ကခ်င္ မွာ တုိက္ပြဲေတြ ႏွစ္သစ္ကူး အထိ ျပန္ျဖစ္

ကခ်င္တပ္ေရွ႕တန္းစစ္စခန္းတေနရာျမင္ကြင္း။
ျပည္တြင္းၿငိမ္းခ်မ္းေရးနဲ႔ စစ္မွန္တဲ့ ဖယ္ဒရယ္ျပည္ေထာင္စု ေပၚထြန္းေရး ဦးစားေပး ေဆာင္ရြက္ဖုိ႔ NLD အစုိးရက ထပ္မံကတိျပဳ ေျပာၾကားေနခ်ိန္မွာပဲ ကခ်င္ျပည္နယ္မွာေတာ့ တုိက္ပဲြေတြ တေက်ာ့ျပန္ ျဖစ္ပြားေနပါတယ္။ ဒီကေန႔အထိ ျပန္လည္ျဖစ္ပြားေနတဲ့ တုိက္ပဲြေတြေၾကာင့္ ေဒသခံေတြ ထြက္ေျပးတိမ္းေရွာင္ေနၾကရတဲ့ အတြက္လည္း လက္နက္ကုိင္ ပဋိပကၡေတြ အဆုံးသတ္ႏုိင္ေရး အစုိးရသစ္ အေနနဲ႔ အျမန္ဆုံး ေဆာင္ရြက္ဖုိ႔ တုိက္တြန္းေနၾကတာပါ။ အျပည့္အစုံကုိေတာ့ ဆက္သြယ္စုံစမ္းထားတဲ့ မဆုမြန္က တင္ျပထားပါတယ္။

ျမန္မာႏုိင္ငံေျမာက္ပုိင္း ကခ်င္ျပည္နယ္မွာ ျမန္မာ့႐ုိးရာ သၾကၤန္မတိုင္ခင္ကတည္းက စခဲ့တဲ့ တုိက္ပဲြေတြဟာ သၾကၤန္အၿပီး ႏွစ္သစ္ကူးတဲ့အထိ ဆက္လက္ ျဖစ္ပြားေနရာမွာ ကခ်င္လြတ္ေျမာက္ေရးတပ္ KIA ဗဟိုဌာနခ်ဳပ္ လိုင္ဇာအနီးက အခုေနာက္ဆုံးတုိက္ပဲြေတြမွာေတာ့ ကခ်င္လက္နက္ကုိင္ေတြရဲ႕ တပ္စခန္းတခ်ဳိ႕ကုိ ျမန္မာစစ္တပ္က သိမ္းယူႏုိင္ခဲ့တယ္လုိ႔လည္း ေဒသခံ ကခ်င္သတင္းေတြက ေဖာ္ျပပါတယ္။ ဒီရက္ပုိင္းေတြမွာ ဆက္တုိက္ဆုိသလုိ ျဖစ္ပြားေနတဲ့ တုိက္ပဲြေတြနဲ႔ စစ္ေရး တင္းမာမႈ အေျခအေနကိုေတာ့ ကခ်င္စစ္ေရး ေစာင့္ၾကည့္ေနတဲ့ ကခ်င္သတင္းစဥ္ အယ္ဒီတာ ကိုေနာ္ဒင္းက အခုလိုရွင္းျပပါတယ္။

"သၾကၤန္မတိုင္မီွမွာလည္းပဲ အစိုးရဘက္က လာၿပီးမွ သူတို႔တုိက္ေတာ့ အခုအခ်ိန္ အထိ KIA စခန္းႏွစ္ခုကို သၾကၤန္မေရာက္ခင္ေလးမွာပဲ KIA စခန္း ၂ခုကို KIA က ေနာက္ဆုတ္ေပးခဲ့တယ္ေလ။ အခုသၾကၤန္ၿပီးၿပီးခ်င္းပဲ ထပ္ၿပီးမွ အစိုးရဘက္က တုိက္လာေတာ့ မေန႔ကဆိုလည္း တနဂၤေႏြေန႔ေပါ့။ စခန္းေနာက္တခုကို သူတို႔ KIA ဘက္က ဆုတ္ခြာေပးတယ္လို႔ေျပာတယ္။ KIA ဘက္ကလည္း ေသဆံုးမႈေတြ ရွိေနတယ္။ ထိခုိက္မႈေတြ ရွိေနတယ္လို႔ေျပာတယ္။"

