နွေတည(၁)(၂)

(၁)
စပယ်ခိုင်လေး...။
ချစ်သမီးလေး... စပယ်ခိုင်။
 နောက်ဆုံးတွင် သမီးလေးကို သတိရနေတော့သည်။ သမီးလေးသည် ကိုယ့်နှလုံးပွားလေးပင်။ ကိုယ်အသွေးတ၀က်ဖြင့် ဖန်ဆင်းထားသော..ကိုယ့်စိတ်ဝိညာဉ်တ၀က်ဖြင့် ဖန်ဆင်းထားသော...ကိုယ့်ကိုယ်ပွားလေးဖြစ်သော သမီးလေး..ရေ့ ။ သမီးလေး၏ ပုခက်တွင်းမှ ကန်ကျောက်နေပုံ၊ ၀ိုင်းစက်စက် သမီးလေး၏မျက်နှာ၊ သမီးလေး၏ ရွှင်လန်းစွာ ပုခက်တွင်းမှမြှူရယ်နေဟန်၊ သမီးလေး၏ သာယာသော ငိုသံ၊ ခိုးခိုးခစ်ခစ် ရယ်မောသံကလေး။
ကလေးသည် ဤတောင်တန်းပြာကြီး၏နောက်ကွယ်...ဤလယ်ကွင်းပြင်ကျယ်ကြီး၏ နောက်ကွယ်တွင် နေရစ်ခဲ့လေပြီ။ ကျနော်သည် တောင်တန်းကြီးနှင့် လယ်ကွင်းပြင်ကျယ်ကြီးကို ဖြတ်သန်းကျော်လွှားလျက် ဟေမန်ကို သတိတရ ဖြစ်နေသည်။
ယခုလို ညနေဆည်းဆာ အခါဝယ် ဟေမန် ၏ နဘေးမှ ပေါက်ပင် တော်တန်းကြီးတွင် အပွင့်များ ရဲရဲတောက် ပွင့်နေလျက်...ရွက်ဝါများ ဖြန့်ခင်းနေမည့် မြစ်ပြင်၏ နုန်းတင်မြေနုများမှ ဆေးခင်းများအပေါ်တွင် လှသော ဆည်းဆာရောင်ခြည်များ ဖြန့်မိုးနေမည်။ ဟေမန်၏နဘေး မြစ်ပြင်ထက်တွင် ကြည်မြသော မြစ်ရေပြင်သည် လှိုင်းလိပ်ငယ်များ လှပစွာလွန့်လူးပြီး ညင်သာစွာ စီးဆင်းနေမည်။ ဝေ၏ အကြော်တဲဆိုင်ဟောင်း နေရာရှေ့ မြစ်ဆိပ် သဲသောင်ပြင်စသို့ လှိုင်းငြိမ့်ကလေးများသည် ပြေးလွှားထိခတ်ပြီး ပျော်မြူးစွာ မြစ်ပြင်ထဲသို့ ပြန်၍ ဆင်းပြေးသွားနေကြမည်။ ဤအခါတွင် မြစ်ရိုးတစ်လျှောက်၌ လှေငယ်တစ်စင်းသည် လူးလာခေါက်ပြန် လှော်ခတ်သွားနေမည်။

 လေတိုက်ခတ်လိုက်လျှင် ရေပန်းရေမွှာများသည် မြစ်ပြင်ထက်မှ အနည်းငယ် ဖြာတက်သွားကြလျက် ဆည်းဆာ နေခြည်ဝယ် သက်တန့်ရောင်စုံ ဖြာနေတော့မည်။ ကျနော်သည် ဝေ၏ ရယ်မောသံကို အမှတ်ရနေပြန်သည်။ ဝေ၏ အပြုံးမှာ အစဉ်သဖြင့် တောက်ပနေတတ်၏။ ဝေ့ရယ်သံမှာ အစဉ်သဖြင့် ရွှင်မြူးနေတတ်၏။ စီးလာသည့် ရထားကား ပြေးလွှားလျက်ပင် ရှိနေသည်။ ရထားသည် တွဲအဆက်မှ အသံမြည်လျက် ပုခက်လွှဲသိပ်ပေးနေသလို လှုပ်ခါပေးနေသည်။

