ကား နေသည်ပင် ညို့ သန်းသွားလေသည်။ ကျနော်သည်ချောင်းကမ်းနဖူးရှိ သဖန်းပင်ရိပ်တွင် အထမ်းကို ပစ်ချလိုက်၏။ သဖန်းပင်ရင်း မြက်ခင်းပြင်ပေါ်တွင် ကိုယ်ကို ပစ်လှဲချလိုက်သည်။
 ဝေသည်လည်းထိုင်ပြီးမှ သူ့ ခေါင်းပေါ်မှတောင်းကို ဖြည်းဖြည်းချလိုက်လေသည်။ သူသည် မျက်နှာမှ ချွေးများကို ပုဆိုးစုတ်နှင့် သုတ်ပြီးကျနော့်နံဘေး မြက်ခင်းပြင်ပေါ်တွင် ပက်လက်လှဲ အိပ်လိုက်ပြန်သည်။ ကျနော်တို့ အထက် ကောင်းကင်၌မူ ရေခိုးရေငွေ့ မိုးသားများသည် ဖြည်းဖြည်း
ချင်းရွေ့ နေကြ၏။ ကျနော် ပါးစပ်ဖွင့်ပြီး အသက်ကို အားပါးတရ ရှူနေမိ၏။ လေတွင် တောပန်းရနံ့လည်းပါလာနေသည်။ ကျောပြင်အောက်မှ မြက်ခင်းပြင်သည် ကတ္တီပါသားလို နူးညံ့နေသည်။ ကျနော့်တကိုယ်လုံးသည် မြက်ခင်းပြင်ထဲတွင် နစ်မြုပ်နေသည်။ အမောပြေလာမှ စမ်းချောင်းထဲတွင် မျက်နှာသစ်ကာ ရေကို ဖြည်းဖြည်း စုတ်ယူသောက်ရလေသည်။ မှန်သားလို ကြည်လင်သောရေပြင်ထက်၌ ဝေနှင့်ကျနော်တို့ အရိပ်များသည်လည်း အတူယှဉ်လျက် ပေါ်နေကြသည်။
 ဝေက “ကိုက်ိုထမ်းရတာလေးရင် ခင်ဝေ့တောင်းထဲ ထည့်အု့းံပေါ့”ဟုပြောလျှင် ကျနော် သည်လည်း
 ခေါင်းယမ်းပြလိုက်၏။ သူ့ တောင်းထဲမှ ကုန်ပစ္စည်းများ၏အလေးချိန်မှာ ကျနော့်အထမ်းထက် တ၀က်မျှပိုလေးနေပေပြီ။
“သစ်ကြိမ်းရောက်ရင် တထောက်နားအုံးမှာမို့ လား၊ တော်ကြာမိုးချုပ်တော့မယ်၊သွားကြမယ်၊
 မောတယ်ပန်းတယ် သဘောမှာမထားနဲ့ ကိုကိုရေ့” သူက ရယ်မောရွှင်ပြစွာ ပြောတတ်လေသည်။
 အိမ်ပြန်ရောက်လျင် ထမင်းကမန်းကတန်းစားပြီး ကျနော်သည်လည်း နှစ်ချိုက်စွာ အိပ်မောကျ
သွားလေတော့သည်။ ကုန်အထမ်းငှါးလျင် ကုန်ချိန်တဆယ်ကို ငါးကျပ်မျှပေးနေရသဖြင့်
 ဈေးမကိုက်တော့သည်ကတကြောင်း၊ ဟေမန်၌ အင်းအလုပ်များ ဖြိုင်ဖြိုင်စနေပြီဖြစ်သဖြင့် အထမ်း
လိုက်ပေးမည့်သူလည်းမရှိ။ ကျနော်သည် စပါးရိတ်သိမ်းအပြီး လှည်းလမ်းပေါက်လာမည့်အချိန်များကိုသာ မျှော်လင့်နေရလေသည်။ မြစ်ရေကျစအချိန်တွင် ဝေ့စိတ်ကူးများအတိုင်း ဟေမန်မြစ်ဆိပ်သောင်ခုံ
စပ်တွင် ဘူးသီးကြော်ဆိုင် တဲကလေးတခု ဖွင့်လိုက်ပြန်သည်။ နောင်နှစ်ကာလ
