 |
| ဇန်န၀ါရီလ (၁၉)ရက်နေ့က ရခိုင်ပြည်နယ်မြောက်ပိုင်းမှာ အတင်းအဓမ္မဖမ်းဆီးခေါ်ဆောင်ခံရပြီးနောက် အသတ်ခံလိုက်ရတဲ့ GFA ခရစ်ယာန်သင်းအုပ်ဆရာ ထွန်းနု (Photo- Dr. KP Yohannan's Facebook) |
GFA သင်းအုပ်ဆရာ ထွန်းနု အသတ်ခံလိုက်ရပြီဖြစ်ကြောင်း ဖေဖေါ်ဝါရီလ (၁) ရက်နေ့က သိခဲ့ရပေမယ့် ဘယ်သူ့မှာ တာဝန်ရှိသလဲဆိုတာကို သက်ဆိုင်ရာ လက်နက်ကိုင်အဖွဲ့တွေဘက်က ထုတ်ဖေါ်ကြေညာခြင်းမရှိသလို၊ အစိုးရဘက်ကလည်း အခုချိန်ထိ တရားဝင် သတင်းထုတ်ပြန်ခြင်းမရှိသေးပါဘူး။
မအင်ကြင်းနိုင်က အပြည့်အစုံကို တင်ပြမှာပါ။
ရခိုင်ပြည်နယ်မြောက်ပိုင်းမှာ နေထိုင်တဲ့ အသက် (၄၁)နှစ်အရွယ် သင်းအုပ်ဆရာ ထွန်းနုကို ဇန်န၀ါရီလ (၁၉)ရက်နေ့က သူ့နေအိမ်မှာရှိနေစဉ် လက်နက်ကိုင်လူ တစုလာရောက်ပြီး အတင်းအကျပ် ဖမ်းဆီးခေါ်ဆောင်သွားခဲ့ပြီးနောက် ဖေဖေါ်ဝါရီလ (၁) ရက်နေ့မှာ သူအသတ်ခံလိုက်ရပြီဖြစ်ကြောင်း သိခဲ့ရတယ်လို့ Gospel For Asia ခရစ်ယာန်အသင်းတော်ရဲ့ ဖေဖေါ်ဝါရီလ (၅) ရက်နေ့ထုတ်က ထုတ်ပြန်တဲ့ ကြေညာချက်မှာ ဖေါ်ပြထားပါတယ်။
ရခိုင်ပြည်နယ်မှာရှိတဲ့ လက်နက်ကိုင်အုပ်စုတစုဟာ သင်းအုပ်ဆရာထွန်းနုအပါအ၀င် အခြားဖမ်းဆီးခေါ်ဆောင်သွားခဲ့သူ အများအပြားကိုလည်း သတ်ဖြတ်ခဲ့ကြောင်း အဲဒီကြေညာချက်မှာ ရေးထားပါတယ်။ သူ့ကို အတင်းအဓမ္မဖမ်းဆီးခေါ်ဆောင်သွားတဲ့ဖြစ်ရပ်နဲ့ ပတ်သက်လို့ အိန္ဒိယအခြေစိုက် Gospel For Asia ခရစ်ယာန်အသင်းတော်တည်ထောင်သူလည်းဖြစ်၊ အကြီးအကဲလည်းဖြစ်တဲ့ဒေါက်တာ KP Yohannan ဇန်န၀ါရီလ ၂၆ ရက်နေ့က ထုတ်ပြန်တဲ့ Youtube အင်တာနက်ဗွီဒီယိုမှာ အခုလိုပြောပါတယ်။
"မြန်မာနိုင်ငံမှာ ပြန်ပေးဆွဲခံထားရတဲ့ ကျနော်တို့ရဲ့ သင်းအုပ်ဆရာအကြီးအကဲ တဦးနဲ့ပတ်သက်လို့ ကျနော် အချိန်အနည်းငယ်ပေး ပြောကြားလိုပါတယ်။ သူဟာ မြန်မာနိုင်ငံမှာ ဘုရားသခင်အတွက် အမှုထမ်းခဲ့တာဟာ အနှစ် (၂၀)ကြာ ရှိခဲ့ပါပြီ။ လူပေါင်း ရာနဲ့ချီ ခရစ်ယာန် ဘာသာကူးပြောင်းအောင် လုပ်နိုင်ခဲ့သူတဦးဖြစ်သလို၊ ခရစ်ယာန်ရှစ်ခိုးကျောင်းတွေ အများအပြားကိုလည်း တည်ထောင်နိုင်ခဲ့သူဖြစ်ပါတယ်။ ဇန်န၀ါရီလ (၁၉) ရက်နေ့မှာတော့ သူရဲ့အိမ်ကို လက်နက်ကိုင် လူတစုရောက်လာပြီး သင်းအုပ်ဆရာကို သေနတ်နဲ့ထောက်ပြီး ခေါ်ဆောင်သွားခဲ့ပါတယ်။ သူ့ကို ဘာကြောင့် အခုလို လာရောက်ဖမ်းဆီးခဲ့သလဲဆိုတာကို ကျနော်တို့ လုံးဝမသိရပါဘူး။"
