စစ်ဖိနပ်အောက်မှ မလွတ်သေးပါ … ထူးခြားလာသည်က ဗြောင်လိမ်ခြင်း ဖြစ်သည် – ကျော်ကျော်မင်း

ကာကွယ်ရေး ဦးစီးချုပ်၏ ရွေးချယ်မှုဖြင့် ခန့်ထားသော လွှတ်တော်ကိုယ်စားလှယ် ၂၅ ရာခိုင်နှုန်းက ပြည်သူတို့ဖြစ်ချင်သော ဆန္ဒကို စွမ်းစွမ်းတမံ တားမြစ်နိုင်ဆဲဖြစ် … ပြည်သူ ၅ သန်းကျော် လက်မှတ် ရေးထိုးထားသည့် ဖွဲ့စည်းပုံအခြေခံ ဥပဒေပုဒ်မ ၄၃၆ ပြင်ဆင်ရေး အလုပ်မဖြစ်သေးသည်ကို ကြည့်လျှင် သိနိုင် …

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

၂၀၁၁ ခုနှစ် မတ်လတွင် အစိုးရသစ် တက်လာပြီးနောက် လအနည်းငယ်အတွင်း အင်မတန် ကောင်းမွန် ပြည့်စုံ လှသော ရွှေအိပ်မက်များ ဖြည့်သွင်းထားသည့် ရွှေရည်စိမ် မိန့်ခွန်းနှင့် မြစ်ဆုံကို ယာယီရပ်ပြခဲ့သည့် အတွက်ကြောင့် သမ္မတဦးသိန်းစိန်သည် ဒီမိုကရေစီ အပြောင်းအလဲအတွက် ရင်ခုန်မျှော်လင့်ချင်စရာ ကောင်းသည့် သမ္မတတစ်ဦးလားဟု မျှော်လင့်ချက် ကြီးကြီးမားမား ထားခဲ့သူများ ရှိခဲ့သည်။

သို့နှင့်တိုင် ၂၀၁၅ ခုနှစ်ရွေးကောက်ပွဲ နီးလာသည့်အခါ မင်းသားခေါင်းတို့ ကျွတ်ကျပြီး ဘီလူး ခေါင်းဆောင်း ပေါ်ထွက် လာသည့် အခါ မေးခွန်းဟောင်းများ ပြန်လည် ထွက်ပေါ် လာခဲ့ရတော့သည်။

၁။ ။ မြန်မာနိုင်ငံကို အရပ်သားအစိုးရက အမှန်တကယ် အုပ်ချုပ်နေပြီလား။

မြန်မာနိုင်ငံကို အရပ်ဝတ် အစိုးရက အုပ်ချုပ်နေပါသည်။ သို့ သော် အရပ်သား အစိုးရမဟုတ်ပါ။ နိုင်ငံတော်သမ္မတ ဦးသိန်းစိန်သည် ယခင်စစ်အစိုးရ၏ ၀န်ကြီးချုပ်ဟောင်းတစ်ဦး၊ ဗိုလ်ချုပ်ကြီးဟောင်း တစ်ဦးဖြစ်သကဲ့သို့ ဒုတိယသမ္မတ ဦးဉာဏ်ထွန်းသည် စစ်အစိုးရလက်ထက်က ဗိုလ်ချုပ်ကြီးဟောင်း တစ်ဦးဖြစ်သည့်အပြင် ကာကွယ်ရေးဦးစီးချုပ်ဟောင်း(ရေ) တစ်ဦးလည်း ဖြစ်သည်။

အဆင့်ဆင့် ၀န်ကြီးများသာမက ပြည်ထောင်စုရွေးကောက်ပွဲ ကော်မရှင် ဥက္ကဋ္ဌ၊ ပြည်သူ့လွှတ်တော်ဥက္ကဋ္ဌ များသည်လည်း ဗိုလ်ချုပ်ကြီးဟောင်းများ အသီးသီး ဖြစ်ကြလေသည်။

