Latest News

Monday, July 30, 2018

တက္ကသိုလ်ကျောင်းသူကို မက်ဆင်ဂျာမှ ခြိန်းခြောက် ငွေတောင်းသည့် တတိယနှစ်ကျောင်းသား လေးဦးကို ရဲဖမ်း



မုံရွာ၊ ဇူလိုင် ၂၉

မုံရွာတက္ကသိုလ်ကျောင်းသူတစ်ဦးကို ဖေ့ဘွတ်ခ်မက်ဆင်ဂျာမှနေ၍ ခြိန်းခြောက် ငွေတောင်းသည့် တတိယနှစ်တက္ကသိုလ်ကျောင်းသား လေးဦးအား ရဲတပ်ဖွဲ့မှ ဖမ်းဆီးလိုက်ကြောင်း မုံရွာမြို့မရဲစခန်းမှသိရသည်။

မုံရွာတက္ကသိုလ် အရှေ့တိုင်းဘာသာရပ်တတိယနှစ် သင်ကြားနေသော ကျောင်းသူတစ်ဦးကို ငွေသိန်းနှစ်ဆယ် မပေးပါက ဖုန်းအတွင်းမှ သူ့ချစ်သူနှင့်နှစ်ယောက်တည်းရိုက်ထားသည့် ကိုယ်ရေးကိုယ်တာ ဓာတ်ပုံ ဗီဒီယိုများအား အွန်လိုင်းတွင် ဖြန့်ဝေမည်ဖြစ်ကြောင်း အေပရယ်မေ အကောင့်ဖြင့် အဆိုပါကျောင်းသူကို မက်ဆင်ဂျာမှ ဇူလိုင် ၂၇ ရက်က ခြိမ်းချောက် ငွေတောင်းခံခဲ့ခြင်းဖြစ်ကြောင်း ယင်းအမှုကိုစစ်ဆေးသည့် ရဲအုပ်လှိုင်ဘွားကိုကိုက ပြောသည်။

"လွန်ခဲ့တဲ့တစ်လလောက်က ကောင်မလေးကိုင်တဲ့ဖုန်း ကျနေတာကနေ ဇာတ်လမ်းက စတာပဲ။ ဖုန်းကျကာစက ကောက်ရတဲ့ ကောင်လေးနဲ့ အဆက်အသွယ်ရသေးတယ်။ သူကလည်း တက္ကသိုလ်ကျောင်းသားပါ ပြန်ပေးပ့ါမယ် အခုတော့ ရွာရောက်နေလို့ပါဆိုပြီး အဆက်အသွယ် ထပ်မရတော့တာလို့ ကောင်မလေးက ဖုန်းပျောက်တဲ့ အမှုလာဖွင့်တုန်းကပြောခဲ့တယ်" ဟု ယင်းအရာရှိက ဆက်ပြောသည်။

ယင်းနောက် မက်ဆင်ဂျာမှ ငွေလာတောင်းနေကြောင်း အဆိုပါကျောင်းသူမှ ငွေခြိန်းခြောက် တောင်းခံသည့် နေ့မှာဘဲ ရဲစခန်းလာအကြောင်းကြားလာသဖြင့် ရဲတပ်ဖွဲ့မှ Wave Money ကနေ ငွေငါးသိန်းအရင် လွှဲပေးမယ်လို့ ကျောင်းသူအား ပြန်ဆက်သွယ်ပြောကြားစေခဲ့သည်။

ထို့နောက် ရဲတပ်ဖွဲ့နှင့် မုံရွာ Wave Money ကိုယ်စားလှယ်တို့နှင့် တိုင်ပင်ကာ ယင်းတို့ ပေးပို့မည့် စကားဝှက်ဂဏန်းနှင့် ငွေလာထုတ်ပါက အကြောင်းကြားပေးရန် မုံရွာတစ်မြို့လုံးမှ Wave Money ဆိုင်များကို အကြောင်းကြားခဲ့သည်။

ဇူလိုင် ၂၈ နေ့ခင်းပိုင်းအရောက်တွင် ကျောက္ကာလမ်းပေါ်ရှိ ဆိုင်တစ်ဆိုင်မှ ရဲတပ်ဖွဲ့ပေးပို့ထားသည့် စကားဝှက်ဂဏန်းဖြင့် လူငယ်သုံးဦးလာရောက်ထုတ်ယူနေကြောင်း အကြောင်းကြားလာခဲ့သဖြင့် အချိန်ခဏဆွဲထားရန် ပြောဆိုပြီး ရဲတပ်ဖွဲ့မှ သွားရောက်ဖမ်းဆီးခဲ့ခြင်းဖြစ်သည်။

ယင်းနောက် လူငယ်သုံးဦးအားရဲတပ်ဖွဲ့မှ စစ်ဆေးရာ တတိယနှစ် စီးပွားရေးတက္ကသိုလ် ကျောင်းသားတစ်ဦးနှင့် တတိယနှစ်သင်္ချာကျောင်းသားနှစ်ဦးဖြစ်နေကြောင်းသိရပြီး ၎င်းတို့ကို တတိယနှစ်စီးပွားရေးတက်နေသည့် သူငယ်ချင်းမှ ဖုန်းကောက်ရထားတယ် ဆိုပြီး မန်မိုရီကတ်ပေးခဲ့၍ ယခုလိုပူးပေါင်းကြံစည်မိကြခြင်းဖြစ်ကြောင်း စစ်ဆေးပေါ်ပေါက်ခဲ့သည်။

ဇူလိုင် ၂၈ ညပိုင်းတွင် အဆိုပါဖုန်းကောက်ရသည့် လူငယ်အား ယင်းရမည့်ခွဲတမ်းပေးမည်လာယူပါဟု ချိန်းဆိုကာ ထပ်မံဖမ်းဆီးခဲ့ကြောင်း ရဲတပ်ဖွဲ့ထံမှသိရသည်။

မောင်ကြီးငယ်ငယ်
Monywa Gazette
https://www.facebook.com/monywagazette/