အတန်ကြာမှ ပြန်တွေးလျင် ဤသဲမြေသောင်စတွင် ဘူးသီးကြော်ဆိုင်ကလေး၊ ဟေမန်မြစ်ယံနှင့်
အကြော်ဆိုင်ရှင် မခင်ဝေတို့ သည် မှေးမှိန်နေသော ပန်းချီကားတချပ်အတွင်းမှ မပီမသ ရုပ်ဝတ္ထုများ
အဖြစ်ဖြင့် ပေါ်လာကြပါလိမ့်မည်။ နံနက်ခင်း ကျနော်တို့ ဆိုင်ထွက်စအချိန်တွင် မြစ်ပြင်မှ လှိုင်းဂယက်ငယ်ကလေးများသည် သောင်စကိုလာ၍ တဖျတ်ဖျတ်ခတ်နေကြ၏။ မြစ်ပြင်မှ မြစ်ခိုးမြစ်ငွေ့ များသည် မှောင်နေ၏။ မြစ်ရေစီးသံသည် တဖြတ်ဖြတ်မြည်နေ၏။ အကြော်ဆိုင်မှ မီးခိုးများသည် မြစ်ခိုးမြစ်ငွေ့ များနှင့် ပေါင်းစပ်သွား၏။ နံနက် နေခြည်များသည်လည်း မြစ်ပြင်အထက်မှ လှိုင်းကြက်ခွပ်များအပေါ်သို့ တစတစ စီးဝင်လာနေသည်။ ဤအကြော်ဆိုင်တဲနေရာ သောင်စပ်၌ပင် ဝေ့ အမေသည် ယခင်က အကြော်တဲကလေးတခု ထိုးခဲ့ဘူး၏။ ထိုအခါကမူ မြစ်ဆိပ်တွင် လူမစည်ကားလှပေ။
ကျနော်နှင့်ဝေသည် မိုးမလင်းမီကတည်းက အိုးခွက်များ၊ ဆီပုံးများ၊ ဆန်မှုန့် ဆလုံများ၊ ဘူးသီးများကိုယူလာကာ ရွာထဲမှ ထွက်လာခဲ့ကြသည်။ အကြော်တဲသို့ ရောက်လျင် အလုပ်များလက်မလည်
နိုင်အောင် ဖြစ်နေကြသည်။ ကျနော် ဘူးသီးစိတ်များကို တဖြတ်ဖြတ်လှီးနေစဉ်တွင် ဝေသည် မီးကုန်းမှုတ်နေ၏။ ဝေ့တွင် ကိုယ်ဝန်ရှိစလည်းပြုနေသဖြင့် ဝေ၏အပြုအမူများမှာ လေးလံနေ၏။ မီးများ
 တောက်လာကြ၏။ ဝေသည် မီးဖိုမှနောက်သို့  သူ့ ကိုယ်ကိုဆုတ်လိုက်ပြီး မီးရောင်ဖြင့် သူ့ ဗိုက်ကို
သူငုံ့ ကြည့်ကာ တခစ်ခစ်ရယ်မောနေပြန်သည်။

“ ကိုယ်ဝန်ကြီးနဲ့ နေရမှာတော့ ရှက်စရာကြီးကွယ်၊ ခင်ဝေအားကြီးရှက်တာဘဲ” ဟု တိုးတိုးပြောကာ ရွှင်လန်းနှစ်သိမ့်  စွာ ရယ်နေခဲ့သည်။ ကျနော်ကား ဤရက်များအတွင်းတွင် အလုပ်အတွက် စိတ်၌ သောကရောက်နေခဲ့ပြန်သည်။ ကျနော့်စိတ်များမှာ ထိုအကြောင်းကိုတွေးမိလျင် ညှိုးရော်သွားခဲ့သည်
ချည်းပင်။ အလုပ်ကို သည်အတိုင်းထား၍မဖြစ်။ အမှုအတွက် ငွေတထောင်မျှ အကုန်အကျခံပြီးလိုက်
သင့်ပေပြီ။ ရုံး၌ အမှုက်ို မကိုင်သေးပဲ စေါင့်နေကြခြင်းမှာ ကျနော့်အိတ်ထဲမှ ငွေထွက်လာနိုင်ရန်