ဤကား အုပ်ချုပ်နေသူများကို ဝေဖန်ခြင်းဖြစ်သည်။ စနစ်ကို ကြည့်လျှင် ရပ်ကွက်၊ မြို့နယ်၊ ခရိုင်၊ တိုင်းဒေသကြီး/ပြည်နယ် အုပ်ချုပ်ရေးဌာနများကို ပြည်ထဲရေးဝန်ကြီးဌာနက ကိုင်တွယ်စီမံသည်။ ပြည်ထဲရေး ၀န်ကြီးဌာနနှင့် တိုင်းနှင့် ပြည်နယ်အလိုက် နပ်စပ်ရေးရာနှင့် လုံခြုံရေးဝန်ကြီးများ အားလုံးသည် တပ်မတော် ကာကွယ်ရေး ဦးစီးချုပ်၏ စီမံခန့်ခွဲမှု အောက်တွင် ရှိနေသည်။

ဤသို့ဆိုလျှင် မြန်မာနိုင်ငံကို အရပ်သား အုပ်ချုပ်နေသည့် ဒီမိုကရေစီနိုင်ငံဟု မည်သို့မျှပြော၍ မရနိုင်တော့ဘဲ ဒုံရင်းအတိုင်း စစ်တပ် အုပ်ချုပ်နေသည်ဟုသာ ဆိုနိုင်ပေတော့မည်။

၂ ။ ။စစ်တပ်အုပ်ချုပ်နေဆဲဟုပင်ဆိုဆို၊ အရပ်သား အုပ်ချုပ်သည်ဟုပင်ဆိုဆို နိုင်ငံ၏အာဏာ ခွဲဝေမှုပုံစံအရ ယခင်က မရှိသည့် လွှတ်တော်ရှိလာခြင်းဖြင့် Check & Balance လုပ်နိုင်မလား။

မထူးပါဘူး။ အဘယ်ကြောင့် ဆိုသော် အခြေခံဥပဒေအရ ပြည်သူ လူထုက ရွေးချယ်ပိုင်ခွင့် မရှိသော ကာကွယ်ရေး ဦးစီးချုပ်၏ ရွေးချယ်မှုဖြင့် ခန့်ထားသော လွှတ်တော်ကိုယ်စားလှယ် ၂၅ ရာခိုင်နှုန်းက ပြည်သူ တို့ ဖြစ်ချင်သော ဆန္ဒကို စွမ်းစွမ်းတမံ တားမြစ်နိုင်ဆဲဖြစ်သည်။ ယင်းကို ပြည်သူ ၅ သန်းကျော် လက်မှတ်ရေးထိုး ထားသည့် ဖွဲ့စည်းပုံ အခြေခံဥပဒေပုဒ်မ ၄၃၆ ပြင်ဆင်ရေး အလုပ်မဖြစ်သေးသည်ကို ကြည့်လျှင်သိနိုင်သည်။

ထို့ပြင် လွှတ်တော်မှ ပြဋ္ဌာန်းလိုက်သည့် အဂတိလိုက်စားမှု ဥပဒေ အပါအ၀င်၊ အလုပ်သမား၊ လယ်သမား၊ မြေယာ၊ ပညာရေး ဥပဒေတိုင်းက ပြည်သူလူထု ဆန္ဒနှင့် ထပ်တူမကျသည်ကို အတိုင်းသား မြင်တွေ့နေရပေရာ စစ်အုပ်စု အလိုကျ ဥပဒေပြုရေးသည် မည်မျှထိ အပြောင်းအလဲ ဖြစ်ပေါ်စေရန် Check & Balance ပြုလုပ်နိုင်မည်နည်း။

ထိုမျှမကသေး ဦးသိန်းဇော် (ဗိုလ်မှူးချုပ်သိန်းဇော်)ကဲ့သို့ စစ်သားတစ်ဖြစ်လဲ လွှတ်တော် ကိုယ်စားလှယ် များစွာကလည်း အရပ်ဝတ်ဖြင့် လွှတ်တော်အတွင်း ထိုင်နေပါသေးသည်။

