စက်တင်ဘာ ၁ ၊ ၂၀၁၄
မန္တလေးမြို့သို့ တရုတ်နိုင်ငံသားဝင်ရောက်မှု သိသာစွာမြင့်တက်လာကြောင်းလူဝင်မှုကြီးကြပ်ရေးနှင့် အမျိုးသားမှတ်ပုံတင်ဌာန၏ စာရင်းဇယားများအရ သိရသည်။
စာရင်းဇယားများအရ ၂၀၁၄ ခုနှစ်အတွင်း လစဉ်အလုပ်အကိုင်ဗီဇာဖြင့် ၀င်ရောက်သူ နိုင်ငံခြားသား ၁၀၀၀ ကျော်ရှိသည့်အနက် ၁၀၀၀ ၀န်းကျင်မှာ တရုတ်နိုင်ငံသားများ ဖြစ်နေသည်။
နိုင်ငံခြား ရင်းနှီးမြှုပ်နှံမှုများ ၀င်ရောက်လာပြီးနောက် မန္တလေးမြို့တွင် လုပ်ငန်းလုပ်ကိုင်လိုသည့် တရုတ်နိုင်ငံသားများ ပိုမိုလာခြင်းဖြစ်သည်။
တရုတ်နိုင်ငံသားများအနေဖြင့် မန္တလေးမြို့တွင် ကျောက်မျက်ရတနာလုပ်ငန်း၊ ရေနံနှင့် သဘာဝဓာတ်ငွေ့နှင့် ပတ်သက်သည့်လုပ်ငန်းများတွင် အများဆုံး ၀င်ရောက်လုပ်ကိုင်ကြကြောင်းနှင့် ယခုနောက်ပိုင်းတွင် မန္တလေးအိမ်ခြံမြေဈေးကွက်အတွင်း၌ အဆမတန် ဈေးကြီးပေးဝယ်သူများ၏နောက်တွင် တရုတ်နိုင်ငံသားများ ပါဝင်ပတ်သက်နိုင်သည်ဟု အိမ်ခြံမြေအကျိုးဆောင်များနှင့် မြို့ခံများက ပြောကြားသည်။
မန္တလေးမြို့၏ လက်ရှိအိမ်ခြံမြေဈေးကွက်တွင် အမှန်တကယ် နေထိုင်ရန်မဟုတ်ဘဲ ရင်းနှီးမြှုပ်နှံရန်အတွက် အဆမတန် ဈေးကြီးပေးဝယ်သူ များပြားလာပြီး အများစုမှာ တရုတ်လူမျိုးများဖြစ်သည်ဟု အိမ်ခြံမြေအကျိုးဆောင်များက ဆိုသည်။
“မန္တလေးအိမ်ခြံမြေဈေးကွက်မှာ တရုတ်လူမျိုးတွေ ၀င်ရောက်ခြယ်လှယ် ဈေးကစားနေကြပြီး လုပ်ကိုင်နေကြတာပဲ။ နောက်ပြီး သိန်းသောင်းချီတန်တဲ့ အရောင်းအ၀ယ်မျိုး ဖြစ်တယ်ဆိုတာ သိရပေမယ့် ဘယ်သူတွေ ၀ယ်သွားတယ်ဆိုတာ အတိအကျ မပြောနိုင်ကြဘူး။ အဲဒီလို အရောင်းအ၀ယ်တွေဆိုတာ မန္တလေးမှာ တော်တော်များလာပြီ။ ပြောရရင် မန္တလေးအိမ်ခြံမြေဈေးနှုန်းတွေ အဆမတန် မြင့်တက်လာရတာဟာ ဘယ်ကရမှန်းမသိရတဲ့ငွေတွေနဲ့ ဈေးကစားလုပ်ကိုင်နေကြလို့။ အခုဆိုရင် မန္တလေးမြို့လယ် ဧရိယာမှာ မြန်မာလူမျိုးပိုင်တဲ့ အကွက်တွေ ဘယ်လောက်မှမကျန်တော့ဘူး။ မြို့ခံအများစုကတော့ မြို့သစ်တိုးချဲ့ရပ်ကွက်တွေမှာ ရောက်ကုန်ကြပြီ” ဟု အိမ်ခြံမြေအကျိုးဆောင်တစ်ဦးက ပြောကြားသည်။