သူ့ကို ဘယ်ကို ခေါ်ဆောင်ပြီး ဖမ်းဆီးထားသလဲဆိုတာ မသိရပေမယ့် သူ့ကိုဘယ်သူတွေ ဖမ်းသွားသလဲဆိုတာ တော့ သိရပြီးဖြစ်ကြောင်း Youtube အင်တာနက်ဗွီဒီယိုထဲမှာ ဒေါက်တာ KP Yohannan ကအခုလိုပြောပါတယ်။
"အစိုးရကို တော်လှန်ပုန်ကန်နေတဲ့ လက်နက်ကိုင်အုပ်စုက လုပ်တယ်ဆိုတာ ကျနော်တို့ သိခဲ့ရပြီ။ လူကို ပြန်ပေးဆွဲတဲ့သဘော ဖမ်းဆီးတာမျိုးမဟုတ်သလို ငွေညှစ်တောင်းခံတာမျိုးလည်း မရှိပါဘူး။ သူ့ကို ဘာကြောင့်ဖမ်းဆီးသွားသလဲဆိုတာကိုတော့ ကျနော်တို့ သိအောင်ကြိုးစားနေပါတယ်။ သူ့ကိုအသက်ရှင်လျှက်လွတ်မြောက်လာဖို့ ဘုရားသခင်နဲ့အတူ ဆုတောင်းပေးကြပါ။"
သင်းအုပ်ဆရာ ထွန်းနု ပျောက်ဆုံးခဲ့တဲ့ နှစ်ပတ်ကြာကာလအတွင်း အစိုးရ၊ စစ်တပ်၊ ရဲတပ်ဖွဲ့တွေက ၀ိုင်းဝန်းကူညီရှာဖွေခဲ့ကြောင်းလည်း ဒေါက်တာ KP Yohannan ကပြောသွားပါတယ်။
"စစ်တပ်၊ ရဲတပ်ဖွဲ့နဲ့ အစိုးရအပါအ၀င် လူတိုင်းကလည်း ကျနော်တို့ကို ကူညီကြပါတယ်။ ပြန်ပေးဆွဲ ဖမ်းခံရတဲ့ နေရာဟာ မြန်မာနိုင်ငံက GFA ခရစ်ယာန် အသင်းတော် ကျောင်းတွေထဲမှာ ဒုတိယအကြီးဆုံးဖြစ်ပါတယ်။ မြန်မာနိုင်ငံမှာ GFA အသင်းဝင် ၀တ်ပြုဆုတောင်းသူပေါင်း ၅၀၀ ရှိပြီး အများစုဟာ ဆင်းရဲပြီး အကူအညီလိုအပ်နေသူတွေဖြစ်ပါတယ်။"
အခုလို သင်းအုပ်ဆရာ ထွန်းနု ပြန်ပေးဆွဲ သတ်ဖြတ်ခံရမှုဟာ မြန်မာနိုင်ငံမှာရှိတဲ့ GFA ခရစ်ယာန် အသင်းတော်အတွက် ပထမဆုံး ရင်ဆိုင်ရတဲ့ စိတ်မကောင်းစရာဖြစ်ရပ်တခုပဲလို့ ဒေါက်တာ KP Yohannan ကပြောပါတယ်။ အသတ်ခံရတဲ့ သင်းအုပ်ဆရာ ထွန်းနုမှာ ဇနီးနဲ့ ကလေးသုံးယောက် ကျန်ရစ်ခဲ့ပါတယ်။ သင်းအုပ်ဆရာထွန်းနု တာဝန်ယူထားတဲ့ ခရစ်ယာန်ဘုရားရှစ်ခိုးကျောင်းမှာ ၀တ်ပြုဆုတောင်းသူပေါင်း (၅၀)လောက်ရှိပါတယ်။
 |
| အသတ်ခံရတဲ့ သင်းအုပ်ဆရာ ထွန်းနုရဲ့ ကျန်ရစ်သူ ဇနီးနဲ့ ကလေးများ (Photo- Dr. KP Yohannan's Facebook) |
အင်ကြင်းနိုင် / ဗွီအိုအေ (မြန်မာပိုင်း)
https://burmese.voanews.com
No comments:
Post a Comment