ကျနော်သည် တဖက်ခုံလွတ်ိပေါ်သို့ သားရေအိတ်ကို တင်ထားလိုက်လျက် ပြတင်းဝမှ မျက်နှာကို ခွာလိုက်ပြီး ခေါင်းကို နောက်မှီအပေါ်သို့ မှေးတင်ထားလိုက်သည်။ ရထားပြတင်းဝမှ ၀င်လာသော လေထဲတွင် အပူငွေ့ လျော့ပါးလာနေသည်။ ထိုအခါတွင် ဆည်းဆာသည် တဖြေးဖြေး တစစ ဖျော့မှိန်လာနေသည်။ ပင်လယ်ပြင်ကြီးကဲ့သို့ ကျယ်ပြောလှသော ရှုမျှော်မဆုံးနိုင်သည့် လယ်ကွင်းပြင်ကြီး။ ဤလယ်ကွင်းပြင် ပင်လယ်ကြီး၏ ကမ်းခြေဟု ထင်မှတ်ရသောဝေးဝေးပျပျဆီမှ သစ်တောတန်းကြီး။ နောက်ဖက်ဆုံး နောက်ခံတောင်တန်းပြာကြီးများ အပေါ်ဝယ် လှပသော ဆေးရောင်စုံ ခြယ်မှုန်းပေးထားနေသလို ထင်ဟပ်နေသော ညနေဆည်းဆာ၏ နေခြည်များမှာ တစထက်တစ ရုတ်သိမ်းလိုက်လာနေသည်။
ဤအရာဝတ္ထုအားလုံးအပေါ်သို့ နွေည၏ အမှောင်ရိပ်ခြည် တစွန်းတစသည် ဖုံးလွှမ်းလာနေလျက်ပင်။ အမှောင်ရိပ်နှင့် ဆည်းဆာနေခြည်များ ဆေးစပ်ရောနှောသည့် အလှတို့ကို မကြည့်မြင်ချင်တော့ဘဲ ကျနော်သည် မျက်လုံးမှိတ်ပစ်လိုက်၏။ ထို့နောက် ခံစားထိတွေ့မှု စိတ်အာရုံမှန်သမျှကို အစဖျောက် ဖျောက်ဖျက်ပစ်နေမိသည်။ မကြာမီ ၇-၃၅ နာရီတွင် ဤရထားသည် အမည်မဖော်လိုသော မြို့ကလေး၏ ဘူတာတွင် ၀င်ရောက်ဆိုက်ကပ် ရပ်နားတော့မည်။ ကျနော်သည် စိတ်လှုပ်ရှား လှိုင်းထနေလျက်နှင့်ပင် အိပ်ပျော်နေရန် ကြိုးပမ်းနေသည်။ အတိတ်သည် ဝေးကွာလွန်းလှသော အရပ်၌ ဟောင်းနွမ်းဆွေးမြေ့ပြီး ကျန်ခဲ့သော အရာဟု ဆိုသော်လည်း နုပျိုသစ်လွင် တောက်ပသော ပစ္စုပ္ပန်နှင့်မူ နှောင်ကြိုါ်တဆက်တည်းနှင့် ပူးတွဲချည်နှောင်ထားသည်။ မိမိဘာကြောင့် သူ့အကြောင်း တွေးနေတော့မလဲ။ သူနှင့် ပတ်သက်နေတော့သည်လည်း မဟုတ်။