အခုေနာက္ဆုံး ျဖစ္ပြားေနတဲ့ တုိက္ပဲြေတြနဲ႔ ပတ္သက္လုိ႔ KIA တာ၀န္ရွိသူေတြ ကုိ ေမးျမန္းဖုိ႔ ႀကိဳးစားေပမဲ့ ဆက္သြယ္လုိ႔ မရခဲ့သလုိ၊ ျမန္မာစစ္တပ္ဘက္ကလည္း သတင္းထုတ္ျပန္တာမ်ဳိးေတာ့ မေတြ႔ရေသးပါဘူး။ ကခ်င္သတင္းစဥ္က ကိုေနာ္ဒင္း ကေတာ့ ျမန္မာစစ္တပ္ဘ က္က ေနာက္ထပ္ ထုိးစစ္ဆင္ တုိက္ခုိက္မယ့္ လကၡဏာေတြကုိ ပါ ေတြ႔ေနရတယ္လုိ႔ ေျပာပါတယ္။

"ဟုတ္ကဲ့၊ အဓိက ကေတာ့ KIO ဗဟိုဌာနခ်ဳပ္ တည္ရွိတဲ့ေနရာ လုိင္ဇာ၊ ကို အဓိက ဦးတည္ၿပီးမွ အစိုးရဘက္က စစ္ဆင္ေနတဲ့သေဘာကို ေတြ႔ရတာေပါ့။ အဲ့တာေၾကာင့္ သူ႔ရဲ႕ လမ္းေၾကာင္းေပါ့။ သူ႔ရဲ႕လမ္းေၾကာင္းေပၚမွာ ရွိတဲ့ ရြာေတြကို အားလံုးကို ေရႊ႕ခုိင္းတာေတာ့ အခုေနာက္ဆံုး ရက္ကို ထပ္ၿပီးမွ သတ္မွတ္တယ္။ စစ္တပ္က ေပါ့ေနာ္။ ေရႊ႕ေျပာင္းခုိင္းတာေပါ့။ KIO ဗဟိုဌာနခ်ဳပ္ တည္ရွိတဲ့ေနရာ အဓိက လုိင္ဇာ နဲ႔ အဓိက အမာစခန္းေတြျဖစ္တယ္ေလ။ အဲ့ဒီ့ဘက္ကုိ သူတို႔က လက္နက္ႀကီးေတြ မ်ားမ်ား သူတို႔သယ္သြားဖို႔အတြက္ အခုစၿပီးမွ သူတို႔ သၾကၤန္ၿပီးတာနဲ႔ သူတို႔ျပန္ၿပီးမွ စစ္ဆင္ေနတာျဖစ္တယ္ဆိုၿပီးေတာ့မွ ေျပာပါတယ္။"

အမ်ဳိးသားဒီမုိကေရစီအဖဲြ႔ခ်ဳပ္ (NLD) ပါတီက ဦးေဆာင္တဲ့ အစုိးရသစ္ ကေတာ့ ျပည္တြင္း ၿငိမ္းခ်မ္းေရး ဦးစားေပး ေဆာင္ရြက္ဖုိ႔ ကတိျပဳထား သလုိ၊ ႏုိင္ငံေတာ္ အတုိင္ပင္ခံပုဂၢိဳလ္ ေဒၚေအာင္ဆန္းစုၾကည္ ကလည္း စစ္မွန္တဲ့ ဖယ္ဒရယ္ျပည္ေထာင္စု တည္ေဆာက္ေရး ႏွစ္သစ္ကူး မိန္႔ခြန္းမွာ ထည့္သြင္းေျပာဆုိခဲ့တာပါ။

ညီညြတ္ေသာ တုိင္းရင္းသားလူမ်ိဳးမ်ား ဖက္ဒရယ္ေကာင္စီရဲ႕ ဗဟိုေကာ္မတီဝင္ လည္းျဖစ္ ကခ်င္အမ်ိဳးသားအစည္းအ႐ံုး ရဲ႕ ဥကၠ႒ ဒူဝါေဘာမ္ဝမ္လေရာ္ ကေတာ့ စစ္ေရးတင္းမာမႈ အေျခအေနေတြကုိ NLD အစုိးရက အျမန္ဆုံးၾကား၀င္ေျဖရွင္းဖုိ႔ လုိတယ္လုိ႔ တုိက္တြန္းပါတယ္။

