နန်းဆိုင်နွမ်
အသက် ၁၅ နှစ်အရွယ် မိန်းကလေးကို ခြိမ်းခြောက် အဓမ္မ ကျင့်ခဲ့သည်ဟု စွပ်စွဲခံထားရသော စားသောက်ဆိုင်ပိုင်ရှင် ဦးမြင့်အောင်အား ယနေ့ ရန်ကုန်တိုင်း အရှေ့ပိုင်းခရိုင် တရားရုံးမှ ထောင်ဒဏ် ၈ နှစ် ချလိုက်ကြောင်း သိရသည်။
ဆိုင်ရှင် အမျိုးသားကို ဖေဖော်ဝါရီ ၁၁ ရက်နေ့က မြောက်ဥက္ကလာပ မြို့နယ် ရဲစခန်းတွင် ချုပ်ထားကာ (ပ) နံပါတ် ၃၅/ ၁၃/ ပြစ်မှုဆိုင်ရာ ဥပဒေ ပုဒ်မ ၃၇၆ တိုင်ကြားစွဲဆိုခဲ့သည့် အမှုအား ထောင်ဒဏ် ချလိုက်ခြင်း ဖြစ်ကြောင်း အမျိုးသား ဒီမိုကရေစီ အဖွဲ့ချုပ် (NLD) ကလေးသူငယ် ကူညီ စောင့်ရှောက်ရေးအဖွဲ့ မှ ဒေါ်လေးလေးက ဧရာဝတီသို့ ပြောသည်။
“အသက်မပြည့်တဲ့ ကလေးငယ်ကို အဓမ္မကျင့်ပြီး ဆေးတွေတိုက်တယ်။ ပြီးတော့ ကလေးမကို ဟိုပို့ဒီပို့ လုပ်တယ်။ အဲဒါကို ကြည့်ပြီးတော့ ထောင်ဒဏ် ၈ နှစ်ပဲချတယ်ဆိုတာ ပိုဆိုးပါတယ်။ ဒါမဖြစ်သင့်တဲ့ ကိစ္စပဲ။ ကျမ သိသလောက်ဆိုရင်တော့ တရားခံကို ထောင်ဒဏ် ၁၅ နှစ်ကနေ အနှစ်၂၀ အနည်းဆုံး ချနိုင်တယ်” ဟု ဒေါ်လေးလေးက ဆိုသည်။
အရွယ် မရောက်သေးသည့် ကလေးတဦးကို အဓမ္မကျင့်ကာ ထောင်ဒဏ် နှစ်အနည်းငယ် ချလိုက်သည့် အတွက် မထိုက်တန်ကြောင်း၊ ယခု ကလေး၏ ဘ၀ ရပ်တည်ရန်နှင့် စိတ်ပိုင်းဆိုင်ရာ ပြန်လည်ရှင်သန်ရန် အချိန်များစွာ ယူရမည်ဖြစ်ကြောင်း၊ အဓမ္မကျင့်ပြီး ဆေးများစွာ တိုက်ကျွေးခဲ့သဖြင့် ကလေး၏ ကျန်းမာရေးမှာ မကောင်းနိုင်တော့ကြောင်း ၎င်းက ဆက်ပြောသည်။
“ကျနော့်ရဲ့ တူမက အခုဆိုရင် နေ့တိုင်းလိုလို ဗိုက်အောင့်နေတယ်။ ကျန်းမာရေး မကောင်းတဲ့ ကြားကနေ တရားရုံးကိုသွား ရတယ်။ အသက်အရွယ်နဲ့ မလိုက် အနိုင်ကျင့်ခံရပြီး တရားခံကို အမိန့်ချတော့ ထောင်ဒဏ် ၈ နှစ်ဆိုတာ အရမ်းနည်းတယ်။သူ့ဘ၀ ရပ်တည်ဖို့အတွက် တော်တော် ရှက်နေတယ်” ဟု ကလေး၏ အုပ်ထိန်းသူ ဦးတင်ဌေးက ဧရာဝတီသို့ ပြောသည်။
ရန်ကုန် မြောက်ဥက္ကလာပရှိ ချယ်ရီ စားသောက်ဆိုင်တွင် ၂၀၁၀ ပြည့်နှစ်က လုပ်အားခ တလ ကျပ် ၁ သောင်းခွဲဖြင့် အလုပ်လုပ်ရန် မိဘများက အပ်နှံခဲ့ကြောင်း၊ ၎င်းကို ဆိုင်ရှင် အမျိုးသားက ၆ ကြိမ်တိုင်တိုင် အဓမ္မ ပြုကျင့်ခဲ့ပြီး ဆိုင်ရှင်၏ ဇနီး သိရှိသွားသည့် နောက်ပိုင်းတွင် ပြဿနာ တစုံတရာ ဖြစ်လာမည်ကို စိုးရိမ်သဖြင့် ဆိုင်ရှင်အမျိုးသား၏ အစ်မအိမ်သို့ တလခန့် ပို့ထားခဲ့ကြောင်း၊ ၂၀၁၂ ခုနှစ် အောက်တိုဘာလတွင် မြောက်ဥက္ကလာပ ရောင်ခြည်သစ် လ္ဘက်ရည်ဆိုင်သို့ ပို့ထားခဲ့ပြီး ၎င်းနေရာတွင် မလုံခြုံဟု ယူဆကာ လာရောက်ခေါ်ယူ၍ အောင်မင်္ဂလာ ကားဝင်းရှိ သန့်စင်ခန်းတွင် ၃ လခန့် သွားရောက် ကူညီလုပ်ကိုင်စေခဲ့ကြောင်း၊ ယင်းနေရာတွင် မကြာခဏ လာရောက် ခြိမ်းခြောက်ကြကြောင်း၊ ၎င်းနောက်တွင်မှ နေအိမ်သို့ ဆက်သွယ်ရန် ဖုန်းနံပါတ်ကို ရှာတွေ့ကာ ဆက်သွယ်ခဲ့ရကြောင်း မိန်းကလေးက ၎င်း အဖမ်းမခံရမီ ဖေဖော်ဝါရီ ၂၂ ရက်နေ့တွင် ဧရာဝတီကို ရှင်းပြခဲ့သည်။
