တရုတ်အနေနဲ့ တပ်မတော်ကို တိုက်တွန်းပေးဖို့ TNLA တောင်းဆို


( တအာင်းလွတ်မြောက်ရေးတပ်မတော် TNLA ပြောရေးဆိုခွင့်ရှိသူ ဗိုလ်မှူးကြီး တာဖုန်းကျော် ကို တွေ့ရစဉ် ) Photo: Kan Thar/RFA
မြောက်ပိုင်းမဟာမိတ်တပ်ဖွဲ့ဝင်တွေအနေနဲ့ ငြိမ်းချမ်းရေးဖြစ်စဉ်မှာ ပါဝင်နိုင်ရေး တရုတ်အစိုးရအနေနဲ့ မြန်မာ့တပ်မတော်ကို တိုက်တွန်းပေးဖို့ တအာင်းလွတ်မြောက်ရေးတပ်မတော်က တရုတ်နိုင်ငံခြားရေးဝန်ကြီးဌာနက တာဝန်ရှိသူတွေနဲ့ တွေ့ဆုံရာမှာ တောင်းဆိုလိုက်တယ်လို့ ပြောပါတယ်။

မနေ့က တရုတ်နိုင်ငံခြားရေးဝန်ကြီးဌာနက တာဝန်ရှိသူတွေနဲ့ မြောက်ပိုင်းမဟာမိတ်တပ်ဖွဲ့ဝင်တွေ တဖွဲ့ချင်းစီ သီးခြားတွေ့ဆုံရာမှာ အခုလိုတောင်းဆိုခဲ့တာဖြစ်တယ်လို့ တအာင်းလွတ်မြောက်ရေးတပ်မတော်က ပြောရေးဆိုခွင့်ရှိသူ ဗိုလ်မှူးကြီး တာဖုန်းကျော် က ပြောပါတယ်။

ပြီးခဲ့တဲ့ နိုဝင်ဘာလ ၂၆ ရက်နေ့ စတင်ပြီး တရုတ်နိုင်ငံကို ရောက်ရှိနေတဲ့ ဒေါက်တာတင်မျိုးဝင်း ဦးဆောင်တဲ့ ပြည်ထောင်စု ငြိမ်းချမ်းကော်မရှင်အဖွဲ့တွေနဲ့ တွေ့ဆုံဖို့အတွက် မြောက်ပိုင်းမဟာမိတ်တပ်ဖွဲ့တွေဖြစ်တဲ့ KIA၊ MNDAA၊ TNLA၊ AA အဖွဲ့တွေကို တရုတ်နိုင်ငံခြားရေးဝန်ကြီးဌာနက ကူမင်းမြို့ကို ဖိတ်ခေါ်ခဲ့ပါတယ်။

မြောက်ပိုင်းမဟာမိတ်တပ်ဖွဲ့က ထိပ်ပိုင်းခေါင်းဆောင်တွေက ဒီဇင်ဘာလ ၁ ရက်နေ့ မနေ့က ကူမင်းမြို့ကို ရောက်ရှိခဲ့ပြီး ငြိမ်းချမ်းရေးကော်မရှင်နဲ့တွေ့ဆုံဖို့ စီစဉ်ခဲ့ပေမယ့် ကော်မရှင်ဘက်က တဖွဲ့ချင်းစီ သီးခြားတွေ့ဆုံလိုကြောင်းနဲ့ အစုအဖွဲ့လိုက် တွေ့ဆုံရမယ်ဆိုရင်လည်း MNDAA၊ AAနဲ့ TNLA တပ်ဖွဲ့ ၃ ဖွဲ့နဲ့သာ တွေ့ဆုံဖို့ရှိကြောင်း ပြောကြားတာကြောင့် နှစ်ဖက်ညှိနှိုင်းမှု အဆင်မပြေဘဲ တွေ့ဆုံပွဲ ပျက်သွားခဲ့ပါတယ်။

ပြည်ထောင်စု ငြိမ်းချမ်းရေးကော်မရှင်နဲ့ မြောက်ပိုင်းမဟာမိတ်အဖွဲ့ထဲ ကေအိုင်အို မပါဘဲ ကျန်တဲ့ ၃ ဖွဲ့အပြင် ဝ အဖွဲ့၊ မိုင်းလား အဖွဲ့တွေနဲ့လည်း တရုတ်နိုင်ငံဘက်မှာ တွေ့ဆုံဖို့ရှိတယ်လို့ နိုင်ငံတော်သမ္မတရုံး ပြောခွင့်ရသူ ဦးဇော်ဌေး က ပြောပါတယ်။

တရုတ်နိုင်ငံခြားရေးဝန်ကြီးဌာနက မြောက်ပိုင်းမဟာမိတ်တပ်ဖွဲ့ဝင်တွေကို တိုက်ပွဲတွေရပ်စဲဖို့နဲ့ ငြိမ်းချမ်းရေးဖြစ်စဉ်မှာ ပါဝင်ဖို့ တိုက်တွန်းခဲ့တယ်လို့ ဗိုလ်မှူးကြီး တာဖုန်းကျော် က ပြောပါတယ်။

RFA Burmese
https://www.facebook.com/rfaburmese/
Share on Google Plus

About MP4 YoU

ကမ္ဘာသတင်း၊မြန်မာ့သတင်း ပေါင်းစုံကိုရောသမမွှေဖော်ပြသွားမည့်
MP4 YoU (The Melting Pot For You)