" က်ေနာ္တို႔ ျဖစ္ေစခ်င္တာက အခု NLD အစိုးရ တက္လာၿပီးေတာ့ ေဒၚေအာင္ဆန္းစုၾကည္ လည္း ေခါင္းေဆာင္ျဖစ္လာၿပီး တက္လာၿပီဆိုရင္ တပ္ကိုေတာ့ မိမိရရ ထိန္းသင့္တယ္။ အဲ့လို တပ္ကို ထိန္းလို႔မရဘူးဆိုတဲ့ ပံုစံေတာ့ မျဖစ္သင့္ဘူး။ ဒါေပမဲ့ တခုရွိတာက အစိုးရက အသစ္ျဖစ္ေနတဲ့အခါက်ေတာ့ အခုေလာေလာဆယ္ဆယ္ တပ္ကိုလည္း သူတို႔ ထိန္းထိန္းသိမ္းသိမ္းနဲ႔ ဆက္ဆံေနရတဲ့အပိုင္းရွိလို႔လား ေပါ့ေလ အဲ့လိုေတာ့ ျမင္တယ္ေပါ့။ ဒါေပမဲ့ ဘာပဲျဖစ္ျဖစ္ အစိုးရျဖစ္လာၿပီဆိုရင္ တပ္ကိုေတာ့ အစိုးရရဲ႕ အထဲမွာျဖစ္တဲ့အခါက်ေတာ့ သူတို႔အေနနဲ႔ ထိန္းရမယ္။ "

ကခ်င္ျပည္နယ္တြင္း တုိက္ပြဲေတြေၾကာင့္ ႏွစ္နဲ႔ခ်ီၿပီး ဒုကၡသည္စခန္းေတြမွာေနရတဲ့ သိန္းခ်ီတဲ့ စစ္ေျပးဒုကၡသည္ေတြ ေနရပ္ရင္းျပန္ႏုိင္ေရး၊ ကေလးငယ္ေတြ ပညာသင္ယူႏုိင္ေရး ေဒသခံေတြ အလုပ္အကိုင္ရရွိၿပီး ပံုမွန္လူေနမႈဘဝျပန္လည္ တည္ေဆာက္ေရးေတြအတြက္ကိုလည္း ကခ်င္ျပည္နယ္ အစိုးရသစ္ဘက္ကေရာ ျပည္ေထာင္စုအစိုးရဘက္ကပါ အေလးအနက္ထား ေဆာင္ရြက္ေပးသင့္ေနပါၿပီလို႔လည္း ကခ်င္အမ်ိဳးသားအစည္းအ႐ံုး ရဲ႕ ဥကၠ႒ ဒူဝါေဘာမ္ဝမ္လေရာ္ ဒူဝါေဘာမ္ဝမ္လေရာ္က ေျပာပါတယ္။

မဆုမြန္ / ဗြီအုိေအ (ျမန္မာပုိင္း)
http://burmese.voanews.com

....................................


ကချင်တပ်ရှေ့တန်းစစ်စခန်းတနေရာမြင်ကွင်း။
ပြည်တွင်းငြိမ်းချမ်းရေးနဲ့ စစ်မှန်တဲ့ ဖယ်ဒရယ်ပြည်ထောင်စု ပေါ်ထွန်းရေး ဦးစားပေး ဆောင်ရွက်ဖို့ NLD အစိုးရက ထပ်မံကတိပြု ပြောကြားနေချိန်မှာပဲ ကချင်ပြည်နယ်မှာတော့ တိုက်ပွဲတွေ တကျော့ပြန် ဖြစ်ပွားနေပါတယ်။ ဒီကနေ့အထိ ပြန်လည်ဖြစ်ပွားနေတဲ့ တိုက်ပွဲတွေကြောင့် ဒေသခံတွေ ထွက်ပြေးတိမ်းရှောင်နေကြရတဲ့ အတွက်လည်း လက်နက်ကိုင် ပဋိပက္ခတွေ အဆုံးသတ်နိုင်ရေး အစိုးရသစ် အနေနဲ့ အမြန်ဆုံး ဆောင်ရွက်ဖို့ တိုက်တွန်းနေကြတာပါ။ အပြည့်အစုံကိုတော့ ဆက်သွယ်စုံစမ်းထားတဲ့ မဆုမွန်က တင်ပြထားပါတယ်။