၃။ ။မဏ္ဍိုင်ကြီး သုံးရပ်အနက် တစ်ခုဖြစ်သည့် တရားစီရင်ရေး မဏ္ဍိုင်ဖြင့် အပြန်အလှန်ထိန်း ကျောင်းပြီး ဒီမိုကရေစီ အနှစ်သာရကို ပုံဖော်မည်ဆိုလျှင်ရော ဒီမိုကရေစီစနစ်ကို ကူးပြောင်းသည်ဟု မဆိုနိုင်ပါလော။

ဖွဲ့စည်းပုံဥပဒေအရ တပ်မတော်သားအားလုံး၏ ပြစ်မှု၊ ပြစ်ဒဏ်များကို စစ်ခုံရုံးကသာ လွပ်လပ်စွာ စီရင်ပိုင်ခွင့် ရှိသဖြင့် စစ်တပ်အပေါ် တရားရုံးများ၏ ထိန်းကျောင်းနိုင်စွမ်းမှာ လုံးဝဥဿုံကင်းမဲ့ နေပေသည်။

ထိုမျှမကသေး အစိုးရအဖွဲ့မှ အရပ်ဘက်တရားရုံးများသို့ တင်ပို့ပြီး လိုသလို တရားစွဲဆိုခံရသော အတိုက်အခံများ၊ ဆန္ဒပြသူများ အားလုံးလိုလို ပြစ်ဒဏ်မှ မလွတ်မြောက်ခဲ့ပေ။

လယ်သမား၊ ကျောင်းသား၊ အလုပ်သမား၊ နိုင်ငံရေးတက်ကြွ လှုပ်ရှားသူများအား အရပ်ဘက် တရားရုံး များသည် အစိုးရအလိုကျ ပုဒ်မအမျိုးမျိုးနှင့် တရားစွဲဆို ထောင်ချပေးနေရဆဲ ဖြစ်နေသည်ကို ဆက်တွေ့ မြင်တွေ့ နေရဆဲသည်။

ထို့ပြင် ဥပဒေနှင့် မညီသည့် အစိုးရလုပ်ဆောင်ချက်များနှင့် ပတ်သက်ပြီး ပြန်လှန်တရားစွဲဆို ခွင့်များလည်း လုံးဝမရရှိသေးပေ။

ဤသို့ဆိုလျှင် တရားစီရင်ရေးသည် အပြန်အလှန် ထိန်းကျောင်းနိုင်စွမ်း မရှိဘဲ အုပ်ချုပ်ရေးအလိုကျ ဆောင်ရွက်နေ ရသော စစ်အစိုးရခေတ် တရားစီရင်ရေးနှင့် ထူးမခြားနား ဖြစ်သည်ကို တွေ့မြင်နေရသည်။

၎။ ။ သို့ဆိုပါလျှင် တိုင်းပြည်၏ အာဏာက မည်သူ့လက်ထဲတွင် အမှန်တကယ် ရှိနေပါသနည်း။

ဖွဲ့စည်းပုံဥပဒေအရ လက်နက်ကိုင် တပ်ဖွဲ့အားလုံးသည် ကာကွယ်ရေးဦးစီးချုပ်၏ လက်အောက်တွင်သာ ရှိနေသည်။ ထို့ကြောင့် စစ်တပ်သာမက ရဲ၊ နယ်ခြားစောင့်တပ်စသည့် လက်နက်ကိုင်တပ်ဖွဲ့ အားလုံးကို တိုက်ရိုက် အမိန့်ပေးနိုင်သူမှာ ကာကွယ်ရေး ဦးစီးချုပ်သာ ဖြစ်သည်။

