ဗြိတိသျှ ဒုတိယဝန်ကြီး မြစ်ကြီးနားမြို့ကို ရောက်ရှိ

29-1-2014 (RFA)

မြန်မာအစိုးရနဲ့ တိုင်းရင်းသား လက်နက်ကိုင်အဖွဲ့တွေအကြား ငြိမ်းချမ်းရေးလုပ်ငန်းစဉ်တွေ လုပ်ဆောင်နေတာကို ဗြိတိန်အစိုးရအနေနဲ့ ထောက်ခံကြောင်း၊ အဲဒီလုပ်ငန်းစဉ်တွေမှာ နိုင်ငံရေးအရ အဖြေရှာနိုင်မယ့် နည်းလမ်းတွေကိုပါ ထည့်သွင်းစဉ်းစားစေလိုကြောင်း ဗြိတိသျှနိုင်ငံခြားရေးနဲ့ ဓနသဟာယနိုင်ငံများ ဝန်ကြီးဌာန အာရှရေးရာ ဒုတိယဝန်ကြီး Mr Hugo Swire က ဒီနေ့ ပြောကြားလိုက်ပါတယ်။

ကချင်ပြည်နယ် မြစ်ကြီးနားမြို့ကို ရောက်ရှိစဉ် ငြိမ်းချမ်းရေး လုပ်ငန်းစဉ်နဲ့ ပတ်သက်ပြီး RFA က မေးမြန်းရာမှာ Mr Hugo Swire က အခုလို ပြောလိုက်တာပါ။

အစိုးရအနေနဲ့ ၂၀၀၈ ဖွဲ့စည်းပုံ အခြေခံဥပဒေ ပြုပြင်ရေးကိစ္စကိုလည်း ဆောင်ရွက်ဖို့လိုသလို တိုင်းရင်းသားအရေးနဲ့ ရခိုင်ပြည်နယ် အရေးကိစ္စတွေကိုလည်း ဖြေရှင်းဖို့လိုအပ်တယ်လို့ သူကပြောပါတယ်။

ဗြိတိသျှ ဒုတိယ၀န်ကြီးဟာ ဒုတိယကမ္ဘာစစ်အတွင်းက ဗြိတိသျှစစ်တပ်အတွက် အမှုထမ်းခဲ့တဲ့ စစ်မှုထမ်းဟောင်း ၁၀ ယောက်နဲ့ တွေ့ဆုံခဲ့ပါတယ်။ ဒါ့အပြင် မြစ်ကြီးနားအခြေစိုက် ရှမ်းမျိုးနွယ်စုရေးရာအဖွဲ့၊ ကေအိုင်အို နည်းပညာအကြံပေးအလုပ်ဖွဲ့ရုံးနဲ့ ခရစ်ယာန်ဘာသာရေးအဖွဲ့တွေနဲ့လည်း တွေ့ဆုံခဲ့ပါတယ်။