 စပ်ဆိုင်နေတော့သည်လည်း မဟုတ်။ ဘာကြောင့် ကိုယ့်လမ်းကို ကိုယ်သွားနေလျက်မှ သူ့လမ်းကို လှမ်းမျှော်ကြည့်နေလိုသနည်း။ ထိုဘူတာကို ဖြတ်ကျော်နေဆဲကာလ၌ အရာရာတိုင်းကို မေ့နေလျက၊် မြင် တွေ့  သိ အာရုံမှန်သမျှ ပျောာက်နေလျက် နှစ်ခြိုက်စွာ အိပ်မောကျနေချင်သည်။ သိူ့သော် ရထားသည် ထိုဘူတာနှင့် တစထက်တစ ပို၍ နီးကပ်သွားနေလျက် စိတ်လှုပ်ရှားမှုမှာ ပို၍ ပြင်းထန်လာနေသည်။ ဤညနေ ဆည်းဆာတို့သည် မကြာမြင့်မီ အလျင်း ကွယ်ပသွားတော့မည်။
ထိုအခါတွင် နွေပေါင်းများစွာ၏ ညပေါင်းများစွာအနက်မှ နွေတစ်ခု၏ ညတညသည် ဆိုက်ရောက်လာတော့မည်။ +++

(၂)
"ဟုတ်ပါတယ်ကွာ၊ လာကြပါပြီ" "မဖြစ်နိုင်ပါဘူး၊ သူ ကျနော့်ပါးကိုတောင် ရိုက်ထားသေးတာဘဲ၊ သူလိုက်လာတယ်ဆိုတာ မဖြစ်နိုင်ပါဘူး" "မင်း အလွန်ညံ့သေးတာဘဲ ကိုကို အဲဒါကြောင့် ကောင်မလေးက မောင်ရင့်ကို သနားနေတာတဲ့ဗျာ၊ မရွှေက ကိုယ့်ကို ပြောထားတာဘဲ၊ မင်း ကောင်မလေးကိုတော့ ပစ်တော့မသွားပါနဲ့ သူငယ်ချင်း၊ ကိုယ်လဲ ဒီကောင်မလေးကို မင်းပစ်သွားမှာဘဲ စိုးရိမ်တယ်၊ ဒီကောင်မလေး သူ့အမေနဲ့သာ ကြာရှည်နေရင်တော့ သူ့အမေရောဂါ ကူးစက်သွားမှာ စိုးရတယ် ကိုကို၊ အဆိပ်ရောဂါပိုးထက် စိတ်ဓာတ်ရောဂါပိုးဟာ အကူးအစက် ပိုပြီးမြန်တယ်၊ ပိုကြောက်စရာလဲ ကောင်းတာဘဲ။ သူ့အမေနဲ့တော့ ခွဲခွဲခြားခြား လားလားမုန်းထားဘဲ ထားဖို့ ကိုယ်သတိပေးဖြစ်အောင် ပေးလိုက်ပါရဲ့" အရပ်ရှည်ရှည် ခါးကိုင်းကိုင်း လေးကိုင်းညွှတ်ကွေးနေဟန်ဖြစ်သည့် ကိုခင်ထွန်းကြီးသည် ကုက္ကိုပင်အရိပ်အောက် အုတ်ခုံမှာ ကျနော်နှင့် အတူတူထရပ်ပြီး တိုးတိုးရယ်နေသည်။ သူ့ရယ်သံသည် အမှောင်လွှမ်းနေသည့် ကျောက်စရစ်လမ်းလေးအတိုင်း ပြေးလွှားနေသည်။