မန္တလေးမြို့ ချမ်းအေးသာစံမြို့နယ်တွင်နေထိုင်သူ ဒေါ်ခိုင်သဇင်က “ကျွန်မတို့လမ်းထဲမှာအရင်က တရုတ်လူမျိုး အိမ်သုံးလေးအိမ်ပဲ ရှိပါတယ်။ အခုတော့ မြန်မာအိမ်က သုံးလေးလုံးလောက်ပဲ ရှိတော့တယ်။ တချို့အိမ်တွေဆို လူမနေဘဲ တရုတ်စာတန်းတွေပဲ ချိတ်ထားတာ တွေ့ရတယ်။ မန္တလေးဟာ တရုတ်နိုင်ငံရဲ့ ပြည်နယ်တစ်ခုဖြစ်သွားမှာ စိုးရိမ်မိတယ်” ဟု ပြောကြားသည်။
တရုတ်နိုင်ငံသားများဝင်ရောက်မှု ပိုမိုများပြားလာသည့်အချိန်တွင် မန္တလေးမြို့ရှိ တရုတ်နွယ်ဖွားများ အိမ်ခြံမြေများ ၀ယ်ယူနေမှုမှာ မြန်မာနိုင်ငံသား ဟုတ်မဟုတ်ကို စုံစမ်းဖော်ထုတ်ရန် လိုအပ်သည်ဟု မြို့ခံများက ပြောကြားသည်။
အမရပူရမြို့နယ်မှ အသက် ၂၅ နှစ်အရွယ် လူငယ်တစ်ဦးက “မန္တလေးမြို့ကို တောင်ဘက်ကိုပဲ ချဲ့လို့ရတယ်။ ဒါကို ကြိုတင်မြင်တဲ့ တရုတ်တွေက အမရပူရမြို့ထဲအပြင် ရွာတွေအထိဆင်းပြီး မြေကွက်၊ လယ်ကွက်တွေကို အဆမတန်ဈေးကြီးပေးပြီး လိုက်ဝယ်နေတယ်။ သူတို့ကိုယ်တိုင်နာမည်နဲ့ ၀ယ်တာရှိသလို မြန်မာအမည်နဲ့ ၀ယ်နေတာတွေလည်း ရှိတယ်။ ဒီလိုနဲ့ ကျွန်တော်တို့မြို့ထဲမှာလည်း တရုတ်တွေခြေဆန့်လာတယ်။ မန္တလေးက တရုတ်တွေမဟုတ်ဘူးလို့လည်း သိရတယ်။ အရင်က ၁၀ သိန်းဝန်းကျင်ပဲရှိတဲ့ တောင်သမန်အင်း အရှေ့ဘက်က ရွာတွေတောင်မှ သိန်း ၁၀၀၀၊ ၂၀၀၀ တန်ကုန်တယ်။ ကြာလာရင်တော့ မန္တလေးဟာ စင်ကာပူလို တရုတ်တွေနေတဲ့နေရာ ဖြစ်လာနိုင်တယ်” ဟု ပြောကြားသည်။
တရုတ်လူမျိုးများအနေဖြင့် မန္တလေးမြို့ပေါ် ရပ်ကွက်များသာမက ဆင်ခြေဖုန်းရပ်ကွက်များနှင့် လယ်ယာမြေများကိုပါ လိုက်လံဝယ်ယူလျက်ရှိသည်ဟု ဒေသခံများ၏ ပြောကြားချက်အရ သိရသည်။
ထို့အပြင် မန္တလေးမြို့တွင် တရုတ်လူမျိုးပိုင်ဆိုင်သည့် လုပ်ငန်းများလည်း များပြားလာပြီး တရုတ်စာသားဖြင့် ရေးသားထားသော ဟိုတယ်များ၊ စားသောက်ဆိုင်များ အပါအ၀င် အခြားလုပ်ငန်းများပါ မြို့တွင်းတွင် ပိုမိုတွေ့ရှိလာရကြောင်း မြို့ခံများကဆိုသည်။