အချိန်ပေးထားခြင်းဖြစ်ပေသည်။ ကျနော်သည် မြို့ ကြီးသို့ ကျနော်တို့ ပြောင်းရှွေှု့ သွားပြီး အမေ့ထံမှ အကူအညီများတောင်းသင့်သည်ကို တွေးလာခဲ့မိသည်။ တနံနက်တွင်မူ ကျနော့်စိတ်ကူးများ ဝေ့ကို
 ဖွင့်ပြောရလေသည်။ ဝေသည် ပွက်ပွက်ဆူနေသော ဒယ်အိုးထဲသို့ ဘူးသီးစိတ်များကို ခပ်ခွက်နှင့်ခပ်ထည့်နေရာမှ ကျနော့်မျက်နှာကို လှည့်ကြည့်ပြီး ငေးနေသည်။ မြို့ ကြီးနှင့် ကျနော့်အမေအကြောင်း
စလိုက်လျင်ပင် သူ၏ပြုံးရွှင်ကြည်နူးနေသော မျက်နှာကလေးမှာ စိုးရိမ်သောကများ ဖြစ်ပွားလာခဲ့
သည်။ သူ့ မျက်နှာကလေးသည် ကျနော့်စကား အဆုံးမသတ်မီတွင်ပင် အဖြေးဖြေးညှိုးရော်လာနေ
သည်။
“ အလုပ်ပြန်လိုက်မှဖြစ်မယ်၊ အလုပ်လက်မဲ့ဖြစ်နေတာ လူပင်ပမ်းတာက ဒီလောက်အရေးမကြီးဘူး၊ လူအထင်သေးခံရတာက သိတ်ဆိုးတယ်၊ အမှန်ပြောရရင် ဒီအခြေအနေ နေရတာ တခါတခါ သိတ်အားငယ်ဖို့ကောင်းတယ်၊ ဝေ ပင်ပမ်းတာကိုလည်း ကို ကြည့်သာနေရတယ်၊ စိတ်မချမ်းသာတော့ဘူး၊
အများဆုံး ငွေနှစ်ထောင် မကုန်ရပါဘူး၊ အလုပ်ပြန်ရပါတယ်၊ ကို မြို့ ကြီးကို ပြန်မှ ဖြစ်တော့မယ် ”
“ ကိုကို့ ကို ဟေမန်ကလူတွေ အထင်သေးကြလို့ လား၊ မသေးပါဘူးကိုကိုရယ် ”ဟု သူသည် တွေးတွေးဆဆပြောနေ၏။
“ ဟေမန်မယ် ကိုကိုက အတောင်ကျိုးပီး ခဏ နားနေကြတာပဲဝေ၊ တသက်လုံးနေဖို့ မှ မဟုတ်ဘဲ ”
 ဝေသည် ငြိမ်သက်ကာ အကြော်အိုးဖက်သို့ မျက်နှာကို ဖြည်းဖြည်းပြန်လှည့်လေသည်။
 သူသည် အကြော်များကို ထက်အောက်လှန်နေရင်း မျက်လုံးအိမ်၌ မျက်ရည်များပြည့်လာနေပြန်သည်။
“ ကိုကိုတို့ အမေက ကိုကိုအလုပ်ပြုတ်တာ ဒီကောင်မကြောင့်လို့ ပြောမှာပဲ၊ ကိုကိုနဲ့ ခင်ဝေနဲ့ ကွဲကြရမှာပဲ၊ ဖြစ်သလို ခွဲကြမယ်၊ မပြုံးပါနဲ့ ကိုကိုရယ်၊ ကိုကိုသွာှးုရင် ခင်ဝေ လိုက်လည်းမလိုက်ရဲဘူး၊ ဒီမှာလဲ မနေခဲ့ဘူး ”
ကျနော်သည်လည်း သူ့ စကားသံများကို နားထောင်ပြီး စိတ်ရှုပ်လာနေမိခဲ့လေသည်။ သူ့ ကို ကျေနပ်နားလည်အောင် မည်သို့ မျှရှုင်းပြ၍ ရနိုင်မည်မဟုတ်သည်ကိုလည်း သိနေမိ၏။ ကျနော်ကား မြို့ ကြီးသို့ သူမသိပဲ ထွက်ခွါသွားရတော့မလိုပင် ဖြစ်နေသည်။ သူသည် ဤရက်များအတွင်း၌ ဈေးရောင်းလည်းမထွက်တော့ပေ။ သူဈေးရောင်းထွက်သွားစဉ်တွင် ကျနော်ထွက်ခွါသွားမည်ကို