လမ်းပေါ်ဝယ် မိုးစက်မိုးမှုန်များသည် ချစ်စဖွယ် နှင်းဖွဲကလေးများကဲ့သို့ ဖွာကျနေလျက်၊ မှုန်ပျပျ ဓာတ်မီးတိုင်များမှ အလင်းရောင်သည် မိုးစက်မိုးမှုန်များကို ထွင်းဖောက်နေလျက်။ အနီးကပ်နေသည့် မီးရထားစက်ခေါင်းရုံမှ ရထားများ၏ ရှေ့တိုးနောက်ငင် ဆူညံသံများသည် ဤလမ်းမှောင်ကြားကလေး အတွင်းထဲသို့ ရောက်လာနေသည်။ ဤဘူတာနောက်ဘက် လမ်းကလေးသည် ဘောလုံးကွင်းကို လွန်ပြီးလျှင် မီးရထားဆေးရုံရှေ့ဘက်၌ ကျယ်ပြန့်သွားလျက် ဆေးရုံရှေ့ထောင့်ချိုးအကွေ့တွင် အခြားလမ်းသွယ်ကလေးတစ်ခုနှင့် ဆုံတွေ့သည်။ ထိုလမ်းသွယ်ကလေးမှာ လူနှစ်ယောက် ဘေးချင်းယှဉ် သွားသာရုံ ကျဉ်းကျဥ်းကလေးဖြစ်၍ လမ်း၏ဘေးနှစ်ဘက်တွင် သရက်ပင်ပုကလေးများ အုပ်ဆိုင်းနေပြီး ထိုနေရာမှာ မြို့အစွန်ပိုင်း တဲအိမ်ငယ်ကလေးများ ပြည့်နှက်နေသော ရပ်ကွက်ဖြစ်နေသည်။
 ဓာတ်မီးတိုင်များကင်းမဲ့နေသော ထိုလမ်းမြှောင်ကလေးမှာ အစဉ်သဖြင့် မှောင်ပိန်းနေတတ်သည်။ ဤအမှောင်လမ်းသွယ်ကလေး၏ အဆုံး၌ မြို့ကို ဖြတ်သန်းစီးဆင်းသည့် ချောင်းငယ်လေးတစ်ခု ကန့်လန့် ဆီးတားထားသည်။ ယခုအခါ ချောင်းပြင်တွင် ရေများစီးဆင်းနေ၍ ချောင်းကို ဖြတ်သားထားသည့် လက်ရမ်းမဲ့တံတားကလေးမှာ လူဖြတ်လျှောက်သွားလျှင် ယိမ်းခါနေသည်။ ချောင်း၏တစ်ဖက်တွင် ဓာတ်မီးရောင်များ ထိန်ဝင်းနေသည့် ဆန်စက်ဝင်းကြီးရှိလျက် ချောင်းကမ်းနဘေး အလုပ်သမားတန်းလျားများအောက်တွင် ယခုအခါ၌ ရွှံ့ရေနုံးတင်လျက် အိုင်များထွန်းနေသည်။

 ဝေသည် ဤအလုပ်သမားတန်းလျားများ၏ ပျံကျတန်းလျားလေး တစ်ခုမှ။ သူ့ဘ၀ ပတ်ဝန်းကျင်သည်ထိုနေရာမှ။သူ့အခြေခံ အခြေအနေ အပေါင်းသည် ထိုနေရာမှ။ သူ့စိတ်ဓာတ် နှလုံးသား အသိပညာ အခြေခံသည် ထိုနေရာမှ။ ဘောလုံးကွင်းအစပ် အမှောင်ထဲမှ တိုးရွေ့လာနေသော ခပ်ဝါးဝါး အရိပ်နှစ်ခုကို ကျနော်သည် လှမ်းမြင်တွေ့နေရ၏။ ထိုအရိပ်နှစ်ခုသည် နီးကပ်လာနေပြီ။ နောက်ဆုံး လမ်းဓာတ်မီးတိုင်၏ မှုန်ပျပျ အလင်းရောင် ကျရောက်ရာ အမှိန်ဆုံးဘက်သို့ ရောက်လာနေသည်။