“အိမ်ခြံမြေဈေးကွက်မှာ တရုတ်တွေ ပါဝင်ပတ်သက်နေတယ်ဆိုတာတော့ လူတိုင်းသိတယ်။ ဒါပေမဲ့ သူတို့က နာမည်ခံနဲ့ ၀ယ်တာမျိုးဆိုတော့ သက်သေပြဖို့ခက်တယ်။ ဒါကို သက်ဆိုင်ရာ တာဝန်ရှိသူတွေအနေနဲ့ စစ်ဆေးဖော်ထုတ်သင့်တယ်” ဟု မန္တလေးမြို့ခံ စီးပွားရေးလုပ်ငန်းရှင်တစ်ဦးက ပြောကြားသည်။
လူဝင်မှုကြီးကြပ်ရေးနှင့် အမျိုးသားမှတ်ပုံတင်ဌာနမှ ဦးသောင်းဇော်က “အိမ်ခြံမြေ၀ယ်တယ်ဆိုတာကတော့ မြန်မာနိုင်ငံသားတွေပဲ ၀ယ်လို့ရပါတယ်။ နိုင်ငံခြားသားကတော့ အိမ်ဝယ်ပိုင်ခွင့် မရှိတဲ့အပြင် အိမ်ငှားတောင် နေခွင့်မရှိပါဘူး” ဟု အိမ်ခြံမြေ၀ယ်ယူနိုင်မှုနှင့်ပတ်သက်၍ ပြောကြားသည်။
သို့ရာတွင် မန္တလေးသို့ ၀င်ရောက်လာသော အချို့တရုတ်နိုင်ငံသားများသည် မြန်မာစကား ကျွမ်းကျင်စွာတတ်သည့်အတွက် အရေးယူရန် ခက်ခဲကြောင်းလည်း ဦးသောင်းဇော်က ပြောကြားသည်။
မန္တလေးမြို့သို့ လာရောက်သော တရုတ်နိုင်ငံသားများအနေဖြင့် ဗီဇာသက်တမ်းကျော်လွန်ကာ နေထိုင်ခြင်း၊ မြန်မာနိုင်ငံသားဖြင့် အိမ်ထောင်ကျကာ တရားမ၀င် အခြေတကျနေထိုင်ခြင်း၊ တရုတ်နိုင်ငံတွင် ရာဇ၀တ်ကျူးလွန်ကာ ထွက်ပြေးတိမ်းရှောင်လာသူများ ရှိခြင်းတို့ကို ဖမ်းဆီးအရေးယူမှုများ ပြုလုပ်လျက်ရှိကြောင်း၊ တရားမ၀င်နေထိုင်သည့် တရုတ်နိုင်ငံသားများကို တွေ့ရှိပါက တိုင်ကြားနိုင်ကြောင်းနှင့် လက်ခံထားရှိသောအိမ်ရှင်ကို လ၀ကဥပဒေအရ ထောင်ဒဏ်ချမှတ်နိုင်ကြောင်း ဦးသောင်းဇော်က ဆက်လက်ပြောကြားသည်။
တရုတ်နိုင်ငံသားများ အပါအ၀င် နိုင်ငံခြားသားများအနေဖြင့် ဗီဇာစည်းကမ်းများအတိုင်း သတ်မှတ်ချက်နေထိုင်ရန် လစဉ်ခေါ်ယူ ပြောကြားလျက်ရှိကြောင်း၊ နိုင်ငံခြားသားအရေးနှင့်ပတ်သက်၍ ယခင်ကထက် ပိုမိုတင်းကျပ်စွာ ဆောင်ရွက်လျက်ရှိကြောင်း ပြောကြားသည်။
အလုပ်အကိုင်ဗီဇာဖြင့် ၀င်ရောက်လာသော နိုင်ငံခြားသားများကို ရက် ၇၀ နေထိုင်ခွင့်ပြုထားပြီး သက်ဆိုင်ရာဝန်ကြီးဌာန၏ ထောက်ခံချက်ဖြင့် သုံးကြိမ်သက်တမ်းတိုးကာ တစ်နှစ်အထိ နေထိုင်ခွင့်ရှိကြောင်း သိရသည်။