ခလေးလိုပင် စိုးရိမ်နေသည်။ ညအိပ်လျင်ပင် သူအိပ်ပျော်နေစဉ် ကျနော်ထွက်သွားမည်ကို စိုးရိမ်ကာ ကျနော့်လည်ပင်းကို မလွှတ်တမ်း ဖက်ထားပြီးမှ အိပ်သည်။ တခါတရံ ညနက်သန်းခေါင်၌ သူအိပ်ှုရာမှ နိုးလာပြီး ကျနော့်ကိုမတွေ့ လျင် အိပ်ရာပေါ်၌ လိုက်၍စမ်းသည်။ သူသည် ခြေရင်းမှ မှန်အိမ်မီးကိုမြှင့်လိုက်ပြီး
‘ လန့် သွားတာဘဲ ‛ ဟု သူ့ ကိုယ်သူ ပြောကာ ပြန်လှဲအိပ်လျင် ကျနော့်လည်ပင်းကို တင်းကြပ်စွာ ဖက်ထားပြန်သည်။ သူသည် ညအိပ်ရာ မဝင်မီတွင်လည်း သူအိပ်ပျော်နေစဉ် ကျနော်ထွက်ခွါမသွားရန် တတွတ်တွတ်ပြောနေတတ်ပြန်သည်။
“ ခင်ဝေ့ ရွှေတွေ ဘာလုပ်ဖို့ ထားတာလဲကိုကို၊ ရောင်းလိုက်ပေါ့၊ ငွေ သွားမတောင်းပါနဲ့ ကိုကိုရယ်၊
 မျက်နှာအောက်မချစမ်းပါနဲ့ ၊ ခင်ဝေ့အမေတို့ မှာ ပစ္စည်းရှိရင်အကောင်းသားနော်၊ ခင်ဝေ့အမေဆိုရင်
 မျက်နှာအောက်ချနေဘို့ လဲမလိုဘူး၊ ကိုကိုထွက်သွားရင် ခင်ဝေနဲ့ ကွဲရမှာဘဲ၊ ခင်ဝေလေ ဒီဟေမန်မယ် ဆွေမျိုးဆိုလို့ လဲ ရင်းရင်းနှီးနှီးထဲကမရှိဘူး၊ ကိုကိုမရှိရင်တော့ ခင်ဝေတကောင်ကြွက် ဖြစ်နေခဲ့ရမှာ ”
 စကားပြောနေရင်း သူ့ နှုတ်ခမ်းကလေးများမှာ မဲ့လာကြလေသည်။ ကျနော်လည်း သူ့ နဖူးကိုသာ သပ်တင်နေသော်လည်း သူ့ ကို ထိုအကြောင်းနှင့်ပတ်သက်၍ စကားတလုံးမျှ မပြောတော့ပေ။ မှန်အိမ်ကိုမှိန်လိုက်ပြီး သူနှင့်ခတ်ခွါခွါအိပ်ကာ ကျနော်သည် စိတ်မောပင်ပန်းနေရလေသည်။ သူ့ ရွှေများကို မပေါင်နှံ မရောင်းချသင့်ပေ။ ထိုသို့ အသုံးပြုပြီးမှ အလုပ်ပြုတ်သွားခဲ့လျင် ကျနော်တို့ ကား ခြေလွတ်လက်လွတ် အခြေအနေပို၍ဆိုးလာကြလိမ့်မည်ကို သူ့ ပြောပြ၍ နားလည်မည်မဟုတ်။ နံနက်ခင်းများတွင် အကြော်တဲဆိုင် အတွင်း၌လည်း သူ့ က်ိုမြင်တွေ့ နေရသည်မှာ ထိုအကြောင်းကို နက်ရှိုင်းထိခိုက်စွာ
 တွေးတောနေပုံရလေသည်။ သူသည ဘူးသီးကြော်များကို ခပ်ခွက်ဖြင့် ထည့်နေရင်း ငေးနေ
တတ်ပြန်သည်။ သူ့ ကိုယ်တခြမ်းကို အကြော်မီးဖိုရောင်ဖြင့် ဘေးတစေါင်းမြင်နေရပုံမှာ ထိုအခါများ၌ စိတ်ထိခိုက်ဖွယ်ရာ ဖြစ်နေပြန်သည်။