ကျနော်သည် စိတ်လှုပ်ရှားစွာ ရင်ခုန်လှိုင်းထလျက် ထိုအရိပ်နှစ်ခုကို ငေး၍ ကြည့်နေမိသည်။ မျက်နှာပေါ်တွင် လာ၍ထိမှန်နေသော မိုးစက်မိုးမှုန်များမှာ ချစ်စဖွယ် ဖြစ်လေသည်။ ထို့နောက် အရိပ်နှစ်ခုသည် ပို၍ နီးကပ်လာပြီး ပို ထင်ရှားလာသည်။ အရိပ်တစ်ခုသည် မရွှေဖြစ်လျက် ဝေ့လက်ကို ဆွဲကိုင်လာသည်။ ထို့နောက် သူတို့မျက်နှာများကို အလင်းရောင် မှုန်မှုန်ဝယ် သဲကွဲစွာ မြင်တွေ့ရလေသည်။ ဝေ့ကိုယ်ပေါ်တွင် ၀တ်ထားသော အင်္ကျီကြမ်းကလေးမှာ အကွက်မပေါ်တော့ဘဲ လက်မောင်းတစ်ဖက်၌ အပြဲရာတစ်ခုရှိနေပြီး သူ့ထမီတိုတိုလေးမှာလည်း ညစ်နွမ်းနေပြီ။ သူသည် အ၀ါရောင်လွင့်နေသော တဘက်အဟောင်းလေးတစ်ခုကို ခေါင်းတွင် ရစ်ပတ်ထားသည်။ သူသည် ဂျပန်ဖိနပ် အဟောင်းကလေးကို မိုးရေစပ်စပ်စပ်ထဲ၌ တဖျတ်ဖျတ် အသံမြည်အောင် စီးလာသည်။
သူ့ပါးပြင်တွင် ကွက်ထားသည့် ပါးကွက်တို့သည် ချွေးစွန်းပြီး မညီမညာ ပျက်ပြယ်စ ပြုလာနေသည်။ သူတို့သည် ရှေ့နား၌ ရပ်တန့်လိုက်ကြလေသည်။ ဝေသည် ခေါင်းကို အောက်သို့ ငုံ့စိုက်ထားပြီး သူ့ပါးပြင် နှစ်ဖက်မှာ နီထွေးနေလျက်။ သူ့အသားတို့မှာ တဆတ်ဆတ် တုန်နေလျက်။ မရွှေလက်ထဲမှ သူ့လက်ကို ရုန်းထွက်နေသည်။ "ဟင့်အင်း၊ ခင်ဝေ မလိုက်ချင်ဘူး။ ခင်ဝေ့ကို သက်သက် ဆေးလိပ်ဝယ်ဆိုပြီး မလိမ့်တပတ် လုပ်ခေါ်လာတာ၊ခင်ဝေပြန်မယ်၊ ခင်ဝေပြန်မယ်" ဟု သူ၏ူပြောနေသံမှာ တုန်ယင်နေသည်။