“မရောင်းရတဲ့ စတိုးဆိုင်တွေ ဖွင့်ထားပြီးတော့ နောက်ထပ်မြေတွေ ၀ယ်နေတာတွေက ဘယ်ကပိုက်ဆံနဲ့ ၀ယ်တယ်။ ဘယ်လိုနည်းနဲ့ ၀င်လာတယ်ဆိုတာ စဉ်းစားစရာ ဖြစ်နေတာပေါ့။ တချို့ တကယ်စီးပွားရေးလုပ်ပြီး ၀ယ်တဲ့သူတွေ ရှိတာပေါ့နော်။ ဒါပေမဲ့ တော်တော်များများက အဲဒီလိုဖြစ်နေတယ်။ ဒီငွေတွေ ဘယ်လိုနည်းနဲ့ ၀င်နေလဲဆိုတာတော့ သူတို့အဆက်စပ်နဲ့ ၀င်လာကြတာလို့ပဲ ပြောရမှာပဲ။ မန္တလေးမြို့ပေါ်မှာ တရုတ်တွေ ၀ယ်တာမဟုတ်ဘူး။ အကုန်လိုက်ဝယ်တာ။ အရင်က မြန်မာတွေ အစွန်ရောက်သွားတယ်။ အစွန်ကို မနေနိုင်တော့တဲ့သူတွေလည်း ရှိလာတယ်။ အငှားအဆင့် ရောက်သွားကြတယ်” ဟု ၀သုနြေ္ဒ အိမ်ခြံမြေအကျိုးဆောင်လုပ်ငန်းမှ ဦးမျိုးမြင့်အောင်က ပြောကြားသည်။
မန္တလေးမြို့ မဟာအောင်မြေမြို့နယ်ရှိ ကျောက်စိမ်းဈေးတွင် ကာလရှည်ကြာနေထိုင်သည့် တရုတ်လူမျိုးများရှိကြောင်း၊ အများစုမှာ ဟိုတယ်တွင် နေထိုင်ခြင်းမပြုဘဲ အိမ်ငှားရမ်းနေထိုင်ကြကြောင်း၊ မည်သည့်ဗီဇာဖြင့် လာရောက်သည်ကိုမူ မသိရှိရကြောင်း ကျောက်မျက်လုပ်ကိုင်သူများက ပြောကြားသည်။
“သိရသလောက်တော့ ပြည်မကလုပ်ငန်းရှင်နဲ့ ဒေသခံလုပ်ငန်းရှင် တရုတ်လူမျိုးတွေ ငွေကြေးလှည့်ပတ် စီးဆင်းနေတဲ့ပုံစံက ဥပမာဆိုပါတော့။ နယ်ခံလုပ်ငန်းရှင်က ဆိုင်ကယ်အမြောက်အမြားကို သွင်းကုန်လိုင်စင်နဲ့ မှာယူတင်သွင်းတယ်။ ဒါပေမဲ့ ငွေအလုံးအရင်းလိုက် ချပေးစရာ မလိုဘူး။ နောက်တော့မှ ဟိုဘက်က တရုတ်လုပ်ငန်းရှင်က မန္တလေးဈေးကွက်မှာလာပြီး ကျောက်စိမ်းလုပ်ငန်းမှာ ၀ယ်ယူတာမျိုး၊ အိမ်ခြံမြေ၀ယ်ယူတာမျိုး လုပ်ကြတာ။ မန္တလေးမှာရှိတဲ့ တရုတ်တွေ အိမ်ခြံမြေ၀ယ်နေတဲ့နောက်မှာ ပြည်မကတရုတ်တွေ ရှိကိုရှိနေလိမ့်မယ်” ဟု မန္တလေးမြို့မှ မူဆယ်-ကြယ်ခေါင်နယ်စပ်တွင် သွင်းကုန်ထုတ်ကုန်လုပ်ငန်း ပြုလုပ်လျက်ရှိသည့် ဦးအောင်ကိုက ပြောကြားသည်။
မန္တလေးတွင် တရုတ်နွယ်ဖွား မြန်မာနိုင်ငံသား ခြောက်သောင်းကျော် ခုနစ်သောင်းနီးပါးရှိကြောင်း လူဝင်မှုကြီးကြပ်ရေးနှင့် အမျိုးသားမှတ်ပုံတင်ဌာန၏ စာရင်းဇယားများအရ သိရသည်။