မြန်မာနိုင်ငံမြောက်ပိုင်း ကချင်ပြည်နယ်မှာ မြန်မာ့ရိုးရာ သင်္ကြန်မတိုင်ခင်ကတည်းက စခဲ့တဲ့ တိုက်ပွဲတွေဟာ သင်္ကြန်အပြီး နှစ်သစ်ကူးတဲ့အထိ ဆက်လက် ဖြစ်ပွားနေရာမှာ ကချင်လွတ်မြောက်ရေးတပ် KIA ဗဟိုဌာနချုပ် လိုင်ဇာအနီးက အခုနောက်ဆုံးတိုက်ပွဲတွေမှာတော့ ကချင်လက်နက်ကိုင်တွေရဲ့ တပ်စခန်းတချို့ကို မြန်မာစစ်တပ်က သိမ်းယူနိုင်ခဲ့တယ်လို့လည်း ဒေသခံ ကချင်သတင်းတွေက ဖော်ပြပါတယ်။ ဒီရက်ပိုင်းတွေမှာ ဆက်တိုက်ဆိုသလို ဖြစ်ပွားနေတဲ့ တိုက်ပွဲတွေနဲ့ စစ်ရေး တင်းမာမှု အခြေအနေကိုတော့ ကချင်စစ်ရေး စောင့်ကြည့်နေတဲ့ ကချင်သတင်းစဉ် အယ်ဒီတာ ကိုနော်ဒင်းက အခုလိုရှင်းပြပါတယ်။

"သင်္ကြန်မတိုင်မှီမှာလည်းပဲ အစိုးရဘက်က လာပြီးမှ သူတို့တိုက်တော့ အခုအချိန် အထိ KIA စခန်းနှစ်ခုကို သင်္ကြန်မရောက်ခင်လေးမှာပဲ KIA စခန်း ၂ခုကို KIA က နောက်ဆုတ်ပေးခဲ့တယ်လေ။ အခုသင်္ကြန်ပြီးပြီးချင်းပဲ ထပ်ပြီးမှ အစိုးရဘက်က တိုက်လာတော့ မနေ့ကဆိုလည်း တနင်္ဂနွေနေ့ပေါ့။ စခန်းနောက်တခုကို သူတို့ KIA ဘက်က ဆုတ်ခွာပေးတယ်လို့ပြောတယ်။ KIA ဘက်ကလည်း သေဆုံးမှုတွေ ရှိနေတယ်။ ထိခိုက်မှုတွေ ရှိနေတယ်လို့ပြောတယ်။"

အခုနောက်ဆုံး ဖြစ်ပွားနေတဲ့ တိုက်ပွဲတွေနဲ့ ပတ်သက်လို့ KIA တာဝန်ရှိသူတွေ ကို မေးမြန်းဖို့ ကြိုးစားပေမဲ့ ဆက်သွယ်လို့ မရခဲ့သလို၊ မြန်မာစစ်တပ်ဘက်ကလည်း သတင်းထုတ်ပြန်တာမျိုးတော့ မတွေ့ရသေးပါဘူး။ ကချင်သတင်းစဉ်က ကိုနော်ဒင်း ကတော့ မြန်မာစစ်တပ်ဘ က်က နောက်ထပ် ထိုးစစ်ဆင် တိုက်ခိုက်မယ့် လက္ခဏာတွေကို ပါ တွေ့နေရတယ်လို့ ပြောပါတယ်။

"ဟုတ်ကဲ့၊ အဓိက ကတော့ KIO ဗဟိုဌာနချုပ် တည်ရှိတဲ့နေရာ လိုင်ဇာ၊ ကို အဓိက ဦးတည်ပြီးမှ အစိုးရဘက်က စစ်ဆင်နေတဲ့သဘောကို တွေ့ရတာပေါ့။ အဲ့တာကြောင့် သူ့ရဲ့ လမ်းကြောင်းပေါ့။ သူ့ရဲ့လမ်းကြောင်းပေါ်မှာ ရှိတဲ့ ရွာတွေကို အားလုံးကို ရွှေ့ခိုင်းတာတော့ အခုနောက်ဆုံး ရက်ကို ထပ်ပြီးမှ သတ်မှတ်တယ်။ စစ်တပ်က ပေါ့နော်။ ရွှေ့ပြောင်းခိုင်းတာပေါ့။ KIO ဗဟိုဌာနချုပ် တည်ရှိတဲ့နေရာ အဓိက လိုင်ဇာ နဲ့ အဓိက အမာစခန်းတွေဖြစ်တယ်လေ။ အဲ့ဒီ့ဘက်ကို သူတို့က လက်နက်ကြီးတွေ များများ သူတို့သယ်သွားဖို့အတွက် အခုစပြီးမှ သူတို့ သင်္ကြန်ပြီးတာနဲ့ သူတို့ပြန်ပြီးမှ စစ်ဆင်နေတာဖြစ်တယ်ဆိုပြီးတော့မှ ပြောပါတယ်။"