သူတို့နှစ်ဦး ရပ်နေရာ၌ ဓာတ်မီးတိုင်မှ အလင်းရောင် ပို၍ မှိန်ဖျော့နေပြီး ကျနော်သည် အိပ်မက်ထဲတွင် သွားနေသကဲ့သို့ သူတိှုိ့ရှိရာသို့ ဖြတ်သွားလျက် တကိုယ်လုံးမှာ တုန်ယင်နေသည်။ ကျနော်သည် ဝေ့ရှေ့တွင် ရပ်တန့်လိုက်လေသည်။ အမှောင်ရိပ်ရိပ်ထဲတွင် သူ့မျက်နှာကလေးကို စူးစိုက်ကြည့်နေသည်။ "လိုက်ခဲ့ပါ ဝေရယ်၊ ကိုယ်က ပြောင်းမိန့်ကျလာလို့ ပြောင်းရတော့မှာမို့ ဝေမပါဘဲနဲ့ ပြောင်းသွားရရင် ဝေနဲ့ ဝေးသွားတော့မှာလို့ ထင်တယ်။ ကိုယ်နဲ့ ဝေနဲ့ ဝေးရတော့မှာလို့ ထင်တယ်။ ဒါကြောင့် မရွှေကိုလွှတ်ပြီး ဝေ့ကို ခဏကလေး ခေါ်ပေးစမ်းပါ တောင်းပန်ပေးစမ်းပါလို့ ပြောရတာ။ ကိုယ်ပြောပါအုံးမယ်၊ ကိုယ်ပြောပါရစေဦး.." ဝေ့ အသက်မှာ ဆယ့်ငါးနှစ်ထက် ကျော်လွန်ဦးမည် မဟုတ်သေး။ နိုပျိုသစ်လွင်သော ရိုးသားသန့်စင်သော သူ့ပင်ကိုယ် အလှတို့သည် မီးရောင်မှိန်မှိန်အောက်တွင် ပို၍ လှနေသည် ထင်ရသည်။ သူ့ကို မရွှေသည် စက်ထဲတွင် အလုပ်လုပ်နေရာမှ လှည့်ပတ်ခေါ်လာခဲ့ပြီး လမ်းကျမှ ပြောပြသည်။
"ကိုယ့်ကို ညှာပါအုံး ဝေရယ်..မင်းမလိုက်လာလို့ မဖြစ်ဖူး"

ထို့နောက် ကျနော်သည် အမှောင်ရိပ်ထဲတွင် သူ့လက်ကလေးကို သာသာဖွဖွ ဆုပ်ကိုင်လိုက်လေသည်။ သူသည် သူ့လက်ကလေးကို ဟန်ဆောင် ရုန်းကန်မှန်းသိသိ ရုန်းကန်နေသည်။ သူ့လက်ဖ၀ါးပြင်မှာ အလုပ်ကြမ်းလုပ်ခဲ့ရသဖြင့် ကြမ်းတမ်းနေသည်။ သို့သော်..သူ့လက်ချောင်းသွယ်သွယ်ကလေးများသည် နွေးထွေးနေကြလေသည်။ အမှောင်ရိပ်ထဲတွင် သူ့မျက်နှာပေါ်၌ အပြုံးရိပ်တခု မထင်မရှား ဖြတ်သန်းသွားသည်။ ဤ ၀ိုင်းစက်နေသာ နုပျိုနေသော မျက်နှာကလေးသည် ရယ်လိုက်လျှင် ဖောင်းမို့နီထွေးနေသည့် ပါးမို့နှစ်ဖက်၌ ချိုင့်ခွက်ကလေးနှစ်ခု ချစ်စဖွယ် ဖြစ်ပေါ်သွားတတ်၏။ သူ့မျက်နှာတစ်ခုလုံးမှာ ရှက်သွေးများထူပိန်းစွာ လျှမ်းတက်သွားပြီး ပို၍ နှစ်လိုဘွယ်ကောင်းစွာ လှသွားလေသည်။

 "ကဲ..ဆရာလေး၊ ကိုယ့်ဖာသာရအောင် ချော့ချက်နှူးနှက်ပြီး အပါခေါ်လာခဲ့ပေတော့နော်။

မိန်းမဆိုတာ နဲနဲပါးပါး မူလိုက်ရမှ မိန်းမတန်ဖိုးတက်တယ်ထင်တာ၊ တော်ကြာနေ မူတာနဲ့ပြန်လွှတ်လိုက်ရင် မိန်းမဆိုတာ ကိုယ့်ကိုယ်ကို သတ်သေချင်တာဘဲ..." ဟု မရွှေက ပြောနေ၏။
သူ့စကားပြောဟန် စကားပြောသံမှာ ပျော်ရွှင်ဖွယ် ရယ်စရာကောင်းနေလေသည်။
ထို့နောက် သူတို့သည် လမ်းအတိုင်း စက်ခေါင်းရုံဘက် ချိုးကွေ့ရန် ဘောလုံးကွင်းဟောင်းကြီးကို ဖြတ်သန်းလျှောက်သွားနေကြလေသည်။
"မလိုက်ဖူး..မလိုက်ဖူး။ ဘာပြုလို့ လိုက်ရမှာလဲ"
ကျနော်သည် ရုန်းကန်နေသော သူ့လက်ကို တင်းတင်းကျပ်ကျပ် ဆုပ်လိုက်ကာ အမှောင်ရိပ်ထဲတွင် သူ့မျက်နှာကို စိုက်ကြည့်လျက် ရယ်မောလိုက်လေသည်။