ထိုမျှမကသေး အဓိကကျသော ၀န်ကြီးဌာနများ ဖြစ်သည့် ကာကွယ်ရေးဝန်ကြီးဌာန၊ ပြည်ထဲရေးဝန်ကြီးဌာန၊ နယ်စပ်ရေးရာ ၀န်ကြီးဌာနတို့သည် ကာကွယ်ရေးဦးစီးချုပ်က အမည်စာရင်းတင်သွင်း သူများကို ခန့်အပ်ရမည် ဖြစ်ရာ ကာကွယ်ရေးဦးစီးချုပ်က တိုက်ရိုက် စီမံခန့်ခွဲနိုင်သည့် အခြေအနေဖြစ်သည်။

စစ်တပ်နှင့် ရဲဝန်ထမ်းများ အသုံးပြုမှုသည် ကာကွယ်ရေးဦးစီးချုပ် မသိဘဲ အသုံးပြုဖို့ရန် မဖြစ်နိုင်တော့ချေ။

ထို့ကြောင့် သမ္မတကြီးက ငြိမ်းချမ်းရေး လက်မှတ်ရေးထိုးရန် တစ်ဖက်တွင် ဆောင်ရွက်နေချိန်တွင် တစ်ဖက်တွင် တိုက်ပွဲများ ဆက်လက် ဖြစ်ပွားနေရခြင်းဖြစ်သည်။

ထို့ပြင် ဆိုခဲ့ပါအတိုင်း ရပ်ကွက်၊ မြို့နယ်၊ ခရိုင်၊ တိုင်း စသည့် အဆင့်ဆင့်ကို အုပ်ချုပ်သော အထွေထွေ အုပ်ချုပ်ရေး ဦးစီးဌာနများကို ကိုယ်တွယ်စီမံသော ပြည်ထဲရေးဝန်ကြီးဌာန၊ တိုင်းဒေသကြီးနှင့် ပြည်နယ်အလိုက် လုံခြုံရေးအတွက် စီမံဆုံးဖြတ်ပိုင်ခွင့်ရှိနေသော လုံခြုံရေးနှင့် နယ်စပ်ရေးရာ ၀န်ကြီးများသည်လည်း ကာကွယ် ရေးဦးစီးချုပ်က အဆိုပြုထားသည့် ၀န်ကြီးများဖြစ်ရာ ကာကွယ်ရေး ဦးစီးချုပ်၏ အာဏာမည်မျှ သက်ရောက် သည်ကို သိရှိနိုင်ပေသည်။

၎။ ။ သို့ဆိုလျှင် စစ်တပ်က အချိန်မရွေး အာဏာသိမ်းနိုင်သည့် အခြေအနေနှင့် ကြုံတွေ့နေပြီလား။

စစ်တပ်က အာဏာသိမ်းရန် မလိုပါ။ သမ္မတကြီးကသာ အရေးပေါ် အခြေအနေကြေညာပြီး စစ်တပ်ကို အာဏာလွှဲရန် လိုပါသည်။ အခြေခံဥပဒေတွင် စစ်တပ်ကသွေးမြေမကျ အာဏာရယူနိုင်သည့် နည်းလမ်းကို အတိအကျ ပြဋ္ဌာန်းထားပြီး ဖြစ်သည်။

လိုအပ်ပါက အရေးပေါ်အခြေအနေ ကြေညာပြီး စစ်တပ်လက်သို့ အာဏာအပြည့်အ၀ကို အလွယ်တကူ ပြန်ပေး လိုက်ရုံမျှသာ ဖြစ်သည်။

ထို့ကြောင့်စစ်တပ်သည် တရားမ၀င်ရော၊ တရားဝင်နည်းလမ်းနှင့်ပါ အာဏာရယူထားပြီး ဖြစ်သည်။

၅။ ။ စစ်တပ်သည် တိုင်းပြည် ကာကွယ်ရန်အတွက်သာ ဖြစ်ရမည့် အခြေအနေမှာ နိုင်ငံတော်အာဏာကို မည်သည့် အကြောင်းပြချက်နှင့် ရယူခွင့်ရှိနေပါသလဲ။