အမျိုးသားဒီမိုကရေစီအဖွဲ့ချုပ် (NLD) ပါတီက ဦးဆောင်တဲ့ အစိုးရသစ် ကတော့ ပြည်တွင်း ငြိမ်းချမ်းရေး ဦးစားပေး ဆောင်ရွက်ဖို့ ကတိပြုထား သလို၊ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကလည်း စစ်မှန်တဲ့ ဖယ်ဒရယ်ပြည်ထောင်စု တည်ဆောက်ရေး နှစ်သစ်ကူး မိန့်ခွန်းမှာ ထည့်သွင်းပြောဆိုခဲ့တာပါ။

ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီရဲ့ ဗဟိုကော်မတီဝင် လည်းဖြစ် ကချင်အမျိုးသားအစည်းအရုံး ရဲ့ ဥက္ကဋ္ဌ ဒူဝါဘောမ်ဝမ်လရော် ကတော့ စစ်ရေးတင်းမာမှု အခြေအနေတွေကို NLD အစိုးရက အမြန်ဆုံးကြားဝင်ဖြေရှင်းဖို့ လိုတယ်လို့ တိုက်တွန်းပါတယ်။

" ကျနော်တို့ ဖြစ်စေချင်တာက အခု NLD အစိုးရ တက်လာပြီးတော့ ဒေါ်အောင်ဆန်းစုကြည် လည်း ခေါင်းဆောင်ဖြစ်လာပြီး တက်လာပြီဆိုရင် တပ်ကိုတော့ မိမိရရ ထိန်းသင့်တယ်။ အဲ့လို တပ်ကို ထိန်းလို့မရဘူးဆိုတဲ့ ပုံစံတော့ မဖြစ်သင့်ဘူး။ ဒါပေမဲ့ တခုရှိတာက အစိုးရက အသစ်ဖြစ်နေတဲ့အခါကျတော့ အခုလောလောဆယ်ဆယ် တပ်ကိုလည်း သူတို့ ထိန်းထိန်းသိမ်းသိမ်းနဲ့ ဆက်ဆံနေရတဲ့အပိုင်းရှိလို့လား ပေါ့လေ အဲ့လိုတော့ မြင်တယ်ပေါ့။ ဒါပေမဲ့ ဘာပဲဖြစ်ဖြစ် အစိုးရဖြစ်လာပြီဆိုရင် တပ်ကိုတော့ အစိုးရရဲ့ အထဲမှာဖြစ်တဲ့အခါကျတော့ သူတို့အနေနဲ့ ထိန်းရမယ်။ "

ကချင်ပြည်နယ်တွင်း တိုက်ပွဲတွေကြောင့် နှစ်နဲ့ချီပြီး ဒုက္ခသည်စခန်းတွေမှာနေရတဲ့ သိန်းချီတဲ့ စစ်ပြေးဒုက္ခသည်တွေ နေရပ်ရင်းပြန်နိုင်ရေး၊ ကလေးငယ်တွေ ပညာသင်ယူနိုင်ရေး ဒေသခံတွေ အလုပ်အကိုင်ရရှိပြီး ပုံမှန်လူနေမှုဘဝပြန်လည် တည်ဆောက်ရေးတွေအတွက်ကိုလည်း ကချင်ပြည်နယ် အစိုးရသစ်ဘက်ကရော ပြည်ထောင်စုအစိုးရဘက်ကပါ အလေးအနက်ထား ဆောင်ရွက်ပေးသင့်နေပါပြီလို့လည်း ကချင်အမျိုးသားအစည်းအရုံး ရဲ့ ဥက္ကဋ္ဌ ဒူဝါဘောမ်ဝမ်လရော် ဒူဝါဘောမ်ဝမ်လရော်က ပြောပါတယ်။

မဆုမွန် / ဗွီအိုအေ (မြန်မာပိုင်း)
http://burmese.voanews.com
Share on Google Plus

About MP4 YoU

ကမၻာသတင္း၊ျမန္မာ့သတင္း ေပါင္းစံုကိုေရာသမေမႊေဖာ္ျပသြားမည့္
MP4 YoU (The Melting Pot For You)