"ဘာပြုလို့မှ မဟုတ်ဖူး၊ ကိုယ်က ဝေ့ကိုချစ်လို့ ဝေလိုက်ခဲ့ရမှာ"
ကျနော်သည် လက်တစ်ဖက်ကို သူ့ခါးပေါ်တင်လိုက်ပြီး ခါးကိုသိမ်း၍ ပွေ့ဖက်လိုက်လေသည်။ သူ့ခါး သိမ်သိမ်ငယ်ငယ်ကလေးမှာ လက်ထဲတွင်ပင် ပျောက်ကွယ်သွားသလား ထင်ရသည်။
ထို့နောက် သူ့မျက်နှာနှင့် ကျနော့်မျက်နှာသည် အလင်းရောင်မှိန်မှိန်ထဲတွင် နီးကပ်သွားလေသည်။ သူ့ရုန်းကန်နေမှုမှာ လျှော့လိုက်လာသည်။ သူ့မျက်နှာပေါ်မှ ကြက်သွေးရောင်မှာ ပို၍တောက်ပသွားသည်။ ကျနော်သည် သူ့ကို ပွေ့ယူခမန်းဆွဲပြီး စက်ခေါင်းရုံဘက်မှ လမ်းသို့သွားရန် ဘောလုံးကွင်းဘက်သို့ ခေါ်လာခဲ့သည်။ ဘောလုံးကွင်းပြင်ကြီးပေါ်တွင် တင်နေသည့် ရွှံ့ဘွက်ရေအိုင်များကို နင်းလျှောက်လာရလေသည်။ ထိုအချိန်၌ ဖွဲဖွဲကျနေသော မိုးစက်မိုးမှုန်များမှာ ပို၍ သဲလာသည်။