စစ်အစိုးရအဆက်ဆက် အစဉ်အလာအရ စစ်တပ်သည် တိုင်းပြည်ချောက်ထဲကျရန် လက်နှစ်လုံး အလိုတွင် ကယ်တင်ပိုင်ခွင့်ရှိသော ကယ်တင်ရှင်ရာထူးကို အလိုအလျောက် ပိုင်ဆိုင်ခွင့် ရှိခြင်းကြောင့် ဖြစ်သည်။

၆။ ။ သို့ဆိုလျှင် မြန်မာနိုင်ငံသည် အပြောင်းအလဲကာလသို့ မရောက်ဘဲ၊ လုံးဝမပြောင်းလဲဘဲ ရှိနေပါသလား။

မဟုတ်ပါ။ မြန်မာနိုင်ငံသည် အပြောင်းအလဲ လမ်းကြောင်းပေါ်တွင် ရှိနေသည်။ အလွန်ပြောင်းလဲ နေပါသည်။

အဓိကအကျဆုံး အပြောင်းအလဲတစ်ခုမှာ ယခင်စစ်အစိုးရသည် ပြည်သူကို လုံးဝဂရုမစိုက်ဘဲ လုပ်ချင်ရာကို ဗြောင်လုပ်ပြီး ဝေဖန်သမျှ သူကိုဖိနှိပ်သည့် ဗြောင်ကျကျအုပ်ချုပ်ရေးစနစ်ကို ကျင့်သုံးသည်။

ထို့ကြောင့် နိုင်ငံတကာက ၀ိုင်းကြဉ်ထားသည့် အခြေအနေကို ကြုံတွေ့ရသည်။

လက်ရှိအစိုးရသည်ကား ပြည်သူကို ဂရုတစိုက်ရှိလှသည် မဟုတ်သော်လည်း နိုင်ငံတကာဖိအားများ ပြန်လည် သက်ရောက်လာမည်ကို ကြောက်ပုံရသည်။

ထို့ကြောင့် ပြည်သူကို ယခင်အတိုင်း ခပ်ပြောင်ပြောင်ပင် ဖိနှိပ်အုပ်ချုပ်နေဆဲ ဖြစ်သော်လည်း နိုင်ငံတကာ အမြင်တွင် ဥပဒေနှင့်ညီသယောင် ပြုမူကြသည်။

ကိုပါကြီး၊ ဒေါ်ခင်ဝင်းစသည့် စစ်တပ်နှင့် ပြည်ထဲရေးဝန်ကြီးဌာန လက်အောက်ခံ ရဲတပ်ဖွဲ့တို့၏ ပယောဂ မကင်းသည့် သေဆုံးမှုများ၊ လက်ပံတန်း၊ ဆူးလေ၊ ရွှေပြည်သာတို့မှ အကြမ်းဖက် ဖြိုခွင်းမှုများကို ဗီဒီယို သက်သေ၊ လူသက်သေ၊ အသံသက်သေစသည့် သက်သေပေါင်းများစွာ ရှိနေသည့် တိုင်ပင် နိုင်ငံတကာ မီဒီယာ စာမျက်နှာတွင် ခပ်ပြောင်ပြောင်ပင် ဥပဒေနှင့်အညီဟု ဗြောင်လိမ် ဗြောင်စား ဆိုလာခြင်းက သက်သေပြနေသည်။

ထို့ကြောင့် စစ်ဖိနပ်အောက်မှ ဒီမိုကရေစီခေတ်သို့ မြန်မာနိုင်ငံ ပြောင်းလဲ လာခြင်းမဟုတ်ဘဲ စစ်ဖိနပ် အောက်တွင် ဗြောင်ကျကျ ဖိနှိပ်အုပ်ချုပ်မှုအား၊ စစ်ဖိနပ်မှန်း မသိအောင် အရောင်ပြောင်းပြီး ဗြောင်လိမ်သည့် အုပ်ချုပ်နည်းသို့ ပြောင်းလဲလာခြင်းဟု ဆိုရပေတော့မည်။

ကျော်ကျော်မင်း
မြန်မာသံတော်ဆင့်သတင်းဌာန – https://www.facebook.com/myanmarherald