“ ကိုကို ဒီမှာမနေချင်တော့တာ ကုန်ထမ်းရတာ ပင်ပန်းလို့ လားဟင် ” ဟု သူသည် လှည့်မကြည့်ဘဲ သူ့ အတွေးနှင့်သူ မေးနေတတ်သည်။

“ လှည်းလမ်းလည်း ပေါက်တော့မှာဘဲ၊ ကိုက်ို ကုန်ထမ်းရတာ ပင်ပန်းနေရင် မထမ်းနဲ့ တော့လေ၊
ခင်ဝေရွက်ပါ့မယ်၊ ကိုကို အဖေါ်ဘဲ လိုက်ခဲ့ပေါ့၊ ဒီနှစ် ဟေမန်မယ် သစ်ကွင်းဖွင့်ရင် စည်လာအုန်း
မယ်၊ ဒီထက် ရောင်းချလို့ ကောင်းလာမယ်၊ ခင်ဝေ့သဘော ဆိုရင်လေ ဒီမှာ သုံးပင်အိမ်တလုံးလောက်
 ဆောက်မယ်၊ မြေပဲ သုံးဧကလောက်စိုက်မယ်၊ ဒါပေမယ့် ကိုကိုက မနေချင်ဘူးမှုတ်လား။

‘ ခင်ဝေလေ အခုတလော သိတ်အားငယ်တာပဲ၊ ကိုယ်ဝန်ကြောင့်လားမသိဘူး၊ ကိုက်ို့ ကိုလည်း မျက်စိအောက်က ဘယ်မှ မသွာစေချင်ဘူး၊ ကိုကို ထွက်သွားမှာ သိတ်ကြောက်တာ၊ ကိုကိုထွက်သွားရင် ကိုကိုနဲ့ ကွဲကြရင် ခင်ဝေတော့ ကိုယ်ဝန်ကြီးနဲ့ ဘယ်လိုဖြစ်နေရမယ်ဆိုတာ မသိတော့ဘူး ‛
သူ့ ကိုယ်ဝန်မှာ တရက်ပြီးတရက် ပို၍ ထင်ရှားလာနေသည်။ မီးရောင်အောက်တွင် သူ့ ချွေးခံအင်္ကျီမှ
 ကြယ်သီးတလုံးပြုတ်နေသည်ကို မြင်နေရသည်။ ထိုနေရာ၌ သူ၏ဝင်းဝါသော ဗိုက်သားမှာ အပြင်သို့ ရုန်းကန်ထွက်နေသည်။ ထိုခဏ၌ပင် ကျနော်သည် သူမွေးမည့်သားသမီးအတွက် ကြည်နူးစိတ် ဝမ်းသာစိတ်များ ခံစားနေရပြန်သည်။ ဖခင်၏ မေတ္တာစိတ်များသည် နှလုံးသားမှ တဖြန်းဖြန်းအဆိပ်တက်သလို တက်လာနေကြသည်။
“ အေးလေ ဝေ ဒီလောက် သောကဖြစ်နေရင် ကို မသွားတော့ပါဘူး၊ ရွှေဘဲ ပေါင်ရမှာပေါ့လေ၊ မသွားတာဘဲ မှန်ပါလိမ့်မယ်၊ တော်ကြာ ကိုသွားနေတုန်း ဝေ တခုခုဖြစ်ရင် စိတ်ဆင်းရဲရမှာဘဲ ”
ကျနော့်စိတ်များ အဆုံးမသတ်မီ သူသည် ကျနော့်ကိုပြန်လှည့်ကြည့်နေ၏။ ထိုဝမ်းသာ ကြည်နူးမှုများကြောင့်ပင် သူ့ မျက်လုံးအိမ်၌ မျက်ရည်များ ပိတ်ဖုံးလာနေပြန်သည်။ သူသည် သဲသောင်စပ်ရှိ လေထဲ၌ လည်းကောင်း၊ မြစ်ပြင်ထက်ရှိ လှိုင်းလိပ်ငယ်များအပေါ်တွင်လည်းကောင်း၊ ဂယက်များရိုက်ခတ်လာအောင်
 ‘ တကယ်လား တကယ်လား က်ိုကို မြို့ ကြီးကို မသွာတော့ဘူးနော်၊ မသွားတော့ဘူးနော် ‛ နှင့် မေးနေလျင် ကျနော်သည်လည်း ခေါင်းကို တဆတ်ဆတ် ညိတ်ပြနေရပြန်သည်။
 နိုင်ဝင်းဆွေ


No comments:

Post a Comment