"မင်း..မှတ်မိသေးလားဝေ..၊ ဟိုတညက ကိုခင်ထွန်းကြီး ဆွမ်းကျွေးမယ် ကိုယ့်ပါးကို ဝေရိုက်လိုက်တာလေ၊ ပထမ ကိုယ်ဖက်လိုက်တုန်းကတော့ ဝေ့မျက်နှာက ပြုံးလိုက်သလိုဘဲ၊ ဒါကြောင့် ကိုယ်ကနမ်းလိုက်တော့မှ မင်းက ရိုက်လိုက်တယ်၊ အခုလဲ မင်းကိုယ့်ကို ရိုက်အုံးမှာဘဲလား"
"ရိုက်မှာဘဲ" "ရိုက်လေ..ရိုက်လေ"
သူသည် မမျှော်မှန်းနိုင်ဘဲ၊ မထင်မှတ်ဘဲ ယခု ကျနော့်နောက်သို့ လိုက်ပါလာခဲ့လေသည်။
ဤအဖြစ်အပျက်မှာ အိပ်မက်တခု မက်နေရသလို ဖြစ်၏။ အိပ်မက်သည် နွေးထွေးသော အိပ်မက်ဖြစ်၏။ အလင်းရောင်မှုန်မှုန်ထဲတွင် မသဲမကွဲမြင်နေရသော သူ့မျက်နှာလေးမှာ ပြုံးနေသည်ဟု ထင်ရသည်။ ကိုခင်ထွန်း၏ ဆွမ်းကျွေးညကို ကျနော်သည် သတိတရ ဖြစ်နေ၏။
ထိုနေ့က သူ့ကို ကျနော် စတင် မြင်ဘူးသည်။ ထိုညက ကိုခင်ထွန်းကြီးက အကွက်ဆင်ပေးခဲ့သဖြင့် သူ့ကို စကားစပြောခဲ့ရ၏။
"အဲဒီတုန်းကတော့ မင်းကိုယ့်ကို ဘာလို့ ရိုက်တာလဲ"
"စော်ကားလို့"
"အခုတော့ မင်းကိုယ်နဲ့ လိုက်လာတယ်နော်" သူသည် ကိုယ်ကို ဆောင့်ရုန်းနေ၏။
"ဒါဖြင့် ပြန်မယ်လေ၊ ခင်ဝေက သူ့ကို သနားလို့ လိုက်လာခဲ့တာ၊ သူက ခင်ဝေလိုက်မလာရင် သူ့ကိုယ်သူ သတ်သေမယ်ဆိုလို့ လိုက်လာခဲ့ရတာ"
ကျနော်က တိုးတိုး ရယ်မောနေပြန်သည်။
"မရွှေကခေါ်လို့ စက်ထဲမယ် ဆန်သယ်နေရင်း ဘာမသိ ညာမသိ လိုက်လာခဲ့တာ၊ အခုမှ ကိုယ့်ကိုယ်ကို ခိုးရာလိုက်နေမိမှန်း သိတော့တာဘဲ၊ ဒီလူကြီး မကောင်းဘူး၊ ဒီနေ့ လေးကျပ်ဖိုးရတယ်။ ငွေတောင် မထုတ်ခဲ့ရသေးဘူး"
ချစ်စဖွယ်တုန်ယင်နေသော သူ့စကားသံသည် မိမိ၏ နှလုံးသားအပေါ်မှ ဖြတ်သန်းသွားပြီး တိုးဝှေ့နေသည်ဟု ထင်၏။ ထိုနေရာတွင် ကျနော်သည် တကြိမ်ထပ် သူ့တကိုယ်လုံးကို ပွေ့ညှစ်ပစ်မိပြန်သည်။ သူ့ပါး ဖောင်းဖောင်းမို့မို့ကလေးနှင့် ထိတွေ့သွား၏။
 နွေးထွေးသော သူ့နှုတ်ခမ်းသားကလေးများနှင့် ထိတွေ့မိသည်။
ထို့နောက် ချစ်စဖွယ်ဖြာကျနေသည့် မိုးစက်မိုးမှုန်များ အကြားတွင် သူ့ရင်ခုန်သံ၊ သူ့အသက်ရှူသံတို့ကို ကြားနေရသည်။ သူသည် ကျနော့်အိမ်သို့ လိုက်ခဲ့တော့မည်။
ကျနော်ပြောင်းရွေ့ရာသို့ လိုက်ပါခဲ့တော့မည်။ ကျနော့်စိတ်ထဲတွင် ကျနော့်ကို သူပိုင်၍ သူ့ကို ကျနော်ပိုင်နေပြီ ဆိုသော အသိစိတ် အာရုံဖြစ်ပေါ်နေသည်။ ထိုအသိစိတ်သည် မည်သည့်အခါကာလတွင်မှ လျော့ပါး ပျက်ပြယ်သွားမည်မဟုတ်။ မှေးမှိန် ပျောက်ကွယ်သွားမည် မဟုတ်။ အစဉ်အမြဲ ခိုင်ခံ့ စွဲမြဲ့နေမည်ဟု ထင်ထားသည်။ +++


Share on Google Plus

About MP4 YoU

ကမ္ဘာသတင်း၊မြန်မာ့သတင်း ပေါင်းစုံကိုရောသမမွှေဖော်ပြသွားမည့်
MP4 YoU (The Melting Pot For You)