ဟိုတယ်စာရေး

 လွန်ခဲ့သော နှစ်ပေါင်းများစွာက လေမိုးထန်သော ညတစ်ညမှာ အဘိုးကြီးနဲ့ ဇနီးဖြစ်သူတို့ဟာ အမေရိကန်ပြည်ထောင်စု ဖီလာဒီဖီးယားရှိ ဟိုတယ်လေးတစ်လုံးရဲ့ ဧည့်ခန်းလေးထဲ ဝင်လာခဲ့ပါတယ်။ သူတို့စုံတွဲဟာ မိုးခိုဖို့ ကြိုးစားရင်း တစ်ညတာ ခိုလှုံရာရရန် မျှော်လင့်လျှက် ဧည့်ကြိုစားပွဲဆီ ရောက်လာကြပါတယ်။

“ကျွန်တော်တို့အတွက် အခန်းတစ်ခန်းလောက် ရနိုင်မလား” အမျိုးသားဖြစ်သူက မေးလာပါတယ်။ဖော်ရွှေတတ်တဲ့ စာရေးဟာ စုံတွဲကို နှစ်လိုဖွယ်ရာ ပြုံးကြည့်ရင်း မြို့ထဲတွင် အစည်းအဝေး သုံးခုရှိကြောင်း ရှင်းပြခဲ့ပါတယ်။“အခန်းအားလုံး ပြည့်နေပါပြီ”လို့ စာရေးက ပြောပါတယ်။ “ဒါပေမယ့် မွန်ရည်တဲ့ ခင်ဗျားတို့စုံတွဲကို နံနက်တစ်နာရီ အချိန်မျိုးမှာ မိုးရွာကြီးထဲ မလွှတ်ရက်ပါဘူး။ ကျွန်တော့်အခန်းထဲ အိပ်နိုင်မလား။ ပရိဘောဂ အစုံအလင် မရှိပေမယ့် ခင်ဗျားတို့နှစ်ယောက် သက်သောင့်သက်သာ အနားယူဖို့အတွက်တော့ လုံလောက်ပါတယ်”စုံတွဲက ငြင်းဆိုတဲ့အခါ
လူငယ်လေးက ဆက်လက်ပြောဆိုပါတယ်။ “ကျွန်တော့်အတွက်တော့ မပူပါနဲ့ဗျာ။ ကျွန်တော် အဆင်ပြေအောင် လုပ်လိုက်ပါမယ်” လို့ စာရေးက သူတို့ကို ရှင်းပြခဲ့ပါတယ်။

ဒီတော့မှ စုံတွဲက (သူ့အခန်းထဲအိပ်ဖို့) သဘောတူလိုက်တယ်။
နောက်တစ်နေ့နံနက်တွင် အဘိုးကြီးက စာရေးကို ငွေပေးချေရင်း ပြောဆိုလိုက်ပါတယ်။ “ခင်ဗျားဟာ ကြင်နာတတ်တဲ့ မန်နေဂျာတစ်ယောက်ပါ။ အကောင်ဆုံး ဟိုတယ်ရဲ့ သူဌေးပဲ ဖြစ်သင့်ပါတယ်။ တစ်နေ့နေ့မှာတော့ ကျွန်တော် ခင်ဗျားအတွက် အကောင်းဆုံးဟိုတယ်တစ်လုံး တည်ဆောက်ပေးနိုင်ကောင်းပါရဲ့”စာရေးက သူတို့ကိုကြည့်ရင်း ပြုံးလိုက်ပါတယ်။

သူတို့သုံးယောက်လုံး ပျော်ရွှင်နေခဲ့ကြပါတယ်။ သူတို့စုံတွဲ ကားမောင်း
ထွက်လာစဉ် ဖော်ရွှေမှုရော၊ အကူအညီပေးမှုရော နှစ်မျိုးလုံးရှိတဲ့ လူမျိုးဟာ တွေ့ဆုံရဖို့ ခက်ခဲပေမယ့် ဒီစာရေးကတော့ ခွင်းချက်ပင်ဖြစ်ကြောင်း
အဘိုးကြီးက လက်ခံသဘောတူလိုက်ပါတယ်။နှစ်နှစ်တာ ကုန်ဆုံးခဲ့ပေပြီ။
စာရေးဟာ ဒီအဖြစ်အပျက်ကို မေ့ပျောက်လုနီးပါး ဖြစ်နေတဲ့အချိန်မှာ အဘိုးကြီးထံကနေ စာတစ်စောင် လက်ခံရရှိခဲ့ပါတယ်။

စာထဲမှာ လေမိုးထန်တဲ့ ညတစ်ညအကြောင်း ပြန်ပြောပြထားပြီး လူငယ်လေးကို နယူးယောက်မြို့သို့ အလည်လာရောက်ဖို့ အသွားအပြန် လက်မှတ်တစ်စုံကိုလည်း စာအိတ်ထဲ ထည့်ပေးလိုက်ပါတယ်။
အဘိုးကြီးက သူ့ကို နယူးယောက်မှာ တွေ့တဲ့အခါ ရိပ်သာ(၅)လမ်းနဲ့ (၃၄)လမ်းထောင့်သို့ ဦးဆောင်ခေါ်သွားပါတယ်။

အဲဒီနောက် သူဟာ ကောင်းကင်ပြင်ထိ ထိုးထွက်နေတဲ့ မျှော်စင်တွေနဲ့အတူ နီကြန်ကြန် ကျောက်တုန်းများဖြင့် တည်ဆောက်ထားတဲ့ အဆောက်အဦး
အသစ်ကြီးကို ညွှန်ပြလိုက်ပါတယ်။

“ခင်ဗျား စီမံအုပ်ချုပ်ဖို့အတွက် ဒီဟိုတယ်ကို ကျွန်တော် တည်ဆောက်ထားတာပါ”လို့ အဘိုးကြီးက ပြောလိုက်ပါတယ်။
“ခင်ဗျား ရယ်စရာ ပြောနေတာပဲ ဖြစ်ရမယ်”လို့ လူငယ်လေးက ပြောပါတယ်။
“ကျွန်တော် ရယ်စရာ ပြောတာမဟုတ်ကြောင်း အာမခံရဲပါတယ်”လို့ အဘိုးကြီးက ဝေခွဲရခက်သော အပြုံးဖြင့် ပြောဆိုလိုက်ပါတယ်။

အဘိုးကြီးရဲ့ နာမည်ကတော့ ဝီလီယံ ဝေါ့ဒေါ့ဖ် အက်စ်တာဖြစ်ပြီး ခမ်းနားတဲ့ အဆောက်အဦး အသစ်ကြီးကတော့ ဝေါ့ဒေါ့ဖ် အက်စ်တိုရီးယား ဟိုတယ်ဖြစ်ပါတယ်။ ဒီဟိုတယ်ရဲ့ ပထမဦးဆုံး မန်နေဂျာဖြစ်လာတဲ့ စာရေးလေးကတော့ ဂျော့ဂ်ျ စီဘိုးဒ်ထ် ဖြစ်ပါတယ်။ လူငယ်စာရေးလေးဟာ သူပြုလုပ်ပေးခဲ့တဲ့ လုပ်ရပ်ကြောင့် ကမ္ဘာ့အကောင်းဆုံးဟိုတယ်တစ်ခုရဲ့ မန်နေဂျာ ဖြစ်လာလိမ့်မယ်လို့ ဘယ်တုန်းကမှ မစဉ်းစားခဲ့မိပါဘူး။

credit: Nay Lin Aung