“ဘယ်နေရာကြည့်ကြည့် တရုတ်ဆိုင်တွေနဲ့ မန္တလေးဖြစ်နေပြီ။ တရုတ်လူမျိုးအများစုဟာ တရုတ်စကားပဲ ပြောကြတယ်။ ဗမာစကား မပြောကြဘူး။ အခုလို နိုင်ငံခြားသား အ၀င်မြင့်တက်နေတဲ့အချိန်မှာ သူတို့တွေက မြန်မာနိုင်ငံသား တရုတ်လား။ တရုတ်နိုင်ငံသား တရုတ်လားဆိုတာ ခွဲခြားဖို့ခက်လာတယ်။ နောက်ပြီး မြန်မာစာနဲ့ အင်္ဂလိပ်စာနဲ့ပဲ ခွဲပြုထားတဲ့ မန္တလေးမှာ တရုတ်စာသားတွေနဲ့ ဟိုတယ်တွေ၊ စားသောက်ဆိုင်တွေနဲ့ အခြားဆိုင်တွေ ပေါ်ပေါ်တင်တင် ဖွင့်လှစ်လာကြတယ်” ဟု မဟာအောင်မြေမြို့နယ်တွင်နေထိုင်သူ ကိုရဲနိုင်က ပြောကြားသည်။
မန္တလေးမြို့ရှိ တရုတ်လူမျိုးများနှင့် တရုတ်ပြည်မရှိ တရုတ်နိုင်ငံသားများမှာ လုပ်ငန်းလုပ်ကိုင်မည့် ရင်းနှီးမြှုပ်နှံမှုငွေကို ဘဏ်စနစ်ဖြင့် အလွှဲအပြောင်းပြုလုပ်ခြင်းမဟုတ်ဘဲ သွင်းကုန်ထုတ်ကုန်လုပ်ငန်းနှင့် ဆက်စပ်သော ငွေကြေးများဖြင့်သာ ငွေကြေးလည်ပတ်မှု ပြုလုပ်လျက်ရှိသည့်အတွက် အိမ်ခြံမြေဈေးကွက်တွင် ၀င်ရောက်လုပ်ကိုင်နေသည့် တရုတ်လူမျိုးများ၏ ငွေကြေးကို စိစစ်သင့်သည်ဟု စီးပွားရေးလုပ်ငန်းရှင်အချို့က ဝေဖန်ထောက်ပြမှုများလည်း ရှိနေသည်။
မန္တလေးမြို့ ၇၈ လမ်းတွင်နေထိုင်သူ ဦးအောင်ဇင်က “အိမ်ရှေ့မှာ မုန်လာချဉ်ရောင်းသလို၊ မာလာဟင်းရောင်းသလိုနဲ့ တိုက်တွေခြံတွေ ပိုင်သွားကြတဲ့ တရုတ်လူမျိုးတွေ ရှိတယ်။ ဒီပိုက်ဆံတွေက ဘယ်ကရတာလဲ။ တရုတ်လူမျိုးတွေ အိမ်ခြံမြေတွေကို ဈေးကြီးပေးဝယ်နေမှုနဲ့ ပတ်သက်ပြီး သေချာစိစစ်သင့်တယ်” ဟု ပြောကြားသည်။
မန္တလေးမြို့တွင် တရုတ်လူမျိုး များပြားလာမှု၊ တရုတ်နိုင်ငံသားများ ၀င်ရောက်မှု မြင့်တက်လာမှုနှင့်အတူ အိမ်ခြံမြေများအား အဆမတန် ဈေးကြီးပေးဝယ်နေမှုတို့ကြောင့် မန္တလေးမြို့သည် တရုတ်နိုင်ငံ၏ ငွေပြုလုပ်သည့် နေရာတစ်ခု ဖြစ်လာမည်ကို စိုးရိမ်ကြောင်း ဒေသခံများက ပြောကြားသည်။
Eleven Media Group
No comments:
Post a Comment