ကျွန်တော်တို့ကျောင်းလေးရေနစ်နေပါတယ်

ပဲခူးတိုင်း မိုးညိုမြို့နယ် ရွာသာယာအုပ်စု ရှေ့ပြေးကျေးရွာရှိ အမှတ်(၁) အခြေခံပညာမူလတန်းကျောင်းသည်ရေကြီးရေလျှံခြင်း၊ စာသင်ခုံနှင့်သင်ထောက်ကူပစ္စည်းများ မရှိခြင်း၊ ဆရာဆရာမ မလုံလောက်ခြင်းများကြောင့် ပညာသင်ကြားရေး ခက်ခဲနေသည်ဟု ဒေသခံကျေးရွာသားများက ပြောကြားခဲ့သည်။

စက်တင်ဘာ(၁၈)ရက်နေ့တွင်မိုးညိုမြို့နယ် မြောက်လွတ်ကုန်းအုပ်စုအင်းရွာမှ ရေကာတာကျိုးပေါက်ပြီး ရေလွမ်းမိုးခဲ့သဖြင့် ယခုအချိန်တွင် အဆိုပါကျောင်းမှကျောင်းသား/သူများကို ဇွဲမာန်အောင်စံပြထုတ်လုပ်ရေး သမ၀ါယမအသင်းလိမိတက်အဆောက်အဦးသို့ ပြောင်းရွှေ့ ပညာသင်ကြားပေးလျက်ရှိသည်ဟု ဒေသခံတစ်ဦးဖြစ်သူကိုဝင်းကိုက ပြောပါသည်။

စာသင်ကျောင်းမှာ အလျားပေ(၄၀)အနံပေ(၂၀)သပ်ကယ်မိုးထရံကာမြေစိုက်ဖြစ်ပြီး သင်ထောက်ကူပစ္စည်းများအနေဖြင့် စားပွဲတစ်လုံးနှင့် ခုံတန်းရှည်သုံးလုံးသာရှိသဖြင့် ကျောင်းသားကလေးများမှာ မြေကြီး ပေါ်တွင်ထိုင်ပြီး ပညာသင်ယူရသည်ဟုလည်း ၄င်းကပြောသည်။

“ကြမ်းခင်းမရှိဘူး။ ဘူမိကမ္ဗလာမြေမွေ့ရာနဲ့စာသင်ရတဲ့ကျောင်းလေးဖြစ်ပါတယ်” ဟု သူက ဆိုသည်။

ကျောင်းကို ၁၉၉၆ခုနှစ်တွင် ကျေးရွာက ကိုယ်ထူကိုယ်ထ တည်ဆောက်ခဲ့ခြင်းဖြစ်ပြီး ထိုစဉ်က ကျောင်းဆရာတစ်ဦးကို လေးသောင်းကျပ်ဖြင့် ငှားရမ်းပညာသင်ခဲ့ရသည်ဟု သိရပါသည်။

ကျောင်းသူကျောင်းသား အရေအတွက်
သူငယ်တန်း(၂၅)ယောက်၊
ပထမတန်း(၁၂)ယောက်၊
ဒုတိယတန်း(၅) ယောက်၊
တတိယတန်း(၄)ယောက်၊
စတုတ္ထတန်း(၅)ယောက်
စုစုပေါင်းကျောင်းသား/သူ(၅၁) ယောက်

၂၀၀၉ တွင် အစိုးရက ကျာင်းဆရာနှစ်ဦး ခန့်အပ်ခဲ့သော်လည်း ၂၀၁၀၊ ၂၀၁၃ တို့တွင် ထိုနှစ်ဦးလုံးပြောင်းရွှေ့သွားခဲ့ကြောင်း၊ ယခုအခါမြို့နယ်ပညာရေးမှူး၏ စီစဉ်ပေးမှုဖြင့် အခြားကျောင်းများမှဆရာဆရာမများက အလှည့်ကျ လာရောက်ပညာသင်ကြားပေးကြောင်း ကျေးရွာရွာမိရွာဖဦးမြင့်အေးထံမှသိရပါသည်။ 
Credit: Irrawaddy blog