စွန့်သူနှင့် စားသူများ

 ၄.၁.၂၀၁၅
ဗိုလ်ချုပ်နှစ် ၁၀၀ ပြည့်အတွက် စာတွေလိုက်ဖတ်တော့ ရိုးသားတဲ့ ဗိုလ်ချုပ်အောင်ဆန်းဟာ ပိုက်ဆံအိတ်ထဲမှာ တစ်ပြားမှ မရှိဘဲ နေထိုင်သွားတာကို တွေ့ရတယ်။

တစ်နေ့ ဗိုလ်ချုပ်က ဗိုက်ဆာတော့ သူ့နားမှာ အမြဲရှိနေတဲ့ ဗိုလ်ထွန်းလှကို ဗိုက်ဆာလိုက်တာကွာ လို့ပြော သတဲ့။ ဗိုလ်ထွန်းလှကလည်း ဗိုလ်ချုပ်ဘာစားချင်သလဲဆိုတော့ ဗိုလ်ချုပ်က "ငါ ပလာတာ စားချင်တယ်ကွာ" လို့ ပြောသတဲ့။

ဒီတော့ ဗိုလ်ထွန်းလှလည်း ဗိုလ်ချုပ်ကို မဂိုလမ်း (ယခု ရွှေဘုံသာလမ်း) ကိုခေါ်လာပြီး သူတို့ ကျောင်းသား ဘဝက စားနေကျ ပလာတာဆိုင်မှာ ပလာတာ မှာကျွေးတယ်။ ဗိုလ်ချုပ်က ဆာနေတာနဲ့ ဆိတ်သားခပတ်ပါ စားချင်တယ်ပြောတော့ ဗိုလ်ထွန်းလှလည်း ဆိတ်သားခပတ်ပါ မှာပေးလိုက်ရတယ်။

အိတ်ထဲမှာ ပိုက်ဆံပါတာကနည်းနည်း။ ဗိုလ်ချုပ်ကို တစ်ယောက်ထဲစာ မှာပေးပြီး သူမစားဘဲထိုင်နေရင် ဗိုလ်ချုပ်က စားမှာ မဟုတ်ဘူးဆိုတာကို ဗိုလ်ထွန်းလှသိတယ်။ ဒါကြောင့် မယောင်မလည်နဲ့ ထသွားပြီး ဆိုင်ရှင် ကုလားဆီကို ဟိုမှာထိုင်နေတဲ့သူကို သိလားလို့ မေးလိုက်တော့ ကုလားက သိတယ်လို့ ပြန်ပြောတယ်။ ဗိုလ်ထွန်းလှကလည်း သူ့မှာ ပိုက်ဆံမပါလို့ မနက်ဖြန်မှ လာပေးပါ့မယ်ဆိုတဲ့ အကြောင်း၊ ဗိုလ်ချုပ်မေးရင် ရှင်းပြီးပြီဆိုတဲ့ အကြောင်း ကုလားကိုပြောခိုင်းပြီး ပလာတာနဲ့ ဆိတ်သားခပတ်ထိုင်စားနေတယ်။

ဗိုလ်ချုပ် ဆာဆာနဲ့ အားရပါးရ စားနေတာကို ဗိုလ်ထွန်းလှကကြည့်နေမိတယ်။ အားလုံး စားပြီးတော့ ဗိုလ်ချုပ်က ဗိုလ်ထွန်းလှကို ပိုက်ဆံရှင်းလိုက်လေကွာလို့ ပြောပါတယ်။ ဆိုင်ရှင်ကုလားကလာပြီး ခုနက ရှင်းသွားပြီပြီလို့ ပြောပါတယ်။ ဗိုလ်ထွန်းလှလည်း နောက်တစ်နေ့မှ ပလာတာဆိုင်ကို ပိုက်ဆံသွားရှင်းပေးရ တယ်ဆိုတဲ့ စာကိုဖတ်ပြီး ကျွန်တော် အရမ်းစိတ်မကောင်းဖြစ်မိတယ်။

သူ အသက်ရှင်နေသမျှ ကာလပတ်လုံး ပိုက်ဆံဆိုတာ ဘာမှန်းမသိဘဲ ဒီအတိုင်းဖြစ်သလိုနေပြီး တိုင်းပြည်နဲ့ လူမျိုးအတွက် အသက်စွန့်သွားရတဲ့ ဗိုလ်ချုပ်။ ပလာတာဖိုးတောင် မရှင်းနိုင်တဲ့ ဗိုလ်ချုပ်။ ဗိုက်ဆာတာကို အာဏာနဲ့ သွားဝယ်မခိုင်းတာတွေ၊ ငါဗိုလ်ချုပ်ဆိုပြီး နိုင့်ထက်စီးနင်း မလုပ်တာတွေကို ဖတ်ရလေ တစ်ချိန်က ဗိုလ်ချုပ်ကိုတွေးပြီး ဝမ်းနည်းလေဖြစ်မိတယ်။

ခေတ်သစ်ဗိုလ်ချုပ်တွေကတော့ ပလာတာ မပြောနဲ့ ပလာဇာကြီးတစ်ခုလုံးကိုတောင် ဝယ်နိုင်တဲ့ အနေအထား။ တိုက်ကောင်းကောင်း၊ ခြံကောင်းကောင်း၊ ကားကောင်းကောင်းတွေစီးပြီး မောက်မာစွာ နေထိုင်နိုင်ကြတဲ့ အနေအထား။

မစားဘဲစွန့်သွားသူတွေကို အားမနာ၊ မျက်နှာမထောက်၊ မစွန့်ဘဲ စားနေကြတဲ့ သူတွေ မြန်မာပြည်မှာ ဂုဏ်မောက်နေကြတာကိုကြည့်ပြီးတော့ ဗိုလ်ချုပ် (အောင်ဆန်း) အတွက် စိတ်မကောင်းဖြစ်မိတယ်။

  Written by တင်ညွန့်
http://mp4you.co.uk/assk/4bogyoke-aung-san.html