အမျိုးသား ဒီမိုကရေစီ အဖွဲ့ချုပ်ပါတီ ဥက္ကဋ္ဌ ဒေါ်အောင်ဆန်းစုကြည်၏ ချင်းပြည်နယ် ခရီးစဉ်အတွင်း ရွှေပါရမီတောရ ဆရာတော် အရှင်ဆန္ဒာဓိကလည်း လိုက်ပါလာမည် ဖြစ်ကြောင်း အဆိုပါ ပါတီ ကလေးမြို့နယ် အတွင်းရေးမှူး ဦးကိုလေးက ပြောကြားသည်။
၂၀၁၄ ခုနှစ် ဇန်နဝါရီလ ၇ ရက်နေ့ တွင် ပြုလုပ်မည့် တီးတိန်မြို့နယ် ဒေါ်လွန် အုပ်စု ဇိုနွမ်းဇန် (ဆန်သိုက်) ကျေးရွာ၊ အမက (မူလွန်) ကျောင်းဆောင်သစ် ဖွင့်ပွဲနှင့် အလှူငွေ ပေးအပ်ပွဲ အခမ်းအနားသို့ ကြွရောက်ရန် လိုက်ပါလာခြင်း ဖြစ်ပြီး အဆိုပါပွဲသို့ ဒေါ်အောင်ဆန်းစုကြည်လည်း တက်ရောက်မည် ဖြစ်ကြောင်း ၎င်းက ဆက်လက်ပြောကြားသည်။
ပြီးခဲ့သည့် ၂၀၁၃ ခုနှစ် ဖေဖော်ဝါရီလ ၂၀ ရက်နေ့တွင် အရှင်ဆန္ဒာဓိက၏ ချင်းပြည်နယ် ပညာရေး ရန်ပုံငွေအတွက် ထောက်ပံ့သော အလှူငွေကျပ် သိန်း ၅၂၀ ဖြင့် အဆိုပါ ကျောင်းဆောင်ကို ဆောက်လုပ်ခဲ့ခြင်း ဖြစ်သည်။
ဒေါ်အောင်ဆန်းစုကြည်၏ ချင်းပြည်နယ် ခရီးစဉ်အတွင်း တီးတိန်၊ ဖလမ်းနှင့် ဟားခါးမြို့တို့သို့ သွားရောက်မည် ဖြစ်ပြီး ဇန်နဝါရီလ ၁၀ ရက်နေ့တွင် ကလေးမြို့ ဒေသခံများနှင့် ဟောပြော ဆွေးနွေးသွားမည် ဖြစ်ကြောင်း သိရသည်။
ဒီဇင်ဘာလ ၁၆ ရက်နေ့က ခွဲစိတ်ကုသမှု ခံယူထားသော ဒေါ်အောင်ဆန်းစုကြည်၏ ခြေထောက် ချုပ်ရိုးများကို ဒီဇင်ဘာလ ၂၆ ရက်နေ့တွင် ပြန်ဖြေရာ ခွဲစိတ်မှု ရာနှုန်းပြည့် အောင်မြင်ပြီး ကျန်းမာရေး အခြေအနေ ကောင်းမွန်ပြီ ဖြစ်သဖြင့် အဖွဲချုပ် ဥက္ကဋ္ဌ၏ ချင်းပြည်နယ် ခရီးစဉ်ကို မူလ စီစဉ်ထားသည့်အတိုင်း သွားရောက်မည် ဖြစ်ပါကြောင်း ဒေါက်တာတင်မျိုးဝင်းက အတည်ပြု ပြောကြားပါသည်။
မြတ် (ကလေး)
No comments:
Post a Comment