အဓမ္မမှုဖြင့် ချုပ်နှောင် ခံထားရသူ စားသောက်ဆိုင် ပိုင်ရှင် ဦးမြင့်အောင်၏ ဇနီးက ဖေဖော်ဝါရီ ၂၃ ရက်နေ့ ညနေပိုင်းတွင် အဆိုပါ မိန်းကလေးသည် ကျပ် ၃ သိန်းတန် လက်ပတ်နာရီနှင့် ပိုက်ဆံ ကျပ် ၂ သောင်း ခိုးယူခဲ့ကြောင်း ရန်ကုန် မြောက်ဥက္ကလာပ ရဲစခန်းသို့ တိုင်ကြားခဲ့ပြီး (ပ) နံပါတ် ၁၀၄/ ၁၃ ပုဒ်မ ၃၈၁ ဖြင့် ပြန်လည်တရားစွဲဆိုထားကာ ရန်ကုန်
နတ်မောက်လမ်းရှိ အမျိုးသမီး ကလေးသူငယ် စောင့်ရှောက်ရေး ကျောင်းသို့ ၂၄ ရက်နေ့က ပို့ခဲ့ကြောင်း သိရသည်။
အဆိုပါ အမှုနှင့် ပတ်သက်ပြီး မိန်းကလေးဘက်မှ ကူညီဆောင်ရွက်ပေးနေသည့် ရှေ့နေကွန်ရက်မှ ဦးအောင်သိန်းက “တကယ်ဆိုရင် ခရိုင် တရားရုံးကနေပြီးတော့ ဒီလိုအမှုကို ၁၀ နှစ်ကနေ တသက်တကျွန်းအထိ စီရင်ပိုင်ခွင့်ရှိပါတယ်။အခုတော့ ထောင်ဒဏ် ၈ နှစ်ဆိုတော့ ကျနော်တို့ အနေနဲ့ များတယ် နည်းတယ်ဆိုတာ မပြောချင်တော့ပါဘူး။ တချို့ ကလေးသူငယ် အမှုတွေတောင် ကျနော်တို့ မဖော်ထုတ် နိုင်တာတွေ ရှိခဲ့တာပဲလေ။ ကလေး အမှုတွေက ပျောက်သွားတာ များပါတယ်” ဟု ဧရာဝတီသို့ ပြောသည်။
အလားတူ တံတားဦးမြို့နယ်တွင် ၂၀၁၃ ခုနစ်မတ်လ ၈ ရက်နေ့က အကြော်ရောင်းသည့် အသက် ၃၄ နှစ် အရွယ် အမျိုးသမီးအား အဓမ္မကျင့် ပစ္စည်းယူလူသတ်ခဲ့သူကို (ပ) ၁၄/၂၀၁၃ ပုဒ်မ ၃၉/ ၃၀၂/ ၃၇၆ ဖြင့် စွဲချက်တင်ပြီး ကျောက်ဆည် ခရိုင်တရားရုံးက ဇူလိုင် ၃၀ ရက်နေ့က သေဒဏ် ချမှတ်ခဲ့ကြောင်း သတင်းရရှိသည်။
ကလေးသူငယ် အခွင့်အရေးများ ဆိုင်ရာ ကုလသမဂ္ဂ သဘောတူစာချုပ်ကို ကမ္ဘာ့နိုင်ငံ အသီးသီးမှ ၁၉၈၉ ခုနှစ်တွင် စတင် လက်မှတ် ရေးထိုးချုပ်ဆို ခဲ့ကြောင်း၊ မြန်မာနိုင်ငံသည် ၁၉၉၉ ခုနှစ် ရောက်မှသာလျှင် လက်မှတ် ရေးထိုးခဲ့ကြောင်း၊ စာချုပ်တွင် အချက်ပေါင်း ၅၄ ချက်ပါဝင်ပြီး အချက် ၄၀ အထိ ကလေး အခွင့်အရေးများ ဖော်ပြထားကာ၊ ကျန် ၁၄ ချက်သည် အစိုးရများ ဘက်မှ အကောင်အထည်ဖော် ဆောင်ရွက်ရမည့် အပိုင်းကို ပြဋ္ဌာန်းထားခြင်းဖြစ်ကြောင်း သိရသည်။
ကလေးသူငယ်၏ အသက် အပိုင်းအခြားကို နိုင်ငံတကာတွင် ၁၈ နှစ်အရွယ်အထိ သတ်မှတ်ထားပြီး မြန်မာနိုင်ငံတွင်မူ အသက် ၁၆ နှစ်အထိသာ ကလေးအဖြစ် သတ်မှတ်၍ အသက် ၁၆ နှစ်မှ ၁၈ နှစ်ကို လူငယ်ဟု သတ်မှတ်ထားသည်။
No comments:
Post a Comment